৪. পৱাৰণাক্খন্ধকং

অফাসুকৱিহাৰকথা

২০৯. পৱাৰণাক্খন্ধকে – নেৱ আলপেয্যাম ন সল্লপেয্যামাতি এত্থ আলাপো নাম পঠমৱচনং; সল্লাপো পচ্ছিমৱচনং. হত্থৱিলঙ্ঘকেনাতি হত্থুক্খেপকেন. পসুসংৱাসন্তি পসূনং ৱিয সংৱাসং. পসৱোপি হি অত্তনো উপ্পন্নং সুখদুক্খং অঞ্ঞমঞ্ঞস্স ন আৰোচেন্তি, পটিসন্থাৰং ন কৰোন্তি, তথা এতেপি ন অকংসু; তস্মা নেসং সংৱাসো ‘‘পসুসংৱাসো’’তি ৱুচ্চতি. এস নযো সব্বত্থ. ন ভিক্খৱে মূগব্বতং তিত্থিযসমাদানন্তি ‘‘ইমং তেমাসং ন কথেতব্ব’’ন্তি এৱৰূপং ৱতসমাদানং ন কাতব্বং; অধম্মকতিকা হেসা. অঞ্ঞমঞ্ঞানুলোমতাতি অঞ্ঞমঞ্ঞং ৱত্তুং অনুলোমভাৱো. ‘‘ৱদন্তু মং আযস্মন্তো’’তি হি ৱদন্তং সক্কা হোতি কিঞ্চি ৱত্তুং; ন ইতৰং. আপত্তিৱুট্ঠানতা ৱিনযপুৰেক্খাৰতাতি আপত্তীহি ৱুট্ঠানভাৱো ৱিনযং পুৰতো কত্ৱা চৰণভাৱো. ‘‘ৱদন্তু মং আযস্মন্তো’’তি হি এৱং ৱদন্তো আপত্তীহি ৱুট্ঠহিস্সতি, ৱিনযঞ্চ পুৰক্খত্ৱা ৱিহৰিস্সতীতি ৱুচ্চতি.

২১০. সুণাতু মে ভন্তে সঙ্ঘো অজ্জ পৱাৰণা, যদি সঙ্ঘস্স পত্তকল্লং, সঙ্ঘো পৱাৰেয্যাতি অযং সব্বসঙ্গাহিকা নাম ঞত্তি; এৱঞ্হি ৱুত্তে তেৱাচিকং দ্ৱেৱাচিকং একৱাচিকঞ্চ পৱাৰেতুং ৱট্টতি. সমানৱস্সিকং ন ৱট্টতি. ‘‘তেৱাচিকং পৱাৰেয্যা’’তি ৱুত্তে পন তেৱাচিকমেৱ ৱট্টতি, অঞ্ঞং ন ৱট্টতি. ‘‘দ্ৱেৱাচিকং পৱাৰেয্যা’’তি ৱুত্তে দ্ৱেৱাচিকঞ্চ তেৱাচিকঞ্চ ৱট্টতি, একৱাচিকঞ্চ সমানৱস্সিকঞ্চ ন ৱট্টতি. ‘‘একৱাচিকং পৱাৰেয্যা’’তি ৱুত্তে পন একৱাচিক-দ্ৱেৱাচিক-তেৱাচিকানি ৱট্টন্তি, সমানৱস্সিকমেৱ ন ৱট্টতি. ‘‘সমানৱস্সিক’’ন্তি ৱুত্তে সব্বং ৱট্টতি.

২১১. অচ্ছন্তীতি নিসিন্নাৱ হোন্তি, ন উট্ঠহন্তি. তদমন্তৰাতি তদন্তৰা; তাৱতকং কালন্তি অত্থো.

পৱাৰণাভেদকথা

২১২. চাতুদ্দসিকা চ পন্নৰসিকা চাতি এত্থ চাতুদ্দসিকায ‘‘অজ্জ পৱাৰণা চাতুদ্দসী’’তি এৱং পুব্বকিচ্চং কাতব্বং, পন্নৰসিকায ‘‘অজ্জ পৱাৰণা পন্নৰসী’’তি.

পৱাৰণকম্মেসু সচে একস্মিং ৱিহাৰে পঞ্চসু ভিক্খূসু ৱসন্তেসু একস্স পৱাৰণং আহৰিত্ৱা চত্তাৰো গণঞত্তিং ঠপেত্ৱা পৱাৰেন্তি, চতূসু তীসু ৱা ৱসন্তেসু একস্স পৱাৰণং আহৰিত্ৱা তযো ৱা দ্ৱে ৱা সঙ্ঘঞত্তিং ঠপেত্ৱা পৱাৰেন্তি, সব্বমেতং অধম্মেনৱগ্গং পৱাৰণকম্মং.

সচে পন সব্বেপি পঞ্চ জনা একতো সন্নিপতিত্ৱা গণঞত্তিং ঠপেত্ৱা পৱাৰেন্তি, চত্তাৰো তযো ৱা দ্ৱে ৱা ৱসন্তা একতো সন্নিপতিত্ৱা সঙ্ঘঞত্তিং ঠপেত্ৱা পৱাৰেন্তি, সব্বমেতং অধম্মেনসমগ্গং পৱাৰণকম্মং.

সচে পঞ্চসু জনেসু একস্স পৱাৰণং আহৰিত্ৱা চত্তাৰো সঙ্ঘঞত্তিং ঠপেত্ৱা পৱাৰেন্তি, চতূসু তীসু ৱা একস্স পৱাৰণং আহৰিত্ৱা তযো ৱা দ্ৱে ৱা গণঞত্তিং ঠপেত্ৱা পৱাৰেন্তি, সব্বমেতং ধম্মেনৱগ্গং পৱাৰণকম্মং.

সচে পন সব্বেপি পঞ্চ জনা একতো সন্নিপতিত্ৱা সঙ্ঘঞত্তিং ঠপেত্ৱা পৱাৰেন্তি, চত্তাৰো ৱা তযো ৱা একতো সন্নিপতিত্ৱা গণঞত্তিং ঠপেত্ৱা পৱাৰেন্তি, দ্ৱে অঞ্ঞমঞ্ঞং পৱাৰেন্তি, এককো ৱসন্তো অধিট্ঠানপৱাৰণং কৰোতি, সব্বমেতং ধম্মেনসমগ্গং নাম পৱাৰণকম্মন্তি.

পৱাৰণাদানানুজাননকথা

২১৩. দিন্না হোতি পৱাৰণাতি এত্থ এৱং দিন্নায পৱাৰণায পৱাৰণাহাৰকেন সঙ্ঘং উপসঙ্কমিত্ৱা এৱং পৱাৰেতব্বং – ‘‘তিস্সো ভন্তে ভিক্খু সঙ্ঘং পৱাৰেতি দিট্ঠেন ৱা সুতেন ৱা পৰিসঙ্কায ৱা, ৱদতু তং ভন্তে সঙ্ঘো অনুকম্পং উপাদায, পস্সন্তো পটিকৰিস্সতি. দুতিযম্পি…পে… ততিযম্পি ভন্তে তিস্সো ভিক্খু সঙ্ঘং পৱাৰেতি…পে… পটিকৰিস্সতী’’তি. সচে পন ৱুড্ঢতৰো হোতি, ‘‘আযস্মা ভন্তে তিস্সো’’তি ৱত্তব্বং; এৱঞ্হি তেন তস্সত্থায পৱাৰিতং হোতীতি.

পৱাৰণং দেন্তেন ছন্দম্পি দাতুন্তি এত্থ ছন্দদানং উপোসথক্খন্ধকে ৱুত্তনযেনেৱ ৱেদিতব্বং. ইধাপি চ ছন্দদানং অৱসেসকম্মত্থায. তস্মা সচে পৱাৰণং দেন্তো ছন্দং দেতি, ৱুত্তনযেন আহটায পৱাৰণায তেন চ ভিক্খুনা সঙ্ঘেন চ পৱাৰিতমেৱ হোতি. অথ পৱাৰণমেৱ দেতি, ন ছন্দং, তস্স চ পৱাৰণায আৰোচিতায সঙ্ঘেন চ পৱাৰিতে সব্বেসং সুপ্পৱাৰিতং হোতি, অঞ্ঞং পন কম্মং কুপ্পতি. সচে ছন্দমেৱ দেতি ন পৱাৰণং, সঙ্ঘস্স পৱাৰণা চ সেসকম্মানি চ ন কুপ্পন্তি, তেন পন ভিক্খুনা অপ্পৱাৰিতং হোতি. পৱাৰণদিৱসে পন বহিসীমাযং পৱাৰণং অধিট্ঠহিত্ৱা আগতেনপি ছন্দো দাতব্বো, তেন সঙ্ঘস্স পৱাৰণকম্মং ন কুপ্পতি.

২১৮. অজ্জ মে পৱাৰণাতি এত্থ সচে চাতুদ্দসিকা হোতি, ‘‘অজ্জ মে পৱাৰণা চাতুদ্দসী’’তি সচে পন্নৰসিকা ‘‘অজ্জ মে পৱাৰণা পন্নৰসী’’তি এৱং অধিট্ঠাতব্বং.

২১৯. তদহুপৱাৰণায আপত্তিন্তিআদি ৱুত্তনযমেৱ.

অনাপত্তিপন্নৰসকাদিকথা

২২২. পুন পৱাৰেতব্বন্তি পুন পুব্বকিচ্চং কত্ৱা ঞত্তিং ঠপেত্ৱা সঙ্ঘত্থেৰতো পট্ঠায পৱাৰেতব্বং. সেসং উপোসথক্খন্ধকৱণ্ণনাযং ৱুত্তনযেনেৱ ৱেদিতব্বং.

২২৮. আগন্তুকেহি আৱাসিকানং অনুৱত্তিতব্বন্তি ‘‘অজ্জ পৱাৰণা চাতুদ্দসী’’তি এতদেৱ পুব্বকিচ্চং কাতব্বং. পন্নৰসিকৱাৰেপি এসেৱ নযো. আৱাসিকেহি নিস্সীমং গন্ত্ৱা পৱাৰেতব্বন্তি অস্সাৱসানে অযং পাড়িমুত্তকৱিনিচ্ছযো – সচে পুৰিমিকায পঞ্চ ভিক্খূ ৱস্সং উপগতা, পচ্ছিমিকাযপি পঞ্চ, পুৰিমেহি ঞত্তিং ঠপেত্ৱা পৱাৰিতে পচ্ছিমেহি তেসং সন্তিকে পাৰিসুদ্ধিউপোসথো কাতব্বো, ন একস্মিং উপোসথগ্গে দ্ৱে ঞত্তিযো ঠপেতব্বা. সচেপি পচ্ছিমিকায উপগতা চত্তাৰো তযো দ্ৱে একো ৱা হোতি, এসেৱ নযো. অথ পুৰিমিকায চত্তাৰো পচ্ছিমিকাযপি চত্তাৰো তযো দ্ৱে একো ৱা এসেৱ নযো. অথাপি পুৰিমিকায তযো, পচ্ছিমিকাযপি তযো দ্ৱে ৱা, এসেৱ নযো. ইদঞ্হেত্থ লক্খণং – সচে পুৰিমিকায উপগতেহি পচ্ছিমিকায উপগতা থোকতৰা চেৱ হোন্তি সমসমা চ, সঙ্ঘপৱাৰণায গণং পূৰেন্তি, সঙ্ঘপৱাৰণাৱসেন ঞত্তি ঠপেতব্বাতি.

সচে পন পুৰিমিকায তযো, পচ্ছিমিকায একো হোতি, তেন সদ্ধিং তে চত্তাৰো হোন্তি, চতুন্নং সঙ্ঘঞত্তিং ঠপেত্ৱা পৱাৰেতুং ন ৱট্টতি. গণঞত্তিযা পন সো গণপূৰকো হোতি, তস্মা গণৱসেন ঞত্তিং ঠপেত্ৱা পুৰিমেহি পৱাৰেতব্বং. ইতৰেন তেসং সন্তিকে পাৰিসুদ্ধিউপোসথো কাতব্বো. সচে পুৰিমিকায দ্ৱে পচ্ছিমিকায দ্ৱে ৱা একো ৱা হোতি, এসেৱ নযো. সচে পুৰিমিকায একো, পচ্ছিমিকাযপি একো হোতি, একেন একস্স সন্তিকে পৱাৰেতব্বং, একেন পাৰিসুদ্ধিউপোসথো কাতব্বো. সচে পন পুৰিমৱস্সূপগতেহি পচ্ছিমৱস্সূপগতা একেনপি অধিকতৰা হোন্তি, পঠমং পাতিমোক্খং উদ্দিসিত্ৱা পচ্ছা থোকতৰেহি তেসং সন্তিকে পৱাৰেতব্বং.

কত্তিকচাতুমাসিনিযা পৱাৰণায পন সচে পঠমং ৱস্সূপগতেহি মহাপৱাৰণায পৱাৰিতেহি পচ্ছা উপগতা অধিকতৰা ৱা সমসমা ৱা হোন্তি, পৱাৰণাঞত্তিং ঠপেত্ৱা পৱাৰেতব্বং. তেহি পৱাৰিতে পচ্ছা ইতৰেহি পাৰিসুদ্ধিউপোসথো কাতব্বো. অথ মহাপৱাৰণায পৱাৰিতা বহূ ভিক্খূ হোন্তি, পচ্ছিমৱস্সূপগতা থোকতৰা ৱা একো ৱা, পাতিমোক্খে উদ্দিট্ঠে পচ্ছা তেসং সন্তিকে তেন পৱাৰেতব্বং.

২৩৩. ন চ ভিক্খৱে অপ্পৱাৰণায পৱাৰেতব্বং, অঞ্ঞত্ৰ সঙ্ঘসামগ্গিযাতি এত্থ কোসম্বকসামগ্গীসদিসাৱ সামগ্গী ৱেদিতব্বা. ‘‘অজ্জ পৱাৰণা সামগ্গী’’তি এৱঞ্চেত্থ পুব্বকিচ্চং কাতব্বং. যে পন কিস্মিঞ্চিদেৱ অপ্পমত্তকে পৱাৰণং ঠপেত্ৱা সমগ্গা হোন্তি, তেহি পৱাৰণাযমেৱ পৱাৰণা কাতব্বা. সামগ্গীপৱাৰণং কৰোন্তেহি চ পঠমপৱাৰণং ঠপেত্ৱা পাটিপদতো পট্ঠায যাৱ কত্তিকচাতুমাসিনী পুণ্ণমা, এত্থন্তৰে কাতব্বা, ততো পচ্ছা ৱা পুৰে ৱা ন ৱট্টতি.

দ্ৱেৱাচিকাদিপৱাৰণাকথা

২৩৪. দ্ৱেৱাচিকং পৱাৰেতুন্তি এত্থ ঞত্তিং ঠপেন্তেনাপি ‘‘যদি সঙ্ঘস্স পত্তকল্লং সঙ্ঘো দ্ৱেৱাচিকং পৱাৰেয্যা’’তি ৱত্তব্বং, একৱাচিকে ‘‘একৱাচিকং পৱাৰেয্যা’’তি, সমানৱস্সিকেপি ‘‘সমানৱস্সিকং পৱাৰেয্যা’’তি ৱত্তব্বং, এত্থ চ বহূপি সমানৱস্সা একতো পৱাৰেতুং লভন্তি.

পৱাৰণাঠপনকথা

২৩৬. ভাসিতায লপিতায অপৰিযোসিতাযাতি এত্থ সব্বসঙ্গাহিকঞ্চ পুগ্গলিকঞ্চাতি দুৱিধং পৱাৰণাঠপনং. তত্থ সব্বসঙ্গাহিকে ‘‘সুণাতু মে ভন্তে সঙ্ঘো…পে… সঙ্ঘো তেৱাচিকং পৱাৰে’’ ইতি সুকাৰতো যাৱ ৰেকাৰো, তাৱ ভাসিতা লপিতা অপৰিযোসিতাৱ হোতি পৱাৰণা. এত্থন্তৰে একপদেপি ঠপেন্তেন ঠপিতা হোতি পৱাৰণা. ‘য্য’কাৰে পন পত্তে পৰিযোসিতা হোতি, তস্মা ততো পট্ঠায ঠপেন্তেন ঠপিতাপি অট্ঠপিতা হোতি. পুগ্গলিকঠপনে পন – ‘‘সঙ্ঘং ভন্তে পৱাৰেমি…পে… ততিযম্পি ভন্তে সঙ্ঘং পৱাৰেমি দিট্ঠেন ৱা…পে… পস্সন্তো পটী’’তি সঙ্কাৰতো যাৱ অযং সব্বপচ্ছিমো ‘টি’কাৰো তাৱ ভাসিতা লপিতা অপৰিযোসিতাৱ হোতি পৱাৰণা, এত্থন্তৰে একপদেপি ঠপেন্তেন ঠপিতা হোতি পৱাৰণা, ‘‘কৰিস্সামী’’তি ৱুত্তে পন পৰিযোসিতা হোতি, তস্মা ‘‘কৰিস্সামী’’তি এতস্মিং পদে পত্তে ঠপিতাপি অট্ঠপিতা হোতি. এস নযো দ্ৱেৱাচিকএকৱাচিকসমানৱস্সিকাসুপি. এতাসুপি হি টিকাৰাৱসানংযেৱ ঠপনখেত্তন্তি.

২৩৭. অনুযুঞ্জিযমানোতি ‘‘কিম্হি নং ঠপেসী’’তি পৰতো ৱুত্তনযেন পুচ্ছিযমানো. ওমদ্দিত্ৱাতি এতানি ‘‘অলং ভিক্খু মা ভণ্ডন’’ন্তিআদীনি ৱচনানি ৱত্ৱা, ৱচনোমদ্দনা হি ইধ ওমদ্দনাতি অধিপ্পেতা. অনুদ্ধংসিতং পটিজানাতীতি ‘‘অমূলকেন পাৰাজিকেন অনুদ্ধংসিতো অযং মযা’’তি এৱং পটিজানাতি. যথাধম্মন্তি সঙ্ঘাদিসেসেন অনুদ্ধংসনে পাচিত্তিযং; ইতৰেহি দুক্কটং. নাসেত্ৱাতি লিঙ্গনাসনায নাসেত্ৱা.

২৩৮. সাস্স যথাধম্মং পটিকতাতি এত্তকমেৱ ৱত্ৱা পৱাৰেথাতি ৱত্তব্বা, অসুকা নাম আপত্তীতি ইদং পন ন ৱত্তব্বং, এতঞ্হি কলহস্স মুখং হোতি.

ৱত্থুঠপনাদিকথা

২৩৯. ইদং ৱত্থু পঞ্ঞাযতি ন পুগ্গলোতি এত্থ চোৰা কিৰ অৰঞ্ঞৱিহাৰে পোক্খৰণিতো মচ্ছে গহেত্ৱা পচিত্ৱা খাদিত্ৱা অগমংসু. সো তং ৱিপ্পকাৰং দিস্ৱা আৰামে ৱা কিঞ্চি ধুত্তেন কতং ৱিপ্পকাৰং দিস্ৱা ‘‘ভিক্খুস্স ইমিনা কম্মেন ভৱিতব্ব’’ন্তি সল্লক্খেত্ৱা এৱমাহ. ৱত্থুং ঠপেত্ৱা সঙ্ঘো পৱাৰেয্যাতি ‘‘যদা তং পুগ্গলং জানিস্সাম, তদা নং চোদেস্সাম. ইদানি পন সঙ্ঘো পৱাৰেতূ’’তি অযমেত্থ অত্থো. ইদানেৱ নং ৱদেহীতি সচে ইমিনা ৱত্থুনা কঞ্চি পুগ্গলং পৰিসঙ্কসি, ইদানেৱ নং অপদিসাহীতি অত্থো. সচে অপদিসতি, তং পুগ্গলং অনুৱিজ্জিত্ৱা পৱাৰেতব্বং; নো চে অপদিসতি, উপপৰিক্খিত্ৱা জানিস্সামাতি পৱাৰেতব্বং.

অযং পুগ্গলো পঞ্ঞাযতি ন ৱত্থূতি এত্থ একো ভিক্খু মালাগন্ধৱিলেপনেহি চেতিযং ৱা পূজেসি, অৰিট্ঠং ৱা পিৱি, তস্স তদনুৰূপো সৰীৰগন্ধো অহোসি; সো তং গন্ধং সন্ধায ‘‘ইমস্স ভিক্খুনো এৱৰূপো সৰীৰগন্ধো’’তি ৱত্থুং পকাসেন্তো এৱমাহ. পুগ্গলং ঠপেত্ৱা সঙ্ঘো পৱাৰেয্যাতি এতং পুগ্গলং ঠপেত্ৱা সঙ্ঘো পৱাৰেতু. ইদানেৱ নং ৱদেহীতি যং ত্ৱং পুগ্গলং ঠপেসি, তস্স পুগ্গলস্স ইদানেৱ দোসং ৱদ. সচে অযমস্স দোসোতি ৱদতি, তং পুগ্গলং সোধেত্ৱা পৱাৰেতব্বং. অথ নাহং জানামীতি ৱদতি, উপপৰিক্খিত্ৱা জানিস্সামাতি পৱাৰেতব্বং.

ইদং ৱত্থু চ পুগ্গলো চ পঞ্ঞাযতীতি পুৰিমনযেনেৱ চোৰেহি মচ্ছে গহেত্ৱা পচিত্ৱা পৰিভুত্তট্ঠানঞ্চ গন্ধাদীহি নহানট্ঠানঞ্চ দিস্ৱা ‘‘পব্বজিতস্স কম্ম’’ন্তি মঞ্ঞমানো সো এৱমাহ. ইদানেৱ নং ৱদেহীতি ইদানেৱ তেন ৱত্থুনা পৰিসঙ্কিতং পুগ্গলং ৱদেহি; ইদং পন উভযম্পি দিস্ৱা দিট্ঠকালতো পট্ঠায ৱিনিচ্ছিনিত্ৱাৱ পৱাৰেতব্বং. কল্লং ৱচনাযাতি কল্লং চোদনায; চোদেতুং ৱট্টতীতি অত্থো. কস্মা? পৱাৰণতো পুব্বে অৱিনিচ্ছিতত্তা পচ্ছা চ দিস্ৱা চোদিতত্তাতি. উক্কোটনকং পাচিত্তিযন্তি ইদঞ্হি উভযং পুব্বে পৱাৰণায দিস্ৱা ৱিনিচ্ছিনিত্ৱাৱ ভিক্খূ পৱাৰেন্তি, তস্মা পুন তং উক্কোটেন্তস্স আপত্তি.

ভণ্ডনকাৰকৱত্থুকথা

২৪০. দ্ৱে তযো উপোসথে চাতুদ্দসিকে কাতুন্তি এত্থ চতুত্থপঞ্চমা দ্ৱে, ততিযো পন পকতিযাপি চতুদ্দসিকোযেৱাতি. তস্মা ততিযচতুত্থা ৱা ততিযচতুত্থপঞ্চমা ৱা দ্ৱে তযো চাতুদ্দসিকা কাতব্বা. অথ চতুত্থে কতে সুণন্তি, পঞ্চমো চাতুদ্দসিকো কাতব্বো. এৱম্পি দ্ৱে চাতুদ্দসিকা হোন্তি. এৱং কৰোন্তা ভণ্ডনকাৰকানং তেৰসে ৱা চাতুদ্দসে ৱা ইমে পন্নৰসীপৱাৰণং পৱাৰেস্সন্তি. এৱং পৱাৰেন্তেহি চ বহিসীমায সামণেৰে ঠপেত্ৱা ‘‘তে আগচ্ছন্তী’’তি সুত্ৱা লহুং লহুং সন্নিপতিত্ৱা পৱাৰেতব্বং. এতমত্থং দস্সেতুং ‘‘তে চে ভিক্খৱে…পে… তথা কৰোন্তূ’’তি ৱুত্তং.

অসংৱিহিতাতি সংৱিদহনৰহিতা আগমনজাননত্থায অকতসংৱিদহিতা; অৱিঞ্ঞাতাৱ হুত্ৱাতি অত্থো. তেসং ৱিক্খিত্ৱাতি ‘‘কিলন্তত্থ মুহুত্তং ৱিস্সমথা’’তিআদিনা নযেন সম্মোহং কত্ৱাতি অত্থো. নো চে লভেথাতি নো চে বহিসীমং গন্তুং লভেয্যুং; ভণ্ডনকাৰকানং সামণেৰেহি চ দহৰভিক্খূহি চ নিৰন্তৰং অনুবদ্ধাৱ হোন্তি. আগমে জুণ্হেতি যং সন্ধায আগমে জুণ্হে পৱাৰেয্যামাতি ঞত্তিং ঠপেসুং, তস্মিং আগমে জুণ্হে কোমুদিযা চাতুমাসিনিযা অকামা পৱাৰেতব্বং, অৱস্সং পৱাৰেতব্বং, ন হি তং অতিক্কমিত্ৱা পৱাৰেতুং লব্ভতি. তেহি চে ভিক্খৱে ভিক্খূহি পৱাৰিযমানেতি এৱং চাতুমাসিনিযা পৱাৰিযমানে.

পৱাৰণাসঙ্গহকথা

২৪১. অঞ্ঞতৰো ফাসুৱিহাৰোতি তৰুণসমথো ৱা তৰুণৱিপস্সনা ৱা. পৰিবাহিৰা ভৱিস্সামাতি অনিবদ্ধৰত্তিট্ঠানদিৱাট্ঠানাদিভাৱেন ভাৱনানুযোগং সম্পাদেতুং অসক্কোন্তা বাহিৰা ভৱিস্সাম. সব্বেহেৱ একজ্ঝং সন্নিপতিতব্বন্তি ইমিনা ছন্দদানং পটিক্খিপতি. ভিন্নস্স হি সঙ্ঘস্স সমগ্গকৰণকালে তিণৱত্থাৰকসমথে ইমস্মিঞ্চ পৱাৰণাসঙ্গহেতি ইমেসু তীসু ঠানেসু ছন্দং দাতুং ন ৱট্টতি. পৱাৰণাসঙ্গহো নামাযং ৱিস্সট্ঠকম্মট্ঠানানং থামগতসমথৱিপস্সনানং সোতাপন্নাদীনঞ্চ ন দাতব্বো. তৰুণসমথৱিপস্সনালাভিনো পন সব্বে ৱা হোন্তু, উপড্ঢা ৱা, একপুগ্গলো ৱা একস্সপি ৱসেন দাতব্বোযেৱ. দিন্নে পৱাৰণাসঙ্গহে অন্তোৱস্সে পৰিহাৰোৱ হোতি, আগন্তুকা তেসং সেনাসনং গহেতুং ন লভন্তি. তেহিপি ছিন্নৱস্সেহি ন ভৱিতব্বং, পৱাৰেত্ৱা পন অন্তৰাপি চাৰিকং পক্কমিতুং লভন্তীতি দস্সনত্থং ‘‘তেহি চে ভিক্খৱে’’তিআদিমাহ. সেসং সব্বত্থ উত্তানমেৱাতি.

পৱাৰণাক্খন্ধকৱণ্ণনা নিট্ঠিতা.