৯. অনিমিত্তপঞ্হাসুত্তৱণ্ণনা

৩৪০. অনিমিত্তং চেতোসমাধিন্তি নিচ্চনিমিত্তাদীনি পহায পৱত্তং ৱিপস্সনাসমাধিংযেৱ সন্ধাযেতং ৱুত্তন্তি. নিমিত্তানুসাৰি ৱিঞ্ঞাণং হোতীতি এৱং ইমিনা ৱিপস্সনাসমাধিৱিহাৰেন ৱিহৰতো ৱিপস্সনাঞাণে তিক্খে সূৰে ৱহমানে. যথা নাম পুৰিসস্স তিখিণেন ফৰসুনা ৰুক্খং ছিন্দন্তস্স ‘‘সুট্ঠু ৱত মে ফৰসু ৱহতী’’তি খণে খণে ফৰসুধাৰং ওলোকেন্তস্স ছেজ্জকিচ্চং ন নিপ্ফজ্জতি, এৱং থেৰস্সাপি ‘‘সূৰং ৱত মে হুত্ৱা ঞাণং ৱহতী’’তি ৱিপস্সনং আৰব্ভ নিকন্তি উপ্পজ্জতি. অথ ৱিপস্সনাকিচ্চং সাধেতুং নাসক্খি. তং সন্ধায ৱুত্তং ‘‘নিমিত্তানুসাৰি ৱিঞ্ঞাণং হোতী’’তি. সব্বনিমিত্তানং অমনসিকাৰা অনিমিত্তং চেতোসমাধিং উপসম্পজ্জ ৱিহাসিন্তি সব্বেসং নিচ্চসুখঅত্তনিমিত্তানং অমনসিকাৰেন অনিমিত্তং ৱুট্ঠানগামিনিৱিপস্সনাসম্পযুত্তং চেতোসমাধিং নিব্বানাৰম্মণং উপৰিমগ্গফলসমাধিং উপসম্পজ্জ ৱিহাসিং.