১০. কৱিসুত্তৱণ্ণনা

৬০. দসমে ছন্দো নিদানন্তি গাযত্তিআদিকো ছন্দো গাথানং নিদানং. পুব্বপট্ঠাপনগাথা আৰভন্তো হি ‘‘কতৰচ্ছন্দেন হোতূ’’তি আৰভতি. ৱিযঞ্জনন্তি জননং. অক্খৰং হি পদং জনেতি, পদং গাথং জনেতি, গাথা অত্থং পকাসেতীতি. নামসন্নিস্সিতাতি সমুদ্দাদিপণ্ণত্তিনিস্সিতা. গাথা আৰভন্তো হি সমুদ্দং ৱা পথৱিং ৱা যং কিঞ্চি নামং নিস্সযিত্ৱাৱ আৰভতি. আসযোতি পতিট্ঠা. কৱিতো হি গাথা পৱত্তন্তি. সো তাসং পতিট্ঠা হোতীতি. দসমং.

জৰাৱগ্গো ছট্ঠো.