১. সোতাপত্তিৱগ্গো

১. ৱাতসুত্তৱণ্ণনা

২০৬. দিট্ঠিসংযুত্তে ন ৱাতা ৱাযন্তীতিআদীসু এৱং কিৰ তেসং দিট্ঠি – ‘‘যেপি এতে ৰুক্খসাখাদীনি ভঞ্জন্তা ৱাতা ৱাযন্তি, ন এতে ৱাতা, ৱাতলেসো নামেসো, ৱাতো পন এসিকত্থম্ভো ৱিয পব্বতকূটং ৱিয চ ঠিতো. তথা যাপি এতা তিণকট্ঠাদীনি ৱহন্তিযো নদিযো সন্দন্তি, ন এত্থ উদকং সন্দকি, উদকলেসো নামেস, উদকং পন এসিকত্থম্ভো ৱিয পব্বতকূটং ৱিয চ ঠিতং. যাপিমা গব্ভিনিযো ৱিজাযন্তীতি চ ৱুচ্চন্তি, কিঞ্চাপি তা মিলাতুদৰা হোন্তি, গব্ভো পন ন নিক্খমতি, গব্ভলেসো নামেসো, গব্ভো পন এসিকত্থম্ভো ৱিয পব্বতকূটং ৱিয চ ঠিতো. যেপি এতে চন্দিমসূৰিযা উদেন্তি ৱা অপেন্তি ৱা, নেৱ তে উদেন্তি ন অপেন্তি, চন্দিমসূৰিযলেসো নামেস, চন্দিমসূৰিযা পন এসিকত্থম্ভো ৱিয পব্বতকূটং ৱিয চ ঠিতা’’তি.

২-৪. এতংমমসুত্তাদিৱণ্ণনা

২০৭-২০৯. দিট্ঠন্তিআদীসু দিট্ঠং ৰূপাযতনং. সুতং সদ্দাযতনং. মুতং গন্ধাযতনং ৰসাযতনং ফোট্ঠব্বাযতনং. তঞ্হি পত্ৱা গহেতব্বতো মুতন্তি চ ৱুত্তং. অৱসেসানি সত্তাযতনানি ৱিঞ্ঞাতং নাম. পত্তন্তি পৰিযেসিত্ৱা ৱা অপৰিযেসিত্ৱা ৱা পত্তং. পৰিযেসিতন্তি পত্তং ৱা অপত্তং ৱা পৰিযেসিতং. অনুৱিচৰিতং মনসাতি চিত্তেন অনুসঞ্চৰিতং. লোকস্মিঞ্হি পৰিযেসিত্ৱা পত্তম্পি অত্থি, পৰিযেসিত্ৱা নোপত্তম্পি, অপৰিযেসিত্ৱা পত্তম্পি, অপৰিযেসিত্ৱা নোপত্তম্পি. তত্থ পৰিযেসিত্ৱা পত্তং পত্তং নাম, পৰিযেসিত্ৱা নোপত্তং পৰিযেসিতং নাম. অপৰিযেসিত্ৱা পত্তঞ্চ অপৰিযেসিত্ৱা নোপত্তঞ্চ মনসানুৱিচৰিতং নাম. অথ ৱা পৰিযেসিত্ৱা পত্তম্পি অপৰিযেসিত্ৱা পত্তম্পি পত্তট্ঠেন পত্তং নাম, পৰিযেসিত্ৱা নোপত্তমেৱ পৰিযেসিতং নাম, অপৰিযেসিত্ৱা নোপত্তং মনসানুৱিচৰিতং নাম. সব্বং ৱা এতং মনসা অনুৱিচৰিতমেৱ.

৫. নত্থিদিন্নসুত্তৱণ্ণনা

২১০. নত্থি দিন্নন্তিআদীসু নত্থি দিন্নন্তি দিন্নস্স ফলাভাৱং সন্ধায ৱদন্তি. যিট্ঠং ৱুচ্চতি মহাযাগো. হুতন্তি পহেণকসক্কাৰো অধিপ্পেতো. তম্পি উভযং ফলাভাৱমেৱ সন্ধায পটিক্খিপন্তি. সুকতদুক্কটানন্তি সুকতদুক্কতানং, কুসলাকুসলানন্তি অত্থো. ফলং ৱিপাকোতি যং ফলন্তি ৱা ৱিপাকোতি ৱা ৱুচ্চতি, তং নত্থীতি ৱদন্তি. নত্থি অযং লোকোতি পৰলোকে ঠিতস্স অযং লোকো নত্থি. নত্থি পৰো লোকোতি ইধ লোকে ঠিতস্সপি পৰো লোকো নত্থি, সব্বে তত্থ তত্থেৱ উচ্ছিজ্জন্তীতি দস্সেন্তি. নত্থি মাতা নত্থি পিতাতি তেসু সম্মাপটিপত্তিমিচ্ছাপটিপত্তীনং ফলাভাৱৱসেন ৱদন্তি. নত্থি সত্তা ওপপাতিকাতি চৱিত্ৱা উপ্পজ্জনকসত্তা নাম নত্থীতি ৱদন্তি. নত্থি লোকে সমণব্ৰাহ্মণাতি লোকে সম্মাপটিপন্না সমণব্ৰাহ্মণা নাম নত্থীতি ৱদন্তি.

চাতুমহাভূতিকোতি চতুমহাভূতমযো. পথৱী পথৱীকাযন্তি অজ্ঝত্তিকা পথৱীধাতু বাহিৰং পথৱীধাতুং. অনুপেতীতি অনুযাতি. অনুপগচ্ছতীতি তস্সেৱ ৱেৱচনং, অনুগচ্ছতীতিপি অত্থো. উভযেনাপি উপেতি উপগচ্ছতীতি দস্সেন্তি. আপাদীসুপি এসেৱ নযো. ইন্দ্ৰিযানীতি মনচ্ছট্ঠানি ইন্দ্ৰিযানি. সঙ্কমন্তীতি আকাসং পক্খন্দন্তি. আসন্দিপঞ্চমাতি নিপন্নমঞ্চেন পঞ্চমা, মঞ্চো চেৱ, চত্তাৰো মঞ্চপাদে গহেত্ৱা ঠিতা চত্তাৰো পুৰিসা চাতি অত্থো. যাৱ আড়াহনাতি যাৱ সুসানা. পদানীতি ‘‘অযং এৱং সীলৱা অহোসি, এৱং দুস্সীলো’’তিআদিনা নযেন পৱত্তানি গুণাগুণপদানি. সৰীৰমেৱ ৱা এত্থ পদানীতি অধিপ্পেতং. কাপোতকানীতি কপোতকৱণ্ণানি, পাৰাৱতপক্খৱণ্ণানীতি অত্থো. ভস্সন্তাতি ভস্মন্তা. অযমেৱ ৱা পাড়ি. আহুতিযোতি যং পহেণকসক্কাৰাদিভেদং দিন্নদানং, সব্বং তং ছাৰিকাৱসানমেৱ হোতি, ন ততো পৰং ফলদাযকং হুত্ৱা গচ্ছতীতি অত্থো. দত্তুপঞ্ঞত্তন্তি দত্তূহি বালমনুস্সেহি পঞ্ঞত্তং. ইদং ৱুত্তং হোতি – বালেহি অবুদ্ধীহি পঞ্ঞত্তমিদং দানং, ন পণ্ডিতেহি. বালা দেন্তি, পণ্ডিতা গণ্হন্তীতি দস্সেন্তি.

৬. কৰোতোসুত্তৱণ্ণনা

২১১. কৰোতোতি সহত্থা কৰোন্তস্স. কাৰযতোতি আণত্তিযা কাৰেন্তস্স. ছিন্দতোতি পৰেসং হত্থাদীনি ছিন্দন্তস্স. ছেদাপযতোতি পৰেহি ছেদাপেন্তস্স. পচতোতি দণ্ডেন পীড়েন্তস্স. পচাপযতোতি পৰেহি দণ্ডাদিনা পীড়াপেন্তস্স. সোচতো সোচাপযতোতি পৰস্স ভণ্ডহৰণাদীহি সোকং সযং কৰোন্তস্সাপি পৰেহি কাৰেন্তস্সাপি. কিলমতো কিলমাপযতোতি আহাৰুপচ্ছেদবন্ধনাগাৰপৱেসনাদীহি সযং কিলমেন্তস্সপি পৰেহি কিলমাপেন্তস্সপি. ফন্দতো ফন্দাপযতোতি পৰং ফন্দন্তং ফন্দনকালে সযম্পি ফন্দতো পৰেম্পি ফন্দাপযতো. পাণমতিপাতযতোতি পাণং হনন্তস্সপি হনাপেন্তস্সপি. এৱং সব্বত্থ কৰণকাৰাপনৱসেনেৱ অত্থো ৱেদিতব্বো.

সন্ধিন্তি ঘৰসন্ধিং. নিল্লোপন্তি মহাৱিলোপং. একাগাৰিকন্তি একমেৱ ঘৰং পৰিৱাৰেত্ৱা ৱিলুম্পনং. পৰিপন্থে তিট্ঠতোতি আগতাগতানং অচ্ছিন্দনত্থং মগ্গে তিট্ঠতো. কৰোতো ন কৰীযতি পাপন্তি যংকিঞ্চি পাপং কৰোমীতি সঞ্ঞায কৰোতোপি পাপং ন কৰীযতি, নত্থি পাপং. সত্তা পন কৰোমাতি এৱংসঞ্ঞিনো হোন্তীতি দীপেন্তি. খুৰপৰিযন্তেনাতি খুৰনেমিনা, খুৰধাৰসদিসপৰিযন্তেন ৱা. একমংসখলন্তি একমংসৰাসিং. পুঞ্জন্তি তস্সেৱ ৱেৱচনং. ততোনিদানন্তি একমংসখলকৰণনিদানং.

দক্খিণন্তি দক্খিণতীৰে মনুস্সা কক্খড়া দাৰুণা, তে সন্ধায হনন্তোতিআদি ৱুত্তং. উত্তৰন্তি উত্তৰতীৰে সদ্ধা হোন্তি পসন্না বুদ্ধমামকা ধম্মমামকা সঙ্ঘমামকা, তে সন্ধায দদন্তোতিআদি ৱুত্তং. তত্থ যজন্তোতি মহাযাগং কৰোন্তো. দমেনাতি ইন্দ্ৰিযদমেন উপোসথকম্মেন. সংযমেনাতি সীলসংযমেন. সচ্চৱজ্জেনাতি সচ্চৱচনেন. আগমোতি আগমনং, পৱত্তীতি অত্থো. সব্বথাপি পাপপুঞ্ঞানং কিৰিযমেৱ পটিক্খিপন্তি.

৭. হেতুসুত্তৱণ্ণনা

২১২. নত্থি হেতু নত্থি পচ্চযোতি এত্থ পচ্চযোতি হেতুৱেৱচনমেৱ. উভযেনাপি ৱিজ্জমানমেৱ কাযদুচ্চৰিতাদীনং সংকিলেসপচ্চযং, কাযসুচৰিতাদীনঞ্চ ৱিসুদ্ধিপচ্চযং পটিক্খিপন্তি. নত্থি বলন্তি যম্হি অত্তনো বলে পতিট্ঠিতা ইমে সত্তা দেৱত্তম্পি মাৰত্তম্পি ব্ৰহ্মত্তম্পি সাৱকবোধিম্পি পচ্চেকবোধিম্পি সব্বঞ্ঞুতম্পি পাপুণন্তি, তং বলং পটিক্খিপন্তি. নত্থি ৱীৰিযন্তিআদীনি সব্বানি অঞ্ঞমঞ্ঞৱেৱচনানেৱ. ‘‘ইদং নো ৱীৰিযেন, ইদং পুৰিসথামেন, ইদং পুৰিসপৰক্কমেন পত্ত’’ন্তি, এৱং পৱত্তৱচনপটিক্খেপকৰণৱসেন পনেতানি ৱিসুং আদিযন্তি.

সব্বে সত্তাতি ওট্ঠগোণগদ্ৰভাদযো অনৱসেসে পৰিগ্গণ্হন্তি. সব্বে পাণাতি একিন্দ্ৰিযো পাণো, দ্ৱিন্দ্ৰিযো পাণোতিআদিৱসেন ৱদন্তি. সব্বে ভূতাতি অণ্ডকোসৱত্থিকোসেসু ভূতে সন্ধায ৱদন্তি. সব্বে জীৱাতি সালিযৱগোধুমাদযো সন্ধায ৱদন্তি. তেসু হি তে ৱিৰুহনভাৱেন জীৱসঞ্ঞিনো. অৱসা অবলা অৱীৰিযাতি তেসং অত্তনো ৱসো ৱা বলং ৱা ৱীৰিযং ৱা নত্থি. নিযতিসঙ্গতিভাৱপৰিণতাতি এত্থ নিযতীতি নিযততা. সঙ্গতীতি ছন্নং অভিজাতীনং তত্থ তত্থ গমনং. ভাৱোতি সভাৱোযেৱ. এৱং নিযতিযা চ সঙ্গতিযা চ ভাৱেন চ পৰিণতা নানপ্পকাৰতং পত্তা. যেন হি যথা ভৱিতব্বং, সো তথেৱ ভৱতি. যেন ন ভৱিতব্বং, সো ন ভৱতীতি দস্সেন্তি. ছস্ৱেৱাভিজাতীসূতি ছসু এৱ অভিজাতীসু ঠত্ৱা সুখঞ্চ দুক্খঞ্চ পটিসংৱেদেন্তি, অঞ্ঞা সুখদুক্খভূমি নত্থীতি দস্সেন্তি.

৮-১০. মহাদিট্ঠিসুত্তাদিৱণ্ণনা

২১৩-২১৫. অকটাতি অকতা. অকটৱিধাতি অকতৱিধানা, ‘‘এৱং কৰোহী’’তি কেনচি কাৰিতাপি ন হোন্তীতি অত্থো. অনিম্মিতাতি ইদ্ধিযাপি ন নিম্মিতা. অনিম্মাতাতি অনিম্মাপিতা. ‘‘অনিম্মিতব্বা’’তিপি পাঠো, ন নিম্মিতব্বাতি অত্থো. ৱঞ্ঝাতি ৱঞ্ঝপসুৱঞ্ঝতালাদযো ৱিয অফলা কস্সচি অজনকা. পব্বতকূটং ৱিয ঠিতাতি কূটট্ঠা. এসিকট্ঠাযিনো ৱিয হুত্ৱা ঠিতাতি এসিকট্ঠাযিট্ঠিতা, যথা সুনিখাতো এসিকত্থম্ভো নিচ্চলো তিট্ঠতি, এৱং ঠিতাতি অত্থো. ন ইঞ্জন্তীতি এসিকত্থম্ভো ৱিয ঠিতত্তা ন চলন্তি. ন ৱিপৰিণমন্তীতি পকতিং ন ৱিজহন্তি. ন অঞ্ঞমঞ্ঞং ব্যাবাধেন্তীতি অঞ্ঞমঞ্ঞং ন উপহনন্তি. নালন্তি ন সমত্থা. পথৱীকাযোতিআদীসু পথৱীযেৱ পথৱীকাযো, পথৱীসমূহো ৱা. সত্তন্নংত্ৱেৱ কাযানন্তি যথা মুগ্গৰাসিআদীসু পহটং সত্থং মুগ্গৰাসিআদীনং অন্তৰেনেৱ পৱিসতি, এৱং সত্তন্নং কাযানং অন্তৰেন ছিদ্দেন ৱিৱৰেন সত্থং পৱিসতি. তত্থ ‘‘অহং ইমং জীৱিতা ৱোৰোপেমী’’তি কেৱলং সঞ্ঞামত্তমেৱ হোতীতি দস্সেন্তি.

যোনিপমুখসতসহস্সানীতি পমুখযোনীনং উত্তমযোনীনং চুদ্দসসতসহস্সানি অঞ্ঞানি চ সট্ঠিসতানি অঞ্ঞানি চ ছসতানি পঞ্চ চ কম্মুনো সতানীতি পঞ্চকম্মসতানি চাতি কেৱলং তক্কমত্তকেন নিৰত্থকদিট্ঠিং দীপেন্তি. পঞ্চ চ কম্মানি তীণি চ কম্মানীতিআদীসুপি এসেৱ নযো. কেচি পনাহু ‘‘পঞ্চ কম্মানীতি পঞ্চিন্দ্ৰিযৱসেন গণ্হন্তি, তীণীতি কাযকম্মাদিৱসেনা’’তি. কম্মে চ অড্ঢকম্মে চাতি এত্থ পনস্স কাযকম্মৱচীকম্মানি কম্মন্তি লদ্ধি, মনোকম্মং উপড্ঢকম্মন্তি. দ্ৱট্ঠিপটিপদাতি দ্ৱাসট্ঠিপটিপদাতি ৱদন্তি. দ্ৱট্ঠন্তৰকপ্পাতি একস্মিং কপ্পে চতুসট্ঠি অন্তৰকপ্পা নাম হোন্তি, অযং পন অঞ্ঞে দ্ৱে অজানন্তো এৱমাহ.

ছড়াভিজাতিযোতি কণ্হাভিজাতি নীলাভিজাতি লোহিতাভিজাতি হলিদ্দাভিজাতি সুক্কাভিজাতি পৰমসুক্কাভিজাতীতি ইমা ছ অভিজাতিযো ৱদন্তি. তত্থ ওৰব্ভিকা সূকৰিকা সাকুণিকা মাগৱিকা লুদ্দা মচ্ছঘাতকা চোৰা চোৰঘাতকা বন্ধনাগাৰিকা, যে ৱা পনঞ্ঞেপি কেচি কুৰূৰকম্মন্তা, অযং কণ্হাভিজাতীতি ৱদন্তি. ভিক্খূ নীলাভিজাতীতি ৱদন্তি. তে কিৰ চতূসু পচ্চযেসু কণ্টকে পক্খিপিত্ৱা খাদন্তি, ‘‘ভিক্খূ চ কণ্টকৱুত্তিকা’’তি (অ. নি. ৬.৫৭) অযং হিস্স পাড়ি এৱ. অথ ৱা কণ্টকৱুত্তিকা এৱ নাম একে পব্বজিতাতি ৱদন্তি. লোহিতাভিজাতি নাম নিগণ্ঠা একসাটকাতি ৱদন্তি. ইমে কিৰ পুৰিমেহি দ্ৱীহি পণ্ডৰতৰা. গিহী ওদাতৱসনা অচেলকসাৱকা হলিদ্দাভিজাতীতি ৱদন্তি. এৱং অত্তনো পচ্চযদাযকে নিগণ্ঠেহিপি জেট্ঠকতৰে কৰোন্তি. আজীৱকা আজীৱিনিযো অযং সুক্কাভিজাতীতি ৱদন্তি. তে কিৰ পুৰিমেহি চতূহি পণ্ডৰতৰা. নন্দো ৱচ্ছো, কিসো সংকিচ্চো, মক্খলি গোসালো পৰমসুক্কাভিজাতীতি ৱদন্তি. তে কিৰ সব্বেহি পণ্ডৰতৰা.

অট্ঠ পুৰিসভূমিযোতি মন্দভূমি খিড্ডাভূমি ৱীমংসকভূমি উজুগতভূমি সেখভূমি সমণভূমি জাননভূমি পন্নভূমীতি ইমা অট্ঠ পুৰিসভূমিযোতি ৱদন্তি. তত্থ জাতদিৱসতো পট্ঠায সত্ত দিৱসে সম্বাধট্ঠানতো নিক্খন্তত্তা সত্তা মন্দা হোন্তি মোমূহা, অযং মন্দভূমীতি ৱদন্তি. যে পন দুগ্গতিতো আগতা হোন্তি, তে অভিণ্হং ৰোদন্তি চেৱ ৱিৰৱন্তি চ, সুগতিতো আগতা তং অনুস্সৰিত্ৱা অনুস্সৰিত্ৱা হসন্তি, অযং খিড্ডাভূমি নাম. মাতাপিতূনং হত্থং ৱা পাদং ৱা মঞ্চং ৱা পীঠং ৱা গহেত্ৱা ভূমিযং পদনিক্খিপনং ৱীমংসকভূমি নাম. পদসা গন্তুং সমত্থকালো উজুগতভূমি নাম. সিপ্পানি সিক্খনকালো সেখভূমি নাম. ঘৰা নিক্খম্ম পব্বজনকালো সমণভূমি নাম. আচৰিযং সেৱিত্ৱা জাননকালো জাননভূমি নাম. ‘‘ভিক্খু চ পন্নকো জিনো ন কিঞ্চি আহা’’তি এৱং অলাভিং সমণং পন্নভূমীতি ৱদন্তি.

একূনপঞ্ঞাস আজীৱকসতেতি একূনপঞ্ঞাস আজীৱৱুত্তিসতানি. পৰিব্বাজকসতেতি পৰিব্বাজকপব্বজ্জাসতানি. নাগৱাসসতেতি নাগমণ্ডলসতানি. ৱীসে ইন্দ্ৰিযসতেতি ৱীস ইন্দ্ৰিযসতানি. তিংসে নিৰযসতেতি তিংস নিৰযসতানি. ৰজোধাতুযোতি ৰজওকিৰণট্ঠানানি. হত্থপিট্ঠিপাদপিট্ঠাদীনি সন্ধায ৱদতি. সত্ত সঞ্ঞীগব্ভাতি ওট্ঠগোণগদ্ৰভঅজপসুমিগমহিংসে সন্ধায ৱদতি. সত্ত অসঞ্ঞীগব্ভাতি সালিযৱগোধুমমুগ্গকঙ্গুৱৰককুদ্ৰূসকে সন্ধায ৱদতি. নিগণ্ঠিগব্ভাতি গণ্ঠিম্হি জাতগব্ভা, উচ্ছুৱেড়ুনড়াদযো সন্ধায ৱদতি. সত্ত দেৱাতি বহূ দেৱা, সো পন সত্তাতি ৱদতি. মনুস্সাপি অনন্তা, সো সত্তাতি ৱদতি. সত্ত পেসাচাতি পিসাচা মহন্তমহন্তা, সত্তাতি ৱদতি. সৰাতি মহাসৰা. কণ্ণমুণ্ড-ৰথকাৰ-অনোতত্ত-সীহপ্পপাত-ছদ্দন্ত-মুচলিন্দ-কুণালদহে গহেত্ৱা ৱদতি.

পৱুটাতি গণ্ঠিকা. পপাতাতি মহাপপাতা. পপাতসতানীতি খুদ্দকপপাতসতানি. সুপিনাতি মহাসুপিনা. সুপিনসতানীতি খুদ্দকসুপিনসতানি. মহাকপ্পিনোতি মহাকপ্পানং. এত্থ একম্হা মহাসৰা ৱস্সসতে ৱস্সসতে কুসগ্গেন একং উদকবিন্দুং নীহৰিত্ৱা সত্তক্খত্তুং তম্হি সৰে নিৰুদকে কতে একো মহাকপ্পোতি ৱদতি. এৱৰূপানং মহাকপ্পানং চতুৰাসীতিসতসহস্সানি খেপেত্ৱা বালে চ পণ্ডিতে চ দুক্খস্সন্তং কৰোন্তীতি অযমস্স লদ্ধি. পণ্ডিতোপি কিৰ অন্তৰাৱিসুজ্ঝিতুং ন সক্কোতি, বালোপি ততো উদ্ধং ন গচ্ছতি.

সীলেন ৱাতি অচেলকসীলেন ৱা অঞ্ঞেন ৱা যেন কেনচি. ৱতেনাতি তাদিসেনেৱ ৱতেন. তপেনাতি তপোকম্মেন. অপৰিপক্কং পৰিপাচেতি নাম যো ‘‘অহং পণ্ডিতো’’তি অন্তৰা ৱিসুজ্ঝতি. পৰিপক্কং ফুস্স ফুস্স ব্যন্তীকৰোতি নাম যো ‘‘অহং বালো’’তি ৱুত্তপৰিমাণকালং অতিক্কমিত্ৱা যাতি. হেৱং নত্থীতি এৱং নত্থি. তঞ্হি উভযম্পি ন সক্কা কাতুন্তি দীপেতি. দোণমিতেতি দোণেন মিতং ৱিয. সুখদুক্খেতি সুখদুক্খং. পৰিযন্তকতেতি ৱুত্তপৰিমাণেন কালেন কতপৰিযন্তো. নত্থি হাযনৱড্ঢনেতি নত্থি হাযনৱড্ঢনানি, ন সংসাৰো পণ্ডিতস্স হাযতি, ন বালস্স ৱড্ঢতীতি অত্থো. উক্কংসাৱকংসেতি উক্কংসাৱকংসা. হাযনৱড্ঢনানমেৱেতং ৱেৱচনং. ইদানি তমত্থং উপমায সাধেন্তো সেয্যথাপি নামাতিআদিমাহ. তত্থ সুত্তগুড়েতি ৱেঠেত্ৱা কতসুত্তগুড়ে. নিব্বেঠিযমানমেৱ পলেতীতি পব্বতে ৱা ৰুক্খগ্গে ৱা ঠত্ৱা খিত্তং সুত্তপ্পমাণেন নিব্বেঠিযমানমেৱ গচ্ছতি, সুত্তে খীণে তত্থেৱ তিট্ঠতি, ন গচ্ছতি এৱমেৱ বালা চ পণ্ডিতা চ কালৱসেন নিব্বেঠিযমানা সুখদুক্খং পলেন্তি, যথাৱুত্তেন কালেন অতিক্কমন্তীতি দস্সেতি.

১১-১৮. অন্তৱাসুত্তাদিৱণ্ণনা

২১৬-২২৩. অন্তৱা লোকোতি একতো ৱড্ঢিতনিমিত্তং লোকোতি গাহেন ৱা তক্কেন ৱা উপ্পন্নদিট্ঠি. অনন্তৱাতি সব্বতো ৱড্ঢিতং অপ্পমাণনিমিত্তং লোকোতি গাহেন ৱা তক্কেন ৱা উপ্পন্নদিট্ঠি. তং জীৱং তং সৰীৰন্তি জীৱঞ্চ সৰীৰঞ্চ একমেৱাতি উপ্পন্নদিট্ঠি. সেসং সব্বত্থ উত্তানমেৱাতি. ইমানি তাৱ সোতাপত্তিমগ্গৱসেন অট্ঠাৰস ৱেয্যাকৰণানি একং গমনং.