১২. ধম্মকথিকৱগ্গো

১-২. অৱিজ্জাসুত্তাদিৱণ্ণনা

১১৩-১১৪. ধম্মকথিকৱগ্গস্স পঠমে এত্তাৱতা চ অৱিজ্জাগতো হোতীতি যাৱতা ইমায চতূসু সচ্চেসু অঞ্ঞাণভূতায অৱিজ্জায সমন্নাগতো, এত্তাৱতা অৱিজ্জাগতো হোতীতি অত্থো. দুতিযেপি এসেৱ নযো. পঠমদুতিযানি.

৩. ধম্মকথিকসুত্তৱণ্ণনা

১১৫. ততিযে পঠমেন ধম্মকথিকো, দুতিযেন সেখভূমি, ততিযেন অসেখভূমীতি এৱং ধম্মকথিকং পুচ্ছিতেন ৱিসেসেত্ৱা দ্ৱে ভূমিযো কথিতা. ততিযং.

৪. দুতিযধম্মকথিকসুত্তৱণ্ণনা

১১৬. চতুত্থে তিস্সন্নম্পি পুচ্ছানং তীণি ৱিস্সজ্জনানি কথিতানি. চতুত্থং.

৫-৯. বন্ধনসুত্তাদিৱণ্ণনা

১১৭-১২১. পঞ্চমে অতীৰদস্সীতি তীৰং ৱুচ্চতি ৱট্টং, তং ন পস্সতি. অপাৰদস্সীতি পাৰং ৱুচ্চতি নিব্বানং, তং ন পস্সতি. বদ্ধোতি কিলেসবন্ধনেন বদ্ধো হুত্ৱা জীযতি চ মীযতি চ অস্মা লোকা পৰং লোকং গচ্ছতীতি. ইমস্মিং সুত্তে ৱট্টদুক্খং কথিতন্তি. ছট্ঠাদীনি উত্তানত্থানেৱ. পঞ্চমাদীনি.

১০. সীলৱন্তসুত্তৱণ্ণনা

১২২. দসমে অনিচ্চতোতিআদীসু হুত্ৱা অভাৱাকাৰেন অনিচ্চতো, পটিপীড়নাকাৰেন দুক্খতো, আবাধট্ঠেন ৰোগতো, অন্তোদোসট্ঠেন গণ্ডতো, তেসং তেসং গণ্ডানং পচ্চযভাৱেন ৱা খণনট্ঠেন ৱা সল্লতো দুক্খট্ঠেন অঘতো, ৱিসভাগমহাভূতসমুট্ঠানআবাধপচ্চযট্ঠেন আবাধতো, অসকট্ঠেন পৰতো, পলুজ্জনট্ঠেন পলোকতো, সত্তসুঞ্ঞতট্ঠেন সুঞ্ঞতো, অত্তাভাৱেন অনত্ততো. এৱমেত্থ ‘‘অনিচ্চতো পলোকতো’’তি দ্ৱীহি পদেহি অনিচ্চমনসিকাৰো, ‘‘সুঞ্ঞতো অনত্ততো’’তি দ্ৱীহি অনত্তমনসিকাৰো, সেসেহি দুক্খমনসিকাৰো ৱুত্তোতি ৱেদিতব্বো. সেসমেত্থ উত্তানমেৱ. দসমং.

১১. সুতৱন্তসুত্তৱণ্ণনা

১২৩. তথা একাদসমে. দসমস্মিঞ্হি ‘‘সীলৱতা’’তি চতুপাৰিসুদ্ধিসীলং ৱুত্তং, ইধ সুতৱতাতি কম্মট্ঠানসুতং ইদমেৱ নানাকৰণং. একাদসমং.

১২-১৩. কপ্পসুত্তাদিৱণ্ণনা

১২৪-১২৫. দ্ৱাদসমতেৰসমানি ৰাহুলোৱাদসদিসানেৱাতি. দ্ৱাদসমতেৰসমানি.

ধম্মকথিকৱগ্গো দ্ৱাদসমো.