৬. জৰাৱগ্গো

১. জৰাসুত্তৱণ্ণনা

৫১. জৰাৱগ্গস্স পঠমে সাধূতি লদ্ধকং ভদ্দকং. সীলং যাৱ জৰাতি ইমিনা ইদং দস্সেতি – যথা মুত্তামণিৰত্তৱত্থাদীনি আভৰণানি তৰুণকালেযেৱ সোভন্তি, জৰাজিণ্ণকালে তানি ধাৰেন্তো ‘‘অযং অজ্জাপি বালভাৱং পত্থেতি, উম্মত্তকো মঞ্ঞে’’তি ৱত্তব্বতং আপজ্জতি, ন এৱং সীলং. সীলঞ্হি নিচ্চকালং সোভতি. বালকালেপি হি সীলং ৰক্খন্তং ‘‘কিং ইমস্স সীলেনা’’তি? ৱত্তাৰো নত্থি. মজ্ঝিমকালেপি মহল্লককালেপীতি.

সদ্ধা সাধু পতিট্ঠিতাতি হত্থাড়ৱকচিত্তগহপতিআদীনং ৱিয মগ্গেন আগতা পতিট্ঠিতসদ্ধা নাম সাধু. পঞ্ঞা নৰানং ৰতনন্তি এত্থ চিত্তীকতট্ঠাদীহি ৰতনং ৱেদিতব্বং. ৱুত্তঞ্হেতং –

‘‘যদি চিত্তীকতন্তি ৰতনং, ননু ভগৱা চিত্তীকতো পুৰিসসীহো, যে চ লোকে চিত্তীকতা, তেসং চিত্তীকতো ভগৱা. যদি ৰতিকৰন্তি ৰতনং, ননু ভগৱা ৰতিকৰো পুৰিসসীহো, তস্স ৱচনেন চৰন্তা ঝানৰতিসুখেন অভিৰমন্তি. যদি অতুল্যন্তি ৰতনং, ননু ভগৱা অতুলো পুৰিসসীহো. ন হি সক্কা তুলেতুং গুণেহি গুণপাৰমিং গতো. যদি দুল্লভন্তি ৰতনং, ননু ভগৱা দুল্লভো পুৰিসসীহো. যদি অনোমসত্তপৰিভোগন্তি ৰতনং, ননু ভগৱা অনোমো সীলেন সমাধিনা পঞ্ঞায ৱিমুত্তিযা ৱিমুত্তিঞাণদস্সনেনা’’তি.

ইধ পন দুল্লভপাতুভাৱট্ঠেন পঞ্ঞা ‘‘ৰতন’’ন্তি ৱুত্তং. পুঞ্ঞন্তি পুঞ্ঞচেতনা, সা হি অৰূপত্তা পৰিহৰিতুং ন সক্কাতি. পঠমং.

২. অজৰসাসুত্তৱণ্ণনা

৫২. দুতিযে অজৰসাতি অজীৰণেন, অৱিপত্তিযাতি অত্থো. সীলঞ্হি অৱিপন্নমেৱ সাধু হোতি, ৱিপন্নসীলং আচৰিযুপজ্ঝাযাদযোপি ন সঙ্গণ্হন্তি, গতগতট্ঠানে নিদ্ধমিতব্বোৱ হোতীতি. দুতিযং.

৩. মিত্তসুত্তৱণ্ণনা

৫৩. ততিযে সত্থোতি সদ্ধিংচৰো, জঙ্ঘসত্থো ৱা সকটসত্থো ৱা. মিত্তন্তি ৰোগে উপ্পন্নে পাটঙ্কিযা ৱা অঞ্ঞেন ৱা যানেন হৰিত্ৱা খেমন্তসম্পাপনেন মিত্তং. সকে ঘৰেতি অত্তনো গেহে. তথাৰূপে ৰোগে জাতে পুত্তভৰিযাদযো জিগুচ্ছন্তি, মাতা পন অসুচিম্পি চন্দনং ৱিয মঞ্ঞতি. তস্মা সা সকে ঘৰে মিত্তং. সহাযো অত্থজাতস্সাতি উপ্পন্নকিচ্চস্স যো তং কিচ্চং ৱহতি নিত্থৰতি, সো কিচ্চেসু সহ অযনভাৱেন সহাযো মিত্তং, সুৰাপানাদিসহাযা পন ন মিত্তা. সম্পৰাযিকন্তি সম্পৰাযহিতং. ততিযং.

৪. ৱত্থুসুত্তৱণ্ণনা

৫৪. চতুত্থে পুত্তা ৱত্থূতি মহল্লককালে পটিজগ্গনট্ঠেন পুত্তা পতিট্ঠা. পৰমোতি অঞ্ঞেসং অকথেতব্বস্সপি গুয্হস্স কথেতব্বযুত্ততায ভৰিযা পৰমো সখা নাম. চতুত্থং.

৫-৭. পঠমজনসুত্তাদিৱণ্ণনা

৫৫. পঞ্চমে ৱিধাৱতীতি পৰসমুদ্দাদিগমনৱসেন ইতো চিতো চ ৱিধাৱতি. পঞ্চমং.

৫৬. ছট্ঠে দুক্খাতি ৱট্টদুক্খতো. ছট্ঠং.

৫৭. সত্তমে পৰাযণন্তি নিপ্ফত্তি অৱস্সযো. সত্তমং.

৮. উপ্পথসুত্তৱণ্ণনা

৫৮. অট্ঠমে ৰাগো উপ্পথোতি সুগতিঞ্চ নিব্বানঞ্চ গচ্ছন্তস্স অমগ্গো. ৰত্তিন্দিৱক্খযোতি ৰত্তিদিৱেহি, ৰত্তিদিৱেসু ৱা খীযতি. ইত্থী মলন্তি সেসং বাহিৰমলং ভস্মখাৰাদীহি ধোৱিত্ৱা সক্কা সোধেতুং, মাতুগামমলেন দুট্ঠো পন ন সক্কা সুদ্ধো নাম কাতুন্তি ইত্থী ‘‘মল’’ন্তি ৱুত্তা. এত্থাতি এত্থ ইত্থিযং পজা সজ্জতি. তপোতি ইন্দ্ৰিযসংৱৰধুতঙ্গগুণৱীৰিযদুক্কৰকাৰিকানং নামং, ইধ পন ঠপেত্ৱা দুক্কৰকাৰিকং সব্বাপি কিলেসসন্তাপিকা পটিপদা ৱট্টতি. ব্ৰহ্মচৰিযন্তি মেথুনৱিৰতি. অট্ঠমং.

৯. দুতিযসুত্তৱণ্ণনা

৫৯. নৱমে কিস্স চাভিৰতোতি কিস্মিং অভিৰতো. দুতিযাতি সুগতিঞ্চেৱ নিব্বানঞ্চ গচ্ছন্তস্স দুতিযিকা. পঞ্ঞা চেনং পসাসতীতি পঞ্ঞা এতং পুৰিসং ‘‘ইদং কৰোহি, ইদং মাকৰী’’তি অনুসাসতি. নৱমং.

১০. কৱিসুত্তৱণ্ণনা

৬০. দসমে ছন্দো নিদানন্তি গাযত্তিআদিকো ছন্দো গাথানং নিদানং. পুব্বপট্ঠাপনগাথা আৰভন্তো হি ‘‘কতৰচ্ছন্দেন হোতূ’’তি আৰভতি. ৱিযঞ্জনন্তি জননং. অক্খৰং হি পদং জনেতি, পদং গাথং জনেতি, গাথা অত্থং পকাসেতীতি. নামসন্নিস্সিতাতি সমুদ্দাদিপণ্ণত্তিনিস্সিতা. গাথা আৰভন্তো হি সমুদ্দং ৱা পথৱিং ৱা যং কিঞ্চি নামং নিস্সযিত্ৱাৱ আৰভতি. আসযোতি পতিট্ঠা. কৱিতো হি গাথা পৱত্তন্তি. সো তাসং পতিট্ঠা হোতীতি. দসমং.

জৰাৱগ্গো ছট্ঠো.