৩. সমণব্ৰাহ্মণসুত্তৱণ্ণনা

১৩. ততিযে সমণা ৱা ব্ৰাহ্মণা ৱাতি সচ্চানি পটিৱিজ্ঝিতুং অসমত্থা বাহিৰকসমণব্ৰাহ্মণা. জৰামৰণং নপ্পজানন্তীতিআদীসু জৰামৰণং ন জানন্তি দুক্খসচ্চৱসেন, জৰামৰণসমুদযং ন জানন্তি সহ তণ্হায জাতি জৰামৰণস্স সমুদযোতি সমুদযসচ্চৱসেন, জৰামৰণনিৰোধং ন জানন্তি নিৰোধসচ্চৱসেন, পটিপদং ন জানন্তি মগ্গসচ্চৱসেন. জাতিং ন জানন্তি দুক্খসচ্চৱসেন, জাতিসমুদযং ন জানন্তি সহ তণ্হায ভৱো জাতিসমুদযোতি সমুদযসচ্চৱসেন. এৱং সহ তণ্হায সমুদযং যোজেত্ৱা সব্বপদেসু চতুসচ্চৱসেন অত্থো ৱেদিতব্বো. সামঞ্ঞত্থং ৱা ব্ৰহ্মঞ্ঞত্থং ৱাতি এত্থ অৰিযমগ্গো সামঞ্ঞঞ্চেৱ ব্ৰহ্মঞ্ঞঞ্চ. উভযত্থাপি পন অত্থো নাম অৰিযফলং ৱেদিতব্বং. ইতি ভগৱা ইমস্মিং সুত্তে একাদসসু ঠানেসু চত্তাৰি সচ্চানি কথেসীতি. ততিযং.