৭. ৰাহুলসংযুত্তং

১. পঠমৱগ্গো

১-৮. চক্খুসুত্তাদিৱণ্ণনা

১৮৮-১৯৫. ৰাহুলসংযুত্তস্স পঠমে একোতি চতূসু ইৰিযাপথেসু একৱিহাৰী. ৱূপকট্ঠোতি ৱিৱেকট্ঠো নিস্সদ্দো. অপ্পমত্তোতি সতিযা অৱিপ্পৱসন্তো. আতাপীতি ৱীৰিযসম্পন্নো. পহিতত্তো ৱিহৰেয্যন্তি ৱিসেসাধিগমত্থায পেসিতত্তো হুত্ৱা ৱিহৰেয্যং. অনিচ্চন্তি হুত্ৱা অভাৱাকাৰেন অনিচ্চং. অথ ৱা উপ্পাদৱযৱন্ততায তাৱকালিকতায ৱিপৰিণামকোটিযা নিচ্চপটিক্খেপতোতি ইমেহিপি কাৰণেহি অনিচ্চং. দুক্খন্তি চতূহি কাৰণেহি দুক্খং দুক্খমনট্ঠেন দুক্খৱত্থুকট্ঠেন সততসম্পীড়নট্ঠেন সুখপটিক্খেপেনাতি. কল্লন্তি যুত্তং. এতং মমাতি তণ্হাগাহো. এসোহমস্মীতি মানগাহো. এসো মে অত্তাতি দিট্ঠিগাহো. তণ্হাগাহো চেত্থ অট্ঠসততণ্হাৱিচৰিতৱসেন, মানগাহো নৱৱিধমানৱসেন, দিট্ঠিগাহো দ্ৱাসট্ঠিদিট্ঠিৱসেন ৱেদিতব্বো. নিব্বিন্দং ৱিৰজ্জতীতি এত্থ ৱিৰাগৱসেন চত্তাৰো মগ্গা কথিতা, ৱিৰাগা ৱিমুচ্চতীতি এত্থ ৱিমুত্তিৱসেন চত্তাৰি সামঞ্ঞফলানি.

এত্থ চ পঞ্চসু দ্ৱাৰেসু পসাদাৱ গহিতা, মনোতি ইমিনা তেভূমকং সম্মসনচাৰচিত্তং. দুতিযে পঞ্চসু দ্ৱাৰেসু আৰম্মণমেৱ. ততিযে পঞ্চসু দ্ৱাৰেসু পসাদৱত্থুকচিত্তমেৱ, মনোৱিঞ্ঞাণেন তেভূমকং সম্মসনচাৰচিত্তং গহিতং. এৱং সব্বত্থ নযো নেতব্বো. ছট্ঠে তেভূমকধম্মা. অট্ঠমে পন তণ্হাতি তস্মিং তস্মিং দ্ৱাৰে জৱনপ্পত্তাৱ লব্ভতি. পঠমাদীনি.

৯. ধাতুসুত্তৱণ্ণনা

১৯৬. নৱমে ৱিঞ্ঞাণধাতুৱসেন নামং, সেসাহি ৰূপন্তি নামৰূপং কথিতং. নৱমং.

১০. খন্ধসুত্তৱণ্ণনা

১৯৭. দসমে ৰূপক্খন্ধো কামাৱচৰো, সেসা চত্তাৰো সব্বসঙ্গাহিকপৰিচ্ছেদেন চতুভূমকা. ইধ পন তেভূমকাতি গহেতব্বা. দসমং.

পঠমো ৱগ্গো.

২. দুতিযৱগ্গো

১-১০. চক্খুসুত্তাদিৱণ্ণনা

১৯৮-১৯৯. দুতিযে দস উত্তানত্থানেৱ. পঠমাদীনি.

১১. অনুসযসুত্তৱণ্ণনা

২০০. একাদসমে ইমস্মিঞ্চ সৱিঞ্ঞাণকে কাযেতি অত্তনো সৱিঞ্ঞাণককাযং দস্সেতি, বহিদ্ধা চাতি পৰস্স সৱিঞ্ঞাণকং ৱা অৱিঞ্ঞাণকং ৱা. পুৰিমেন ৱা অত্তনো চ পৰস্স চ ৱিঞ্ঞাণমেৱ দস্সেতি, পচ্ছিমেন বহিদ্ধা অনিন্দ্ৰিযবদ্ধৰূপং. অহঙ্কাৰমমঙ্কাৰমানানুসযাতি অহংকাৰদিট্ঠি চ মমংকাৰতণ্হা চ মানানুসযা চ. ন হোন্তীতি এতে কিলেসা কথং জানন্তস্স এতেসু ৱত্থূসু ন হোন্তীতি পুচ্ছতি. সম্মপ্পঞ্ঞায পস্সতীতি সহ ৱিপস্সনায মগ্গপঞ্ঞায সুট্ঠু পস্সতি. একাদসমং.

১২. অপগতসুত্তৱণ্ণনা

২০১. দ্ৱাদসমে অহঙ্কাৰমমঙ্কাৰমানাপগতন্তি অহংকাৰতো চ মমংকাৰতো চ মানতো চ অপগতং. ৱিধা সমতিক্কন্তন্তি মানকোট্ঠাসে সুট্ঠু অতিক্কন্তং. সন্তং সুৱিমুত্তন্তি কিলেসৱূপসমেন সন্তং, কিলেসেহেৱ সুট্ঠু ৱিমুত্তং. সেসং উত্তানমেৱাতি. দ্ৱাদসমং.

দুতিযো ৱগ্গো.

দ্ৱীসুপি অসেক্খভূমি কথিতা. পঠমো পনেত্থ আযাচন্তস্স দেসিতো, দুতিযো অনাযাচন্তস্স. সকলেপি পন ৰাহুলসংযুত্তে থেৰস্স ৱিমুত্তিপৰিপাচনীযধম্মাৱ কথিতাতি.

ৰাহুলসংযুত্তৱণ্ণনা নিট্ঠিতা.