৯. ৱনসংযুত্তং

১. ৱিৱেকসুত্তৱণ্ণনা

২২১. ৱনসংযুত্তস্স পঠমে কোসলেসু ৱিহৰতীতি সত্থু সন্তিকে কম্মট্ঠানং গহেত্ৱা তস্স জনপদস্স সুলভভিক্খতায তত্থ গন্ত্ৱা ৱিহৰতি. সংৱেজেতুকামাতি ৱিৱেকং পটিপজ্জাপেতুকামা. ৱিৱেককামোতি তযো ৱিৱেকে পত্থযন্তো. নিচ্ছৰতী বহিদ্ধাতি বাহিৰেসু পুথুত্তাৰম্মণেসু চৰতি. জনো জনস্মিন্তি ত্ৱং জনো অঞ্ঞস্মিং জনে ছন্দৰাগং ৱিনযস্সু. পজহাসীতি পজহ. ভৱাসীতি ভৱ. সতং তং সাৰযামসেতি সতিমন্তং পণ্ডিতং তং মযম্পি সাৰযাম, সতং ৱা ধম্মং মযং তং সাৰযামাতি অত্থো. পাতালৰজোতি অপ্পতিট্ঠট্ঠেন পাতালসঙ্খাতো কিলেসৰজো. মা তং কামৰজোতি অযং কামৰাগৰজো তং মা অৱহৰি, অপাযমেৱ মা নেতূতি অত্থো. পংসুকুন্থিতোতি পংসুমক্খিতো. ৱিধুনন্তি ৱিধুনন্তো. সিতং ৰজন্তি সৰীৰলগ্গং ৰজং. সংৱেগমাপাদীতি দেৱতাপি নাম মং এৱং সাৰেতীতি ৱিৱেকমাপন্নো, উত্তমৱীৰিযং ৱা পগ্গয্হ পৰমৱিৱেকং মগ্গমেৱ পটিপন্নোতি. পঠমং.

২. উপট্ঠানসুত্তৱণ্ণনা

২২২. দুতিযে সুপতীতি অযং কিৰ খীণাসৱো, সো দূৰে ভিক্খাচাৰগামং গন্ত্ৱা আগতো পণ্ণসালায পত্তচীৱৰং পটিসামেত্ৱা অৱিদূৰে জাতস্সৰং ওতৰিত্ৱা গত্তানি উতুং গাহাপেত্ৱা দিৱাট্ঠানং সম্মজ্জিত্ৱা তত্থ নীচমঞ্চকং পঞ্ঞাপেত্ৱা নিদ্দং অনোক্কমন্তোৱ নিপন্নো. খীণাসৱস্সাপি হি কাযদৰথো হোতিযেৱাতি তস্স ৱিনোদনত্থং, তং সন্ধায সুপতীতি ৱুত্তং. অজ্ঝভাসীতি ‘‘অযং ভিক্খু সত্থু সন্তিকে কম্মট্ঠানং গহেত্ৱা দিৱা সুপতি, দিৱাসোপ্পঞ্চ নামেতং ৱড্ঢিতং দিট্ঠধম্মিকসম্পৰাযিকং অত্থং নাসেতী’’তি মঞ্ঞমানা ‘‘চোদেস্সামি ন’’ন্তি চিন্তেত্ৱা অভাসি.

আতুৰস্সাতি জৰাতুৰো ৰোগাতুৰো কিলেসাতুৰোতি তযো আতুৰা, তেসু কিলেসাতুৰং সন্ধাযেৱমাহ. সল্লৱিদ্ধস্সাতি সৱিসেন সত্তিসল্লেন ৱিয অৱিজ্জাৱিসৱিট্ঠেন তণ্হাসল্লেন হদযে ৱিদ্ধস্স. ৰুপ্পতোতি ঘট্টিযমানস্স.

ইদানিস্স কামেসু আদীনৱং কথযন্তী অনিচ্চাতিআদিমাহ. তত্থ অসিতন্তি তণ্হাদিট্ঠিনিস্সযেন অনিস্সিতং. কস্মা পব্বজিতং তপেতি এৱৰূপং খীণাসৱং দিৱাসোপ্পং ন তপতি, তাদিসং পন কস্মা ন তপেস্সতীতি? ৱদতি. থেৰস্সেৱ ৱা এতং ৱচনং, তস্মা অযমেত্থ অত্থো – বদ্ধেসু মুত্তং অসিতং মাদিসং খীণাসৱপব্বজিতং কস্মা দিৱাসোপ্পং তপে, ন তপেস্সতীতি? সেসগাথাসুপি এসেৱ নযো. দেৱতায হি ৱচনপক্খে – ‘‘এৱৰূপং খীণাসৱপব্বজিতং দিৱাসোপ্পং ন তপতি, তাদিসং পন কস্মা ন তপেস্সতি? তপেস্সতিযেৱা’’তি অত্থো. থেৰস্স ৱচনপক্খে – ‘‘এৱৰূপং মাদিসং খীণাসৱপব্বজিতং কস্মা দিৱাসোপ্পং তপে? ন তপতিযেৱা’’তি অত্থো. অযং পনেত্থ অনুত্তানপদৱণ্ণনা. ৱিনযাতি ৱিনযেন. সমতিক্কমাতি ৱট্টমূলিকায অৱিজ্জায সমতিক্কমেন. তং ঞাণন্তি তং চতুসচ্চঞাণং. পৰমোদানন্তি পৰমপৰিসুদ্ধং. পব্বজিতন্তি এৱৰূপেন ঞাণেন সমন্নাগতং পব্বজিতং. ৱিজ্জাযাতি চতুত্থমগ্গৱিজ্জায. আৰদ্ধৱীৰিযন্তি পগ্গহিতৱীৰিযং পৰিপুণ্ণৱীৰিযং. দুতিযং.

৩. কস্সপগোত্তসুত্তৱণ্ণনা

২২৩. ততিযে ছেতন্তি একং মিগলুদ্দকং. ওৱদতীতি সো কিৰ মিগলুদ্দকো পাতোৱ ভুঞ্জিত্ৱা ‘‘মিগে ৱধিস্সামী’’তি অৰঞ্ঞং পৱিট্ঠো একং ৰোহিতমিগং দিস্ৱা ‘‘সত্তিযা নং পহৰিস্সামী’’তি অনুবন্ধমানো থেৰস্স পঠমসুত্তে ৱুত্তনযেনেৱ দিৱাৱিহাৰং নিসিন্নস্স অৱিদূৰেন পক্কমতি. অথ নং থেৰো – ‘‘উপাসক, পাণাতিপাতো নামেস অপাযসংৱত্তনিকো অপ্পাযুকসংৱত্তনিকো, সক্কা অঞ্ঞেনপি কসিৱণিজ্জাদিকম্মেন দাৰভৰণং কাতুং, মা এৱৰূপং কক্খড়কম্মং কৰোহী’’তি আহ. সোপি ‘‘মহাপংসুকূলিকত্থেৰো কথেতী’’তি গাৰৱেন ঠত্ৱা সোতুং আৰদ্ধো. অথস্স সোতুকামতং জনেস্সামীতি থেৰো অঙ্গুট্ঠকং জালাপেসি. সো অক্খীহিপি পস্সতি, কণ্ণেহিপি সুণাতি, চিত্তং পনস্স ‘‘অসুকট্ঠানং মিগো গতো ভৱিস্সতি, অসুকতিত্থং ওতিণ্ণো, তত্থ নং গন্ত্ৱা ঘাতেত্ৱা যাৱদিচ্ছকং মংসং খাদিত্ৱা সেসং কাজেনাদায গন্ত্ৱা পুত্তকে তোসেস্সামী’’তি এৱং মিগস্সেৱ অনুপদং ধাৱতি. এৱং ৱিক্খিত্তচিত্তস্স ধম্মং দেসেন্তং থেৰং সন্ধায ৱুত্তং ‘‘ওৱদতী’’তি. অজ্ঝভাসীতি ‘‘অযং থেৰো অদাৰুং তচ্ছন্তো ৱিয অখেত্তে ৱপ্পন্তো ৱিয অত্তনোপি কম্মং নাসেতি, এতস্সাপি চোদেস্সামি ন’’ন্তি অভাসি.

অপ্পপঞ্ঞন্তি নিপ্পঞ্ঞং. অচেতসন্তি কাৰণজাননসমত্থেন চিত্তেন ৰহিতং. মন্দোৱাতি অন্ধবালো ৱিয. সুণাতীতি তৱ ধম্মকথং সুণাতি. ন ৱিজানাতীতি অত্থমস্স ন জানাতি. আলোকেতীতি তৱ পুথুজ্জনিকইদ্ধিযা জলন্তং অঙ্গুট্ঠকং আলোকেতি. ন পস্সতীতি এত্থ ‘‘নেৱ তেলং ন ৱট্টি ন দীপকপল্লিকা, থেৰস্স পন আনুভাৱেনাযং জলতী’’তি ইমং কাৰণং ন পস্সতি. দস পজ্জোতেতি দসসু অঙ্গুলীসু দস পদীপে. ৰূপানীতি কাৰণৰূপানি. চক্খূতি পঞ্ঞাচক্খু. সংৱেগমাপাদীতি কিং মে ইমিনাতি? ৱীৰিযং পগ্গয্হ পৰমৱিৱেকং অৰহত্তমগ্গং পটিপজ্জি. ততিযং.

৪. সম্বহুলসুত্তৱণ্ণনা

২২৪. চতুত্থে সম্বহুলাতি বহূ সুত্তন্তিকা আভিধম্মিকা ৱিনযধৰা চ. ৱিহৰন্তীতি সত্থু সন্তিকে কম্মট্ঠানং গহেত্ৱা ৱিহৰন্তি. পক্কমিংসূতি তে কিৰ তস্মিং জনপদে অঞ্ঞতৰং গামং উপসঙ্কমন্তে দিস্ৱা মনুস্সা পসন্নচিত্তা আসনসালায কোজৱত্থৰণাদীনি পঞ্ঞাপেত্ৱা যাগুখজ্জকানি দত্ৱা উপনিসীদিংসু. মহাথেৰো একং ধম্মকথিকং ‘‘ধম্মং কথেহী’’তি আহ. সো চিত্তং ধম্মকথং কথেসি. মনুস্সা পসীদিত্ৱা ভোজনৱেলাযং পণীতভোজনং অদংসু. মহাথেৰো মনুঞ্ঞং ভত্তানুমোদনমকাসি. মনুস্সা ভিয্যোসোমত্তায পসন্না ‘‘ইধেৱ, ভন্তে, তেমাসং ৱসথা’’তি পটিঞ্ঞং কাৰেত্ৱা গমনাগমনসম্পন্নে ঠানে সেনাসনানি কাৰেত্ৱা চতূহি পচ্চযেহি উপট্ঠহিংসু. মহাথেৰো ৱস্সূপনাযিকদিৱসে ভিক্খূ ওৱদি – ‘‘আৱুসো, তুম্হেহি গৰুকস্স সত্থু সন্তিকে কম্মট্ঠানং গহিতং, বুদ্ধপাতুভাৱো নাম দুল্লভো. মাসস্স অট্ঠ দিৱসে ধম্মস্সৱনং কত্ৱা গণসঙ্গণিকং পহায অপ্পমত্তা ৱিহৰথা’’তি. তে ততো পট্ঠায যুঞ্জন্তি ঘটেন্তি. কদাচি সব্বৰত্তিকং ধম্মস্সৱনং কৰোন্তি, কদাচি পঞ্হং ৱিস্সজ্জেন্তি, কদাচি পধানং কৰোন্তি. তেসং ধম্মস্সৱনদিৱসে ধম্মং কথেন্তানংযেৱ অৰুণো উগ্গচ্ছতি. পঞ্হাৱিস্সজ্জনদিৱসে ব্যত্তো ভিক্খু পঞ্হং পুচ্ছতি, পণ্ডিতো ৱিস্সজ্জেতীতি পুচ্ছনৱিস্সজ্জনং কৰোন্তানংযেৱ. পধানদিৱসে সূৰিযত্থঙ্গমনে গণ্ডিং পহৰিত্ৱাৱ চঙ্কমং ওতৰিত্ৱা পধানং কৰোন্তানংযেৱ. তে এৱং ৱস্সং ৱস্সিত্ৱা পৱাৰেত্ৱা পক্কমিংসু. তং সন্ধাযেতং ৱুত্তং. পৰিদেৱমানাতি ‘‘ইদানি তথাৰূপং মধুৰং ধম্মস্সৱনং পঞ্হাকথনং কুতো লভিস্সামী’’তিআদীনি ৱত্ৱা ৰোদমানা.

খাযতীতি পঞ্ঞাযতি উপট্ঠাতি. কো মেতি কহং ইমে. ৱজ্জিভূমিযাতি ৱজ্জিৰট্ঠাভিমুখা গতা. মগা ৱিযাতি যথা মগা তস্মিং তস্মিং পব্বতপাদে ৱা ৱনসণ্ডে ৱা ৱিচৰন্তা – ‘‘ইদং অম্হাকং মাতুসন্তকং পিতুসন্তকং পৱেণিআগত’’ন্তি অগহেত্ৱা, যত্থেৱ নেসং গোচৰফাসুতা চ হোতি পৰিপন্থাভাৱো চ, তত্থ ৱিচৰন্তি. এৱং অনিকেতা অগেহা ভিক্খৱোপি ‘‘অযং, আৱুসো, অম্হাকং আচৰিযুপজ্ঝাযানং সন্তকো পৱেণিআগতো’’তি অগহেত্ৱা যত্থেৱ নেসং উতুসপ্পাযং ভোজনসপ্পাযং পুগ্গলসপ্পাযং সেনাসনসপ্পাযং ধম্মস্সৱনসপ্পাযঞ্চ সুলভং হোতি, তত্থ ৱিহৰন্তি. চতুত্থং.

৫. আনন্দসুত্তৱণ্ণনা

২২৫. পঞ্চমে আনন্দোতি ধম্মভণ্ডাগাৰিকত্থেৰো. অতিৱেলন্তি অতিক্কন্তং ৱেলং. গিহিসঞ্ঞত্তিবহুলোতি ৰত্তিঞ্চ দিৱা চ বহুকালং গিহী সঞ্ঞাপযন্তো. ভগৱতি পৰিনিব্বুতে মহাকস্সপত্থেৰো থেৰং আহ – ‘‘আৱুসো, মযং ৰাজগহে ৱস্সং উপগন্ত্ৱা ধম্মং সঙ্গাযিস্সাম, গচ্ছ ত্ৱং অৰঞ্ঞং পৱিসিত্ৱা উপৰিমগ্গত্তযত্থায ৱাযামং কৰোহী’’তি. সো ভগৱতো পত্তচীৱৰমাদায কোসলৰট্ঠং গন্ত্ৱা একস্মিং অৰঞ্ঞাৱাসে ৱসিত্ৱা পুনদিৱসে একং গামং পাৱিসি. মনুস্সা থেৰং দিস্ৱা – ‘‘ভন্তে আনন্দ, তুম্হে পুব্বে সত্থাৰা সদ্ধিং আগচ্ছথ. অজ্জ এককাৱ আগতা. কহং সত্থাৰং ঠপেত্ৱা আগতত্থ? ইদানি কস্স পত্তচীৱৰং গহেত্ৱা ৱিচৰথ? কস্স মুখোদকং দন্তকট্ঠং দেথ, পৰিৱেণং সম্মজ্জথ, ৱত্তপটিৱত্তং কৰোথা’’তি বহুং ৱত্ৱা পৰিদেৱিংসু. থেৰো – ‘‘মা, আৱুসো, সোচিত্থ, মা পৰিদেৱিত্থ, অনিচ্চা সঙ্খাৰা’’তিআদীনি ৱত্ৱা তে সঞ্ঞাপেত্ৱা ভত্তকিচ্চাৱসানে ৱসনট্ঠানমেৱ গচ্ছতি. মনুস্সা সাযম্পি তত্থ গন্ত্ৱা তথেৱ পৰিদেৱন্তি. থেৰোপি তথেৱ ওৱদতি. তং সন্ধাযেতং ৱুত্তং. অজ্ঝভাসীতি ‘‘অযং থেৰো ভিক্খুসঙ্ঘস্স কথং সুত্ৱা ‘সমণধম্মং কৰিস্সামী’তি অৰঞ্ঞং পৱিসিত্ৱা ইদানি গিহী সঞ্ঞাপেন্তো ৱিহৰতি, সত্থু সাসনং অসঙ্গহিতপুপ্ফৰাসি ৱিয ঠিতং, ধম্মসঙ্গহং ন কৰোতি, চোদেস্সামি ন’’ন্তি চিন্তেত্ৱা অভাসি.

পসক্কিযাতি পৱিসিত্ৱা. হদযস্মিং ওপিযাতি কিচ্চতো চ আৰম্মণতো চ হদযম্হি পক্খিপিত্ৱা. ‘‘নিব্বানং পাপুণিস্সামী’’তি ৱীৰিযং কৰোন্তো নিব্বানং কিচ্চতো হদযম্হি ওপেতি নাম, নিব্বানাৰম্মণং পন সমাপত্তিং অপ্পেত্ৱা নিসীদন্তো আৰম্মণতো. তদুভযম্পি সন্ধাযেসা ভাসতি. ঝাযাতি দ্ৱীহি ঝানেহি ঝাযিকো ভৱ. বিড়িবিড়িকাতি অযং গিহীহি সদ্ধিং বিড়িবিড়িকথা. পঞ্চমং.

৬. অনুৰুদ্ধসুত্তৱণ্ণনা

২২৬. ছট্ঠে পুৰাণদুতিযিকাতি অনন্তৰে অত্তভাৱে অগ্গমহেসী. সোভসীতি পুব্বেপি সোভসি, ইদানিপি সোভসি. দুগ্গতাতি ন গতিদুগ্গতিযা দুগ্গতা. তা হি সুগতিযং ঠিতা সম্পত্তিং অনুভৱন্তি, পটিপত্তিদুগ্গতিযা পন দুগ্গতা. ততো চুতা হি তা নিৰযেপি উপপজ্জন্তীতি দুগ্গতা. পতিট্ঠিতাতি সক্কাযস্মিং হি পতিট্ঠহন্তো অট্ঠহি কাৰণেহি পতিট্ঠাতি – ৰত্তো ৰাগৱসেন পতিট্ঠাতি, দুট্ঠো দোসৱসেন… মূড়্হো মোহৱসেন… ৱিনিবদ্ধো মানৱসেন… পৰামট্ঠো দিট্ঠিৱসেন… থামগতো অনুসযৱসেন… অনিট্ঠঙ্গতো ৱিচিকিচ্ছাৱসেন… ৱিক্খেপগতো উদ্ধচ্চৱসেন পতিট্ঠাতি. তাপি এৱং পতিট্ঠিতাৱ. নৰদেৱানন্তি দেৱনৰানং.

নত্থি দানীতি সা কিৰ দেৱধীতা থেৰে বলৱসিনেহা অহোসি, পটিগন্তুং নাসক্খি. কালেন আগন্ত্ৱা পৰিৱেণং সম্মজ্জতি, মুখোদকং দন্তকট্ঠং পানীযং পৰিভোজনীযং উপট্ঠপেতি. থেৰো অনাৱজ্জনেন পৰিভুঞ্জতি. একস্মিং দিৱসে থেৰস্স জিণ্ণচীৱৰস্স চোড়কভিক্খং চৰতো সঙ্কাৰকূটে দিব্বদুস্সং ঠপেত্ৱা পক্কমি. থেৰো তং দিস্ৱা উক্খিপিত্ৱা, ওলোকেন্তো দুস্সন্তং দিস্ৱা ‘‘দুস্সমেত’’ন্তি ঞত্ৱা, ‘‘অলং এত্তাৱতা’’তি অগ্গহেসি. তেনেৱস্স চীৱৰং নিট্ঠাসি. অথ দ্ৱে অগ্গসাৱকা অনুৰুদ্ধত্থেৰো চাতি তযো জনা চীৱৰং কৰিংসু. সত্থা সূচিং যোজেত্ৱা অদাসি. নিট্ঠিতচীৱৰস্স পিণ্ডায চৰতো দেৱতা পিণ্ডপাতং সমাদপেতি. সা কালেন একিকা, কালেন অত্তদুতিযা থেৰস্স সন্তিকং আগচ্ছতি. তদা পন অত্তততিযা আগন্ত্ৱা দিৱাট্ঠানে থেৰং উপসঙ্কমিত্ৱা – ‘‘মযং মনাপকাযিকা নাম মনসা ইচ্ছিতিচ্ছিতৰূপং মাপেমা’’তি আহ. থেৰো – ‘‘এতা এৱং ৱদন্তি, ৱীমংসিস্সামি, সব্বা নীলকা হোন্তূ’’তি চিন্তেসি. তা থেৰস্স মনং ঞত্ৱা সব্বাৱ নীলৱণ্ণা অহেসুং, এৱং পীতলোহিতওদাতৱণ্ণাতি. ততো চিন্তযিংসু – ‘‘থেৰো অম্হাকং দস্সনং অস্সাদেতী’’তি তা সমজ্জং কাতুং আৰদ্ধা, একাপি গাযি, একাপি নচ্চি, একাপি অচ্ছৰং পহৰি. থেৰো ইন্দ্ৰিযানি ওক্খিপি. ততো – ‘‘ন অম্হাকং দস্সনং থেৰো অস্সাদেতী’’তি ঞত্ৱা সিনেহং ৱা সন্থৱং ৱা অলভমানা নিব্বিন্দিত্ৱা গন্তুমাৰদ্ধা. থেৰো তাসং গমনভাৱং ঞত্ৱা – ‘‘মা পুনপ্পুনং আগচ্ছিংসূ’’তি অৰহত্তং ব্যাকৰোন্তো ইমং গাথমাহ. তত্থ ৱিক্খীণোতি খীণো. জাতিসংসাৰোতি তত্থ তত্থ জাতিসঙ্খাতো সংসাৰো. ছট্ঠং.

৭. নাগদত্তসুত্তৱণ্ণনা

২২৭. সত্তমে অতিকালেনাতি সব্বৰত্তিং নিদ্দাযিত্ৱা বলৱপচ্চূসে কোটিসম্মুঞ্জনিযা থোকং সম্মজ্জিত্ৱা মুখং ধোৱিত্ৱা যাগুভিক্খায পাতোৱ পৱিসতি. অতিদিৱাতি যাগুং আদায আসনসালং গন্ত্ৱা পিৱিত্ৱা একস্মিং ঠানে নিপন্নো নিদ্দাযিত্ৱা – ‘‘মনুস্সানং ভোজনৱেলায পণীতং ভিক্খং লভিস্সামী’’তি উপকট্ঠে মজ্ঝন্হিকে উট্ঠায ধম্মকৰণেন উদকং গহেত্ৱা অক্খীনি পমজ্জিত্ৱা পিণ্ডায চৰিত্ৱা যাৱদত্থং ভুঞ্জিত্ৱা মজ্ঝন্হিকে ৱীতিৱত্তে পটিক্কমতি. দিৱা চ আগন্ত্ৱাতি অতিকালে পৱিট্ঠেন নাম অঞ্ঞেহি ভিক্খূহি পঠমতৰং আগন্তব্বং হোতি, ত্ৱং পন অতিৱিয দিৱা আগন্ত্ৱা গতাসীতি অত্থো. ভাযামি নাগদত্তন্তি তং নাগদত্তং অহং ভাযামি. সুপ্পগব্ভন্তি সুট্ঠু পগব্ভং. কুলেসূতি খত্তিযকুলাদিউপট্ঠাককুলেসু. সত্তমং.

৮. কুলঘৰণীসুত্তৱণ্ণনা

২২৮. অট্ঠমে অজ্ঝোগাড়্হপ্পত্তোতি ওগাহপ্পত্তো. সো কিৰ সত্থু সন্তিকে কম্মট্ঠানং গহেত্ৱা তং ৱনসণ্ডং পৱিসিত্ৱা দুতিযদিৱসে গামং পিণ্ডায পাৱিসি পাসাদিকেহি অভিক্কন্তাদীহি. অঞ্ঞতৰং কুলং তস্স ইৰিযাপথে পসীদিত্ৱা পঞ্চপতিট্ঠিতেন ৱন্দিত্ৱা পিণ্ডপাতং অদাসি. ভত্তানুমোদনং পুন সুত্ৱা অতিৰেকতৰং পসীদিত্ৱা, ‘‘ভন্তে, নিচ্চকালং ইধেৱ ভিক্খং গণ্হথা’’তি নিমন্তেসি. থেৰো অধিৱাসেত্ৱা তেসং আহাৰং পৰিভুঞ্জমানো ৱীৰিযং পগ্গয্হ ঘটেন্তো অৰহত্তং পত্ৱা চিন্তেসি – ‘‘বহূপকাৰং মে এতং কুলং, অঞ্ঞত্থ গন্ত্ৱা কিং কৰিস্সামী’’তি? ফলসমাপত্তিসুখং অনুভৱন্তো তত্থেৱ ৱসি. অজ্ঝভাসীতি সা কিৰ থেৰস্স খীণাসৱভাৱং অজানন্তী চিন্তেসি – ‘‘অযং থেৰো নেৱ অঞ্ঞং গামং গচ্ছতি, ন অঞ্ঞং ঘৰং, ন ৰুক্খমূলআসনসালাদীসু নিসীদতি, নিচ্চকালং ঘৰং পৱিসিত্ৱাৱ নিসীদতি, উভোপেতে ওগাধপ্পত্তা পটিগাধপ্পত্তা, কদাচি এস ইমং কুলং দূসেয্য, চোদেস্সামি ন’’ন্তি. তস্মা অভাসি.

সণ্ঠানেতি নগৰদ্ৱাৰস্স আসন্নে মনুস্সানং ভণ্ডকং ওতাৰেত্ৱা ৱিস্সমনট্ঠানে. সঙ্গম্মাতি সমাগন্ত্ৱা. মন্তেন্তীতি কথেন্তি. মঞ্চ তঞ্চাতি মঞ্চ কথেন্তি তঞ্চ কথেন্তি. কিমন্তৰন্তি কিং কাৰণং? বহূ হি সদ্দা পচ্চূহাতি বহুকা এতে লোকস্মিং পটিলোমসদ্দা. ন তেনাতি তেন কাৰণেন, তেন ৱা তপস্সিনা ন মঙ্কু হোতব্বং. ন হি তেনাতি ন হি তেন পৰেহি ৱুত্তৱচনেন সত্তো কিলিস্সতি, অত্তনা কতেন পন পাপকম্মেনেৱ কিলিস্সতীতি দস্সেতি. ৱাতমিগো যথাতি যথা ৱনে ৱাতমিগো ৱাতেৰিতানং পণ্ণাদীনং সদ্দেন পৰিতস্সতি, এৱং যো সদ্দপৰিত্তাসী হোতীতি অত্থো. নাস্স সম্পজ্জতে ৱতন্তি তস্স লহুচিত্তস্স ৱতং ন সম্পজ্জতি. থেৰো পন খীণাসৱত্তা সম্পন্নৱতোতি ৱেদিতব্বো. অট্ঠমং.

৯. ৱজ্জিপুত্তসুত্তৱণ্ণনা

২২৯. নৱমে ৱজ্জিপুত্তকোতি ৱজ্জিৰট্ঠে ৰাজপুত্তো ছত্তং পহায পব্বজিতো. সব্বৰত্তিচাৰোতি কত্তিকনক্খত্তং ঘোসেত্ৱা সকলনগৰং ধজপটাকাদীহি পটিমণ্ডেত্ৱা পৱত্তিতো সব্বৰত্তিচাৰো. ইদঞ্হি নক্খত্তং যাৱ চাতুমহাৰাজিকেহি একাবদ্ধং হোতি. তূৰিযতাড়িতৱাদিতনিগ্ঘোসসদ্দন্তি ভেৰিআদিতূৰিযানং তাড়িতানং ৱীণাদীনঞ্চ ৱাদিতানং নিগ্ঘোসসদ্দং. অভাসীতি ৱেসালিযং কিৰ সত্ত ৰাজসহস্সানি সত্তসতানি সত্ত চ ৰাজানো, তত্তকাৱ তেসং উপৰাজসেনাপতিআদযো. তেসু অলঙ্কতপটিযত্তেসু নক্খত্তকীড়নত্থায ৱীথিং ওতিণ্ণেসু সট্ঠিহত্থে মহাচঙ্কমে চঙ্কমমানো নভস্স মজ্ঝে ঠিতং চন্দং দিস্ৱা চঙ্কমনকোটিযং ফলকং নিস্সায ঠিতো অভাসি. অপৱিদ্ধংৱ ৱনস্মিং দাৰুকন্তি ৱত্থৱেঠনালঙ্কাৰৰহিতত্তা ৱনে ছড্ডিতদাৰুকং ৱিয জাতং. পাপিযোতি লামকতৰো অম্হেহি অঞ্ঞো কোচি অত্থি. পিহযন্তীতি থেৰো আৰঞ্ঞিকো পংসুকূলিকো পিণ্ডপাতিকো সপদানচাৰিকো অপ্পিচ্ছো সন্তুট্ঠোতি বহূ তুয্হং পত্থযন্তীতি অত্থো. সগ্গগামিনন্তি সগ্গং গচ্ছন্তানং গতানম্পি. নৱমং.

১০. সজ্ঝাযসুত্তৱণ্ণনা

২৩০. দসমে যং সুদন্তি নিপাতমত্তং. সজ্ঝাযবহুলোতি নিস্সৰণপৰিযত্তিৱসেন সজ্ঝাযনতো বহুতৰং কালং সজ্ঝাযন্তো. সো কিৰ আচৰিযস্স দিৱাট্ঠানং সম্মজ্জিত্ৱা আচৰিযং উদিক্খন্তো তিট্ঠতি. অথ নং আগচ্ছন্তং দিস্ৱাৱ পচ্চুগ্গন্ত্ৱা পত্তচীৱৰং পটিগ্গহেত্ৱা পঞ্ঞত্তাসনে নিসিন্নস্স তালৱণ্টৱাতং দত্ৱা পানীযং আপুচ্ছিত্ৱা পাদে ধোৱিত্ৱা তেলং মক্খেত্ৱা ৱন্দিত্ৱা ঠিতো উদ্দেসং গহেত্ৱা যাৱ সূৰিযত্থঙ্গমা সজ্ঝাযং কৰোতি. সো ন্হানকোট্ঠকে উদকং উপট্ঠপেত্ৱা অঙ্গাৰকপল্লে অগ্গিং কৰোতি. আচৰিযস্স ন্হত্ৱা আগতস্স পাদেসু উদকং পুঞ্ছিত্ৱা পিট্ঠিপৰিকম্মং কত্ৱা ৱন্দিত্ৱা উদ্দেসং গহেত্ৱা পঠমযামে সজ্ঝাযং কত্ৱা মজ্ঝিমযামে সৰীৰং সমস্সাসেত্ৱা পচ্ছিমযামে উদ্দেসং গহেত্ৱা যাৱ অৰুণুগ্গমনা সজ্ঝাযং কত্ৱা নিৰুদ্ধসদ্দং খযতো সম্মসতি. ততো সেসং উপাদাযৰূপং ভূতৰূপং নামৰূপন্তি পঞ্চসু খন্ধেসু ৱিপস্সনং ৱড্ঢেত্ৱা অৰহত্তং পাপুণি. অপ্পোস্সুক্কোতি উদ্দেসগ্গহণে চ সজ্ঝাযকৰণীযে চ নিৰুস্সুক্কো. সঙ্কসাযতীতি যস্স দানি অত্থায অহং সজ্ঝাযং কৰেয্যং, সো মে অত্থো মত্থকং পত্তো. কিং মে ইদানি সজ্ঝাযেনাতি ফলসমাপত্তিসুখেন কালং অতিৱত্তেতি. অজ্ঝভাসীতি, ‘‘কিং নু খো অস্স থেৰস্স অফাসুকং জাতং, উদাহুস্স আচৰিযস্স? কেন নু খো কাৰণেন পুব্বে ৱিয মধুৰস্সৰেন ন সজ্ঝাযতী’’তি? আগন্ত্ৱা সন্তিকে ঠিতা অভাসি.

ধম্মপদানীতি ইধ সব্বম্পি বুদ্ধৱচনং অধিপ্পেতং. নাধীযসীতি ন সজ্ঝাযসি. নাদিযসীতি ৱা পাঠো, ন গণ্হাসীতি অত্থো. পসংসন্তি ধম্মভাণকো পসংসং লভতি, আভিধম্মিকো সুত্তন্তিকো ৱিনযধৰোতিস্স পসংসিতা ভৱন্তি. ৱিৰাগেনাতি অৰিযমগ্গেন. অঞ্ঞাযাতি জানিত্ৱা. নিক্খেপনন্তি তস্স দিট্ঠসুতাদিনো ৱিস্সজ্জনং সন্তো ৱদন্তীতি দীপেতি, ন বুদ্ধৱচনস্স. এত্তাৱতা ‘‘থেৰো বুদ্ধৱচনং ন ৱিস্সজ্জাপেতী’’তি ন নিচ্চকালং সজ্ঝাযন্তেনেৱ ভৱিতব্বং, সজ্ঝাযিত্ৱা পন – ‘‘এত্তকস্সাহং অত্থস্স ৱা ধম্মস্স ৱা আধাৰো ভৱিতুং সমত্থো’’তি ঞত্ৱা ৱট্টদুক্খস্স অন্তকিৰিযায পটিপজ্জিতব্বং. দসমং.

১১. অকুসলৱিতক্কসুত্তৱণ্ণনা

২৩১. একাদসমে অকুসলে ৱিতক্কেতি কামৱিতক্কাদযো তযো মহাৱিতক্কে. অযোনিসো মনসিকাৰাতি অনুপাযমনসিকাৰেন. সোতি সো ত্ৱং. অযোনিসো পটিনিস্সজ্জাতি এতং অনুপাযমনসিকাৰং ৱজ্জেহি. সত্থাৰন্তি ইমায গাথায পাসাদিককম্মট্ঠানং কথেতি. পীতিসুখমসংসযন্তি একংসেনেৱ বলৱপীতিঞ্চ সুখঞ্চ অধিগমিস্সসি. একাদসমং.

১২. মজ্ঝন্হিকসুত্তৱণ্ণনা

২৩২. দ্ৱাদসমে যং ৱত্তব্বং, তং দেৱতাসংযুত্তে নন্দনৱগ্গে ৱুত্তমেৱ. দ্ৱাদসমং.

১৩. পাকতিন্দ্ৰিযসুত্তৱণ্ণনা

২৩৩. তেৰসমং দেৱপুত্তসংযুত্তে জন্তুদেৱপুত্তসুত্তে ৱিত্থাৰিতমেৱ. তেৰসমং.

১৪. গন্ধত্থেনসুত্তৱণ্ণনা

২৩৪. চুদ্দসমে অজ্ঝভাসীতি তং ভিক্খুং নাড়ে গহেত্ৱা পদুমং সিঙ্ঘমানং দিস্ৱাৱ – ‘‘অযং ভিক্খু সত্থু সন্তিকে কম্মট্ঠানং গহেত্ৱা সমণধম্মং কাতুং অৰঞ্ঞং পৱিট্ঠো গন্ধাৰম্মণং উপনিজ্ঝাযতি, স্ৱাযং অজ্জ উপসিঙ্ঘং স্ৱেপি পুনদিৱসেপি উপসিঙ্ঘিস্সতি, এৱমস্স সা গন্ধতণ্হা ৱড্ঢিত্ৱা দিট্ঠধম্মিকসম্পৰাযিকং অত্থং নাসেস্সতি, মা মযি পস্সন্তিযা নস্সতু, চোদেস্সামি ন’’ন্তি উপসঙ্কমিত্ৱা অভাসি.

একঙ্গমেতং থেয্যানন্তি থেনিতব্বানং ৰূপাৰম্মণাদীনং পঞ্চকোট্ঠাসানং ইদং একঙ্গং, এককোট্ঠাসোতি অত্থো. ন হৰামীতি ন গহেত্ৱা গচ্ছামি. আৰাতি দূৰে নাড়ে গহেত্ৱা নামেত্ৱা দূৰে ঠিতো উপসিঙ্ঘামীতি ৱদতি. ৱণ্ণেনাতি কাৰণেন.

য্ৱাযন্তি যো অযং. তস্মিং কিৰ দেৱতায সদ্ধিং কথেন্তেযেৱ একো তাপসো ওতৰিত্ৱা ভিসখননাদীনি কাতুং আৰদ্ধো, তং সন্ধাযেৱমাহ. আকিণ্ণকম্মন্তোতি এৱং অপৰিসুদ্ধকম্মন্তো. অখীণকম্মন্তোতিপি পাঠো, কক্খড়কম্মন্তোতি অত্থো. ন ৱুচ্চতীতি গন্ধচোৰোতি ৱা পুপ্ফচোৰোতি ৱা কস্মা ন ৱুচ্চতি.

আকিণ্ণলুদ্দোতি বহুপাপো গাড়্হপাপো ৱা, তস্মা ন ৱুচ্চতি. ধাতিচেলংৱ মক্খিতোতি যথা ধাতিযা নিৱত্থকিলিট্ঠৱত্থং উচ্চাৰপস্সাৱপংসুমসিকদ্দমাদীহি মক্খিতং, এৱমেৱং ৰাগদোসাদীহি মক্খিতো. অৰহামি ৱত্তৱেতি অৰহামি ৱত্তুং. দেৱতায চোদনা কিৰ সুগতানুসিট্ঠিসদিসা, ন তং লামকা হীনাধিমুত্তিকা মিচ্ছাপটিপন্নকপুগ্গলা লভন্তি. তস্মিং পন অত্তভাৱে মগ্গফলানং ভব্বৰূপা পুগ্গলা তং লভন্তি, তস্মা এৱমাহ.

সুচিগৱেসিনোতি সুচীনি সীলসমাধিঞাণানি গৱেসন্তস্স. অব্ভামত্তং ৱাতি ৱলাহককূটমত্তং ৱিয. জানাসীতি সুদ্ধো অযন্তি জানাসি. ৱজ্জাসীতি ৱদেয্যাসি. নেৱ তং উপজীৱামাতি দেৱতা কিৰ চিন্তেসি – ‘‘অযং ভিক্খু অত্থি মে হিতকামা দেৱতা, সা মং চোদেস্সতি সাৰেস্সতীতি পমাদম্পি অনুযুঞ্জেয্য, নাস্স ৱচনং সম্পটিচ্ছিস্সামী’’তি. তস্মা এৱমাহ. ত্ৱমেৱাতি ত্ৱংযেৱ. জানেয্যাতি জানেয্যাসি. যেনাতি যেন কম্মেন সুগতিং গচ্ছেয্যাসি, তং কম্মং ত্ৱংযেৱ জানেয্যাসীতি. চুদ্দসমং.

ইতি সাৰত্থপ্পকাসিনিযা

সংযুত্তনিকায-অট্ঠকথায

ৱনসংযুত্তৱণ্ণনা নিট্ঠিতা.