৯. ওপম্মসংযুত্তং

১. কূটসুত্তৱণ্ণনা

২২৩. ওপম্মসংযুত্তস্স পঠমে কূটং গচ্ছন্তীতি কূটঙ্গমা. কূটং সমোসৰন্তীতি কূটসমোসৰণা. কূটসমুগ্ঘাতাতি কূটস্স সমুগ্ঘাতেন. অৱিজ্জাসমুগ্ঘাতাতি অৰহত্তমগ্গেন অৱিজ্জায সমুগ্ঘাতেন. অপ্পমত্তাতি সতিযা অৱিপ্পৱাসে ঠিতা হুত্ৱা. পঠমং.

২. নখসিখসুত্তৱণ্ণনা

২২৪. দুতিযে মনুস্সেসু পচ্চাজাযন্তীতি যে মনুস্সলোকতো চুতা মনুস্সেসু জাযন্তি, তে এৱং অপ্পকাতি অধিপ্পাযো. অঞ্ঞত্ৰ মনুস্সেহীতি যে পন মনুস্সলোকতো চুতা ঠপেত্ৱা মনুস্সলোকং চতূসু অপাযেসু পচ্চাজাযন্তি, তে মহাপথৱিযং পংসু ৱিয বহুতৰা. ইমস্মিঞ্চ সুত্তে দেৱাপি মনুস্সেহেৱ সঙ্গহিতা. তস্মা যথা মনুস্সেসু জাযন্তা অপ্পকা, এৱং দেৱেসুপীতি ৱেদিতব্বা. দুতিযং.

৩. কুলসুত্তৱণ্ণনা

২২৫. ততিযে সুপ্পধংসিযানীতি সুৱিহেঠিযানি. কুম্ভত্থেনকেহীতি যে পৰঘৰং পৱিসিত্ৱা দীপালোকেন ওলোকেত্ৱা পৰভণ্ডং হৰিতুকামা ঘটে দীপং কত্ৱা পৱিসন্তি, তে কুম্ভত্থেনকা নাম, তেহি কুম্ভত্থেনকেহি. সুপ্পধংসিযো হোতি অমনুস্সেহীতি মেত্তাভাৱনাৰহিতং পংসুপিসাচকা ৱিধংসযন্তি, পগেৱ উড়াৰা অমনুস্সা. ভাৱিতাতি ৱড্ঢিতা. বহুলীকতাতি পুনপ্পুনং কতা. যানীকতাতি যুত্তযানং ৱিয কতা. ৱত্থুকতাতি পতিট্ঠানট্ঠেন ৱত্থু ৱিয কতা. অনুট্ঠিতাতি অধিট্ঠিতা. পৰিচিতাতি সমন্ততো চিতা সুৱড্ঢিতা. সুসমাৰদ্ধাতি চিত্তেন সুট্ঠু সমাৰদ্ধা. ততিযং.

৪. ওক্খাসুত্তৱণ্ণনা

২২৬. চতুত্থে ওক্খাসতন্তি মহামুখউক্খলীনং সতং. দানং দদেয্যাতি পণীতভোজনভৰিতানং মহাউক্খলীনং সতং দানং দদেয্য. ‘‘উক্কাসত’’ন্তিপি পাঠো, তস্স দণ্ডদীপিকাসতন্তি অত্থো. একায পন দীপিকায যত্তকে ঠানে আলোকো হোতি, ততো সতগুণং ঠানং সত্তহি ৰতনেহি পূৰেত্ৱা দানং দদেয্যাতি অত্থো. গদ্দুহনমত্তন্তি গোদুহনমত্তং, গাৱিযা একৱাৰং অগ্গথনাকড্ঢনমত্তন্তি অত্থো. গন্ধঊহনমত্তং ৱা, দ্ৱীহি অঙ্গুলীহি গন্ধপিণ্ডং গহেত্ৱা একৱাৰং ঘাযনমত্তন্তি অত্থো. এত্তকম্পি হি কালং যো পন গব্ভপৰিৱেণৱিহাৰূপচাৰ পৰিচ্ছেদেন ৱা চক্কৱাড়পৰিচ্ছেদেন ৱা অপৰিমাণাসু লোকধাতূসু ৱা সব্বসত্তেসু হিতফৰণং মেত্তচিত্তং ভাৱেতুং সক্কোতি, ইদং ততো একদিৱসং তিক্খত্তুং দিন্নদানতো মহপ্ফলতৰং. চতুত্থং.

৫. সত্তিসুত্তৱণ্ণনা

২২৭. পঞ্চমে পটিলেণিস্সামীতিআদীসু অগ্গে পহৰিত্ৱা কপ্পাসৱট্টিং ৱিয নামেন্তো নিয্যাসৱট্টিং ৱিয চ একতো কত্ৱা অল্লিযাপেন্তো পটিলেণেতি নাম. মজ্ঝে পহৰিত্ৱা নামেত্ৱা ধাৰায ৱা পহৰিত্ৱা দ্ৱেপি ধাৰা একতো অল্লিযাপেন্তো পটিকোট্টেতি নাম. কপ্পাসৱট্টনকৰণীযং ৱিয পৱত্তেন্তো চিৰকালং সংৱেল্লিতকিলঞ্জং পসাৰেত্ৱা পুন সংৱেল্লেন্তো ৱিয চ পটিৱট্টেতি নাম. পঞ্চমং.

৬. ধনুগ্গহসুত্তৱণ্ণনা

২২৮. ছট্ঠে দড়্হধম্মা ধনুগ্গহাতি দড়্হধনুনো ইস্সাসা. দড়্হধনু নাম দ্ৱিসহস্সথামং ৱুচ্চতি, দ্ৱিসহস্সথামং নাম যস্স আৰোপিতস্স জিযাবদ্ধো লোহসীসাদীনং ভাৰো দণ্ডে গহেত্ৱা যাৱ কণ্ডপ্পমাণা উক্খিত্তস্স পথৱিতো মুচ্চতি. সুসিক্খিতাতি দসদ্ৱাদসৱস্সানি আচৰিযকুলে উগ্গহিতসিপ্পা. কতহত্থাতি যো সিপ্পমেৱ উগ্গণ্হাতি, সো কতহত্থো ন হোতি, ইমে পন কতহত্থা চিণ্ণৱসীভাৱা. কতূপাসনাতি ৰাজকুলাদীসু দস্সিতসিপ্পা.

তস্স পুৰিসস্স জৱোতি এৱৰূপো অঞ্ঞো পুৰিসো নাম ন ভূতপুব্বো, বোধিসত্তস্সেৱ পন জৱনহংসকালো নাম আসি. তদা বোধিসত্তো চত্তাৰি কণ্ডানি আহৰি. তদা কিৰস্স কনিট্ঠভাতৰো ‘‘মযং, ভাতিক, সূৰিযেন সদ্ধিং জৱিস্সামা’’তি আৰোচেসুং. বোধিসত্তো আহ – ‘‘সূৰিযো সীঘজৱো, ন সক্খিস্সথ তুম্হে তেন সদ্ধিং জৱিতু’’ন্তি. তে দুতিযং ততিযম্পি তথেৱ ৱত্ৱা একদিৱসং ‘‘গচ্ছামা’’তি যুগন্ধৰপব্বতং আৰুহিত্ৱা নিসীদিংসু. বোধিসত্তো ‘‘কহং মে ভাতৰো’’তি? পুচ্ছিত্ৱা, ‘‘সূৰিযেন সদ্ধিং জৱিতুং গতা’’তি ৱুত্তে, ‘‘ৱিনস্সিস্সন্তি তপস্সিনো’’তি তে অনুকম্পমানো সযম্পি গন্ত্ৱা তেসং সন্তিকে নিসীদি. অথ সূৰিযে উগ্গচ্ছন্তে দ্ৱেপি ভাতৰো সূৰিযেন সদ্ধিংযেৱ আকাসং পক্খন্তা, বোধিসত্তোপি তেহি সদ্ধিংযেৱ পক্খন্তো. তেসু একস্স অপত্তেযেৱ অন্তৰভত্তসমযে পক্খন্তৰেসু অগ্গি উট্ঠহি, সো ভাতৰং পক্কোসিত্ৱা ‘‘ন সক্কোমী’’তি আহ. তমেনং বোধিসত্তো ‘‘মা ভাযী’’তি সমস্সাসেত্ৱা পক্খপঞ্জৰেন পলিৱেঠেত্ৱা দৰথং ৱিনোদেত্ৱা ‘‘গচ্ছা’’তি পেসেসি.

দুতিযো যাৱ অন্তৰভত্তা জৱিত্ৱা পক্খন্তৰেসু অগ্গিম্হি উট্ঠহিতে তথেৱাহ. তম্পি সো তথেৱ কত্ৱা ‘‘গচ্ছা’’তি পেসেসি. সযং পন যাৱ মজ্ঝন্হিকা জৱিত্ৱা, ‘‘এতে বালাতি মযাপি বালেন ন ভৱিতব্ব’’ন্তি নিৱত্তিত্ৱা – ‘‘অদিট্ঠসহাযকং বাৰাণসিৰাজং পস্সিস্সামী’’তি বাৰাণসিং অগমাসি. তস্মিং নগৰমত্থকে পৰিব্ভমন্তে দ্ৱাদসযোজনং নগৰং পত্তকটাহেন ওত্থটপত্তো ৱিয অহোসি. অথ পৰিব্ভমন্তস্স পৰিব্ভমন্তস্স তত্থ তত্থ ছিদ্দানি পঞ্ঞাযিংসু. সযম্পি অনেকহংসসহস্সসদিসো পঞ্ঞাযি. সো ৱেগং পটিসংহৰিত্ৱা ৰাজগেহাভিমুখো অহোসি. ৰাজা ওলোকেত্ৱা – ‘‘আগতো কিৰ মে পিযসহাযো জৱনহংসো’’তি ৱাতপানং ৱিৱৰিত্ৱা ৰতনপীঠং পঞ্ঞাপেত্ৱা ওলোকেন্তো অট্ঠাসি. বোধিসত্তো ৰতনপীঠে নিসীদি.

অথস্স ৰাজা সহস্সপাকেন তেলেন পক্খন্তৰানি মক্খেত্ৱা, মধুলাজে চেৱ মধুৰপানকঞ্চ অদাসি. ততো নং কতপৰিভোগং ‘‘সম্ম, কহং অগমাসী’’তি? পুচ্ছি. সো তং পৱত্তিং আৰোচেত্ৱা ‘‘অথাহং, মহাৰাজ, যাৱ মজ্ঝন্হিকা জৱিত্ৱা – ‘নত্থি জৱিতেন অত্থো’তি নিৱত্তো’’তি আচিক্খি. অথ ৰাজা আহ – ‘‘অহং, সামি, তুম্হাকং সূৰিযেন সদ্ধিং জৱনৱেগং পস্সিতুকামো’’তি. দুক্কৰং, মহাৰাজ, ন সক্কা তযা পস্সিতুন্তি. তেন হি, সামি, সৰিক্খকমত্তম্পি দস্সেহীতি. আম, মহাৰাজ, ধনুগ্গহে সন্নিপাতেহীতি. ৰাজা সন্নিপাতেসি. হংসো ততো চত্তাৰো গহেত্ৱা নগৰমজ্ঝে তোৰণং কাৰেত্ৱা অত্তনো গীৱায ঘণ্ডং পিড়ন্ধাপেত্ৱা তোৰণস্স উপৰি নিসীদিত্ৱা – ‘‘চত্তাৰো জনা তোৰণং নিস্সায চতুদিসাভিমুখা একেকং কণ্ডং খিপন্তূ’’তি ৱত্ৱা, সযং পঠমকণ্ডেনেৱ সদ্ধিং উপ্পতিত্ৱা, তং কণ্ডং অগ্গহেত্ৱাৱ, দক্খিণাভিমুখং গতকণ্ডং ধনুতো ৰতনমত্তাপগতং গণ্হি. দুতিযং দ্ৱিৰতনমত্তাপগতং, ততিযং তিৰতনমত্তাপগতং, চতুত্থং ভূমিং অপ্পত্তমেৱ গণ্হি. অথ নং চত্তাৰি কণ্ডানি গহেত্ৱা তোৰণে নিসিন্নকালেযেৱ অদ্দসংসু. সো ৰাজানং আহ – ‘‘পস্স, মহাৰাজ, এৱংসীঘো অম্হাকং জৱো’’তি. এৱং বোধিসত্তেনেৱ জৱনহংসকালে তানি কণ্ডানি আহৰিতানীতি ৱেদিতব্বানি.

পুৰতো ধাৱন্তীতি অগ্গতো জৱন্তি. ন পনেতা সব্বকালং পুৰতোৱ হোন্তি, কদাচি পুৰতো, কদাচি পচ্ছতো হোন্তি. আকাসট্ঠকৱিমানেসু হি উয্যানানিপি হোন্তি পোক্খৰণিযোপি, তা তত্থ নহাযন্তি, উদককীড়ং কীড়মানা পচ্ছতোপি হোন্তি, ৱেগেন পন গন্ত্ৱা পুন পুৰতোৱ ধাৱন্তি. আযুসঙ্খাৰাতি ৰূপজীৱিতিন্দ্ৰিযং সন্ধায ৱুত্তং. তঞ্হি ততো সীঘতৰং খীযতি. অৰূপধম্মানং পন ভেদো ন সক্কা পঞ্ঞাপেতুং. ছট্ঠং.

৭. আণিসুত্তৱণ্ণনা

২২৯. সত্তমে দসাৰহানন্তি এৱংনামকানং খত্তিযানং. তে কিৰ সততো দসভাগং গণ্হিংসু, তস্মা ‘‘দসাৰহা’’তি পঞ্ঞাযিংসু. আনকোতি এৱংলদ্ধনামো মুদিঙ্গো. হিমৱন্তে কিৰ মহাকুড়ীৰদহো অহোসি. তত্থ মহন্তো কুড়ীৰো ওতিণ্ণোতিণ্ণং হত্থিং খাদতি. অথ হত্থী উপদ্দুতা একং কৰেণুং সক্কৰিংসু ‘‘ইমিস্সা পুত্তং নিস্সায অম্হাকং সোত্থি ভৱিস্সতী’’তি. সাপি মহেসক্খং পুত্তং ৱিজাযি. তে তম্পি সক্কৰিংসু. সো ৱুদ্ধিপ্পত্তো মাতৰং পুচ্ছি, ‘‘কস্মা মং এতে সক্কৰোন্তী’’তি? সা তং পৱত্তিমাচিক্খি. সো ‘‘কিং ময্হং কুড়ীৰো পহোতি? এথ গচ্ছামা’’তি মহাহত্থিপৰিৱাৰো তত্থ গন্ত্ৱা পঠমমেৱ ওতৰি. কুড়ীৰো উদকসদ্দেনেৱ আগন্ত্ৱা তং অগ্গহেসি. মহন্তো কুড়ীৰস্স অড়ো, সো তং ইতো ৱা এত্তো ৱা চালেতুং অসক্কোন্তো মুখে সোণ্ডং পক্খিপিত্ৱা ৱিৰৱি. হত্থিনো ‘‘যংনিস্সায মযং ‘সোত্থি ভৱিস্সতী’তি অমঞ্ঞিম্হা, সো পঠমতৰং গহিতো’’তি ততো ততো পলাযিংসু.

অথস্স মাতা অৱিদূৰে ঠত্ৱা ‘‘মযং থলনাগা, তুম্হে উদকনাগা নাম, নাগেহি নাগো ন ৱিহেঠেতব্বো’’তি কুড়ীৰং পিযৱচনেন ৱত্ৱা ইমং গাথমাহ –

‘‘যে কুড়ীৰা সমুদ্দস্মিং, গঙ্গায যমুনায চ;

তেসং ত্ৱং ৱাৰিজো সেট্ঠো, মুঞ্চ ৰোদন্তিযা পজ’’ন্তি.

মাতুগামসদ্দো নাম পুৰিসে খোভেত্ৱা তিট্ঠতি, তস্মা সো গহণং সিথিলমকাসি. হত্থিপোতো ৱেগেন উভো পাদে উক্খিপিত্ৱা তং পিট্ঠিযং অক্কমি. সহ অক্কমনা পিট্ঠি মত্তিকভাজনং ৱিয ভিজ্জি. অথ নং দন্তেহি ৱিজ্ঝিত্ৱা উক্খিপিত্ৱা থলে ছড্ডেত্ৱা তুট্ঠৰৱং ৰৱি. অথ নং হত্থী ইতো চিতো চ আগন্ত্ৱা মদ্দিংসু. তস্স একো অড়ো পটিক্কমিত্ৱা পতি, তং সক্কো দেৱৰাজা গহেত্ৱা গতো.

ইতৰো পন অড়ো ৱাতাতপেন সুক্খিত্ৱা পক্কলাখাৰসৱণ্ণো অহোসি, সো দেৱে ৱুট্ঠে উদকোঘেন ৱুয্হন্তো দসভাতিকানং ৰাজূনং উপৰিসোতে জালং পসাৰাপেত্ৱা গঙ্গায কীড়ন্তানং আগন্ত্ৱা জালে লগ্গি. তে কীড়াপৰিযোসানে জালম্হি উক্খিপিযমানে তং দিস্ৱা পুচ্ছিংসু ‘‘কিং এত’’ন্তি? ‘‘কুড়ীৰঅড়ো সামী’’তি. ‘‘ন সক্কা এস আভৰণত্থায উপনেতুং, পৰিযোনন্ধাপেত্ৱা ভেৰিং কৰিস্সামা’’তি? পৰিযোনন্ধাপেত্ৱা পহৰিংসু. সদ্দো দ্ৱাদসযোজনং নগৰং অৱত্থৰি. ততো আহংসু – ‘‘ন সক্কা ইদং দিৱসে দিৱসে ৱাদেতুং, ছণদিৱসত্থায মঙ্গলভেৰী হোতূ’’তি মঙ্গলভেৰিং অকংসু. তস্মিং ৱাদিতে মহাজনো অন্হাযিত্ৱা অপিড়ন্ধিত্ৱা হত্থিযানাদীনি আৰুয্হ সীঘং সন্নিপতন্তি. ইতি মহাজনং পক্কোসিত্ৱা ৱিয আনেতীতি আনকো ত্ৱেৱস্স নামং অহোসি.

অঞ্ঞং আণিং ওদহিংসূতি অঞ্ঞং সুৱণ্ণৰজতাদিমযং আণিং ঘটযিংসু. আণিসঙ্ঘাটোৱ অৱসিস্সীতি সুৱণ্ণাদিমযানং আণীনং সঙ্ঘাটমত্তমেৱ অৱসেসং অহোসি. অথস্স দ্ৱাদসযোজনপ্পমাণো সদ্দো অন্তোসালাযম্পি দুক্খেন সুয্যিত্থ.

গম্ভীৰাতি পাড়িৱসেন গম্ভীৰা সল্লসুত্তসদিসা. গম্ভীৰত্থাতি অত্থৱসেন গম্ভীৰা মহাৱেদল্লসুত্তসদিসা (ম. নি. ১.৪৪৯ আদযো). লোকুত্তৰাতি লোকুত্তৰঅত্থদীপকা. সুঞ্ঞতপ্পটিসংযুত্তাতি সত্তসুঞ্ঞতধম্মমত্তমেৱ পকাসকা সংখিত্তসংযুত্তসদিসা. উগ্গহেতব্বং পৰিযাপুণিতব্বন্তি উগ্গহেতব্বে চ পৰিযাপুণিতব্বে চ. কৱিকতাতি কৱীহি কতা. ইতৰং তস্সেৱ ৱেৱচনং. চিত্তক্খৰাতি ৱিচিত্ৰঅক্খৰা. ইতৰং তস্সেৱ ৱেৱচনং. বাহিৰকাতি সাসনতো বহিভূতা. সাৱকভাসিতাতি তেসং তেসং সাৱকেহি ভাসিতা. সুস্সূসিস্সন্তীতি অক্খৰচিত্ততায চেৱ সৱনসম্পত্তিযা চ অত্তমনা হুত্ৱা সামণেৰদহৰভিক্খুমাতুগামমহাগহপতিকাদযো ‘‘এস ধম্মকথিকো’’তি সন্নিপতিত্ৱা সোতুকামা ভৱিস্সন্তি. তস্মাতি যস্মা তথাগতভাসিতা সুত্তন্তা অনুগ্গয্হমানা অন্তৰধাযন্তি, তস্মা. সত্তমং.

৮. কলিঙ্গৰসুত্তৱণ্ণনা

২৩০. অট্ঠমে কলিঙ্গৰূপধানাতি কলিঙ্গৰঘটিকং সীসূপধানঞ্চেৱ পাদূপধানঞ্চ কত্ৱা. অপ্পমত্তাতি সিপ্পুগ্গহণে অপ্পমত্তা. আতাপিনোতি উট্ঠানৱীৰিযাতাপেন যুত্তা. উপাসনস্মিন্তি সিপ্পানং অভিযোগে আচৰিযানঞ্চ পযিৰুপাসনে. তে কিৰ তদা পাতোৱ উট্ঠায সিপ্পসালং গচ্ছন্তি, তত্থ সিপ্পং উগ্গহেত্ৱা সজ্ঝাযাদীহি অভিযোগং কত্ৱা মুখং ধোৱিত্ৱা যাগুপানায গচ্ছন্তি. যাগুং পিৱিত্ৱা পুন সিপ্পসালং গন্ত্ৱা সিপ্পং গণ্হিত্ৱা সজ্ঝাযং কৰোন্তা পাতৰাসায গচ্ছন্তি. কতপাতৰাসা সমানা ‘‘মা পমাদেন চিৰং নিদ্দোক্কমনং অহোসী’’তি খদিৰঘটিকাসু সীসে চ পাদে চ উপদহিত্ৱা থোকং নিপজ্জিত্ৱা পুন সিপ্পসালং গন্ত্ৱা সিপ্পং গহেত্ৱা সজ্ঝাযন্তি. সাযং সজ্ঝাযং কৰোন্তা চ গেহং গন্ত্ৱা ভুত্তসাযমাসা পঠমযামং সজ্ঝাযং কত্ৱা সযনকালে তথেৱ কলিঙ্গৰং উপধানং কত্ৱা সযন্তি. এৱং তে অক্খণৱেধিনো ৱালৱেধিনো চ অহেসুং. ইদং সন্ধাযেতং ৱুত্তং.

ওতাৰন্তি ৱিৱৰং. আৰম্মণন্তি পচ্চযং. পধানস্মিন্তি পধানভূমিযং ৱীৰিযং কুৰুমানা. পঠমবোধিযং কিৰ ভিক্খূ ভত্তকিচ্চং কত্ৱাৱ কম্মট্ঠানং মনসি কৰোন্তি. তেসং মনসিকৰোন্তানংযেৱ সূৰিযো অত্থং গচ্ছতি. তে ন্হাযিত্ৱা পুন চঙ্কমং ওতৰিত্ৱা পঠমযামং চঙ্কমন্তি. ততো ‘‘মা চিৰং নিদ্দাযিম্হা’’তি সৰীৰদৰথৱিনোদনত্থং নিপজ্জন্তা কট্ঠখণ্ডং উপদহিত্ৱা নিপজ্জন্তি, তে পুন পচ্ছিমযামে ৱুট্ঠায চঙ্কমং ওতৰন্তি. তে সন্ধায ইদং ৱুত্তং. অযম্পি দীপো তিণ্ণং ৰাজূনং কালে একঘণ্ডিনিগ্ঘোসো একপধানভূমি অহোসি. নানামুখে পহটঘণ্ডি পিলিচ্ছিকোড়িযং ওসৰতি, কল্যাণিযং পহটঘণ্ডি নাগদীপে ওসৰতি. ‘‘অযং ভিক্খু পুথুজ্জনো, অযং পুথুজ্জনো’’তি অঙ্গুলিং পসাৰেত্ৱা দস্সেতব্বো অহোসি. একদিৱসং সব্বে অৰহন্তোৱ অহেসুং. তস্মাতি যস্মা কলিঙ্গৰূপধানানং মাৰো আৰম্মণং ন লভতি, তস্মা. অট্ঠমং.

৯. নাগসুত্তৱণ্ণনা

২৩১. নৱমে অতিৱেলন্তি অতিক্কন্তৱেলং কালং অতিক্কন্তপ্পমাণং কালং. কিমঙ্গং পনাহন্তি অহং পন কিংকাৰণা ন উপসঙ্কমিস্সামি? ভিসমুড়ালন্তি ভিসঞ্চেৱ মুড়ালঞ্চ. অব্বুহেত্ৱাতি উদ্ধৰিত্ৱা. ভিঙ্কচ্ছাপাতি হত্থিপোতকা. তে কিৰ অভিণ্হং ভিঙ্কাৰসদ্দং কৰোন্তি, তস্মা ভিঙ্কচ্ছাপাতি ৱুচ্চন্তি. পসন্নাকাৰং কৰোন্তীতি পসন্নেহি কত্তব্বাকাৰং কৰোন্তি, চত্তাৰো পচ্চযে দেন্তি. ধম্মং ভাসন্তীতি একং দ্ৱে জাতকানি ৱা সুত্তন্তে ৱা উগ্গণ্হিত্ৱা অসম্ভিন্নেন সৰেন ধম্মং দেসেন্তি. পসন্নাকাৰং কৰোন্তীতি তেসং তায দেসনায পসন্না গিহী পচ্চযে দেন্তি. নেৱ ৱণ্ণায হোতি ন বলাযাতি নেৱ গুণৱণ্ণায, ন ঞাণবলায হোতি, গুণৱণ্ণে পন পৰিহাযন্তে সৰীৰৱণ্ণোপি সৰীৰবলম্পি পৰিহাযতি, তস্মা সৰীৰস্স নেৱ ৱণ্ণায ন বলায হোতি. নৱমং.

১০. বিড়াৰসুত্তৱণ্ণনা

২৩২. দসমে সন্ধিসমলসংকটীৰেতি এত্থ সন্ধীতি ভিন্নঘৰানং সন্ধি, সমলোতি গামতো গূথনিক্খমনমগ্গো, সংকটীৰন্তি সঙ্কাৰট্ঠানং. মুদুমূসিন্তি মুদুকং মূসিকং. ৱুট্ঠানং পঞ্ঞাযতীতি দেসনা পঞ্ঞাযতি. দসমং.

১১. সিঙ্গালসুত্তৱণ্ণনা

২৩৩. একাদসমে যেন যেন ইচ্ছতীতি সো জৰসিঙ্গালো ইচ্ছিতিচ্ছিতট্ঠানে ইৰিযাপথকপ্পনেন সীতৱাতূপৱাযনেন চ অন্তৰন্তৰা চিত্তস্সাদম্পি লভতীতি দস্সেতি. সক্যপুত্তিযপটিঞ্ঞোতি ইদং দেৱদত্তং সন্ধায ৱুত্তং. সো হি এত্তকম্পি চিত্তস্সাদং অনাগতে অত্তভাৱে ন লভিস্সতীতি. একাদসমং.

১২. দুতিযসিঙ্গালসুত্তৱণ্ণনা

২৩৪. দ্ৱাদসমে কতঞ্ঞুতাতি কতজাননং. কতৱেদিতাতি কতৱিসেসজাননং. তত্ৰিদং জৰসিঙ্গালস্স কতঞ্ঞুতায ৱত্থু – সত্ত কিৰ ভাতৰো খেত্তং কসন্তি. তেসং সব্বকনিট্ঠো খেত্তপৰিযন্তে ঠত্ৱা গাৱো ৰক্খতি. অথেকং জৰসিঙ্গালং অজগৰো গণ্হি, সো তং দিস্ৱা যট্ঠিযা পোথেত্ৱা ৱিস্সজ্জাপেসি. অজগৰো সিঙ্গালং ৱিস্সজ্জেত্ৱা তমেৱ গণ্হি. সিঙ্গালো চিন্তেসি – ‘‘ময্হং ইমিনা জীৱিতং দিন্নং, অহম্পি ইমস্স দস্সামী’’তি যাগুঘটস্স উপৰি ঠপিতং ৱাসিং মুখেন ডংসিত্ৱা তস্স সন্তিকং অগমাসি. ইতৰে ভাতৰো দিস্ৱা, ‘‘সিঙ্গালো ৱাসিং হৰতী’’তি অনুবন্ধিংসু. সো তেহি দিট্ঠভাৱং ঞত্ৱা ৱাসিং তস্স সন্তিকে ছড্ডেত্ৱা পলাযি. ইতৰে আগন্ত্ৱা কনিট্ঠং অজগৰেন গহিতং দিস্ৱা ৱাসিযা অজগৰং ছিন্দিত্ৱা তং গহেত্ৱা অগমংসু. এৱং জৰসিঙ্গালে সিযা যা কাচি কতঞ্ঞুতা কতৱেদিতা. সক্যপুত্তিযপটিঞ্ঞেতি ইদম্পি দেৱদত্তস্স আচাৰমেৱ সন্ধায ৱুত্তন্তি. দ্ৱাদসমং.

ওপম্মসংযুত্তৱণ্ণনা নিট্ঠিতা.