১৩. পঠমসুণিসাৱিমানৱণ্ণনা

অভিক্কন্তেন ৱণ্ণেনাতি সুণিসাৱিমানং. তস্স কা উপ্পত্তি? সাৱত্থিযং অঞ্ঞতৰস্মিং গেহে একা কুলসুণ্হা গেহং পিণ্ডায পৱিট্ঠং খীণাসৱত্থেৰং দিস্ৱা সঞ্জাতপীতিসোমনস্সা ‘‘ইদং ময্হং উত্তমং পুঞ্ঞক্খেত্তং উপট্ঠিত’’ন্তি অত্তনা লদ্ধং পূৱভাগং আদায আদৰেন থেৰস্স উপনেসি, থেৰো তং পটিগ্গহেত্ৱা অনুমোদনং কত্ৱা গতো. সা অপৰভাগে কালং কত্ৱা তাৱতিংসভৱনে উপ্পজ্জি. সেসং সব্বং হেট্ঠা ৱুত্তসদিসমেৱ. তেন ৱুত্তং –

১০৮. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

১০৯. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১১০. ‘‘পুচ্ছামি তং দেৱি মহানুভাৱে, মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা, ৱণ্ণো চ তে সব্বদিসা পভাসতী’’তি.

১১১. ‘‘সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং’’.

১১২. ‘‘অহং মনুস্সেসু মনুস্সভূতা, সুণিসা অহোসিং সসুৰস্স গেহে.

১১৩. ‘‘অদ্দসং ৱিৰজং ভিক্খুং, ৱিপ্পসন্নমনাৱিলং;

তস্স অদাসহং পূৱং, পসন্না সেহি পাণিভি;

ভাগড্ঢভাগং দত্ৱান, মোদামি নন্দনে ৱনে.

১১৪. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

১১৫. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি.

১১২. তত্থ সুণিসাতি পুত্তস্স ভৰিযা. ইত্থিযা হি সামিকস্স পিতা ‘‘সসুৰো’’তি ৱুচ্চতি, তস্স চ সা ‘‘সুণিসা’’তি. তং সন্ধায ‘‘সুণিসা অহোসিং সসুৰস্স গেহে’’তি.

১১৩. ভাগড্ঢভাগন্তি অত্তনা লদ্ধপটিৱীসতো উপড্ঢভাগং. মোদামি নন্দনে ৱনেতি থেৰেন নন্দনৱনে দিট্ঠতায আহ. সেসং ৱুত্তনযমেৱ.

সুণিসাৱিমানৱণ্ণনা নিট্ঠিতা.