১০. তিলদক্খিণৱিমানৱণ্ণনা

অভিক্কন্তেন ৱণ্ণেনাতি তিলদক্খিণৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন চ সমযেন ৰাজগহে অঞ্ঞতৰা ইত্থী গব্ভিনী তিলে ধোৱিত্ৱা আতপে সুক্খাপেতি তেলং কাতুকামা. সা চ পৰিক্খীণাযুকা তং দিৱসমেৱ চৱনধম্মা, নিৰযসংৱত্তনিকং চস্সা কম্মং ওকাসং কত্ৱা ঠিতং. অথ নং ভগৱা পচ্চূসৱেলাযং লোকং ৱোলোকেন্তো দিব্বচক্খুনা দিস্ৱা চিন্তেসি ‘‘অযং ইত্থী অজ্জ কালং কত্ৱা নিৰযে নিব্বত্তিস্সতি, যংনূনাহং তিলভিক্খাপটিগ্গহণেন তং সগ্গূপগং কৰেয্য’’ন্তি. সো সাৱত্থিতো তঙ্খণেনেৱ ৰাজগহং গন্ত্ৱা পুব্বণ্হসমযং নিৱাসেত্ৱা পত্তচীৱৰমাদায ৰাজগহে পিণ্ডায চৰন্তো অনুপুব্বেন তস্সা গেহদ্ৱাৰং পাপুণি. সা ইত্থী ভগৱন্তং পস্সিত্ৱা সঞ্জাতপীতিসোমনস্সা সহসা উট্ঠহিত্ৱা কতঞ্জলী অঞ্ঞং দাতব্বযুত্তকং অপস্সন্তী হত্থপাদে ধোৱিত্ৱা তিলে ৰাসিং কত্ৱা উভোহি হত্থেহি পৰিগ্গহেত্ৱা অঞ্জলিপূৰং তিলং ভগৱতো পত্তে আকিৰিত্ৱা ভগৱন্তং ৱন্দি. তং ভগৱা অনুকম্পমানো ‘‘সুখিনী হোহী’’তি ৱত্ৱা পক্কামি. সা তস্সা ৰত্তিযা পচ্চূসসমযে কালং কত্ৱা তাৱতিংসভৱনে দ্ৱাদসযোজনিকে কনকৱিমানে সুত্তপবুদ্ধা ৱিয নিব্বত্তি.

অথাযস্মা মহামোগ্গল্লানো দেৱচাৰিকং চৰন্তো তং অচ্ছৰাসহস্সপৰিৱুতং মহতিযা দেৱিদ্ধিযা ৱিৰোচমানমুপগন্ত্ৱা –

৮৫. ‘‘অভিক্কন্তেন ৱণ্ণেন, যা ত্ৱং তিট্ঠসি দেৱতে;

ওভাসেন্তী দিসা সব্বা, ওসধী ৱিয তাৰকা.

৮৬. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

৮৭. ‘‘পুচ্ছামি তং দেৱি মহানুভাৱে,

মনুস্সভূতা কিমকাসি পুঞ্ঞং;

কেনাসি এৱং জলিতানুভাৱা,

ৱণ্ণো চ তে সব্বদিসা পভাসতী’’তি. – পুচ্ছি;

৮৮. ‘‘সা দেৱতা অত্তমনা, মোগ্গল্লানেন পুচ্ছিতা;

পঞ্হং পুট্ঠা ৱিযাকাসি, যস্স কম্মস্সিদং ফলং’’.

৮৯. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে.

৯০. ‘‘অদ্দসং ৱিৰজং বুদ্ধং, ৱিপ্পসন্নমনাৱিলং;

আসজ্জ দানং অদাসিং, অকামা তিলদক্খিণং;

দক্খিণেয্যস্স বুদ্ধস্স, পসন্না সেহি পাণিভি.

৯১. ‘‘তেন মেতাদিসো ৱণ্ণো, তেন মে ইধ মিজ্ঝতি;

উপ্পজ্জন্তি চ মে ভোগা, যে কেচি মনসো পিযা.

৯২. ‘‘অক্খামি তে ভিক্খু মহানুভাৱ, মনুস্সভূতা যমকাসি পুঞ্ঞং;

তেনম্হি এৱং জলিতানুভাৱা, ৱণ্ণো চ মে সব্বদিসা পভাসতী’’তি. –

সা ৱিস্সজ্জেসি.

৯০. তত্থ আসজ্জাতি অযং আসজ্জ-সদ্দো ‘‘আসজ্জ নং তথাগত’’ন্তিআদীসু (চূড়ৱ. ৩৫০) ঘট্টেন আগতো. ‘‘আসজ্জ দানং দেতী’’তিআদীসু (দী. নি. ৩.৩৩৬; অ. নি. ৮.৩১) সমাগমে. ইধাপি সমাগমেযেৱ দট্ঠব্বো. তস্মা আসজ্জাতি সমাগন্ত্ৱা, সমৱাযেন সম্পত্ৱাতি অত্থো. তেনাহ ‘‘অকামা’’তি. সা হি দেয্যধম্মসংৱিধানপুব্বকং পুৰিমসিদ্ধং দানসঙ্কপ্পং ৱিনা সহসা সম্পত্তে ভগৱতি পৱত্তিতং তিলদানং সন্ধাযাহ ‘‘আসজ্জ দানং অদাসিং, অকামা তিলদক্খিণ’’ন্তি. সেসং ৱুত্তনযমেৱ.

তিলদক্খিণৱিমানৱণ্ণনা নিট্ঠিতা.