৬. ভেসজ্জক্খন্ধকং

পঞ্চভেসজ্জাদিকথা

২৬০. ভেসজ্জক্খন্ধকে – সাৰদিকেন আবাধেনাতি সৰদকালে উপ্পন্নেন পিত্তাবাধেন, তস্মিঞ্হি কালে ৱস্সোদকেনপি তেমেন্তি, কদ্দমম্পি মদ্দন্তি, অন্তৰন্তৰা আতপোপি খৰো হোতি, তেন তেসং পিত্তং কোট্ঠব্ভন্তৰগতং হোতি. আহাৰত্থঞ্চ ফৰেয্যাতি আহাৰত্থং সাধেয্য.

২৬১. নচ্ছাদেন্তীতি ন জিৰন্তি, ন ৱাতৰোগং পটিপ্পস্সম্ভেতুং সক্কোন্তি. সেনেসিতানীতি সিনিদ্ধানি. ভত্তাচ্ছাদকেনাতি ভত্তং অৰোচিকেন.

২৬২. অচ্ছৱসন্তিআদীসু নিস্সগ্গিযৱণ্ণনাযং ৱুত্তনযেনেৱ ৱিনিচ্ছযো ৱেদিতব্বো. কালে পটিগ্গহিতন্তিআদীসু মজ্ঝন্হিকে অৱীতিৱত্তে পটিগ্গহেত্ৱা পচিত্ৱা পৰিস্সাৱেত্ৱা চাতি অত্থো. তেলপৰিভোগেন পৰিভুঞ্জিতুন্তি সত্তাহকালিকতেলপৰিভোগেন পৰিভুঞ্জিতুং.

২৬৩. মূলভেসজ্জাদি ৱিনিচ্ছযোপি খুদ্দকৱণ্ণনাযং ৱুত্তোযেৱ. তস্মা ইধ যং যং পুব্বে অৱুত্তং তং তদেৱ ৱণ্ণযিস্সাম. ৱচত্তন্তি সেতৱচং. নিসদং নিসদপোতকন্তি পিসনসিলা চ পিসনপোতো চ. ফগ্গৱন্তি লতাজাতি. নত্তমালন্তি কৰঞ্জং. হিঙ্গুহিঙ্গুজতুহিঙ্গুসিপাটিকা হিঙ্গুজাতিযোযেৱ. তকতকপত্তিতকপণ্ণিযো লাখাজাতিযো.

সামুদ্দন্তি সমুদ্দতীৰে ৱালুকা ৱিয সন্তিট্ঠতি. কাড়লোণন্তি পকতিলোণং. সিন্ধৱন্তি সেতৱণ্ণং পব্বতে উট্ঠহতি. উব্ভিদন্তি ভূমিতো অঙ্কুৰং উট্ঠহতি. বিলন্তি দব্বসম্ভাৰেহি সদ্ধিং পচিতং, তং ৰত্তৱণ্ণং.

২৬৪-৬. কাযো ৱা দুগ্গন্ধোতি কস্সচি অস্সাদীনং ৱিয কাযগন্ধো হোতি, তস্সাপি সিৰীসকোসুম্বাদিচুণ্ণানি ৱা গন্ধচুণ্ণানি ৱা সব্বানি ৱট্টন্তি. ছকণন্তি গোমযং. ৰজননিপ্পক্কন্তি ৰজনকসটং. পাকতিকচুণ্ণম্পি কোট্টেত্ৱা উদকেন তেমেত্ৱা ন্হাযিতুং ৱট্টতি; এতম্পি ৰজননিপ্পক্কসঙ্খেপমেৱ গচ্ছতি.

আমকমংসঞ্চ খাদি আমকলোহিতঞ্চ পিৱীতি ন তং ভিক্খু খাদি ন পিৱি, অমনুস্সো খাদিত্ৱা চ পিৱিত্ৱা চ পক্কন্তো, তেন ৱুত্তং – ‘‘তস্স সো অমনুস্সিকাবাধো পটিপ্পস্সম্ভী’’তি.

অঞ্জনন্তি সব্বসঙ্গাহিকৱচনমেতং. কাড়ঞ্জনন্তি একা অঞ্জনজাতি. ৰসঞ্জনং নানাসম্ভাৰেহি কতং. সোতঞ্জনন্তি নদীসোতাদীসু উপ্পজ্জনকং অঞ্জনং. গেৰুকো নাম সুৱণ্ণগেৰুকো. কপল্লন্তি দীপসিখতো গহিতমসি. অঞ্জনূপপিংসনেহীতি অঞ্জনেন সদ্ধিং একতো পিংসিতব্বেহি, ন হি কিঞ্চি অঞ্ঞনূপপিংসনং ন ৱট্টতি. চন্দনন্তি লোহিতচন্দনাদিকং যংকিঞ্চি. তগৰাদীনি পাকটানি, অঞ্ঞানিপি নীলুপ্পলাদীনি ৱট্টন্তিযেৱ.

অট্ঠিমযন্তি মনুস্সট্ঠিং ঠপেত্ৱা অৱসেসঅট্ঠিমযং. দন্তমযন্তি হত্থিদন্তাদিসব্বদন্তমযং. ৱিসাণমযেপি অকপ্পিযং নাম নত্থি, নড়মযাদযো একন্তকপ্পিযাযেৱ. সলাকট্ঠানিযন্তি যত্থ সলাকং ওদহন্তি, তং সুসিৰদণ্ডকং ৱা থৱিকং ৱা অনুজানামীতি অত্থো. অংসবদ্ধকোতি অঞ্জনিত্থৱিকায অংসবদ্ধকো. যমকনত্থুকৰণিন্তি সমসোতাহি দ্ৱীহি পনাড়িকাহি একং নত্থুকৰণিং.

২৬৭. অনুজানামি ভিক্খৱে তেলপাকন্তি যংকিঞ্চি ভেসজ্জপক্খিত্তং সব্বং অনুঞ্ঞাতমেৱ হোতি. অতিপক্খিত্তমজ্জানীতি অতিৱিয খিত্তমজ্জানি; বহুং মজ্জং পক্খিপিত্ৱা যোজিতানীতি অত্থো.

অঙ্গৱাতোতি হত্থপাদে ৱাতো. সম্ভাৰসেদন্তি নানাৱিধপণ্ণভঙ্গসেদং. মহাসেদন্তি মহন্তং সেদং; পোৰিসপ্পমাণং আৱাটং অঙ্গাৰানং পূৰেত্ৱা পংসুৱালিকাদীহি পিদহিত্ৱা তত্থ নানাৱিধানি ৱাতহৰণপণ্ণানি সন্থৰিত্ৱা তেলমক্খিতেন গত্তেন তত্থ নিপজ্জিত্ৱা সম্পৰিৱত্তন্তেন সৰীৰং সেদেতুং অনুজানামীতি অত্থো. ভঙ্গোদকন্তি নানাপণ্ণভঙ্গকুথিতং উদকং; তেহি পণ্ণেহি চ উদকেন চ সিঞ্চিত্ৱা সিঞ্চিত্ৱা সেদেতব্বো. উদককোট্ঠকন্তি উদককোট্ঠে চাটিং ৱা দোণিং ৱা উণ্হোদকস্স পূৰেত্ৱা তত্থ পৱিসিত্ৱা সেদকম্মকৰণং অনুজানামীতি অত্থো.

পব্বৱাতো হোতীতি পব্বে পব্বে ৱাতো ৱিজ্ঝতি. লোহিতং মোচেতুন্তি সত্থকেন লোহিতং মোচেতুং. পজ্জং অভিসঙ্খৰিতুন্তি যেন ফালিতপাদা পাকতিকা হোন্তি; তং নাড়িকেৰাদীসু নানাভেসজ্জানি পক্খিপিত্ৱা পজ্জং অভিসঙ্খৰিতুং; পাদানং সপ্পাযভেসজ্জং পচিতুন্তি অত্থো. তিলকক্কেন অত্থোতি পিট্ঠেহি তিলেহি অত্থো. কবড়িকন্তি ৱণমুখে সত্তুপিণ্ডং পক্খিপিতুং. সাসপকুড্ডেনাতি সাসপপিট্ঠেন. ৱড্ঢমংসন্তি অধিকমংসং আণি ৱিয উট্ঠহতি. লোণসক্খৰিকায ছিন্দিতুন্তি খুৰেন ছিন্দিতুং. ৱিকাসিকন্তি তেলৰুন্ধনপিলোতিকং. সব্বং ৱণপটিকম্মন্তি যংকিঞ্চি ৱণপৰিকম্মং নাম অত্থি; সব্বং অনুজানামীতি অত্থো.

২৬৮. সামং গহেত্ৱাতি ইদং ন কেৱলং সপ্পদট্ঠস্সেৱ, অঞ্ঞস্মিম্পি দট্ঠৱিসে সতি সামং গহেত্ৱা পৰিভুঞ্জিতব্বং; অঞ্ঞেসু পন কাৰণেসু পটিগ্গহিতমেৱ ৱট্টতি. কতো ন পুন পটিগ্গহেতব্বোতি সচে ভূমিপ্পত্তো, পটিগ্গহেতব্বো; অপ্পত্তং পন গহেতুং ৱট্টতি.

২৬৯. ঘৰদিন্নকাবাধোতি ৱসীকৰণপানকসমুট্ঠিতৰোগো. সীতালোড়িন্তি নঙ্গলেন কসন্তস্স ফালে লগ্গমত্তিকং উদকেন আলোড়েত্ৱা পাযেতুং অনুজানামীতি অত্থো.

দুট্ঠগহণিকোতি ৱিপন্নগহণিকো; কিচ্ছেন উচ্চাৰো নিক্খমতীতি অত্থো. আমিসখাৰন্তি সুক্খোদনং ঝাপেত্ৱা তায ছাৰিকায পগ্ঘৰিতং খাৰোদকং. মুত্তহৰীতকন্তি গোমুত্তপৰিভাৱিতং হৰীতকং. অভিসন্নকাযোতি উস্সন্নদোসকাযো. অচ্ছকঞ্জিযন্তি তণ্ডুলোদকমণ্ডো. অকটযুসন্তি অসিনিদ্ধো মুগ্গপচিতপানীযো. কটাকটন্তি সোৱ ধোতসিনিদ্ধো. পটিচ্ছাদনীযেনাতি মংসৰসেন.

গুড়াদিঅনুজাননকথা

২৭২. সচে ভিক্খৱে পক্কাপি মুগ্গা জাযন্তীতি পক্কা মুগ্গা সচেপি জাযন্তি, যথাসুখং পৰিভুঞ্জিতব্বা. পক্কত্তা হি তে কপ্পিযা এৱ.

২৭৪. অন্তোৱুত্থন্তি অকপ্পিযকুটিযং ৱুত্থং. সামং পক্কন্তি এত্থ যংকিঞ্চি আমিসং ভিক্খুনো পচিতুং ন ৱট্টতি. সচেপিস্স উণ্হযাগুযা সুলসিপণ্ণানি ৱা সিঙ্গিৱেৰং ৱা লোণং ৱা পক্খিপন্তি, তম্পি চালেতুং ন ৱট্টতি, ‘‘যাগুং নিব্বাপেমী’’তি পন চালেতুং ৱট্টতি. উত্তণ্ডুলভত্তং লভিত্ৱাপি পিদহিতুং ন ৱট্টতি. সচে পন মনুস্সা পিদহিত্ৱাৱ দেন্তি, ৱট্টতি; ‘‘ভত্তং ৱা মা নিব্বাযতূ’’তি পিদহিতুং ৱট্টতি. খীৰতক্কাদীসু পন সকিং কুথিতেসু অগ্গিং দাতুং ৱট্টতি, পুনপাকস্স অনুঞ্ঞাতত্তা. উক্কপিণ্ডকাপি খাদন্তীতি বিড়ামূসিকগোধামঙ্গুসা খাদন্তি. দমকাতি ৱিঘাসাদা.

২৭৬. ততো নীহটন্তি যত্থ নিমন্তিতা ভুঞ্জন্তি, ততো নীহটং.

২৭৮. ৱনট্ঠং পোক্খৰট্ঠন্তি ৱনে চেৱ পদুমিনিগচ্ছে চ জাতং. অবীজন্তি তৰুণফলং, যস্স বীজং ন অঙ্কুৰং জনেতি. নিব্বট্টবীজন্তি বীজং নিব্বট্টেত্ৱা অপনেত্ৱা পৰিভুঞ্জিতব্বকং অম্বপনসাদি.

২৭৯. দুৰোপযো ৱণোতি দুক্খেন ৰুহতি, দুক্খেন পাকতিকো হোতীতি অত্থো. দুপ্পৰিহাৰং সত্থন্তি সম্বাধে দুক্খেন সত্থং পৰিহৰেয্যং. সত্থকম্মং ৱা ৱত্থিকম্মং ৱাতি যথাপৰিচ্ছিন্নে ওকাসে যেন কেনচি সত্থেন ৱা সূচিযা ৱা কণ্টকেন ৱা সত্তিকায ৱা পাসাণসক্খলিকায ৱা নখেন ৱা ছিন্দনং ৱা ফালনং ৱা ৱিজ্ঝনং ৱা লেখনং ৱা ন কাতব্বং; সব্বঞ্হেতং সত্থকম্মমেৱ হোতি. যেন কেনচি পন চম্মেন ৱা ৱত্থেন ৱা ৱত্থিপীড়নম্পি ন কাতব্বং; সব্বঞ্হেতং ৱত্থিকম্মমেৱ হোতি. এত্থ চ সম্বাধস্স সামন্তা দ্ৱঙ্গুলাতি ইদং সত্থকম্মংযেৱ সন্ধায ৱুত্তং. ৱত্থিকম্মং পন সম্বাধেযেৱ পটিক্খিত্তং. তত্থ পন খাৰং আদাতুং যেন কেনচি ৰজ্জুকেন ৱা বন্ধিতুং ৱট্টতি. যদি তেন ছিজ্জতি, সুচ্ছিন্নং. অণ্ডৱুড্ঢিৰোগেপি সত্থকম্মং ন ৱট্টতি, তস্মা অণ্ডং ফালেত্ৱা বীজানি উদ্ধৰিত্ৱা ‘‘অৰোগং কৰিস্সামী’’তি ন কত্তব্বং. অগ্গিতাপনভেসজ্জালিম্পনেসু পন পটিক্খেপো নত্থি. ৱচ্চমগ্গে ভেসজ্জমক্খিতা আদানৱট্টি ৱা ৱেড়ুনাড়িকা ৱা ৱট্টতি, যায খাৰকম্মং ৱা কৰোন্তি, তেলং ৱা পৱেসেন্তি.

২৮০. পৱত্তমংসন্তি মতস্স মংসং. মাঘাতোতি তং দিৱসং ন লব্ভা কেনচি কিঞ্চি জীৱিতা ৱোৰোপেতুং. পোত্থনিকন্তি মংসচ্ছেদনসত্থকং ৱুচ্চতি. কিম্পিমাযাতি কিম্পি ইমায. ন ভগৱা উস্সহতীতি ন ভগৱা সক্কোতি. যত্ৰ হি নামাতি যস্মা নাম. পটিৱেক্খীতি ৱীমংসি; পটিপুচ্ছীতি ৱুত্তং হোতি. অপ্পটিৱেক্খিত্ৱাতি অপ্পটিপুচ্ছিত্ৱা. সচে পন অসুকমংসন্তি জানাতি, পটিপুচ্ছনকিচ্চং নত্থি, অজানন্তেন পন পুচ্ছিত্ৱাৱ খাদিতব্বং.

হত্থিমংসাদিপটিক্খেপকথা

২৮১. সুনখমংসন্তি এত্থ অৰঞ্ঞকোকা নাম সুনখসদিসা হোন্তি, তেসং মংসং ৱট্টতি. যো পন গামসুনখিযা ৱা কোকেন কোকসুনখিযা ৱা গামসুনখেন সংযোগা উপ্পন্নো, তস্স মংসং ন ৱট্টতি, সো হি উভযং ভজতীতি. অহিমংসন্তি কস্সচি অপাদকস্স দীঘজাতিকস্স মংসং ন ৱট্টতি. সীহমংসাদীনি পাকটানেৱ.

এত্থ চ মনুস্সমংসং সজাতিতায পটিক্খিত্তং, হত্থিঅস্সমংসং ৰাজঙ্গতায, সুনখমংসঞ্চ অহিমংসঞ্চ পটিকূলতায, সীহমংসাদীনি পঞ্চ অত্তনো অনুপদ্দৱত্থাযাতি. ইমেসং মনুস্সাদীনং দসন্নং মংসম্পি অট্ঠিপি লোহিতম্পি চম্মম্পি লোমম্পি সব্বং ন ৱট্টতি, যংকিঞ্চি ঞত্ৱা ৱা অঞত্ৱা ৱা খাদন্তস্স আপত্তিযেৱ. যদা জানাতি, তদা দেসেতব্বা. ‘‘অপুচ্ছিত্ৱা খাদিস্সামী’’তি গণ্হতো পটিগ্গহণে দুক্কটং, ‘‘পুচ্ছিত্ৱা খাদিস্সামী’’তি গণ্হতো অনাপত্তি. উদ্দিস্স কতং পন জানিত্ৱা খাদন্তস্সেৱ আপত্তি, পচ্ছা জানন্তো আপত্তিযা ন কাৰেতব্বোতি.

যাগুমধুগোড়কাদিকথা

২৮২. একত্তকোতি এককো, নত্থি মে দুতিযোতি অত্থো. পহূতং যাগুঞ্চ মধুগোড়কঞ্চ পটিযাদাপেত্ৱাতি সো কিৰ সতসহস্সং ৱযং কত্ৱা পটিযাদাপেসি. অনুমোদনাগাথাপৰিযোসানে ‘‘পত্থযতং ইচ্ছত’’ন্তি পদানং ‘‘অলমেৱ দাতু’’ন্তি ইমিনা সম্বন্ধো. সচে পন ‘‘পত্থযতা ইচ্ছতা’’তি পাঠো অত্থি, সোযেৱ গহেতব্বো.

২৮৩. ভোজ্জযাগুন্তি যা পৱাৰণং জনেতি. যদগ্গেনাতি যং আদিং কত্ৱা. সগ্গা তে আৰদ্ধাতি সগ্গনিব্বত্তকপুঞ্ঞং উপচিতন্তি অত্থো. যথাধম্মো কাৰেতব্বোতি পৰম্পৰভোজনেন কাৰেতব্বো, ভোজ্জযাগুযা হি পৱাৰণা হোতীতি.

২৮৪. নাহং তং কচ্চানাতি তস্মিং কিৰ অৱসিট্ঠগুড়ে দেৱতা সুখুমোজং পক্খিপিংসু, সা অঞ্ঞেসং পৰিণামং ন গচ্ছতি, তস্মা এৱমাহ. গিলানস্স গুড়ন্তি তথাৰূপেন ব্যাধিনা গিলানস্স পচ্ছাভত্তং গুড়ং অনুজানামীতি অত্থো.

পাটলিগামৱত্থুকথা

২৮৫. সব্বসন্থৰিন্তি যথা সব্বং সন্থতং হোতি, এৱং.

২৮৬. সুনিধৱস্সকাৰাতি সুনিধো চ ৱস্সকাৰো চ দ্ৱে ব্ৰাহ্মণা মগধৰঞ্ঞো মহামত্তা মহামচ্চা. ৱজ্জীনং পটিবাহাযাতি ৱজ্জিৰাজকুলানং আযমুখপচ্ছিন্দনত্থং. ৱত্থূনীতি ঘৰৱত্থূনি. চিত্তানি নমন্তি নিৱেসনানি মাপেতুন্তি তা কিৰ দেৱতা ৱত্থুৱিজ্জাপাঠকানং সৰীৰে অধিমুচ্চিত্ৱা এৱং চিত্তানি নামেন্তি. কস্মা? অম্হাকং যথানুৰূপং সক্কাৰং কৰিস্সন্তীতি অত্থো. তাৱতিংসেহীতি লোকে কিৰ সক্কং দেৱৰাজানং ৱিস্সকম্মঞ্চ উপাদায তাৱতিংসা পণ্ডিতাতি সদ্দো অব্ভুগ্গতো, তেনেৱাহ তাৱতিংসেহীতি, তাৱতিংসেহি সদ্ধিং মন্তেত্ৱা ৱিয মাপেন্তীতি অত্থো. যাৱতা অৰিযং আযতনন্তি যত্তকং অৰিযমনুস্সানং ওসৰণট্ঠানং নাম অত্থি. যাৱতা ৱণিপ্পথোতি যত্তকং ৱাণিজানং আভতভণ্ডস্স ৰাসিৱসেনেৱ কযৱিক্কযট্ঠানং নাম অত্থি. ইদং অগ্গনগৰন্তি তেসং অৰিযাযতনৱণিপ্পথানং ইদং অগ্গনগৰং ভৱিস্সতি. পুটভেদনন্তি পুটভেদনট্ঠানং মোচনট্ঠানন্তি ৱুত্তং হোতি. অগ্গিতো ৱাতিআদীসু সমুচ্চযত্থো ৱা সদ্দো. তত্ৰ হি একস্স কোট্ঠাসস্স অগ্গিতো, একস্স উদকতো, একস্স অব্ভন্তৰতো, অঞ্ঞমঞ্ঞভেদা অন্তৰাযো ভৱিস্সতি. উড়ুম্পন্তি পাৰগমনত্থায আণিযো আকোটেত্ৱা কতং. কুল্লন্তি ৱল্লিআদীহি বন্ধিত্ৱা কতং.

অণ্ণৱন্তি সব্বন্তিমেন পৰিচ্ছেদেন যোজনমত্তং গম্ভীৰস্স চ পুথুল্লস্স চ উদকট্ঠানস্সেতং অধিৱচনং. সৰন্তি ইধ নদী অধিপ্পেতা. ইদং ৱুত্তং হোতি – যে গম্ভীৰং ৱিত্থতং তণ্হাসৰং তৰন্তি, তে অৰিযমগ্গসঙ্খাতং সেতুং কত্ৱান ৱিসজ্জ পল্ললানি অনামসিত্ৱাৱ উদকভৰিতানি নিন্নট্ঠানানি; অযং পন ইদং অপ্পমত্তকং উদকং উত্তৰিতুকামোপি কুল্লঞ্হি পৰিজনো বন্ধতি, বুদ্ধা পন বুদ্ধসাৱকা চ ৱিনা এৱ কুল্লেন তিণ্ণা মেধাৱিনো জনাতি.

২৮৭. অননুবোধাতি অবুজ্ঝনেন. সন্ধাৱিতন্তি ভৱতো ভৱং গমনৱসেন সন্ধাৱিতং. সংসৰিতন্তি পুনপ্পুনং গমনৱসেন সংসৰিতং. মমঞ্চেৱ তুম্হাকঞ্চাতি মযা চ তুম্হেহি চ. অথ ৱা সন্ধাৱিতং সংসৰিতন্তি সন্ধাৱনং সংসৰণং মমঞ্চেৱ তুম্হাকঞ্চ অহোসীতি এৱমেত্থ অত্থো দট্ঠব্বো. সংসিতন্তি সংসৰিতং. ভৱনেত্তি সমূহতাতি ভৱতো ভৱগমনা সন্ধাৱনা তণ্হাৰজ্জু সুট্ঠু হতা ছিন্না অপ্পৱত্তিকতা.

২৮৯. নীলাতি ইদং সব্বসঙ্গাহকং. নীলৱণ্ণাতিআদি তস্সেৱ ৱিভাগদস্সনত্থং. তত্থ ন তেসং পকতিৱণ্ণা নীলা, নীলৱিলেপনানং ৱিচিত্ততাৱসেনেতং ৱুত্তং. পটিৱট্টেসীতি পহাৰেসি. সাহাৰং দজ্জেয্যাথাতি সজনপদং দদেয্যাথ. অঙ্গুলিং ফোটেসুন্তি অঙ্গুলিং চালেসুং. অম্বকাযাতি ইত্থিকায. ওলোকেথাতি পস্সথ. অপলোকেথাতি পুনপ্পুনং পস্সথ. উপসংহৰথাতি উপনেথ. ইমং লিচ্ছৱিপৰিসং তুম্হাকং চিত্তেন তাৱতিংসপৰিসং হৰথ, তাৱতিংসস্স সমকং কত্ৱা পস্সথাতি অত্থো.

সীহসেনাপতিৱত্থুআদিকথা

২৯০. ধম্মস্স চ অনুধম্মং ব্যাকৰোন্তীতি ভগৱতা ৱুত্তকাৰণস্স অনুকাৰণং কথেন্তি. সহধম্মিকো ৱাদানুৱাদোতি অপৰেহি ৱুত্তকাৰণেন সকাৰণো হুত্ৱা তুম্হাকং ৱাদো ৱিঞ্ঞুগৰহিতব্বং কাৰণং কোচি অপ্পমত্তকোপি কিং ন আগচ্ছতি. ইদং ৱুত্তং হোতি ‘‘কিং সব্বকাৰেনাপি তুম্হাকং ৱাদে গাৰয্হকাৰণং নত্থী’’তি. অনব্ভক্খাতুকামাতি অভিভৱিত্ৱা ন আচিক্খিতুকামা.

২৯৩. অনুৱিচ্চকাৰন্তি অনুৱিদিত্ৱা চিন্তেত্ৱা তুলযিত্ৱা কাতব্বং কৰোহীতি ৱুত্তং হোতি. ঞাতমনুস্সানন্তি লোকে পাকটানং. সাধু হোতীতি সুন্দৰং হোতি. পটাকং পৰিহৰেয্যুন্তি পটাকং উক্খিপিত্ৱা নগৰে ঘোসন্তা আহিণ্ডেয্যুং. কস্মা? ‘‘এৱং নো অম্হাকং মহন্তভাৱো ভৱিস্সতী’’তি. ওপানভূতন্তি পটিযত্তউদপানো ৱিয ঠিতং. কুলন্তি নিৱেসনং. দাতব্বং মঞ্ঞেয্যাসীতি মা ইমেসং দেয্যধম্মং উপচ্ছিন্দিত্থ, সম্পত্তানঞ্হি দাতব্বমেৱাতি ওৱদতি. ওকাৰোতি অৱকাৰো লামকভাৱো. সামুক্কংসিকাতি অত্তনাযেৱ উদ্ধৰিত্ৱা গহিতা; অসাধাৰণং অঞ্ঞেসন্তি অত্থো. উদ্দিস্স কতন্তি উদ্দিসিত্ৱা কতং.

২৯৪. পটিচ্চকম্মন্তি অত্তানং পটিচ্চ কতন্তি অত্থো. অথ ৱা পটিচ্চকম্মন্তি নিমিত্তকম্মস্সেতং অধিৱচনং, তং পটিচ্চকম্মং এত্থ অত্থীতি মংসম্পি পটিচ্চকম্মন্তি ৱুত্তং. যো হি এৱৰূপং মংসং পৰিভুঞ্জতি, সোপি তস্স কম্মস্স দাযাদো হোতি, ৱধকস্স ৱিয তস্সাপি পাণঘাতকম্মং হোতীতি অধিপ্পাযো. জিৰিদন্তিতি জিৰন্তি অব্ভাচিক্খন্তা ন জিৰন্তি, অব্ভক্খানস্স অন্তং ন গচ্ছন্তীতি অত্থো. তিকোটিপৰিসুদ্ধকথা সঙ্ঘভেদসিক্খাপদৱণ্ণনাযং ৱুত্তা.

কপ্পিযভূমিঅনুজাননকথা

২৯৫. সকটপৰিৱট্টন্তি সকটেহি পৰিক্খেপং ৱিয কত্ৱা অচ্ছন্তি. পচ্চন্তিমন্তি অভিলাপমত্তমেতং ‘‘যং সঙ্ঘো আকঙ্খতী’’তি ৱুত্তত্তা পন ধুৰৱিহাৰোপি সম্মন্নিতুং ৱট্টতি, কম্মৱাচং অৱত্ৱা অপলোকনেনাপি ৱট্টতিযেৱ. কাকোৰৱসদ্দন্তি তত্থ তত্থ পৱিট্ঠানং আমিসখাদনত্থায অনুপ্পগেযেৱ সন্নিপতিতানং কাকানং ওৰৱসদ্দং. যসোজো নাম কপিলসুত্তপৰিযোসানে পব্বজিতানং পঞ্চন্নং সতানং অগ্গপুৰিসো.

উস্সাৱনন্তিকন্তিআদীসু উস্সাৱনন্তিকা তাৱ এৱং কত্তব্বা. যো থম্ভানং ৱা উপৰি ভিত্তিপাদে ৱা নিখনিত্ৱা ৱিহাৰো কৰিযতি, তস্স হেট্ঠা থম্ভপটিচ্ছকা পাসাণা ভূমিগতিকা এৱ. পঠমথম্ভং পন পঠমভিত্তিপাদং ৱা পতিট্ঠাপেন্তেহি বহূহি সম্পৰিৱাৰেত্ৱা ‘‘কপ্পিযকুটিং কৰোম, কপ্পিযকুটিং কৰোমা’’তি ৱাচং নিচ্ছাৰেন্তেহি মনুস্সেসু উক্খিপিত্ৱা পতিট্ঠাপেন্তেসু আমসিত্ৱা ৱা সযং উক্খিপিত্ৱা ৱা থম্ভে ৱা ভিত্তিপাদো ৱা পতিট্ঠাপেতব্বো. কুৰুন্দিমহাপচ্চৰীসু পন ‘‘কপ্পিযকুটি কপ্পিযকুটী’’তি ৱত্ৱা পতিট্ঠাপেতব্বন্তি ৱুত্তং. অন্ধকট্ঠকথাযং ‘‘সঙ্ঘস্স কপ্পিযকুটিং অধিট্ঠামী’’তি ৱুত্তং. তং পন অৱত্ৱাপি অট্ঠকথাসু ৱুত্তনযেন ৱুত্তে দোসো নত্থি. ইদং পনেত্থ সাধাৰণলক্খণং, থম্ভপতিট্ঠানঞ্চ ৱচনপৰিযোসানঞ্চ সমকালং ৱট্টতি. সচে হি অনিট্ঠিতে ৱচনে থম্ভো পতিট্ঠাতি, অপ্পতিট্ঠিতে ৱা তস্মিং ৱচনং নিট্ঠাতি, অকতা হোতি কপ্পিযকুটি. তেনেৱ মহাপচ্চৰিযং ৱুত্তং – ‘‘বহূহি সম্পৰিৱাৰেত্ৱা ৱত্তব্বং, অৱস্সঞ্হি এত্থ একস্সপি ৱচননিট্ঠানঞ্চ থম্ভপতিট্ঠানঞ্চ একতো ভৱিস্সতী’’তি.

ইট্ঠকসিলামত্তিকাকুট্টিকাসু পন কুটীসু হেট্ঠা চযং বন্ধিত্ৱা ৱা অবন্ধিত্ৱা ৱা কৰোন্তু, যতো পট্ঠায ভিত্তিং উট্ঠাপেতুকামা হোন্তি, তং সব্বপঠমং ইট্ঠকং ৱা সিলং ৱা মত্তিকাপিণ্ডং ৱা গহেত্ৱা ৱুত্তনযেনেৱ কপ্পিযকুটি কাতব্বা. ইট্ঠকাদযো হি ভিত্তিযা পঠমিট্ঠকাদীনং হেট্ঠা ন ৱট্টন্তি, থম্ভা পন উপৰি উগ্গচ্ছন্তি, তস্মা ৱট্টন্তি. অন্ধকট্ঠকথাযং ‘‘থম্ভেহি কৰিযমানে চতূসু কোণেসু চত্তাৰো থম্ভা ইট্ঠকাদিকুট্টে চতূসু কোণেসু দ্ৱে তিস্সো ইট্ঠকা অধিট্ঠাতব্বা’’তি ৱুত্তং. তথা পন অকতাযপি দোসো নত্থি, অট্ঠকথাসু হি ৱুত্তমেৱ পমাণং.

গোনিসাদিকা দুৱিধা – আৰামগোনিসাদিকা, ৱিহাৰগোনিসাদিকাতি. তাসু যত্থ নেৱ আৰামো ন সেনাসনানি পৰিক্খিত্তানি হোন্তি, অযং ‘‘আৰামগোনিসাদিকা’’ নাম. যত্থ সেনাসনানি সব্বানি ৱা একচ্চানি ৱা পৰিক্খিত্তানি, আৰামো অপৰিক্খিত্তো, অযং ‘‘ৱিহাৰগোনিসাদিকা’’ নাম. ইতি উভযত্ৰাপি আৰামস্স অপৰিক্খিত্তভাৱোযেৱ পমাণং. আৰামো পন উপড্ঢপৰিক্খিত্তোপি বহুতৰং পৰিক্খিত্তোপি পৰিক্খিত্তোযেৱ নামাতি কুৰুন্দিমহআপচ্চৰিযাদীসু ৱুত্তং. এত্থ কপ্পিযকুটিং লদ্ধুং ৱট্টতি.

গহপতীতি মনুস্সা আৱাসং কত্ৱা ‘‘কপ্পিযকুটিং দেম, পৰিভুঞ্জথা’’তি ৱদন্তি, এসা গহপতি নাম. ‘‘কপ্পিযকুটিং কাতুং দেমা’’তি ৱুত্তেপি ৱট্টতিযেৱ. অন্ধকট্ঠকথাযং পন ‘‘যস্মা ভিক্খুং ঠপেত্ৱা সেসসহধম্মিকানং সব্বেসঞ্চ দেৱমনুস্সানং হত্থতো পটিগ্গহো চ সন্নিধি চ অন্তোৱুত্থঞ্চ তেসং সন্তকং ভিক্খুস্স ৱট্টতি, তস্মা তেসং গেহানি ৱা তেহি দিন্না কপ্পিযকুটি ৱা গহপতীতি ৱুচ্চতী’’তি ৱুত্তং. পুনপি ৱুত্তং – ‘‘ভিক্খুসঙ্ঘস্স ৱিহাৰং ঠপেত্ৱা ভিক্খুনুপস্সযো ৱা আৰামিকানং ৱা তিত্থিযানং ৱা দেৱতানং ৱা নাগানং ৱা অপি ব্ৰহ্মানং ৱিমানং কপ্পিযকুটি হোতী’’তি, তং সুৱুত্তং; সঙ্ঘসন্তকমেৱ হি ভিক্খুসন্তকং ৱা গেহং গহপতিকুটিকা ন হোতি. সম্মুতিকা নাম কম্মৱাচং সাৱেত্ৱা কতাতি.

যং ইমাসু চতূসু কপ্পিযভূমীসু ৱুত্থং আমিসং, তং সব্বং অন্তোৱুত্থসঙ্খ্যং ন গচ্ছতি. ভিক্খূনঞ্চ ভিক্খুনীনঞ্চ অন্তোৱুত্থঅন্তোপক্কমোচনত্থঞ্হি কপ্পিযকুটিযো অনুঞ্ঞাতা. যং পন অকপ্পিযভূমিযং সহসেয্যপ্পহোনকে গেহে ৱুত্থং সঙ্ঘিকং ৱা পুগ্গলিকং ৱা ভিক্খুস্স ভিক্খুনিযা ৱা সন্তকং একৰত্তম্পি ঠপিতং, তং অন্তোৱুত্থং; তত্থ পক্কঞ্চ অন্তোপক্কং নাম হোতি, এতং ন কপ্পতি. সত্তাহকালিকং পন যাৱজীৱিকঞ্চ ৱট্টতি.

তত্ৰাযং ৱিনিচ্ছযো – সামণেৰো ভিক্খুস্স তণ্ডুলাদিকং আমিসং আহৰিত্ৱা কপ্পিযকুটিযং নিক্খিপিত্ৱা পুনদিৱসে পচিত্ৱা দেতি, অন্তোৱুত্থং ন হোতি. তত্থ অকপ্পিযকুটিযং নিক্খিত্তসপ্পিআদীসু যংকিঞ্চি পক্খিপিত্ৱা দেতি, মুখসন্নিধি নাম হোতি. মহাপচ্চৰিযং পন ‘‘অন্তোৱুত্থং হোতী’’তি ৱুত্তং. তত্থ নামমত্তমেৱ নানাকৰণং. ভিক্খু অকপ্পিযকুটিযং ঠপিতসপ্পিঞ্চ যাৱজীৱিকপণ্ণঞ্চ একতো পচিত্ৱা পৰিভুঞ্জতি, সত্তাহং নিৰামিসং ৱট্টতি. সচে আমিসসংসট্ঠং কত্ৱা পৰিভুঞ্জতি, অন্তোৱুত্থঞ্চেৱ সামংপাকঞ্চ হোতি. এতেনুপাযেন সব্বসংসগ্গা ৱেদিতব্বা.

ইমা পন কপ্পিযকুটিযো কদা জহিতৱত্থুকা হোন্তি? উস্সাৱনন্তিকা তাৱ যা থম্ভানং উপৰি ভিত্তিপাদে ৱা নিখণিত্ৱা কতা, সা সব্বেসু থম্ভেসু চ ভিত্তিপাদেসু চ অপনীতেসু জহিতৱত্থুকা হোতি. সচে পন থম্ভে ৱা ভিত্তিপাদে ৱা পৰিৱত্তেন্তি, যো যো ঠিতো তত্থ তত্থ পতিট্ঠাতি, সব্বেসুপি পৰিৱত্তিতেসু অজহিতৱত্থুকাৱ হোতি. ইট্ঠকাদীহি কতা চযস্স উপৰি ভিত্তিঅত্থায ঠপিতং ইট্ঠকং ৱা সিলং ৱা মত্তিকাপিণ্ডং ৱা আদিংকত্ৱা ৱিনাসিতকালে জহিতৱত্থুকা হোতি. যেহি পন ইট্ঠকাদীহি অধিট্ঠিতা, তেসু অপনীতেসুপি তদঞ্ঞাসু পতিট্ঠিতাসু অজহিতৱত্থুকাৱ হোতি.

গোনিসাদিকা পাকাৰাদীহি পৰিক্খেপে কতে জহিতৱত্থুকা হোতি. পুন তস্মিং আৰামে কপ্পিযকুটি লদ্ধুং ৱট্টতি. সচে পন পুনপি পাকাৰাদযো তত্থ তত্থ খণ্ডা হোন্তি, ততো ততো গাৱো পৱিসন্তি, পুন কপ্পিযকুটি হোতি. ইতৰা পন দ্ৱে গোপানসীমত্তং ঠপেত্ৱা সব্বস্মিং ছদনে ৱিনট্ঠে জহিতৱত্থুকা হোন্তি. সচে গোপানসীনং উপৰি একম্পি পক্খপাসকমণ্ডলং অত্থি, ৰক্খতি.

যত্ৰ পনিমা চতস্সোপি কপ্পিযভূমিযো নত্থি, তত্থ কিং কাতব্বং? অনুপসম্পন্নস্স দত্ৱা তস্স সন্তকং কত্ৱা পৰিভুঞ্জিতব্বং. তত্ৰিদং ৱত্থু – কৰৱিকতিস্সত্থেৰো কিৰ ৱিনযধৰপামোক্খো মহাসীৱত্থেৰস্স সন্তিকং অগমাসি. সো দীপালোকেন সপ্পিকুম্ভং পস্সিত্ৱা ‘‘ভন্তে কিমেত’’ন্তি পুচ্ছি. থেৰো ‘‘আৱুসো গামতো সপ্পিকুম্ভো আভতো, লূখদিৱসে সপ্পিনা ভুঞ্জনত্থাযা’’তি আহ. ততো নং তিস্সত্থেৰো ‘‘ন ৱট্টতি ভন্তে’’তি আহ. থেৰো পুনদিৱসে পমুখে নিক্খিপাপেসি. তিস্সত্থেৰো পুন একদিৱসে আগতো তং দিস্ৱা তথেৱ পুচ্ছিত্ৱা ‘‘ভন্তে সহসেয্যপ্পহোনকট্ঠানে ঠপেতুং ন ৱট্টতী’’তি আহ. থেৰো পুনদিৱসে বহি নীহৰাপেত্ৱা নিক্খিপাপেসি, তং চোৰা হৰিংসু. সো পুন একদিৱসং আগতং তিস্সত্থেৰং আহ – ‘‘আৱুসো তযা ‘ন ৱট্টতী’তি ৱুত্তো সো কুম্ভো বহি নিক্খিত্তো চোৰেহি অৱহতো’’তি. ততো নং তিস্সত্থেৰো আহ – ‘‘ননু ভন্তে অনুপসম্পন্নস্স দাতব্বো অস্স, অনুপসম্পন্নস্স হি দত্ৱা তস্স সন্তকং কত্ৱা পৰিভুঞ্জিতুং ৱট্টতী’’তি.

২৯৬-৯. মেণ্ডকৱত্থু উত্তানমেৱ. অপি চেত্থ অনুজানামি ভিক্খৱে পঞ্চ গোৰসেতি ইমে পঞ্চ গোৰসে ৱিসুং পৰিভোগেন পৰিভুঞ্জিতুম্পি অনুজানামীতি অত্থো. পাথেয্যং পৰিযেসিতুন্তি এত্থ সচে কেচি সযমেৱ ঞত্ৱা দেন্তি, ইচ্চেতং কুসলং; নো চে দেন্তি, ঞাতিপৱাৰিতট্ঠানতো ৱা ভিক্খাচাৰৱত্তেন ৱা পৰিযেসিতব্বং. তথা অলভন্তেন অঞ্ঞাতিকঅপৱাৰিতট্ঠানতো যাচিত্ৱাপি গহেতব্বং. একদিৱসেন গমনীযে মগ্গে একভত্তত্থায পৰিযেসিতব্বং. দীঘে অদ্ধানে যত্তকেন কন্তাৰং নিত্থৰতি, তত্তকং পৰিযেসিতব্বং.

কেণিযজটিলৱত্থুকথা

৩০০. কাজেহি গাহাপেত্ৱাতি পঞ্চহি কাজসতেহি সুসঙ্খতস্স বদৰপানস্স কুটসহস্সং গাহাপেত্ৱা. এতস্মিং নিদানে এতস্মিং পকৰণে ধম্মিং কথং কত্ৱাতি ‘‘সাধু ভিক্খৱে পানং অপিৱন্তা সমণস্স গোতমস্স সাৱকা পচ্চযবাহুল্লিকাতি ৱাদং ন উপ্পাদযিত্থ, মযি চ গাৰৱং অকত্থ, মম চ তুম্হেসু গাৰৱং জনযিত্থ, ইতি ৱো অহং ইমিনা কাৰণেন সুট্ঠু পসন্নো’’তিআদিনা নযেন ধম্মিং কথং কত্ৱা অনুজানামি ভিক্খৱে অট্ঠ পানানীতিআদিমাহ.

তত্থ অম্বপানন্তি আমেহি ৱা পক্কেহি ৱা অম্বেহি কতপানং. তত্থ আমেহি কৰোন্তেন অম্বতৰুণানি ভিন্দিত্ৱা উদকে পক্খিপিত্ৱা আতপে আদিচ্চপাকেন পচিত্ৱা পৰিস্সাৱেত্ৱা তদহুপটিগ্গহিতেহি মধুসক্কৰকপ্পূৰাদীহি যোজেত্ৱা কাতব্বং. এৱং কতং পুৰেভত্তমেৱ কপ্পতি. অনুপসম্পন্নেহি কতং লভিত্ৱা পন পুৰেভত্তং পটিগ্গহিতং পুৰেভত্তং সামিসপৰিভোগেনাপি ৱট্টতি, পচ্ছাভত্তং নিৰামিসপৰিভোগেন যাৱ অৰুণুগ্গমনা ৱট্টতিযেৱ. এস নযো সব্বপানেসু.

তেসু পন জম্বুপানন্তি জম্বুফলেহি কতপানং. চোচপানন্তি অট্ঠিকেহি কদলিফলেহি কতপানং. মোচপানন্তি অনট্ঠিকেহি কদলিফলেহি কতপানং. মধুকপানন্তি মধুকানং জাতিৰসেন কতপানং; তং পন উদকসম্ভিন্নং ৱট্টতি, সুদ্ধং ন ৱট্টতি. মুদ্দিকপানন্তি মুদ্দিকা উদকে মদ্দিত্ৱা অম্বপানং ৱিয কতপানং. সালূকপানন্তি ৰত্তুপ্পলনীলুপ্পলাদীনং সালূকে মদ্দিত্ৱা কতপানং. ফাৰুসকপানন্তি ফাৰুসকফলেহি অম্বপানং ৱিয কতপানং. ইমানি অট্ঠ পানানি সীতানিপি আদিচ্চপাকানিপি ৱট্টন্তি, অগ্গিপাকানি ন ৱট্টন্তি. ধঞ্ঞফলৰসন্তি সত্তন্নং ধঞ্ঞানং ফলৰসং. ডাকৰসন্তি পক্কডাকৰসং. যাৱকালিকপত্তানঞ্হি পুৰেভত্তংযেৱ ৰসো কপ্পতি. যাৱজীৱিকানং পটিগ্গহেত্ৱা ঠপিতসপ্পিআদীহি সদ্ধিং পক্কানং সত্তাহং কপ্পতি. সচে পন সুদ্ধউদকেন পচতি, যাৱজীৱম্পি ৱট্টতি. খীৰাদীহি পন সদ্ধিং পচিতুং ন ৱট্টতি. অঞ্ঞেহি পক্কম্পি ডাকৰসসঙ্খ্যমেৱ গচ্ছতি. কুৰুন্দিযং পন ‘‘যাৱকালিকপত্তানম্পি সীতোদকেন মদ্দিত্ৱা কতৰসো ৱা আদিচ্চপাকো ৱা ৱট্টতী’’তি ৱুত্তং. ঠপেত্ৱা মধুকপুপ্ফৰসন্তি এত্থ মধুকপুপ্ফৰসো অগ্গিপাকো ৱা হোতু আদিচ্চপাকো ৱা, পচ্ছাভত্তং ন ৱট্টতি. পুৰেভত্তম্পি যং পানং গহেত্ৱা মজ্জং কৰোন্তি, সো আদিতো পট্ঠায ন ৱট্টতি. মধুকপুপ্ফং পন অল্লং ৱা সুক্খং ৱা ভজ্জিতং ৱা তেন কতফাণিতং ৱা যতো পট্ঠায মজ্জং ন কৰোন্তি, তং সব্বং পুৰেভত্তং ৱট্টতি. উচ্ছুৰসো নিকসটো পচ্ছাভত্তং ৱট্টতি. ইতি পানানি অনুজানন্তেন ইমেপি চত্তাৰো ৰসা অনুঞ্ঞাতাতি. অগ্গিহুত্তমুখা যঞ্ঞাতিআদীসু অগ্গিহুতং সেট্ঠং, অগ্গিহুতং মুখন্তি ৱুত্তং হোতি.

ৰোজমল্লাদিৱত্থুকথা

৩০১-২. ৰোজৱত্থু উত্তানত্থমেৱ. তত্থ সঙ্কৰং অকংসূতি কতিকং অকংসু. উড়াৰং খো তে ইদন্তি সুন্দৰং খো তে ইদং. নাহং ভন্তে আনন্দ বহুকতোতি নাহং বুদ্ধাদিগতপসাদবহুমানেন ইধাগতোতি দস্সেতি. সব্বঞ্চ ডাকন্তি সপ্পিআদীহি পক্কং ৱা অপক্কং ৱা যংকিঞ্চি ডাকং. পিট্ঠখাদনীযন্তি পিট্ঠমযং খাদনীযং; ৰোজো কিৰ ইদং উভযম্পি সতসহস্সং ৱযং কত্ৱা পটিযাদাপেসি.

৩০৩. মঞ্জুকাতি মধুৰৱচনা. পটিভানেয্যকাতি সকে সিপ্পে পটিভানসম্পন্না. দক্খাতি ছেকা, অনলসা ৱা. পৰিযোদাতসিপ্পাতি নিদ্দোসসিপ্পা. নাড়িযাৱাপকেনাতি নাড়িযা চ আৱাপকেন চ. আৱাপকো নাম যত্থ লদ্ধং লদ্ধং আৱপন্তি, পক্খিপন্তীতি ৱুত্তং হোতি. ন চ ভিক্খৱে নহাপিতপুব্বেন খুৰভণ্ডন্তি এত্থ গহেত্ৱা পৰিহৰিতুমেৱ ন ৱট্টতি, অঞ্ঞস্স সন্তকেন কেসে ছেদেতুং ৱট্টতি. সচে ৱেতনং গহেত্ৱা ছিন্দতি, ন ৱট্টতি. যো অনহাপিতপুব্বো তস্স পৰিহৰিতুম্পি ৱট্টতি, তং ৱা অঞ্ঞং ৱা গহেত্ৱা কেসে ছেদেতুম্পি ৱট্টতি.

৩০৪. ভাগং দত্ৱাতি দসমভাগং দত্ৱা; ইদং কিৰ জম্বুদীপে পোৰাণকচাৰিত্তং, তস্মা দসকোট্ঠাসে কত্ৱা একো কোট্ঠাসো ভূমিসামিকানং দাতব্বো.

চতুমহাপদেসকথা

৩০৫. যং ভিক্খৱে মযা ইদং ন কপ্পতীতি ইমে চত্তাৰো মহাপদেসে ভগৱা ভিক্খূনং নযগ্গহণত্থায আহ. তত্থ ধম্মসঙ্গাহকত্থেৰা সুত্তং গহেত্ৱা পৰিমদ্দন্তা ইদং অদ্দসংসু. ঠপেত্ৱা ধঞ্ঞফলৰসন্তি সত্তধঞ্ঞৰসানি পচ্ছাভত্তং ন কপ্পন্তীতি পটিক্খিত্তানি. তালনাড়িকেৰপনসলবুজঅলাবুকুম্ভণ্ডপুস্সফলতিপুসফলএড়ালুকানি, নৱ মহাফলানি সব্বঞ্চ অপৰণ্ণং, ধঞ্ঞগতিকমেৱ. তং কিঞ্চাপি ন পটিক্খিত্তং, অথ খো অকপ্পিযং অনুলোমেতি, তস্মা পচ্ছাভত্তং ন কপ্পতি. অট্ঠ পানানি অনুঞ্ঞাতানি. অৱসেসানি ৱেত্ততিন্তিণিকমাতুলুঙ্গকপিত্থকোসম্বকৰমন্দাদিখুদ্দকফলপানানি অট্ঠপানগতিকানেৱ, তানি কিঞ্চাপি ন অনুঞ্ঞাতানি, অথ খো কপ্পিযং অনুলোমেন্তি, তস্মা কপ্পন্তি. ঠপেত্ৱা হি সানুলোমং ধঞ্ঞফলৰসং অঞ্ঞং ফলপানং নাম অকপ্পিযং নত্থি, সব্বং যামকালিকংযেৱাতি কুৰুন্দিযং ৱুত্তং.

ভগৱতা ছ চীৱৰানি অনুঞ্ঞাতানি. ধম্মসঙ্গাহকত্থেৰেহি তেসং অনুলোমানি দুকূলং, পত্তুণ্ণং, চীনপট্টং, সোমাৰপট্টং, ইদ্ধিমযিকং, দেৱদত্তিযন্তি অপৰানি ছ অনুঞ্ঞাতানি. তত্থ ‘‘পত্তুণ্ণ’’ন্তি পত্তুণ্ণদেসে পাণকেহি সঞ্জাতৱত্থং. দ্ৱে পটা দেসনামেনেৱ ৱুত্তা. তানি তীণি কোসেয্যস্সানুলোমানি. দুকূলং সাণস্স, ইতৰানি দ্ৱে কপ্পাসিকস্স ৱা সব্বেসং ৱা.

ভগৱতা একাদস পত্তে পটিক্খিপিত্ৱা দ্ৱে পত্তা অনুঞ্ঞাতা – লোহপত্তো চেৱ মত্তিকাপত্তো চ. লোহথালকং, মত্তিকাথালকং, তম্বলোহথালকন্তি তেসংযেৱ অনুলোমানি. ভগৱতা তযো তুম্বা অনুঞ্ঞাতা – লোহতুম্বো, কট্ঠতুম্বো, ফলতুম্বোতি. কুণ্ডিকা, কঞ্চনকো, উদকতুম্বোতি তেসংযেৱ অনুলোমানি. কুৰুন্দিযং পন ‘‘পানীযসঙ্খপানীযসৰাৱকানি এতেসং অনুলোমানী’’তি ৱুত্তং. পট্টিকা, সূকৰন্তন্তি দ্ৱে কাযবন্ধনানি অনুঞ্ঞাতানি, দুস্সপট্টেন ৰজ্জুকেন চ কতকাযবন্ধনানি তেসং অনুলোমানি. সেতচ্ছত্তং, কিলঞ্জচ্ছত্তং, পণ্ণচ্ছত্তন্তি তীণি ছত্তানি অনুঞ্ঞাতানি. একপণ্ণচ্ছত্তং তেসংযেৱ অনুলোমন্তি ইমিনা নযেন পাড়িঞ্চ অট্ঠকথঞ্চ অনুপেক্খিত্ৱা অঞ্ঞানিপি কপ্পিযাকপ্পিযানং অনুলোমানি ৱেদিতব্বানি.

তদহুপটিগ্গহিতং কালে কপ্পতীতিআদি সব্বং সম্ভিন্নৰসং সন্ধায ৱুত্তং. সচে হি ছল্লিম্পি অনপনেত্ৱা সকলেনেৱ নাড়িকেৰফলেন সদ্ধিং পানকং পটিগ্গহিতং হোতি, নাড়িকেৰং অপনেত্ৱা তং ৱিকালেপি কপ্পতি. উপৰি সপ্পিপিণ্ডং ঠপেত্ৱা সীতলপাযাসং দেন্তি, যং পাযাসেন অসংসট্ঠং সপ্পি, তং অপনেত্ৱা সত্তাহং পৰিভুঞ্জিতুং ৱট্টতি. বদ্ধমধুফাণিতাদীসুপি এসেৱ নযো. তক্কোলজাতিফলাদীহি অলঙ্কৰিত্ৱা পিণ্ডপাতং দেন্তি, তানি উদ্ধৰিত্ৱা ধোৱিত্ৱা যাৱজীৱং পৰিভুঞ্জিতব্বানি. যাগুযং পক্খিপিত্ৱা দিন্নসিঙ্গিৱেৰাদীসুপি তেলাদীসু পক্খিপিত্ৱা দিন্নলট্ঠিমধুকাদীসুপি এসেৱ নযো. এৱং যং যং অসম্ভিন্নৰসং হোতি, তং তং একতো পটিগ্গহিতম্পি যথা সুদ্ধং হোতি, তথা ধোৱিত্ৱা ৱা তচ্ছেত্ৱা ৱা তস্স তস্স কালৱসেন পৰিভুঞ্জিতুং ৱট্টতি.

সচে পন সম্ভিন্নৰসং হোতি সংসট্ঠং, ন ৱট্টতি. যাৱকালিকঞ্হি অত্তনা সদ্ধিং সম্ভিন্নৰসানি তীণিপি যামকালিকাদীনি অত্তনো সভাৱং উপনেতি, যামকালিকং দ্ৱেপি সত্তাহকালিকাদীনি অত্তনো সভাৱং উপনেতি, সত্তাহকালিকম্পি অত্তনা সদ্ধিং সংসট্ঠং যাৱজীৱিকং অত্তনো সভাৱঞ্ঞেৱ উপনেতি; তস্মা তেন তদহুপটিগ্গহিতেন সদ্ধিং তদহুপটিগ্গহিতং ৱা পুৰেপটিগ্গহিতং ৱা যাৱজীৱিকং সত্তাহং কপ্পতি দ্ৱীহপটিগ্গহিতেন ছাহং, তীহপটিগ্গহিতেন পঞ্চাহং…পে… সত্তাহপটিগ্গহিতেন তদহেৱ কপ্পতীতি ৱেদিতব্বং. তস্মাযেৱ হি ‘‘সত্তাহকালিকেন ভিক্খৱে যাৱজীৱিকং তদহুপটিগ্গহিত’’ন্তি অৱত্ৱা ‘‘পটিগ্গহিতং সত্তাহং কপ্পতী’’তি ৱুত্তং.

কালযামসত্তাহাতিক্কমেসু চেত্থ ৱিকালভোজনসন্নিধিভেসজ্জসিক্খাপদানং ৱসেন আপত্তিযো ৱেদিতব্বা. ইমেসু চ পন চতূসু কালিকেসু যাৱকালিকং যামকালিকন্তি ইদমেৱ দ্ৱযং অন্তোৱুত্থকঞ্চেৱ সন্নিধিকাৰকঞ্চ হোতি, সত্তাহকালিকঞ্চ যাৱজীৱিকঞ্চ অকপ্পিযকুটিযং নিক্খিপিতুম্পি ৱট্টতি, সন্নিধিম্পি ন জনেতীতি. সেসং সব্বত্থ উত্তানমেৱাতি.

ভেসজ্জক্খন্ধকৱণ্ণনা নিট্ঠিতা.