৯. সুপণ্ণসংযুত্তৱণ্ণনা

৩৯২-৪৩৭. সুপণ্ণসংযুত্তে পত্তানং ৱণ্ণৱন্ততায গৰুড়া সুপণ্ণাতি ৱুত্তা. ইধাপি পঠমসুত্তং পুৰিমনযেনেৱ অট্ঠুপ্পত্তিযং ৱুত্তং. হৰন্তীতি উদ্ধৰন্তি. উদ্ধৰমানা চ পন তে অত্তনা হীনে ৱা সমে ৱা উদ্ধৰিতুং সক্কোন্তি, ন অত্তনা পণীততৰে. সত্তৱিধা হি অনুদ্ধৰণীযনাগা নাম পণীততৰা কম্বলস্সতৰা ধতৰট্ঠা সত্তসীদন্তৰৱাসিনো পথৱিট্ঠকা পব্বতট্ঠকা ৱিমানট্ঠকাতি. তত্ৰ অণ্ডজাদীনং জলাবুজাদযো পণীততৰা, তে তেহি অনুদ্ধৰণীযা. কম্বলস্সতৰা পন নাগসেনাপতিনো, তে যত্থ কত্থচি দিস্ৱা যো কোচি সুপণ্ণো উদ্ধৰিতুং ন সক্কোতি. ধতৰট্ঠা পন নাগৰাজানো, তেপি কোচি উদ্ধৰিতুং ন সক্কোতি. যে পন সত্তসীদন্তৰে মহাসমুদ্দে ৱসন্তি, তে যস্মা কত্থচি ৱিকম্পনং কাতুং ন সক্কা, তস্মা কোচি উদ্ধৰিতুং ন সক্কোতি. পথৱিট্ঠকাদীনং নিলীযনোকাসো অত্থি, তস্মা তেপি উদ্ধৰিতুং ন সক্কোতি. যে পন মহাসমুদ্দে ঊমিপিট্ঠে ৱসন্তি, তে যো কোচি সমো ৱা পণীততৰো ৱা সুপণ্ণো উদ্ধৰিতুং সক্কোতি. সেসং নাগসংযুত্তে ৱুত্তনযমেৱাতি.

সুপণ্ণসংযুত্তৱণ্ণনা নিট্ঠিতা.