১০. গন্ধব্বকাযসংযুত্তৱণ্ণনা

৪৩৮-৫৪৯. গন্ধব্বকাযসংযুত্তে মূলগন্ধে অধিৱত্থাতি যস্স ৰুক্খস্স মূলে গন্ধো অত্থি, তং নিস্সায নিব্বত্তা. সো হি সকলোপি ৰুক্খো তেসং উপকপ্পতি. সেসপদেসুপি এসেৱ নযো. গন্ধগন্ধেতি মূলাদিগন্ধানং গন্ধে. যস্স হি ৰুক্খস্স সব্বেসম্পি মূলাদীনং গন্ধো অত্থি, সো ইধ গন্ধো নাম. তস্স গন্ধস্স গন্ধে, তস্মিং অধিৱত্থা. ইধ মূলাদীনি সব্বানি তেসংযেৱ উপকপ্পন্তি. সো দাতা হোতি মূলগন্ধানন্তি সো কাড়ানুসাৰিকাদীনং মূলগন্ধানং দাতা হোতি. এৱং সব্বপদেসু অত্থো ৱেদিতব্বো. এৱঞ্হি সৰিক্খদানম্পি দত্ৱা পত্থনং ঠপেন্তি, অসৰিক্খদানম্পি. তং দস্সেতুং সো অন্নং দেতীতিআদি দসৱিধং দানৱত্থু ৱুত্তং. সেসং সব্বত্থ উত্তানমেৱাতি.

গন্ধব্বকাযসংযুত্তৱণ্ণনা নিট্ঠিতা.