৩. ঞাণৱত্থুসুত্তৱণ্ণনা

৩৩. ততিযে তং সুণাথাতি তং ঞাণৱত্থুদেসনং সুণাথ. ঞাণৱত্থূনীতি চেত্থ ঞাণমেৱ ঞাণৱত্থূতি ৱেদিতব্বং. জৰামৰণে ঞাণন্তিআদীসু চতূসু পঠমং সৱনমযঞাণং সম্মসনঞাণং পটিৱেধঞাণং পচ্চৱেক্খণঞাণন্তি চতুব্বিধং ৱট্টতি, তথা দুতিযং. ততিযং পন ঠপেত্ৱা সম্মসনঞাণং তিৱিধমেৱ হোতি, তথা চতুত্থং. লোকুত্তৰধম্মেসু হি সম্মসনং নাম নত্থি. জাতিযা ঞাণন্তিআদীসুপি এসেৱ নযো. ইমিনা ধম্মেনাতি ইমিনা চতুসচ্চধম্মেন ৱা মগ্গঞাণধম্মেন ৱা.

দিট্ঠেনাতিআদীসু দিট্ঠেনাতি ঞাণচক্খুনা দিট্ঠেন. ৱিদিতেনাতি পঞ্ঞায ৱিদিতেন. অকালিকেনাতি কিঞ্চি কালং অনতিক্কমিত্ৱা পটিৱেধানন্তৰংযেৱ ফলদাযকেন. পত্তেনাতি অধিগতেন. পৰিযোগাড়্হেনাতি পৰিযোগাহিতেন পঞ্ঞায অনুপৱিট্ঠেন. অতীতানাগতে নযং নেতীতি ‘‘যে খো কেচী’’তিআদিনা নযেন অতীতে চ অনাগতে চ নযং নেতি. এত্থ চ ন চতুসচ্চধম্মেন ৱা মগ্গঞাণধম্মেন ৱা সক্কা অতীতানাগতে নযং নেতুং, চতুসচ্চে পন মগ্গঞাণেন পটিৱিদ্ধে পৰতো পচ্চৱেক্খণঞাণং নাম হোতি. তেন নযং নেতীতি ৱেদিতব্বা. অব্ভঞ্ঞংসূতি অভিঅঞ্ঞংসু জানিংসু. সেয্যথাপাহং, এতৰহীতি যথা অহং এতৰহি চতুসচ্চৱসেন জানামি. অন্ৱযে ঞাণন্তি অনুঅযে ঞাণং, ধম্মঞাণস্স অনুগমনে ঞাণং, পচ্চৱেক্খণঞাণস্সেতং নামং. ধম্মে ঞাণন্তি মগ্গঞাণং. ইমস্মিং সুত্তে খীণাসৱস্স সেক্খভূমি কথিতা হোতি. ততিযং.