৬. মোগ্গল্লানসংযুত্তং

১-৮. পঠমঝানপঞ্হাসুত্তাদিৱণ্ণনা

৩৩২-৩৩৯. মোগ্গল্লানসংযুত্তে কামসহগতাতি পঞ্চনীৱৰণসহগতা. তস্স হি পঠমজ্ঝানৱুট্ঠিতস্স পঞ্চ নীৱৰণানি সন্ততো উপট্ঠহিংসু. তেনস্স তং পঠমজ্ঝানং হানভাগিযং নাম অহোসি. তং পমাদং ঞত্ৱা সত্থা ‘‘মা পমাদো’’তি ওৱাদং অদাসি. দুতিযজ্ঝানাদীসুপি ইমিনাৱ নযেন অত্থো ৱেদিতব্বো. আৰম্মণসহগতমেৱ হেত্থ ‘‘সহগত’’ন্তি ৱুত্তং.

৯. অনিমিত্তপঞ্হাসুত্তৱণ্ণনা

৩৪০. অনিমিত্তং চেতোসমাধিন্তি নিচ্চনিমিত্তাদীনি পহায পৱত্তং ৱিপস্সনাসমাধিংযেৱ সন্ধাযেতং ৱুত্তন্তি. নিমিত্তানুসাৰি ৱিঞ্ঞাণং হোতীতি এৱং ইমিনা ৱিপস্সনাসমাধিৱিহাৰেন ৱিহৰতো ৱিপস্সনাঞাণে তিক্খে সূৰে ৱহমানে. যথা নাম পুৰিসস্স তিখিণেন ফৰসুনা ৰুক্খং ছিন্দন্তস্স ‘‘সুট্ঠু ৱত মে ফৰসু ৱহতী’’তি খণে খণে ফৰসুধাৰং ওলোকেন্তস্স ছেজ্জকিচ্চং ন নিপ্ফজ্জতি, এৱং থেৰস্সাপি ‘‘সূৰং ৱত মে হুত্ৱা ঞাণং ৱহতী’’তি ৱিপস্সনং আৰব্ভ নিকন্তি উপ্পজ্জতি. অথ ৱিপস্সনাকিচ্চং সাধেতুং নাসক্খি. তং সন্ধায ৱুত্তং ‘‘নিমিত্তানুসাৰি ৱিঞ্ঞাণং হোতী’’তি. সব্বনিমিত্তানং অমনসিকাৰা অনিমিত্তং চেতোসমাধিং উপসম্পজ্জ ৱিহাসিন্তি সব্বেসং নিচ্চসুখঅত্তনিমিত্তানং অমনসিকাৰেন অনিমিত্তং ৱুট্ঠানগামিনিৱিপস্সনাসম্পযুত্তং চেতোসমাধিং নিব্বানাৰম্মণং উপৰিমগ্গফলসমাধিং উপসম্পজ্জ ৱিহাসিং.

১০-১১. সক্কসুত্তাদিৱণ্ণনা

৩৪১-৩৪২. অৱেচ্চপ্পসাদেনাতি অচলপ্পসাদেন. দসহি ঠানেহীতি দসহি কাৰণেহি. অধিগণ্হন্তীতি অভিভৱন্তি, অতিক্কমিত্ৱা তিট্ঠন্তি. সেসং সব্বত্থ উত্তানত্থমেৱাতি.

মোগ্গল্লানসংযুত্তৱণ্ণনা নিট্ঠিতা.