৮. নড়কপানসুত্তৱণ্ণনা

১৬৬. এৱং মে সুতন্তি নড়কপানসুত্তং. তত্থ নড়কপানেতি এৱংনামকে গামে. পুব্বে কিৰ অম্হাকং বোধিসত্তো ৱানৰযোনিযং নিব্বত্তো, মহাকাযো কপিৰাজা অনেকৱানৰসহস্সপৰিৱুতো পব্বতপাদে ৱিচৰতি. পঞ্ঞৱা খো পন হোতি মহাপুঞ্ঞো. সো পৰিসং এৱং ওৱদতি – ‘‘ইমস্মিং পব্বতপাদে তাতা, ৱিসফলানি নাম হোন্তি, অমনুস্সপৰিগ্গহিতা পোক্খৰণিযো নাম হোন্তি, তুম্হে পুব্বে খাদিতপুব্বানেৱ ফলানি খাদথ, পীতপুব্বানেৱ পানীযানি চ পিৱথ, এত্থ ৱো মং পটিপুচ্ছিতব্বকিচ্চং নত্থি, অখাদিতপুব্বানি পন ফলানি অপীতপুব্বানি চ পানীযানি মং অপুচ্ছিত্ৱা মা খাদিত্থ মা পিৱিত্থা’’তি.

তে একদিৱসং চৰমানা অঞ্ঞং পব্বতপাদং গন্ত্ৱা গোচৰং গহেত্ৱা পানীযং ওলোকেন্তা একং অমনুস্সপৰিগ্গহিতং পোক্খৰণিং দিস্ৱা সহসা অপিৱিত্ৱা সমন্তা পৰিৱাৰেত্ৱা মহাসত্তস্স আগমনং ওলোকযমানা নিসীদিংসু. মহাসত্তো আগন্ত্ৱা ‘‘কিং তাতা পানীযং ন পিৱথা’’তি আহ. তুম্হাকং আগমনং ওলোকেমাতি. সাধু তাতাতি সমন্তা পদং পৰিযেসমানো ওতিণ্ণপদংযেৱ অদ্দস, ন উত্তিণ্ণপদং, দিস্ৱা সপৰিস্সযাতি অঞ্ঞাসি. তাৱদেৱ চ তত্থ অভিনিব্বত্তঅমনুস্সো উদকং দ্ৱেধা কত্ৱা উট্ঠাসি সেতমুখো নীলকুচ্ছি ৰত্তহত্থপাদো মহাদাঠিকো ৱঙ্কদাঠো ৱিৰূপো বীভচ্ছো উদকৰক্খসো. সো এৱমাহ – ‘‘কস্মা পানীযং ন পিৱথ, মধুৰং উদকং পিৱথ, কিং তুম্হে এতস্স ৱচনং সুণাথা’’তি? মহাসত্তো আহ – ‘‘ত্ৱং ইধ অধিৱত্থো অমনুস্সো’’তি? আমাহন্তি. ত্ৱং ইধ ওতিণ্ণে লভসীতি? আম লভামি, তুম্হে পন সব্বে খাদিস্সামীতি. ন সক্খিস্সসি, যক্খাতি. পানীযং পন পিৱিস্সথাতি? আম পিৱিস্সামাতি. এৱং সন্তে একোপি ৱো ন মুচ্চিস্সতীতি. পানীযঞ্চ পিৱিস্সাম, ন চ তে ৱসং গমিস্সামাতি একনড়ং আহৰাপেত্ৱা কোটিযং গহেত্ৱা ধমি, সব্বো একচ্ছিদ্দো অহোসি, তীৰে নিসীদিত্ৱাৱ পানীযং পিৱি, সেসৱানৰানং পাটিযেক্কে নড়ে আহৰাপেত্ৱা ধমিত্ৱা অদাসি. সব্বে যক্খস্স পস্সন্তস্সেৱ পানীযং পিৱিংসু. ৱুত্তম্পি চেতং –

‘‘দিস্ৱা পদমনুত্তিণ্ণং, দিস্ৱানো’ তৰিতং পদং;

নড়েন ৱাৰিং পিস্সাম, নেৱ মং ত্ৱং ৱধিস্সসী’’তি. (জা. ১.১.২০);

ততো পট্ঠায যাৱ অজ্জদিৱসা তস্মিং ঠানে নড়া একচ্ছিদ্দাৱ হোন্তি. ইমিনা হি সদ্ধিং ইমস্মিং কপ্পে চত্তাৰি কপ্পট্ঠিযপাটিহাৰিযানি নাম – চন্দে সসবিম্বং, ৱট্টকজাতকম্হি সচ্চকিৰিযট্ঠানে অগ্গিস্স গমনুপচ্ছেদো, ঘটিকাৰকুম্ভকাৰস্স মাতাপিতূনং ৱসনট্ঠানে দেৱস্স অৱস্সনং, তস্সা পোক্খৰণিযা তীৰে নড়ানং একচ্ছিদ্দভাৱোতি. ইতি সা পোক্খৰণী নড়েন পানীযস্স পীতত্তা নড়কপানাতি নামং লভি. অপৰভাগে তং পোক্খৰণিং নিস্সায গামো পতিট্ঠাসি, তস্সাপি নড়কপানন্তেৱ নামং জাতং. তং সন্ধায ৱুত্তং ‘‘নড়কপানে’’তি. পলাসৱনেতি কিংসুকৱনে.

১৬৭. তগ্ঘ মযং, ভন্তেতি একংসেনেৱ মযং, ভন্তে, অভিৰতা. অঞ্ঞেপি যে তুম্হাকং সাসনে অভিৰমন্তি, তে অম্হেহি সদিসাৱ হুত্ৱা অভিৰমন্তীতি দীপেন্তি.

নেৱ ৰাজাভিনীতাতিআদীসু একো ৰঞ্ঞো অপৰাধং কত্ৱা পলাযতি. ৰাজা কুহিং, ভো, অসুকোতি? পলাতো দেৱাতি. পলাতট্ঠানেপি মে ন মুচ্চিস্সতি, সচে পন পব্বজেয্য, মুচ্চেয্যাতি ৱদতি. তস্স কোচিদেৱ সুহদো গন্ত্ৱা তং পৱত্তিং আৰোচেত্ৱা ত্ৱং সচে জীৱিতুমিচ্ছসি, পব্বজাহীতি. সো পব্বজিত্ৱা জীৱিতং ৰক্খমানো চৰতি. অযং ৰাজাভিনীতো নাম.

একো পন চোৰানং মূলং ছিন্দন্তো চৰতি. চোৰা সুত্ৱা ‘‘পুৰিসানং অত্থিকভাৱং ন জানাতি, জানাপেস্সাম ন’’ন্তি ৱদন্তি. সো তং পৱত্তিং সুত্ৱা পলাযতি. চোৰা পলাতোতি সুত্ৱা ‘‘পলাতট্ঠানেপি নো ন মুচ্চিস্সতি, সচে পন পব্বজেয্য, মুচ্চেয্যা’’তি ৱদন্তি. সো তং পৱত্তিং সুত্ৱা পব্বজতি. অযং চোৰাভিনীতো নাম.

একো পন বহুং ইণং খাদিত্ৱা তেন ইণেন অট্টো পীড়িতো তম্হা গামা পলাযতি. ইণসামিকা সুত্ৱা ‘‘পলাতট্ঠানেপি নো ন মুচ্চিস্সতি, সচে পন পব্বজেয্য, মুচ্চেয্যা’’তি ৱদন্তি. সো তং পৱত্তিং সুত্ৱা পব্বজতি. অযং ইণট্টো নাম.

ৰাজভযাদীনং পন অঞ্ঞতৰেন ভযেন ভীতো অট্টো আতুৰো হুত্ৱা নিক্খম্ম পব্বজিতো ভযট্টো নাম. দুব্ভিক্খাদীসু জীৱিতুং অসক্কোন্তো পব্বজিতো আজীৱিকাপকতো নাম, আজীৱিকায পকতো অভিভূতোতি অত্থো. ইমেসু পন একোপি ইমেহি কাৰণেহি পব্বজিতো নাম নত্থি, তস্মা ‘‘নেৱ ৰাজাভিনীতো’’তিআদিমাহ.

ৱিৱেকন্তি ৱিৱিচ্চ ৱিৱিত্তো হুত্ৱা. ইদং ৱুত্তং হোতি – যং কামেহি চ অকুসলধম্মেহি চ ৱিৱিত্তেন পঠমদুতিযজ্ঝানসঙ্খাতং পীতিসুখং অধিগন্তব্বং, সচে তং ৱিৱিচ্চ কামেহি ৱিৱিচ্চ অকুসলেহি ধম্মেহি পীতিসুখং নাধিগচ্ছতি, অঞ্ঞং ৱা উপৰি দ্ৱিন্নং ঝানানং চতুন্নঞ্চ মগ্গানং ৱসেন সন্ততৰং সুখং নাধিগচ্ছতি, তস্স ইমে অভিজ্ঝাদযো চিত্তং পৰিযাদায তিট্ঠন্তীতি. তত্থ অৰতীতি অধিকুসলেসু ধম্মেসু উক্কণ্ঠিততা. তন্দীতি আলসিযভাৱো. এৱং যো পব্বজিত্ৱা পব্বজিতকিচ্চং কাতুং ন সক্কোতি, তস্স ইমে সত্ত পাপধম্মা উপ্পজ্জিত্ৱা চিত্তং পৰিযাদিযন্তীতি দস্সেত্ৱা ইদানি যস্স তে ধম্মা চিত্তং পৰিযাদায তিট্ঠন্তি, সোযেৱ সমণকিচ্চম্পি কাতুং ন সক্কোতীতি পুন ৱিৱেকং অনুৰুদ্ধা…পে… অঞ্ঞং ৱা ততো সন্ততৰন্তি আহ.

এৱং কণ্হপক্খং দস্সেত্ৱা ইদানি তেনেৱ নযেন সুক্কপক্খং দস্সেতুং পুন ৱিৱেকন্তিআদিমাহ. তস্সত্থো ৱুত্তনযেনেৱ ৱেদিতব্বো.

১৬৮. সঙ্খাযাতি জানিত্ৱা. একন্তি একচ্চং. পটিসেৱতীতি সেৱিতব্বযুত্তকং সেৱতি. সেসপদেসুপি এসেৱ নযো. উপপত্তীসু ব্যাকৰোতীতি সপ্পটিসন্ধিকে তাৱ ব্যাকৰোতু, অপ্পটিসন্ধিকে কথং ব্যাকৰোতীতি. অপ্পটিসন্ধিকস্স পুন ভৱে পটিসন্ধি নত্থীতি ৱদন্তো উপপত্তীসু ব্যাকৰোতি নাম.

জনকুহনত্থন্তি জনৱিম্হাপনত্থং. জনলপনত্থন্তি মহাজনস্স উপলাপনত্থং. ন ইতি মং জনো জানাতূতি এৱং মং মহাজনো জানিস্সতি, এৱং মে মহাজনস্স অন্তৰে কিত্তিসদ্দো উগ্গচ্ছিস্সতীতি ইমিনাপি কাৰণেন ন ব্যাকৰোতীতি অত্থো. উড়াৰৱেদাতি মহন্ততুট্ঠিনো.

১৬৯. সো খো পনস্স আযস্মাতি সো পৰিনিব্বুতো আযস্মা ইমস্স ঠিতস্স আযস্মতো. এৱংসীলোতিআদীসু লোকিযলোকুত্তৰমিস্সকাৱ সীলাদযো ৱেদিতব্বো. এৱংধম্মোতি এত্থ পন সমাধিপক্খিকা ধম্মা ধম্মাতি অধিপ্পেতা. ফাসুৱিহাৰো হোতীতি তেন ভিক্খুনা পূৰিতপটিপত্তিং পূৰেন্তস্স অৰহত্তফলং সচ্ছিকত্ৱা ফলসমাপত্তিৱিহাৰেন ফাসুৱিহাৰো হোতি, অৰহত্তং পত্তুমসক্কোন্তস্স পটিপত্তিং পূৰযমানস্স চৰতোপি ফাসুৱিহাৰোযেৱ নাম হোতি. ইমিনা নযেন সব্বৱাৰেসু অত্থো ৱেদিতব্বোতি.

পপঞ্চসূদনিযা মজ্ঝিমনিকাযট্ঠকথায

নড়কপানসুত্তৱণ্ণনা নিট্ঠিতা.