৭. সপ্পাণকৱগ্গো

১. সঞ্চিচ্চপাণসিক্খাপদৱণ্ণনা

৩৮২. সপ্পাণকৱগ্গস্স পঠমসিক্খাপদে – ইস্সাসো হোতীতি গিহিকালে ধনুগ্গহাচৰিযো হোতি. জীৱিতা ৱোৰোপিতাতি জীৱিতা ৱিযোজিতা.

সিক্খাপদেপি ৱোৰোপেয্যাতি ৱিযোজেয্য. যস্মা পন ৱোহাৰমত্তমেৱেতং; ন হেত্থ কিঞ্চি ৱিযোজিতে সীসালঙ্কাৰে সীসং ৱিয জীৱিতা ৱোৰোপিতে পাণেপি জীৱিতং নাম ৱিসুং তিট্ঠতি, অঞ্ঞদত্থু অন্তৰধানমেৱ গচ্ছতি, তস্মা তমত্থং দস্সেতুং পদভাজনে ‘‘জীৱিতিন্দ্ৰিযং উপচ্ছিন্দতী’’তিআদি ৱুত্তং. ইমস্মিঞ্চ সিক্খাপদে তিৰচ্ছানগতোযেৱ ‘‘পাণো’’তি ৱেদিতব্বো. তং খুদ্দকম্পি মহন্তম্পি মাৰেন্তস্স আপত্তিনানাকৰণং নত্থি. মহন্তে পন উপক্কমমহন্তত্তা অকুসলমহত্তং হোতি. পাণে পাণসঞ্ঞীতি অন্তমসো মঞ্চপীঠং সোধেন্তো মঙ্গুলবীজকেপি পাণসঞ্ঞী নিক্কাৰুণিকতায তং ভিন্দন্তো অপনেতি, পাচিত্তিযং. তস্মা এৱৰূপেসু ঠানেসু কাৰুঞ্ঞং উপট্ঠপেত্ৱা অপ্পমত্তেন ৱত্তং কাতব্বং. সেসং মনুস্সৱিগ্গহে ৱুত্তনযেনেৱ ৱেদিতব্বং সদ্ধিং সমুট্ঠানাদীহীতি.

সঞ্চিচ্চপাণসিক্খাপদং পঠমং.

২. সপ্পাণকসিক্খাপদৱণ্ণনা

৩৮৭. দুতিযে – সপ্পাণকন্তি যে পাণকা পৰিভোগেন মৰন্তি, তেহি পাণকেহি সপ্পাণকং, তাদিসঞ্হি জানং পৰিভুঞ্জতো পযোগে পযোগে পাচিত্তিযং. পত্তপূৰম্পি অৱিচ্ছিন্দিত্ৱা একপযোগেন পিৱতো একা আপত্তি. তাদিসেন উদকেন সামিসং পত্তং আৱিঞ্ছিত্ৱা ধোৱতোপি তাদিসে উদকে উণ্হযাগুপত্তং নিব্বাপযতোপি তং উদকং হত্থেন ৱা উড়ুঙ্কেন ৱা গহেত্ৱা ন্হাযতোপি পযোগে পযোগে পাচিত্তিযং. উদকসোণ্ডিং ৱা পোক্খৰণিং ৱা পৱিসিত্ৱা বহিনিক্খমনত্থায ৱীচিং উট্ঠাপযতোপি. সোণ্ডিং ৱা পোক্খৰণিং ৱা সোধেন্তেহি ততো গহিতউদকং উদকেযেৱ আসিঞ্চিতব্বং. সমীপম্হি উদকে অসতি কপ্পিযউদকস্স অট্ঠ ৱা দস ৱা ঘটে উদকসণ্ঠানকপ্পদেসে আসিঞ্চিত্ৱা তত্থ আসিঞ্চিতব্বং. ‘‘পৱট্টিত্ৱা উদকে পতিস্সতী’’তি উণ্হপাসাণে উদকং নাসিঞ্চিতব্বং. কপ্পিযউদকেন পন পাসাণং নিব্বাপেত্ৱা আসিঞ্চিতুং ৱট্টতি. সেসমেত্থ উত্তানমেৱ.

তিসমুট্ঠানং – কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং,

ৱচীকম্মং, তিচিত্তং, তিৱেদনন্তি. এত্থ চ পটঙ্গপাণকানং পতনং ঞত্ৱাপি সুদ্ধচিত্ততায দীপজালনে ৱিয সপ্পাণকভাৱং ঞত্ৱাপি উদকসঞ্ঞায পৰিভুঞ্জিতব্বতো পণ্ণত্তিৱজ্জতা ৱেদিতব্বাতি.

সপ্পাণকসিক্খাপদং দুতিযং.

৩. উক্কোটনসিক্খাপদৱণ্ণনা

৩৯২. ততিযসিক্খাপদে – উক্কোটেন্তীতি তস্স তস্স ভিক্খুনো সন্তিকং গন্ত্ৱা ‘‘অকতং কম্ম’’ন্তিআদীনি ৱদন্তা উচ্চালেন্তি; যথাপতিট্ঠিতভাৱেন পতিট্ঠাতুং ন দেন্তি.

৩৯৩. যথাধম্মন্তি যো যস্স অধিকৰণস্স ৱূপসমনায ধম্মো ৱুত্তো, তেনেৱ ধম্মেনাতি অত্থো. নিহতাধিকৰণন্তি নিহতং অধিকৰণং; সত্থাৰা ৱুত্তধম্মেনেৱ ৱূপসমিতং অধিকৰণন্তি অত্থো.

৩৯৫. ধম্মকম্মে ধম্মকম্মসঞ্ঞীতি যেন কম্মেন তং অধিকৰণং ৱূপসমিতং, তঞ্চে ধম্মকম্মং হোতি, তস্মিং ধম্মকম্মে অযম্পি ধম্মকম্মসঞ্ঞী হুত্ৱা যদি উক্কোটেতি, পাচিত্তিযং আপজ্জতীতি অত্থো. এতেন নযেন সেসপদানিপি ৱেদিতব্বানি. অযমেত্থ সঙ্খেপো, ৱিত্থাৰো পন ‘‘ইমেসং চতুন্নং অধিকৰণানং কতি উক্কোটনা’’তিআদিনা নযেন পৰিৱাৰে ৱুত্তো. অট্ঠকথাসু তং সব্বং আহৰিত্ৱা তস্সেৱত্থো ৱণ্ণিতো. মযং পন তং তত্থেৱ ৱণ্ণযিস্সাম. ইধ আহৰিত্ৱা ৱণ্ণিযমানে হি সুট্ঠুতৰং সম্মোহো ভৱেয্যাতি ন ৱণ্ণযিম্হ. সেসমেত্থ উত্তানমেৱ. তিসমুট্ঠানং – কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

উক্কোটনসিক্খাপদং ততিযং.

৪. দুট্ঠুল্লসিক্খাপদৱণ্ণনা

৩৯৯. চতুত্থে – দুট্ঠুল্লা নাম আপত্তীতি এত্থ চত্তাৰি পাৰাজিকানি অত্থুদ্ধাৰৱসেন দস্সিতানি, সঙ্ঘাদিসেসাপত্তি পন অধিপ্পেতা, তং ছাদেন্তস্স পাচিত্তিযং. ধুৰং নিক্খিত্তমত্তেতি ধুৰে নিক্খিত্তমত্তে. সচেপি ধুৰং নিক্খিপিত্ৱা পচ্ছা আৰোচেতি, ন ৰক্খতি; ধুৰং নিক্খিত্তমত্তেযেৱ পাচিত্তিযন্তি ৱুত্তং হোতি. সচে পন এৱং ধুৰং নিক্খিপিত্ৱা পটিচ্ছাদনত্থমেৱ অঞ্ঞস্স আৰোচেতি, সোপি অঞ্ঞস্সাতি এতেনুপাযেন সমণসতম্পি সমণসহস্সম্পি আপত্তিং আপজ্জতিযেৱ তাৱ, যাৱ কোটি ন ছিজ্জতি. কদা পন কোটি ছিজ্জতীতি? মহাসুমত্থেৰো তাৱ ৱদতি – ‘‘আপত্তিং আপন্নো একস্স আৰোচেতি, সো পটিনিৱত্তিত্ৱা তস্সেৱ আৰোচেতি; এৱং কোটি ছিজ্জতী’’তি. মহাপদুমত্থেৰো পনাহ – ‘‘অযঞ্হি ৱত্থুপুগ্গলোযেৱ. আপত্তিং আপন্নো পন একস্স ভিক্খুনো আৰোচেতি, অযং অঞ্ঞস্স আৰোচেতি, সো পটিনিৱত্তিত্ৱা যেনস্স আৰোচিতং, তস্সেৱ আৰোচেতি; এৱং ততিযেন পুগ্গলেন দুতিযস্স আৰোচিতে কোটি ছিন্না হোতী’’তি.

৪০০. অদুট্ঠুল্লং আপত্তিন্তি অৱসেসে পঞ্চাপত্তিক্খন্ধে. অনুপসম্পন্নস্স দুট্ঠুল্লং ৱা অদুট্ঠুল্লং ৱা অজ্ঝাচাৰন্তি এত্থ অনুপসম্পন্নস্স সুক্কৱিস্সট্ঠি চ কাযসংসগ্গো চাতি অযং দুট্ঠুল্লঅজ্ঝাচাৰো নাম. সেসমেত্থ উত্তানমেৱাতি. ধুৰনিক্খেপসমুট্ঠানং – কাযৱাচাচিত্ততো সমুট্ঠাতি, অকিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

দুট্ঠুল্লসিক্খাপদং চতুত্থং.

৫. ঊনৱীসতিৱস্সসিক্খাপদৱণ্ণনা

৪০২. পঞ্চমসিক্খাপদে – অঙ্গুলিযো দুক্খা ভৱিস্সন্তীতি অক্খৰানি লিখন্তস্স অঙ্গুলিযো দুক্খা ভৱিস্সন্তীতি চিন্তেসুং. উৰস্স দুক্খোতি গণনং সিক্খন্তেন বহুং চিন্তেতব্বং হোতি, তেনস্স উৰো দুক্খো ভৱিস্সতীতি মঞ্ঞিংসু. অক্খীনি দুক্খা ভৱিস্সন্তীতি ৰূপসুত্তং সিক্খন্তেন কহাপণা পৰিৱত্তেত্ৱা পৰিৱত্তেত্ৱা পস্সিতব্বা হোন্তি, তেনস্স অক্খীনি দুক্খানি ভৱিস্সন্তীতি মঞ্ঞিংসু. ডংসাদীসু ডংসাতি পিঙ্গলমক্খিকাযো. দুক্খানন্তি দুক্খমানং. তিব্বানন্তি বহলানং. খৰানন্তি তিখিণানং. কটুকানন্তি ফৰুসানং; অমনাপতায ৱা কটুকৰসসদিসানং. অসাতানন্তি অমধুৰানং. পাণহৰানন্তি জীৱিতহৰানং.

৪০৪. সীমং সম্মন্নতীতি নৱং সীমং বন্ধতি. কুৰুন্দিযং পন উদকুক্খেপপৰিচ্ছিন্দনেপি দুক্কটং ৱুত্তং. পৰিপুণ্ণৱীসতিৱস্সোতি পটিসন্ধিগ্গহণতো পট্ঠায পৰিপুণ্ণৱীসতিৱস্সো; গব্ভৱীসোপি হি পৰিপুণ্ণৱীসতিৱস্সোত্ৱেৱ সঙ্খ্যে গচ্ছতি. যথাহ –

‘‘তেন খো পন সমযেন আযস্মা কুমাৰকস্সপো গব্ভৱীসো উপসম্পন্নো হোতি. অথ খো আযস্মতো কুমাৰকস্সপস্স এতদহোসি – ‘ভগৱতা পঞ্ঞত্তং, ন ঊনৱীসতিৱস্সো পুগ্গলো উপসম্পাদেতব্বোতি. অহঞ্চম্হি গব্ভৱীসো উপসম্পন্নো. উপসম্পন্নো নুখোম্হি, ননু খো উপসম্পন্নো’তি. ভগৱতো এতমত্থং আৰোচেসুং. যং ভিক্খৱে মাতুকুচ্ছিম্হি পঠমং চিত্তং উপ্পন্নং, পঠমং ৱিঞ্ঞাণং পাতুভূতং তদুপাদায সাৱস্স জাতি. অনুজানামি, ভিক্খৱে, গব্ভৱীসং উপসম্পাদেতু’’ন্তি (মহাৱ. ১২৪).

তত্থ যো দ্ৱাদসমাসে মাতুকুচ্ছিস্মিং ৱসিত্ৱা মহাপৱাৰণায জাতো, সো ততো পট্ঠায যাৱ একূনৱীসতিমে ৱস্সে মহাপৱাৰণা, তং অতিক্কমিত্ৱা পাটিপদে উপসম্পাদেতব্বো. এতেনুপাযেন হাযনৱড্ঢনং ৱেদিতব্বং.

পোৰাণকত্থেৰা পন একূনৱীসতিৱস্সং সামণেৰং নিক্খমনীযপুণ্ণমাসিং অতিক্কম্ম পাটিপদদিৱসে উপসম্পাদেন্তি, তং কস্মাতি? ৱুচ্চতে – একস্মিং ৱস্সে ছ চাতুদ্দসিকউপোসথা হোন্তি. ইতি ৱীসতিযা ৱস্সেসু চত্তাৰো মাসা পৰিহাযন্তি. ৰাজানো ততিযে ততিযে ৱস্সে ৱস্সং উক্কড্ঢন্তি. ইতি অট্ঠাৰসসু ৱস্সেসু ছ মাসা ৱড্ঢন্তি, ততো উপোসথৱসেন পৰিহীনে চত্তাৰো মাসে অপনেত্ৱা দ্ৱে মাসা অৱসেসা হোন্তি, তে দ্ৱে মাসে গহেত্ৱা ৱীসতিৱস্সানি পৰিপুণ্ণানি হোন্তীতি নিক্কঙ্খা হুত্ৱা নিক্খমনীযপুণ্ণমাসিং অতিক্কম্ম পাটিপদে উপসম্পাদেন্তি. এত্থ পন যো পৱাৰেত্ৱা ৱীসতিৱস্সো ভৱিস্সতি, তং সন্ধায ‘‘একূনৱীসতিৱস্স’’ন্তি ৱুত্তং. তস্মা যো মাতুকুচ্ছিস্মিং দ্ৱাদসমাসে ৱসি, সো একৱীসতিৱস্সো হোতি. যো সত্তমাসে ৱসি, সো সত্তমাসাধিকৱীসতিৱস্সো. ছমাসজাতো পন ন জীৱতি.

৪০৬. অনাপত্তি ঊনৱীসতিৱস্সং পৰিপুণ্ণৱীসতিৱস্সসঞ্ঞীতি এত্থ কিঞ্চাপি উপসম্পাদেন্তস্স অনাপত্তি, পুগ্গলো পন অনুপসম্পন্নোৱ হোতি. সচে পন সো দসৱস্সচ্চযেন অঞ্ঞং উপসম্পাদেতি, তঞ্চে মুঞ্চিত্ৱা গণো পূৰতি, সূপসম্পন্নো. সোপি চ যাৱ ন জানাতি, তাৱস্স নেৱ সগ্গন্তৰাযো ন মোক্খন্তৰাযো, ঞত্ৱা পন পুন উপসম্পজ্জিতব্বং. সেসং উত্তানমেৱ.

তিসমুট্ঠানং – কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং,

ৱচীকম্মং, তিচিত্তং, তিৱেদনন্তি.

ঊনৱীসতিৱস্সসিক্খাপদং পঞ্চমং.

৬. থেয্যসত্থসিক্খাপদৱণ্ণনা

৪০৭. ছট্ঠে – পটিযালোকন্তি সূৰিযালোকস্স পটিমুখং; পচ্ছিমদিসন্তি অত্থো. কম্মিযাতি সুঙ্কট্ঠানে কম্মিকা.

৪০৯. ৰাজানং ৱা থেয্যং গচ্ছন্তীতি ৰাজানং ৱা থেনেত্ৱা ৱঞ্চেত্ৱা ৰঞ্ঞো সন্তকং কিঞ্চি গহেত্ৱা ইদানি ন তস্স দস্সামাতি গচ্ছন্তি.

৪১১. ৱিসঙ্কেতেনাতি কালৱিসঙ্কেতেন দিৱসৱিসঙ্কেতেন চ গচ্ছতো অনাপত্তি. মগ্গৱিসঙ্কেতেন পন অটৱিৱিসঙ্কেতেন ৱা আপত্তিযেৱ. সেসমেত্থ ভিক্খুনিৱগ্গে ৱুত্তনযত্তা উত্তানত্থমেৱ. থেয্যসত্থসমুট্ঠানং – কাযচিত্ততো কাযৱাচাচিত্ততো চ সমুট্ঠাতি, কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

থেয্যসত্থসিক্খাপদং ছট্ঠং.

৭. সংৱিধানসিক্খাপদৱণ্ণনা

৪১২. সত্তমে – পধূপেন্তো নিসীদীতি পজ্ঝাযন্তো অত্তানংযেৱ পৰিভাসন্তো নিসীদি. নায্যো সো ভিক্খু মং নিপ্পাতেসীতি অয্যো অযং ভিক্খু মং ন নিক্খামেসি; ন মং গহেত্ৱা অগমাসীতি অত্থো. সেসমেত্থ ভিক্খুনিযা সদ্ধিং সংৱিধানসিক্খাপদে ৱুত্তনযেনেৱ ৱেদিতব্বং সদ্ধিং সমুট্ঠানাদীহীতি.

সংৱিধানসিক্খাপদং সত্তমং.

৮. অৰিট্ঠসিক্খাপদৱণ্ণনা

৪১৭. অট্ঠমে – গদ্ধে বাধযিংসূতি গদ্ধবাধিনো; গদ্ধবাধিনো পুব্বপুৰিসা অস্সাতি গদ্ধবাধিপুব্বো, তস্স গদ্ধবাধিপুব্বস্স গিজ্ঝঘাতককুলপ্পসুতস্সাতি অত্থো.

সগ্গমোক্খানং অন্তৰাযং কৰোন্তীতি অন্তৰাযিকা. তে কম্মকিলেসৱিপাকউপৱাদআণাৱীতিক্কমৱসেন পঞ্চৱিধা. তত্থ পঞ্চানন্তৰিযকম্মা কম্মন্তৰাযিকা নাম. তথা ভিক্খুনীদূসককম্মং, তং পন মোক্খস্সেৱ অন্তৰাযং কৰোতি, ন সগ্গস্স. নিযতমিচ্ছাদিট্ঠিধম্মা কিলেসন্তৰাযিকা নাম. পণ্ডকতিৰচ্ছানগতউভতোব্যঞ্জনকানং পটিসন্ধিধম্মা ৱিপাকন্তৰাযিকা নাম. অৰিযূপৱাদা উপৱাদন্তৰাযিকা নাম, তে পন যাৱ অৰিযে ন খমাপেন্তি তাৱদেৱ, ন ততো পৰং. সঞ্চিচ্চ আপন্না আপত্তিযো আণাৱীতিক্কমন্তৰাযিকা নাম, তাপি যাৱ ভিক্খুভাৱং ৱা পটিজানাতি, ন ৱুট্ঠাতি ৱা ন দেসেতি ৱা তাৱদেৱ, ন ততো পৰং.

তত্ৰাযং ভিক্খু বহুস্সুতো ধম্মকথিকো সেসন্তৰাযিকে জানাতি, ৱিনযে পন অকোৱিদত্তা পণ্ণত্তিৱীতিক্কমন্তৰাযিকে ন জানাতি, তস্মা ৰহোগতো এৱং চিন্তেসি – ‘‘ইমে আগাৰিকা পঞ্চ কামগুণে পৰিভুঞ্জন্তা সোতাপন্নাপি সকদাগামিনোপি অনাগামিনোপি হোন্তি, ভিক্খূপি মনাপিকানি চক্খুৱিঞ্ঞেয্যানি ৰূপানি পস্সন্তি…পে… কাযৱিঞ্ঞেয্যে ফোট্ঠব্বে ফুসন্তি, মুদুকানি অত্থৰণপাৱুৰণাদীনি পৰিভুঞ্জন্তি, এতং সব্বং ৱট্টতি. কস্মা ইত্থিৰূপা…পে… ইত্থিফোট্ঠব্বা এৱ ন ৱট্টন্তি, এতেপি ৱট্টন্তী’’তি. এৱং ৰসেন ৰসং সংসন্দিত্ৱা সচ্ছন্দৰাগপৰিভোগঞ্চ নিচ্ছন্দৰাগপৰিভোগঞ্চ একং কত্ৱা থূলৱাকেহি সদ্ধিং অতিসুখুমসুত্তং ঘটেন্তো ৱিয সাসপেন সদ্ধিং সিনেৰুং উপসংহৰন্তো ৱিয পাপকং দিট্ঠিগতং উপ্পাদেত্ৱা ‘‘কিং ভগৱতা মহাসমুদ্দং বন্ধন্তেন ৱিয মহতা উস্সাহেন পঠমপাৰাজিকং পঞ্ঞত্তং, নত্থি এত্থ দোসো’’তি সব্বঞ্ঞুতঞ্ঞাণেন সদ্ধিং পটিৱিৰুজ্ঝন্তো ভব্বপুগ্গলানং আসং ছিন্দন্তো জিনস্স আণাচক্কে পহাৰমদাসি. তেনাহ – ‘‘তথাহং ভগৱতা ধম্মং দেসিতং আজানামী’’তিআদি.

অট্ঠিকঙ্কলূপমাতিআদিম্হি অট্ঠিকঙ্কলূপমা অপ্পস্সাদট্ঠেন. মংসপেসূপমা বহুসাধাৰণট্ঠেন. তিণুক্কূপমা অনুদহনট্ঠেন. অঙ্গাৰকাসূপমা মহাভিতাপনট্ঠেন. সুপিনকূপমা ইত্তৰপচ্চুপট্ঠানট্ঠেন. যাচিতকূপমা তাৱকালিকট্ঠেন. ৰুক্খফলূপমা সব্বঙ্গপচ্চঙ্গপলিভঞ্জনট্ঠেন. অসিসূনূপমা অধিকুট্টনট্ঠেন. সত্তিসূলূপমা ৱিনিৱিজ্ঝনট্ঠেন. সপ্পসিৰূপমা সাসঙ্কসপ্পটিভযট্ঠেনাতি অযমেত্থ সঙ্খেপো. ৱিত্থাৰো পন পপঞ্চসূদনিযং মজ্ঝিমট্ঠকথাযং (ম. নি. ১.২৩৪ আদযো; ২.৪২ আদযো) গহেতব্বো. এৱং ব্যাখোতি এৱং ৱিয খো. সেসমেত্থ পুব্বে ৱুত্তনযত্তা উত্তানমেৱ.

সমনুভাসনসমুট্ঠানং – কাযৱাচাচিত্ততো সমুট্ঠাতি, অকিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদনন্তি.

অৰিট্ঠসিক্খাপদং অট্ঠমং.

৯. উক্খিত্তসম্ভোগসিক্খাপদৱণ্ণনা

৪২৪-৫. নৱমে – অকটানুধম্মেনাতি অনুধম্মো ৱুচ্চতি আপত্তিযা অদস্সনে ৱা অপ্পটিকম্মে ৱা পাপিকায দিট্ঠিযা অপ্পটিনিস্সগ্গে ৱা ধম্মেন ৱিনযেন সত্থুসাসনেন উক্খিত্তকস্স অনুলোমৱত্তং দিস্ৱা কতা ওসাৰণা; সো ওসাৰণসঙ্খাতো অনুধম্মো যস্স ন কতো, অযং অকটানুধম্মো নাম, তাদিসেন সদ্ধিন্তি অত্থো. তেনেৱস্স পদভাজনে ‘‘অকটানুধম্মো নাম উক্খিত্তো অনোসাৰিতো’’তি ৱুত্তং.

দেতি ৱা পটিগ্গণ্হাতি ৱাতি একপযোগেন বহুম্পি দদতো ৱা গণ্হতো ৱা একং পাচিত্তিযং. ৱিচ্ছিন্দিত্ৱা ৱিচ্ছিন্দিত্ৱা দেন্তস্স চ গণ্হন্তস্স চ পযোগগণনায পাচিত্তিযানি. সেসমেত্থ উত্তানমেৱ. তিসমুট্ঠানং – কিৰিযং, সঞ্ঞাৱিমোক্খং, সচিত্তকং, পণ্ণত্তিৱজ্জং, কাযকম্মং, ৱচীকম্মং, তিচিত্তং, তিৱেদনন্তি.

উক্খিত্তসম্ভোগসিক্খাপদং নৱমং.

১০. কণ্টকসিক্খাপদৱণ্ণনা

৪২৮. দসমে – দিট্ঠিগতং উপ্পন্নন্তি অৰিট্ঠস্স ৱিয এতস্সাপি অযোনিসো উম্মুজ্জন্তস্স উপ্পন্নং. নাসেতূতি এত্থ তিৱিধা নাসনা – সংৱাসনাসনা, লিঙ্গনাসনা, দণ্ডকম্মনাসনাতি. তত্থ আপত্তিযা অদস্সনাদীসু উক্খেপনা সংৱাসনাসনা নাম. ‘‘দূসকো নাসেতব্বো (পাৰা. ৬৬) মেত্তিযং ভিক্খুনিং নাসেথা’’তি (পাৰা. ৩৮৪) অযং লিঙ্গনাসনা নাম. ‘‘অজ্জতগ্গে তে আৱুসো সমণুদ্দেস ন চেৱ সো ভগৱা সত্থা অপদিসিতব্বো’’তি অযং দণ্ডকম্মনাসনা নাম. অযং ইধ অধিপ্পেতা. তেনাহ – ‘‘এৱঞ্চ পন ভিক্খৱে নাসেতব্বো…পে… ৱিনস্সা’’তি. তত্থ চৰাতি গচ্ছ. পিৰেতি পৰ অমামক. ৱিনস্সাতি নস্স; যত্থ তে ন পস্সাম, তত্থ গচ্ছাতি.

৪২৯. উপলাপেয্যাতি সঙ্গণ্হেয্য. উপট্ঠাপেয্যাতি তেন অত্তনো উপট্ঠানং কাৰাপেয্য. সেসং অৰিট্ঠসিক্খাপদে ৱুত্তনযেনেৱ ৱেদিতব্বং সদ্ধিং সমুট্ঠানাদীহীতি.

কণ্টকসিক্খাপদং দসমং.

সমত্তো ৱণ্ণনাক্কমেন সপ্পাণকৱগ্গো সত্তমো.