৮. লোকাযতিকসুত্তৱণ্ণনা

৪৮. অট্ঠমে লোকাযতিকোতি ৱিতণ্ডসত্থে লোকাযতে কতপৰিচযো. জেট্ঠমেতং লোকাযতন্তি পঠমং লোকাযতং. লোকাযতন্তি চ লোকস্সেৱ আযতং, বালপুথুজ্জনলোকস্স আযতং, মহন্তং গম্ভীৰন্তি উপধাৰিতব্বং পৰিত্তং ভাৱং দিট্ঠিগতং. একত্তন্তি একসভাৱং, নিচ্চসভাৱমেৱাতি পুচ্ছতি. পুথুত্তন্তি পুৰিমসভাৱেন নানাসভাৱং, দেৱমনুস্সাদিভাৱেন পঠমং হুত্ৱা পচ্ছা ন হোতীতি উচ্ছেদং সন্ধায পুচ্ছতি. এৱমেত্থ ‘‘সব্বমত্থি, সব্বমেকত্ত’’ন্তি ইমা দ্ৱেপি সস্সতদিট্ঠিযো, ‘‘সব্বং নত্থি, সব্বং পুথুত্ত’’ন্তি ইমা দ্ৱে উচ্ছেদদিট্ঠিযোতি ৱেদিতব্বা. অট্ঠমং.