৩. ততিযপাটিদেসনীযসিক্খাপদৱণ্ণনা

৫৬২. ততিযে – উভতোপসন্নন্তি দ্ৱীহি পসন্নং উপাসকেনপি উপাসিকাযপি. তস্মিং কিৰ কুলে উভোপি তে সোতাপন্নাযেৱ. ভোগেন হাযতীতি এদিসঞ্হি কুলং সচেপি অসীতিকোটিধনং হোতি, ভোগেহি হাযতিযেৱ. কস্মা? যস্মা তত্থ নেৱ উপাসিকা ন উপাসকো ভোগে ৰক্খতি.

৫৬৯. ঘৰতো নীহৰিত্ৱা দেন্তীতি আসনসালং ৱা ৱিহাৰং ৱা আনেত্ৱা দেন্তি. সচেপি অনাগতে ভিক্খুম্হি পঠমংযেৱ নীহৰিত্ৱা দ্ৱাৰে ঠপেত্ৱা পচ্ছা সম্পত্তস্স দেন্তি, ৱট্টতি. ভিক্খুং পন দিস্ৱা অন্তোগেহতো নীহৰিত্ৱা দিয্যমানং ন ৱট্টতীতি মহাপচ্চৰিযং ৱুত্তং. সেসমেত্থ উত্তানমেৱ. এড়কলোমসমুট্ঠানং – কিৰিযং, নোসঞ্ঞাৱিমোক্খং, অচিত্তকং, পণ্ণত্তিৱজ্জং, কাযকম্মং, ৱচীকম্মং তিচিত্তং, তিৱেদনন্তি.

ততিযপাটিদেসনীযং.