১. ৰহোগতৱগ্গো

১-২. পঠমৰহোগতসুত্তাদিৱণ্ণনা

৮৯৯-৯০০. অনুৰুদ্ধসংযুত্তস্স পঠমে আৰদ্ধাতি পৰিপুণ্ণা. সঙ্খেপতো পনেত্থ ছত্তিংসায ঠানেসু অৰহত্তং পাপেত্ৱা ৱিপস্সনা কথিতা, দুতিযে দ্ৱাদসসু ঠানেসু অৰহত্তং পাপেত্ৱা ৱিপস্সনা কথিতা.

৩. সুতনুসুত্তৱণ্ণনা

৯০১. ততিযে মহাভিঞ্ঞতন্তি ছঅভিঞ্ঞাভাৱং. হীনং ধম্মন্তিআদীসু ইমায পাড়িযা অত্থো ৱেদিতব্বো –

‘‘কতমে ধম্মা হীনা? দ্ৱাদস অকুসলচিত্তুপ্পাদা, ইমে ধম্মা হীনা. কতমে ধম্মা মজ্ঝিমা? তীসু ভূমীসু কুসলং, তীসু ভূমীসু ৱিপাকো, তীসু ভূমীসু কিৰিযাব্যাকতং সব্বঞ্চ ৰূপং, ইমে ধম্মা মজ্ঝিমা. কতমে ধম্মা পণীতা? চত্তাৰো মগ্গা অপৰিযাপন্না, চত্তাৰি চ সামঞ্ঞফলানি নিব্বানঞ্চ, ইমে ধম্মা পণীতা’’তি (ধ. স. ১৪২৩-১৪২৫).

৪-৭. পঠমকণ্ডকীসুত্তাদিৱণ্ণনা

৯০২-৯০৫. চতুত্থে কণ্ডকীৱনেতি মহাকৰমন্দৱনে. ছট্ঠে সহস্সং লোকন্তি ইমিনা থেৰস্স সতত ৱিহাৰো দস্সিতো. থেৰো হি পাতোৱ মুখং ধোৱিত্ৱা অতীতানাগতে কপ্পসহস্সং অনুস্সৰতি. পচ্চুপ্পন্নে পন দসচক্কৱাড়সহস্সং একাৱজ্জনস্স আপাথমাগচ্ছতি. সত্তমং উত্তানমেৱ.

৮. সলড়াগাৰসুত্তৱণ্ণনা

৯০৬. অট্ঠমে সলড়াগাৰেতি সলড়ৰুক্খমযায পণ্ণসালায, সলড়ৰুক্খস্স ৱা দ্ৱাৰে ঠিতত্তা এৱংনামকে অগাৰে. ইমস্মিং সুত্তে ৱিপস্সনায সদ্ধিং ৱিপস্সকপুগ্গলো কথিতো.

৯. অম্বপালিৱনসুত্তৱণ্ণনা

৯০৭. নৱমে আসভিং ৱাচন্তি অত্তনো অৰহত্তভাৱদীপকং উত্তমৱাচং. সেসং সব্বত্থ উত্তানত্থমেৱাতি.

ৰহোগতৱগ্গো পঠমো.