৫. ঞাতিকসুত্তৱণ্ণনা

৪৫. পঞ্চমে ঞাতিকেতি দ্ৱিন্নং ঞাতকানং গামে. গিঞ্জকাৱসথেতি ইট্ঠকাহি কতে মহাপাসাদে. ধম্মপৰিযাযন্তি ধম্মকাৰণং. উপস্সুতীতি উপস্সুতিট্ঠানং, যং ঠানং উপগতেন সক্কা হোতি ভগৱতো সদ্দং সোতুং, তত্থ ঠিতোতি অত্থো. সো কিৰ গন্ধকুটিপৰিৱেণসম্মজ্জনত্থং আগতো অত্তনো কম্মং পহায ভগৱতো ধম্মঘোসং সুণন্তো অট্ঠাসি. অদ্দসাতি তদা কিৰ ভগৱতো আদিতোৱ পচ্চযাকাৰং মনসিকৰোন্তস্স ‘‘ইদং ইমিনা পচ্চযেন হোতি, ইদং ইমিনা’’তি আৱজ্জতো যাৱ ভৱগ্গা একঙ্গণং অহোসি, সত্থা মনসিকাৰং পহায ৱচসা সজ্ঝাযং কৰোন্তো যথানুসন্ধিনা দেসনং নিট্ঠপেত্ৱা, ‘‘অপি নু খো ইমং ধম্মপৰিযাযং কোচি অস্সোসী’’তি আৱজ্জেন্তো তং ভিক্খুমদ্দস. তেন ৱুত্তং ‘‘অদ্দসা খো ভগৱা’’তি.

অস্সোসি নোতি অস্সোসি নু. অথ ৱা অস্সোসি নোতি অম্হাকং ভাসন্তানং অস্সোসীতি. উগ্গণ্হাহীতিআদীসু সুত্ৱা তুণ্হীভূতোৱ পগুণং কৰোন্তো উগ্গণ্হাতি নাম. পদানুপদং ঘটেত্ৱা ৱাচায পৰিচিতং কৰোন্তো পৰিযাপুণাতি নাম. উভযথাপি পগুণং আধাৰপ্পত্তং কৰোন্তো ধাৰেতি নাম. অত্থসংহিতোতি কাৰণনিস্সিতো. আদিব্ৰহ্মচৰিযকোতি মগ্গব্ৰহ্মচৰিযস্স আদি পতিট্ঠানভূতো. ইতি তীসুপি ইমেসু সুত্তেসু ৱট্টৱিৱট্টমেৱ কথিতং. পঞ্চমং.