৯. নাগসুত্তৱণ্ণনা

২৩১. নৱমে অতিৱেলন্তি অতিক্কন্তৱেলং কালং অতিক্কন্তপ্পমাণং কালং. কিমঙ্গং পনাহন্তি অহং পন কিংকাৰণা ন উপসঙ্কমিস্সামি? ভিসমুড়ালন্তি ভিসঞ্চেৱ মুড়ালঞ্চ. অব্বুহেত্ৱাতি উদ্ধৰিত্ৱা. ভিঙ্কচ্ছাপাতি হত্থিপোতকা. তে কিৰ অভিণ্হং ভিঙ্কাৰসদ্দং কৰোন্তি, তস্মা ভিঙ্কচ্ছাপাতি ৱুচ্চন্তি. পসন্নাকাৰং কৰোন্তীতি পসন্নেহি কত্তব্বাকাৰং কৰোন্তি, চত্তাৰো পচ্চযে দেন্তি. ধম্মং ভাসন্তীতি একং দ্ৱে জাতকানি ৱা সুত্তন্তে ৱা উগ্গণ্হিত্ৱা অসম্ভিন্নেন সৰেন ধম্মং দেসেন্তি. পসন্নাকাৰং কৰোন্তীতি তেসং তায দেসনায পসন্না গিহী পচ্চযে দেন্তি. নেৱ ৱণ্ণায হোতি ন বলাযাতি নেৱ গুণৱণ্ণায, ন ঞাণবলায হোতি, গুণৱণ্ণে পন পৰিহাযন্তে সৰীৰৱণ্ণোপি সৰীৰবলম্পি পৰিহাযতি, তস্মা সৰীৰস্স নেৱ ৱণ্ণায ন বলায হোতি. নৱমং.