৬. লাভসক্কাৰসংযুত্তং

১. পঠমৱগ্গো

১. দাৰুণসুত্তৱণ্ণনা

১৫৭. লাভসক্কাৰসংযুত্তস্স পঠমে দাৰুণোতি থদ্ধো. লাভসক্কাৰসিলোকোতি এত্থ লাভো নাম চতুপচ্চযলাভো. সক্কাৰোতি তেসংযেৱ সুকতানং সুসঙ্খতানং লাভো. সিলোকোতি ৱণ্ণঘোসো. কটুকোতি তিখিণো. ফৰুসোতি খৰো. অন্তৰাযিকোতি অন্তৰাযকৰো. পঠমং.

২. বড়িসসুত্তৱণ্ণনা

১৫৮. দুতিযে বাড়িসিকোতি বড়িসং গহেত্ৱা চৰমানো মচ্ছঘাতকো. আমিসগতন্তি আমিসমক্খিতং. আমিসচক্খূতি আমিসে চক্খু দস্সনং অস্সাতি আমিসচক্খু. গিলবড়িসোতি গিলিতবড়িসো. অনযং আপন্নোতি দুক্খং পত্তো. ব্যসনং আপন্নোতি ৱিনাসং পত্তো. যথাকামকৰণীযোতি যথাকামেন যথাৰুচিযা যথেৱ নং বাড়িসিকো ইচ্ছতি, তথেৱস্স কত্তব্বোতি অত্থো. যথাকামকৰণীযো পাপিমতোতি যথা কিলেসমাৰস্স কামো, এৱং কত্তব্বো, নিৰযং ৱা তিৰচ্ছানযোনিং ৱা পেত্তিৱিসযং ৱা পাপেতব্বো. দুতিযং.

৩-৪. কুম্মসুত্তাদিৱণ্ণনা

১৫৯-১৬০. ততিযে মহাকুম্মকুলন্তি মহন্তং অট্ঠিকচ্ছপকুলং. অগমাসীতি ‘‘এত্থ অদ্ধা কিঞ্চি খাদিতব্বং অত্থি, তং মচ্ছৰাযন্তো মং এস নিৱাৰেতী’’তি সঞ্ঞায অগমাসি. পপতাযাতি পপতা ৱুচ্চতি দীঘৰজ্জুকবদ্ধো অযকন্তকোসকে দণ্ডকং পৱেসেত্ৱা গহিতো কণ্ণিকসল্লসণ্ঠানো, অযকণ্টকো, যস্মিং ৱেগেন পতিত্ৱা কটাহে লগ্গমত্তে দণ্ডকো নিক্খমতি, ৰজ্জুকো একাবদ্ধো গচ্ছতেৱ. সো কুম্মোতি সো ৱিদ্ধকুম্মো. যেন সো কুম্মোতি উদকসদ্দং সুত্ৱা সাসঙ্কট্ঠানং ভৱিস্সতীতি নিৱত্তিত্ৱা যেন সো অত্থকামো কুম্মো. ন দানি ত্ৱং অম্হাকন্তি ইদানি ত্ৱং অমিত্তহত্থং গতো, ন অম্হাকং সন্তকোতি অত্থো. এৱং সল্লপন্তানংযেৱ চ নেসং নাৱায ঠিতো লুদ্দো ৰজ্জুকং আকড্ঢিত্ৱা কুম্মং গহেত্ৱা যথাকামং অকাসি. সেসমেত্থ ইতো অনন্তৰসুত্তে চ উত্তানমেৱ. ততিযচতুত্থানি.

৫. মীড়্হকসুত্তৱণ্ণনা

১৬১. পঞ্চমে মীড়্হকাতি গূথপাণকা. গূথাদীতি গূথভক্খা. গূথপূৰাতি অন্তো গূথেন ভৰিতা. পুণ্ণা গূথস্সাতি ইদং পুৰিমস্সেৱ অত্থদীপনং. অতিমঞ্ঞেয্যাতি পচ্ছিমপাদে ভূমিযং ঠপেত্ৱা পুৰিমপাদে গূথস্স উপৰি আৰোপেত্ৱা ঠিতা ‘‘অহম্হি গূথাদী’’তি ভণন্তী অতিমঞ্ঞেয্য. পিণ্ডপাতো চস্স পূৰোতি অপৰোপিস্স পত্তপূৰো পণীতপিণ্ডপাতো ভৱেয্য. পঞ্চমং.

৬. অসনিসুত্তৱণ্ণনা

১৬২. ছট্ঠে কং, ভিক্খৱে, অসনিৱিচক্কন্তি, ভিক্খৱে, কং পুগ্গলং মত্থকে পতিত্ৱা মদ্দমানং সুক্কাসনিচক্কং আগচ্ছতু. অপ্পত্তমানসন্তি অনধিগতাৰহত্তং. ইতি ভগৱা ন সত্তানং দুক্খকামতায, আদীনৱং পন দস্সেতুং এৱমাহ. অসনিচক্কঞ্হি মত্থকে পতিতং একমেৱ অত্তভাৱং নাসেতি, লাভসক্কাৰসিলোকেন পৰিযাদিণ্ণচিত্তো নিৰযাদীসু অনন্তদুক্খং অনুভোতি. ছট্ঠং.

৭. দিদ্ধসুত্তৱণ্ণনা

১৬৩. সত্তমে দিদ্ধগতেনাতি গতদিদ্ধেন. ৱিসল্লেনাতি ৱিসমক্খিতেন. সল্লেনাতি সত্তিযা. সত্তমং.

৮. সিঙ্গালসুত্তৱণ্ণনা

১৬৪. অট্ঠমে সিঙ্গালোতি জৰসিঙ্গালো. যথা হি সুৱণ্ণৱণ্ণোপি কাযো পূতিকাযো ত্ৱেৱ, তংখণং গড়িতম্পি চ মুত্তং পূতিমুত্তন্ত্ৱেৱ ৱুচ্চতি, এৱং তদহুজাতোপি সিঙ্গালো জৰসিঙ্গালোত্ৱেৱ ৱুচ্চতি. উক্কণ্টকেন নামাতি এৱংনামকেন ৰোগেন. সো কিৰ সীতকালে উপ্পজ্জতি. তস্মিং উপ্পন্নে সকলসৰীৰতো লোমানি পতন্তি, সকলসৰীৰং নিল্লোমং হুত্ৱা, সমন্ততো ফুটতি, ৱাতব্ভাহতা ৱণা ৰুজ্জন্তি. যথা উম্মত্তকসুনখেন দট্ঠো পুৰিসো অনৱট্ঠিতোৱ ভমতি, এৱং তস্মিং উপ্পন্নে ভমিতব্বো হোতি, অসুকট্ঠানে সোত্থি ভৱিস্সতীতি ন পঞ্ঞাযতি. অট্ঠমং.

৯. ৱেৰম্ভসুত্তৱণ্ণনা

১৬৫. নৱমে ৱেৰম্ভৱাতাতি এৱংনামকা মহাৱাতা. কীদিসে পন ঠানে তে ৱাতা ৱাযন্তীতি? যত্থ ঠিতস্স চত্তাৰো দীপা উপ্পলিনিপত্তমত্তা হুত্ৱা পঞ্ঞাযন্তি. যো পক্খী গচ্ছতীতি নৱৱুট্ঠে দেৱে ৱিৰৱন্তো ৱাতসকুণো তত্থ গচ্ছতি, তং সন্ধাযেতং ৱুত্তং. অৰক্খিতেনেৱ কাযেনাতিআদীসু হত্থপাদে কীড়াপেন্তো খন্ধট্ঠিং ৱা নামেন্তো কাযং ন ৰক্খতি নাম, নানাৱিধং দুট্ঠুল্লকথং কথেন্তো ৱাচং ন ৰক্খতি নাম, কামৱিতক্কাদযো ৱিতক্কেন্তো চিত্তং ন ৰক্খতি নাম. অনুপট্ঠিতায সতিযাতি কাযগতাসতিং অনুপট্ঠপেত্ৱা. নৱমং.

১০. সগাথকসুত্তৱণ্ণনা

১৬৬. দসমে অসক্কাৰেন চূভযন্তি অসক্কাৰেন চ উভযেন. সমাধীতি অৰহত্তফলসমাধি. সো হি তেন ন ৱিকম্পতি. অপ্পমাণৱিহাৰিনোতি অপ্পমাণেন ফলসমাধিনা ৱিহৰন্তস্স. সাততিকন্তি সততকাৰিং. সুখুমংদিট্ঠিৱিপস্সকন্তি অৰহত্তমগ্গদিট্ঠিযা সুখুমদিট্ঠিফলসমাপত্তিঅত্থায ৱিপস্সনং পট্ঠপেত্ৱা আগতত্তা ৱিপস্সকং. উপাদানক্খযাৰামন্তি উপাদানক্খযসঙ্খাতে নিব্বানে ৰতং. আহু সপ্পুৰিসো ইতীতি সপ্পুৰিসোতি কথেন্তীতি. দসমং.

পঠমো ৱগ্গো.

২. দুতিযৱগ্গো

১-২. সুৱণ্ণপাতিসুত্তাদিৱণ্ণনা

১৬৭-১৬৮. দুতিযৱগ্গস্স পঠমে সম্পজানমুসা ভাসন্তন্তি অপ্পমত্তকেনপি কাৰণেন সম্পজানমেৱ মুসা ভাসন্তং. ‘‘সীলং পূৰেস্সামী’’তি সংৱিহিতভিক্খুং সিনেৰুমত্তোপি পচ্চযৰাসি চালেতুং ন সক্কোতি. যদা পন সীলং পহায সক্কাৰনিস্সিতো হোতি, তদা কুণ্ডকমুট্ঠিহেতুপি মুসা ভাসতি, অঞ্ঞং ৱা অকিচ্চং কৰোতি. দুতিযং উত্তানমেৱাতি. পঠমদুতিযানি.

৩-১০. সুৱণ্ণনিক্খসুত্তাদিৱণ্ণনা

১৬৯. ততিযাদীসু সুৱণ্ণনিক্খস্সাতি একস্স কঞ্চননিক্খস্স. সিঙ্গীনিক্খস্সাতি সিঙ্গীসুৱণ্ণনিক্খস্স. পথৱিযাতি চক্কৱাড়ব্ভন্তৰায মহাপথৱিযা. আমিসকিঞ্চিক্খহেতূতি কস্সচিদেৱ আমিসস্স হেতু অন্তমসো কুণ্ডকমুট্ঠিনোপি. জীৱিতহেতূতি অটৱিযং চোৰেহি গহেত্ৱা জীৱিতে ৱোৰোপিযমানে তস্সপি হেতু. জনপদকল্যাণিযাতি জনপদে উত্তমিত্থিযা. ততিযাদীনি.

দুতিযো ৱগ্গো.

৩. ততিযৱগ্গো

১-২. মাতুগামসুত্তাদিৱণ্ণনা

১৭০-১৭১. ততিযৱগ্গস্স পঠমে ন তস্স, ভিক্খৱে, মাতুগামোতি ন তস্স ৰহো এককস্স নিসিন্নস্স তেন ধম্মেন অত্থিকোপি মাতুগামো চিত্তং পৰিযাদাতুং সক্কোতি, যস্স লাভসক্কাৰসিলোকো চিত্তং পৰিযাদাতুং সক্কোতীতি, অত্থো. দুতিযং উত্তানমেৱাতি. পঠমদুতিযানি.

৩-৬. একপুত্তকসুত্তাদিৱণ্ণনা

১৭২-১৭৫. ততিযে সদ্ধাতি সোতাপন্না. সেসমেত্থ উত্তানমেৱ. তথা চতুত্থে পঞ্চমে ছট্ঠে চ. ততিযাদীনি.

৭. ততিযসমণব্ৰাহ্মণসুত্তৱণ্ণনা

১৭৬. সত্তমে সমুদযন্তিআদীসু সহ পুব্বকম্মেন অত্তভাৱো কোলপুত্তিযং ৱণ্ণপোক্খৰতা কল্যাণৱাক্কৰণতা ধুতগুণাৱীকৰণং চীৱৰধাৰণং পৰিৱাৰসম্পত্তীতি এৱমাদি লাভসক্কাৰস্স সমুদযো নাম, তং সমুদযসচ্চৱসেন নপ্পজানাতি, নিৰোধো চ পটিপদা চ নিৰোধসচ্চমগ্গসচ্চৱসেনেৱ ৱেদিতব্বা. সত্তমং.

৮. ছৱিসুত্তৱণ্ণনা

১৭৭. অট্ঠমে যস্মা লাভসক্কাৰসিলোকো নৰকাদীসু, নিব্বত্তেন্তো সকলম্পি ইমং অত্তভাৱং নাসেতি, ইধাপি মৰণম্পি মৰণমত্তম্পি দুক্খং আৱহতি, তস্মা ছৱিং ছিন্দতীতিআদি ৱুত্তং. অট্ঠমং.

৯. ৰজ্জুসুত্তৱণ্ণনা

১৭৮. নৱমে ৱাড়ৰজ্জুযাতি সুত্তাদিমযা ৰজ্জু মুদুকা হোতি ৱাড়ৰজ্জু খৰা ফৰুসা, তস্মা অযমেৱ গহিতা. নৱমং.

১০. ভিক্খুসুত্তৱণ্ণনা

১৭৯. দসমে দিট্ঠধম্মসুখৱিহাৰাতি ফলসমাপত্তিসুখৱিহাৰা. তেসাহমস্সাতি তেসং অহং অস্স. খীণাসৱো হি লাভী পুঞ্ঞসম্পন্নো যাগুখজ্জকাদীনি গহেত্ৱা আগতাগতানং অনুমোদনং কৰোন্তো ধম্মং দেসেন্তো পঞ্হং ৱিস্সজ্জেন্তো ফলসমাপত্তিং অপ্পেত্ৱা নিসীদিতুং ওকাসং ন লভতি, তং সন্ধায ৱুত্তন্তি. দসমং.

ততিযো ৱগ্গো.

৪. চতুত্থৱগ্গো

১-৪. ভিন্দিসুত্তাদিৱণ্ণনা

১৮০-১৮৩. চতুত্থৱগ্গস্স পঠমং উত্তানমেৱ. দুতিযাদীসু কুসলমূলন্তি অলোভাদিতিৱিধকুসলধম্মো. সুক্কো ধম্মোতি তস্সেৱ পৰিযাযদেসনা. অযং পনেত্থ সঙ্খেপত্থো – যস্স কুসলমূলাদিসঙ্খাতস্স অনৱজ্জধম্মস্স অসমুচ্ছিন্নত্তা দেৱদত্তো সগ্গে ৱা নিব্বত্তেয্য, মগ্গফলানি ৱা অধিগচ্ছেয্য, স্ৱাস্স সমুচ্ছেদমগমা সব্বসো সমুচ্ছিন্নো ৱিনট্ঠো. পঠমাদীনি.

৫. অচিৰপক্কন্তসুত্তৱণ্ণনা

১৮৪. পঞ্চমে পৰাভৱাযাতি অৱড্ঢিযা ৱিনাসায. অস্সতৰীতি ৱড়ৱায কুচ্ছিস্মিং গদ্ৰভস্স জাতা. অত্তৱধায গব্ভং গণ্হাতীতি তং অস্সেন সদ্ধিং সম্পযোজেন্তি, সা গব্ভং গণ্হিত্ৱা কালে সম্পত্তে ৱিজাযিতুং ন সক্কোতি, পাদেহি ভূমিযং পহৰন্তী তিট্ঠতি, অথস্সা চত্তাৰো পাদে চতূসু খাণুকেসু বন্ধিত্ৱা কুচ্ছিং ফালেত্ৱা পোতং নীহৰন্তি, সা তত্থেৱ মৰতি. তেনেতং ৱুত্তং. পঞ্চমং.

৬. পঞ্চৰথসতসুত্তৱণ্ণনা

১৮৫. ছট্ঠে ভত্তাভিহাৰোতি অভিহৰিতব্বং ভত্তং. তস্স পন পমাণং দস্সেতুং পঞ্চ চ থালিপাকসতানীতি ৱুত্তং. তত্থ একো থালিপাকো দসন্নং পুৰিসানং ভত্তং গণ্হাতি. নাসায পিত্তং ভিন্দেয্যুন্তি অচ্ছপিত্তং ৱা মচ্ছপিত্তং ৱাস্স নাসপুটে পক্খিপেয্যং. ছট্ঠং.

৭-১৩. মাতুসুত্তাদিৱণ্ণনা

১৮৬-১৮৭. সত্তমে মাতুপি হেতূতি ‘‘সচে মুসা ভণসি, মাতৰং তে ৱিস্সজ্জেস্সাম. নো চে ভণসি, ন ৱিস্সজ্জেস্সামা’’তি এৱং চোৰেহি অটৱিযং পুচ্ছমানো তস্সা চোৰহত্থগতায মাতুযাপি হেতু সম্পজানমুসা ন ভাসেয্যাতি অত্থো. ইতো পৰেসুপি এসেৱ নযোতি. সত্তমাদীনি.

লাভসক্কাৰসংযুত্তৱণ্ণনা নিট্ঠিতা.