৮. হিৰীসুত্তৱণ্ণনা

১৮. অট্ঠমে হিৰীনিসেধোতি হিৰিযা অকুসলে ধম্মে নিসেধেতীতি হিৰীনিসেধো. কোচি লোকস্মিং ৱিজ্জতীতি কোচি এৱৰূপো ৱিজ্জতীতি পুচ্ছতি. যো নিন্দং অপবোধতীতি যো গৰহং অপহৰন্তো বুজ্ঝতি. অস্সো ভদ্ৰো কসামিৱাতি যথা ভদ্ৰো অস্সাজানীযো কসং অপহৰন্তো বুজ্ঝতি, পতোদচ্ছাযং দিস্ৱা সংৱিজ্ঝন্তো ৱিয কসায অত্তনি নিপাতং ন দেতি, এৱমেৱ যো ভিক্খু ভূতস্স দসঅক্কোসৱত্থুনো অত্তনি নিপাতং অদদন্তো নিন্দং অপবোধতি অপহৰন্তো বুজ্ঝতি, এৱৰূপো কোচি খীণাসৱো ৱিজ্জতীতি পুচ্ছতি. অভূতক্কোসেন পন পৰিমুত্তো নাম নত্থি. তনুযাতি তনুকা, হিৰিযা অকুসলে ধম্মে নিসেধেত্ৱা চৰন্তা খীণাসৱা নাম অপ্পকাতি অত্থো. সদা সতাতি নিচ্চকালং সতিৱেপুল্লেন সমন্নাগতা. অন্তং দুক্খস্স পপ্পুয্যাতি ৱট্টদুক্খস্স কোটিং অন্তভূতং নিব্বানং পাপুণিত্ৱা. সেসং ৱুত্তনযমেৱাতি.

হিৰীসুত্তৱণ্ণনা নিট্ঠিতা.