৪. চতুত্থপাটিদেসনীযসিক্খাপদৱণ্ণনা

৫৭০. চতুত্থে – অৱৰুদ্ধা হোন্তীতি পটিৱিৰুদ্ধা হোন্তি.

৫৭৩. পঞ্চন্নং পটিসংৱিদিতন্তি পঞ্চসু সহধম্মিকেসু যংকিঞ্চি পেসেত্ৱা খাদনীযং ভোজনীযং আহৰিস্সামাতি পটিসংৱিদিতং কতম্পি অপ্পটিসংৱিদিতমেৱাতি অত্থো. আৰামং আৰামূপচাৰং ঠপেত্ৱাতি আৰঞ্ঞকসেনাসনাৰামঞ্চ তস্স উপচাৰঞ্চ ঠপেত্ৱা; উপচাৰতো নিক্খন্তং অন্তৰামগ্গে ভিক্খুং দিস্ৱা ৱা গামং আগতস্স ৱা পটিসংৱিদিতং কতম্পি অপ্পটিসংৱিদিতমেৱ হোতীতি ৱেদিতব্বং. সচে সাসঙ্কং হোতি সাসঙ্কন্তি আচিক্খিতব্বন্তি কস্মা আচিক্খিতব্বং? আৰামে চোৰে ৱসন্তে অম্হাকং নাৰোচেন্তীতি ৱচনপটিমোচনত্থং. চোৰা ৱত্তব্বা মনুস্সা ইধূপচৰন্তীতি কস্মা ৱত্তব্বং? অত্তনো উপট্ঠাকেহি অম্হে গণ্হাপেন্তীতি ৱচনপটিমোচনত্থং.

যাগুযা পটিসংৱিদিতে তস্সা পৰিৱাৰো আহৰিয্যতীতি যাগুযা পটিসংৱিদিতং কত্ৱা ‘‘কিং সুদ্ধযাগুযা দিন্নায পূৱভত্তাদীনিপি এতিস্সা যাগুযা পৰিৱাৰং কত্ৱা দস্সামা’’তি এৱং যং কিঞ্চি আহৰন্তি, সব্বং পটিসংৱিদিতমেৱ হোতি. ভত্তেন পটিসংৱিদিতেতিআদীসুপি এসেৱ নযো. অসুকং নাম কুলং পটিসংৱিদিতং কত্ৱা খাদনীযাদীনি গহেত্ৱা গচ্ছতীতি সুত্ৱা অঞ্ঞানিপি তেন সদ্ধিং অত্তনো দেয্যধম্মং আহৰন্তি, ৱট্টতি. যাগুযা পটিসংৱিদিতং কত্ৱা পূৱং ৱা ভত্তং ৱা আহৰন্তি, এতম্পি ৱট্টতীতি কুৰুন্দিযং ৱুত্তং.

৫৭৫. গিলানস্সাতি অপ্পটিসংৱিদিতেপি গিলানস্স অনাপত্তি. পটিসংৱিদিতে ৱা গিলানস্স ৱা সেসকন্তি একস্সত্থায পটিসংৱিদিতং কত্ৱা আহটং, তস্স সেসকং অঞ্ঞস্সাপি ভুঞ্জিতুং ৱট্টতি. চতুন্নং পঞ্চন্নং ৱা পটিসংৱিদিতং কত্ৱা বহুং আহটং হোতি, অঞ্ঞেসম্পি দাতুং ইচ্ছন্তি, এতম্পি পটিসংৱিদিতসেসকমেৱ, সব্বেসম্পি ৱট্টতি. অথ অধিকমেৱ হোতি, সন্নিধিং মোচেত্ৱা ঠপিতং দুতিযদিৱসেপি ৱট্টতি. গিলানস্স আহটাৱসেসেপি এসেৱ নযো. যং পন অপ্পটিসংৱিদিতমেৱ কত্ৱা আভতং, তং বহিআৰামং পেসেত্ৱা পটিসংৱিদিতং কাৰেত্ৱা আহৰাপেতব্বং, ভিক্খূহি ৱা গন্ত্ৱা অন্তৰামগ্গে গহেতব্বং. যম্পি ৱিহাৰমজ্ঝেন গচ্ছন্তা ৱা ৱনচৰকাদযো ৱা ৱনতো আহৰিত্ৱা দেন্তি, পুৰিমনযেনেৱ পটিসংৱিদিতং কাৰেতব্বং. তত্থজাতকন্তি আৰামে জাতকমেৱ; মূলখাদনীযাদিং অঞ্ঞেন কপ্পিযং কত্ৱা দিন্নং পৰিভুঞ্জতো অনাপত্তি. সচে পন তং গামং হৰিত্ৱা পচিত্ৱা আহৰন্তি, ন ৱট্টতি. পটিসংৱিদিতং কাৰেতব্বং. সেসমেত্থ উত্তানমেৱ.

কথিনসমুট্ঠানং – কিৰিযাকিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

চতুত্থপাটিদেসনীযং.

সমন্তপাসাদিকায ৱিনযসংৱণ্ণনায

পাটিদেসনীযৱণ্ণনা নিট্ঠিতা.

পাটিদেসনীযকণ্ডং নিট্ঠিতং.