১৫. নৱপুৰাণৱগ্গো

১. কম্মনিৰোধসুত্তৱণ্ণনা

১৪৬. নৱপুৰাণৱগ্গস্স পঠমে নৱপুৰাণানীতি নৱানি চ পুৰাণানি চ. চক্খু, ভিক্খৱে, পুৰাণকম্মন্তি ন চক্খু পুৰাণং, কম্মমেৱ পুৰাণং, কম্মতো পন নিব্বত্তত্তা পচ্চযনামেন এৱং ৱুত্তং. অভিসঙ্খতন্তি পচ্চযেহি অভিসমাগন্ত্ৱা কতং. অভিসঞ্চেতযিতন্তি চেতনায পকপ্পিতং. ৱেদনিযং দট্ঠব্বন্তি ৱেদনায ৱত্থূতি পস্সিতব্বং. নিৰোধা ৱিমুত্তিং ফুসতীতি ইমস্স তিৱিধস্স কম্মস্স নিৰোধেন ৱিমুত্তিং ফুসতি. অযং ৱুচ্চতীতি অযং তস্সা ৱিমুত্তিযা আৰম্মণভূতো নিৰোধো কম্মনিৰোধোতি ৱুচ্চতি. ইতি ইমস্মিং সুত্তে পুব্বভাগৱিপস্সনা কথিতা.

২-৫. অনিচ্চনিব্বানসপ্পাযসুত্তাদিৱণ্ণনা

১৪৭-১৫০. দুতিযে নিব্বানসপ্পাযন্তি নিব্বানস্স সপ্পাযং উপকাৰপটিপদং. ততিযাদীসুপি এসেৱ নযো. পটিপাটিযা পন চতূসুপি এতেসু সুত্তেসু সহ ৱিপস্সনায চত্তাৰো মগ্গা কথিতা.

৬-৭. অন্তেৱাসিকসুত্তাদিৱণ্ণনা

১৫১-১৫২. ছট্ঠে অনন্তেৱাসিকন্তি অন্তো ৱসনককিলেসৱিৰহিতং. অনাচৰিযকন্তি আচৰণককিলেসৱিৰহিতং. অন্তস্স ৱসন্তীতি অন্তো অস্স ৱসন্তি. তে নং সমুদাচৰন্তীতি তে এতং অধিভৱন্তি অজ্ঝোত্থৰন্তি সিক্খাপেন্তি ৱা. ‘‘এৱং ৱেজ্জকম্মং কৰোহি, এৱং দূতকম্ম’’ন্তি ইতি সিক্খাপনসঙ্খাতেন সমুদাচৰণত্থেনস্স তে আচৰিযা নাম হোন্তি, তেহি আচৰিযেহি সাচৰিযকোতি ৱুচ্চতি. সেসমেত্থ ৱুত্তনযেনেৱ ৱেদিতব্বং. সত্তমং হেট্ঠা কথিতনযমেৱ.

৮. অত্থিনুখোপৰিযাযসুত্তৱণ্ণনা

১৫৩. অট্ঠমে যং পৰিযাযং আগম্মাতি যং কাৰণং আগম্ম. অঞ্ঞত্ৰেৱ সদ্ধাযাতি ৱিনা সদ্ধায সদ্ধং অপনেত্ৱা. এত্থ চ সদ্ধাতি ন পচ্চক্খা সদ্ধা. যো পন পৰস্স এৱং কিৰ এৱং কিৰাতি কথেন্তস্স সুত্ৱা উপ্পন্নো সদ্দহনাকাৰো, তং সন্ধাযেতং ৱুত্তং. ৰুচিআদীসুপি ৰুচাপেত্ৱা খমাপেত্ৱা অত্থেতন্তি গহণাকাৰো ৰুচি নাম, এৱং কিৰ ভৱিস্সতীতি অনুস্সৱনং অনুস্সৱো, নিসীদিত্ৱা একং কাৰণং চিন্তেন্তস্স কাৰণং উপট্ঠাতি, এৱং উপট্ঠিতস্স অত্থেতন্তি গহণং আকাৰপৰিৱিতক্কো নাম, কাৰণৱিতক্কোতি অত্থো. কাৰণং চিন্তেন্তস্স পাপিকা লদ্ধি উপ্পজ্জতি, তং অত্থেসাতি গহণাকাৰো দিট্ঠিনিজ্ঝানক্খন্তি নাম. অঞ্ঞং ব্যাকৰেয্যাতি ইমানি পঞ্চ ঠানানি মুঞ্চিত্ৱা অৰহত্তং ব্যাকৰেয্য. ইমস্মিং সুত্তে সেখাসেখানং পচ্চৱেক্খণা কথিতা.

৯-১০. ইন্দ্ৰিযসম্পন্নসুত্তাদিৱণ্ণনা

১৫৪-১৫৫. নৱমে ইন্দ্ৰিযসম্পন্নোতি পৰিপুণ্ণিন্দ্ৰিযো. তত্থ যেন ছ ইন্দ্ৰিযানি সম্মসিত্ৱা অৰহত্তং পত্তং, সো তেহি নিব্বিসেৱনেহি ইন্দ্ৰিযেহি সমন্নাগতত্তা, চক্খাদীনি ৱা ছ ইন্দ্ৰিযানি সম্মসন্তস্স উপ্পন্নেহি সদ্ধাদীহি ইন্দ্ৰিযেহি সমন্নাগতত্তা পৰিপুণ্ণিন্দ্ৰিযো নাম হোতি, তং সন্ধায ভগৱা চক্খুন্দ্ৰিযে চেতিআদিনা নযেন দেসনং ৱিত্থাৰেত্ৱা এত্তাৱতা খো ভিক্খু ইন্দ্ৰিযসম্পন্নো হোতীতি আহ. দসমং হেট্ঠা ৱুত্তনযমেৱাতি.

নৱপুৰাণৱগ্গো পঞ্চদসমো.

ততিযো পণ্ণাসকো.