১০. চূড়পুণ্ণমসুত্তৱণ্ণনা

৯১. এৱং মে সুতন্তি চূড়পুণ্ণমসুত্তং. তত্থ তুণ্হীভূতং তুণ্হীভূতন্তি যং যং দিসং অনুৱিলোকেতি, তত্থ তত্থ তুণ্হীভূতমেৱ. অনুৱিলোকেত্ৱাতি পঞ্চপসাদপটিমণ্ডিতানি অক্খীনি উম্মীলেত্ৱা ততো ততো ৱিলোকেত্ৱা অন্তমসো হত্থকুক্কুচ্চপাদকুক্কুচ্চানম্পি অভাৱং দিস্ৱা. অসপ্পুৰিসোতি পাপপুৰিসো. নো হেতং, ভন্তেতি যস্মা অন্ধো অন্ধং ৱিয সো তং জানিতুং ন সক্কোতি, তস্মা এৱমাহংসু. এতেনেৱ নযেন ইতো পৰেসুপি ৱাৰেসু অত্থো ৱেদিতব্বো. অস্সদ্ধসমন্নাগতোতি পাপধম্মসমন্নাগতো. অসপ্পুৰিসভত্তীতি অসপ্পুৰিসসেৱনো. অসপ্পুৰিসচিন্তীতি অসপ্পুৰিসচিন্তায চিন্তকো. অসপ্পুৰিসমন্তীতি অসপ্পুৰিসমন্তনং মন্তেতা. অসপ্পুৰিসৱাচোতি অসপ্পুৰিসৱাচং ভাসিতা. অসপ্পুৰিসকম্মন্তোতি অসপ্পুৰিসকম্মানং কত্তা. অসপ্পুৰিসদিট্ঠীতি অসপ্পুৰিসদিট্ঠিযা সমন্নাগতো. অসপ্পুৰিসদানন্তি অসপ্পুৰিসেহি দাতব্বং দানং. ত্যাস্স মিত্তাতি তে অস্স মিত্তা. অত্তব্যাবাধাযপি চেতেতীতি পাণং হনিস্সামি, অদিন্নং আদিযিস্সামি, মিচ্ছা চৰিস্সামি, দস অকুসলকম্মপথে সমাদায ৱত্তিস্সামীতি এৱং অত্তনো দুক্খত্থায চিন্তেতি. পৰব্যাবাধাযাতি যথা অসুকো অসুকং পাণং হন্তি, অসুকস্স সন্তকং অদিন্নং আদিযতি, দস অকুসলকম্মপথে সমাদায ৱত্ততি, এৱং নং আণাপেস্সামীতি এৱং পৰস্স দুক্খত্থায চিন্তেতি. উভযব্যাবাধাযাতি অহং অসুকঞ্চ অসুকঞ্চ গহেত্ৱা দস অকুসলকম্মপথে সমাদায ৱত্তিস্সামীতি এৱং উভযদুক্খত্থায চিন্তেতীতি.

অত্তব্যাবাধাযপি মন্তেতীতিআদীসু অহং দস অকুসলকম্মপথে সমাদায ৱত্তিস্সামীতি মন্তেন্তো অত্তব্যাবাধায মন্তেতি নাম. অসুকং দস অকুসলকম্মপথে সমাদপেস্সামীতি মন্তেন্তো পৰব্যাবাধায মন্তেতি নাম. অঞ্ঞেন সদ্ধিং – ‘‘মযং উভোপি একতো হুত্ৱা দস অকুসলকম্মপথে সমাদায ৱত্তিস্সামা’’তি মন্তেন্তো উভযব্যাবাধায মন্তেতি নাম.

অসক্কচ্চং দানং দেতীতি দেয্যধম্মম্পি পুগ্গলম্পি ন সক্কৰোতি. দেয্যধম্মং ন সক্কৰোতি নাম উত্তণ্ডুলাদিদোসসমন্নাগতং আহাৰং দেতি, ন পসন্নং কৰোতি. পুগ্গলং ন সক্কৰোতি নাম নিসীদনট্ঠানং অসম্মজ্জিত্ৱা যত্থ ৱা তত্থ ৱা নিসীদাপেত্ৱা যং ৱা তং ৱা আধাৰকং ঠপেত্ৱা দানং দেতি. অসহত্থাতি অত্তনো হত্থেন, ন দেতি, দাসকম্মকাৰাদীহি দাপেতি. অচিত্তিকত্ৱাতি হেট্ঠা ৱুত্তনযেন দেয্যধম্মেপি পুগ্গলেপি ন চিত্তীকাৰং কত্ৱা দেতি. অপৱিদ্ধন্তি ছড্ডেতুকামো হুত্ৱা ৱম্মিকে উৰগং পক্খিপন্তো ৱিয দেতি. অনাগমনদিট্ঠিকোতি নো ফলপাটিকঙ্খী হুত্ৱা দেতি.

তত্থ উপপজ্জতীতি ন দানং দত্ৱা নিৰযে উপপজ্জতি. যং পন তেন পাপলদ্ধিকায মিচ্ছাদস্সনং গহিতং, তায মিচ্ছাদিট্ঠিযা নিৰযে উপপজ্জতি. সুক্কপক্খো ৱুত্তপটিপক্খনযেন ৱেদিতব্বো. দেৱমহত্ততাতি ছকামাৱচৰদেৱা. মনুস্সমহত্ততাতি তিণ্ণং কুলানং সম্পত্তি. সেসং সব্বত্থ উত্তানমেৱ. ইদং পন সুত্তং সুদ্ধৱট্টৱসেনেৱ কথিতন্তি.

পপঞ্চসূদনিযা মজ্ঝিমনিকাযট্ঠকথায

চূড়পুণ্ণমসুত্তৱণ্ণনা নিট্ঠিতা.

পঠমৱগ্গৱণ্ণনা নিট্ঠিতা.