১১. ৱলাহকসংযুত্তৱণ্ণনা

৫৫০-৬০৬. ৱলাহকসংযুত্তে ৱলাহককাযিকাতি ৱলাহকনামকে দেৱকাযে উপ্পন্না আকাসচাৰিকদেৱা. সীতৱলাহকাতি সীতকৰণৱলাহকা. সেসপদেসুপি এসেৱ নযো. চেতোপণিধিমন্ৱাযাতি চিত্তট্ঠপনং আগম্ম. সীতং হোতীতি যং ৱস্সানে ৱা হেমন্তে ৱা সীতং হোতি, তং উতুসমুট্ঠানমেৱ. যং পন সীতেপি অতিসীতং, গিম্হে চ উপ্পন্নং সীতং, তং দেৱতানুভাৱেন নিব্বত্তং সীতং নাম. উণ্হং হোতীতি যং গিম্হানে উণ্হং, তং উতুসমুট্ঠানিকং পাকতিকমেৱ. যং পন উণ্হেপি অতিউণ্হং, সীতকালে চ উপ্পন্নং উণ্হং, তং দেৱতানুভাৱেন নিব্বত্তং উণ্হং নাম. অব্ভং হোতীতি অব্ভমণ্ডপো হোতি. ইধাপি যং ৱস্সানে চ সিসিৰে চ অব্ভং উপ্পজ্জতি, তং উতুসমুট্ঠানিকং পাকতিকমেৱ. যং পন অব্ভেযেৱ অতিঅব্ভং, সত্তসত্তাহম্পি চন্দসূৰিযে ছাদেত্ৱা একন্ধকাৰং কৰোতি, যঞ্চ চিত্তৱেসাখমাসেসু অব্ভং, তং দেৱতানুভাৱেন উপ্পন্নং অব্ভং নাম. ৱাতো হোতীতি যো তস্মিং তস্মিং উতুম্হি উত্তৰদক্খিণাদিপকতিৱাতো হোতি, অযং উতুসমুট্ঠানোৱ. যোপি পন ৰুক্খক্খন্ধাদিপদালনো অতিৱাতো নাম অত্থি, অযঞ্চেৱ, যো চ অঞ্ঞোপি অকালৱাতো, অযং দেৱতানুভাৱনিব্বত্তো নাম. দেৱো ৱস্সতীতি যং ৱস্সিকে চত্তাৰো মাসে ৱস্সং, তং উতুসমুট্ঠানমেৱ. যং পন ৱস্সেযেৱ অতিৱস্সং, যঞ্চ চিত্তৱেসাখমাসেসু ৱস্সং, তং দেৱতানুভাৱনিব্বত্তং নাম.

তত্ৰিদং ৱত্থু – একো কিৰ ৱস্সৱলাহকদেৱপুত্তো তলকূটকৱাসি খীণাসৱত্থেৰস্স সন্তিকং গন্ত্ৱা ৱন্দিত্ৱা অট্ঠাসি. থেৰো ‘‘কোসি ত্ৱ’’ন্তি পুচ্ছি. ‘‘অহং, ভন্তে, ৱস্সৱলাহকদেৱপুত্তো’’তি. ‘‘তুম্হাকং কিৰ চিত্তেন দেৱো ৱস্সতী’’তি? ‘‘আম, ভন্তে’’তি. ‘‘পস্সিতুকামা ময’’ন্তি. ‘‘তেমিস্সথ, ভন্তে’’তি. ‘‘মেঘসীসং ৱা গজ্জিতং ৱা ন পঞ্ঞাযতি, কথং তেমিস্সামা’’তি? ‘‘ভন্তে, অম্হাকংচিত্তেন দেৱো ৱস্সতি, তুম্হে পণ্ণসালং পৱিসথা’’তি. ‘‘সাধু দেৱপুত্তা’’তি সো পাদে ধোৱিত্ৱা পণ্ণসালং পাৱিসি. দেৱপুত্তো তস্মিং পৱিসন্তেযেৱ একং গীতং গাযিত্ৱা হত্থং উক্খিপি. সমন্তা তিযোজনট্ঠানং একমেঘং অহোসি. থেৰো অদ্ধতিন্তো পণ্ণসালং পৱিট্ঠোতি. অপিচ দেৱো নামেস অট্ঠহি কাৰণেহি ৱস্সতি নাগানুভাৱেন সুপণ্ণানুভাৱেন দেৱতানুভাৱেন সচ্চকিৰিযায উতুসমুট্ঠানেন মাৰাৱট্টনেন ইদ্ধিবলেন ৱিনাসমেঘেনাতি.

ৱলাহকসংযুত্তৱণ্ণনা নিট্ঠিতা.