১. ইসিদাসীথেৰীগাথাৱণ্ণনা

চত্তালীসনিপাতে নগৰম্হি কুসুমনামেতিআদিকা ইসিদাসিযা থেৰিযা গাথা. অযম্পি পুৰিমবুদ্ধেসু কতাধিকাৰা তত্থ তত্থ ভৱে পুৰিসত্তভাৱে ঠত্ৱা ৱিৱট্টূপনিস্সযং কুসলং উপচিনন্তী চৰিমভৱতো সত্তমে ভৱে অকল্যাণসন্নিস্সযেন পৰদাৰিককম্মং কত্ৱা, কাযস্স ভেদা নিৰযে নিব্বত্তিত্ৱা তত্থ বহূনি ৱস্সসতানি নিৰযে পচ্চিত্ৱা, ততো চুতা তীসু জাতীসু তিৰচ্ছানযোনিযং নিব্বত্তিত্ৱা ততো চুতা দাসিযা কুচ্ছিস্মিং নপুংসকো হুত্ৱা নিব্বত্তি. ততো পন চুতা একস্স দলিদ্দস্স সাকটিকস্স ধীতা হুত্ৱা নিব্বত্তি. তং ৱযপ্পত্তং গিৰিদাসো নাম অঞ্ঞতৰস্স সত্থৱাহস্স পুত্তো অত্তনো ভৰিযং কত্ৱা গেহং আনেসি. তস্স চ ভৰিযা অত্থি সীলৱতী কল্যাণধম্মা. তস্সং ইস্সাপকতা সামিনো তস্সা ৱিদ্দেসনকম্মং অকাসি. সা তত্থ যাৱজীৱং ঠত্ৱা কাযস্স ভেদা ইমস্মিং বুদ্ধুপ্পাদে উজ্জেনিযং কুলপদেসসীলাচাৰাদিগুণেহি অভিসম্মতস্স ৱিভৱসম্পন্নস্স সেট্ঠিস্স ধীতা হুত্ৱা নিব্বত্তি, ইসিদাসীতিস্সা নামং অহোসি.

তং ৱযপ্পত্তকালে মাতাপিতৰো কুলৰূপৱযৱিভৱাদিসদিসস্স অঞ্ঞতৰস্স সেট্ঠিপুত্তস্স অদংসু. সা তস্স গেহে পতিদেৱতা হুত্ৱা মাসমত্তং ৱসি. অথস্সা কম্মবলেন সামিকো ৱিৰত্তৰূপো হুত্ৱা তং ঘৰতো নীহৰি. তং সব্বং পাড়িতো এৱ ৱিঞ্ঞাযতি. তেসং তেসং পন সামিকানং অৰুচ্চনেয্যতায সংৱেগজাতা পিতৰং অনুজানাপেত্ৱা, জিনদত্তায থেৰিযা সন্তিকে পব্বজিত্ৱা ৱিপস্সনায কম্মং কৰোন্তী নচিৰস্সেৱ সহ পটিসম্ভিদাহি অৰহত্তং পত্ৱা, ফলসুখেন নিব্বানসুখেন চ ৱীতিনামেন্তী একদিৱসং পাটলিপুত্তনগৰে পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা মহাগঙ্গাযং ৱালুকপুলিনে নিসীদিত্ৱা বোধিত্থেৰিযা নাম অত্তনো সহাযত্থেৰিযা পুব্বপটিপত্তিং পুচ্ছিতা তমত্থং গাথাবন্ধৱসেন ৱিস্সজ্জেসি ‘‘উজ্জেনিযা পুৰৱৰে’’তিআদিনা. তেসং পন পুচ্ছাৱিস্সজ্জনানং সম্বন্ধং দস্সেতুং –

৪০২. ‘‘নগৰম্হি কুসুমনামে, পাটলিপুত্তম্হি পথৱিযা মণ্ডে;

সক্যকুলকুলীনাযো, দ্ৱে ভিক্খুনিযো হি গুণৱতিযো.

৪০৩. ‘‘ইসিদাসী তত্থ একা, দুতিযা বোধীতি সীলসম্পন্না চ;

ঝানজ্ঝাযনৰতাযো, বহুস্সুতাযো ধুতকিলেসাযো.

৪০৪. ‘‘তা পিণ্ডায চৰিত্ৱা, ভত্তত্থং কৰিয ধোতপত্তাযো;

ৰহিতম্হি সুখনিসিন্না, ইমা গিৰা অব্ভুদীৰেসু’’ন্তি. –

ইমা তিস্সো গাথা সঙ্গীতিকাৰেহি ঠপিতা.

৪০৫. ‘‘পাসাদিকাসি অয্যে, ইসিদাসি ৱযোপি তে অপৰিহীনো;

কিং দিস্ৱান ব্যালিকং, অথাসি নেক্খম্মমনুযুত্তা.

৪০৬. ‘‘এৱমনুযুঞ্জিযমানা সা, ৰহিতে ধম্মদেসনাকুসলা;

ইসিদাসী ৱচনমব্ৰৱি, সুণ বোধি যথাম্হি পব্বজিতা.

ইতো পৰং ৱিস্সজ্জনগাথা.

৪০৭. ‘‘উজ্জেনিযা পুৰৱৰে, ময্হং পিতা সীলসংৱুতো সেট্ঠি;

তস্সম্হি একধীতা, পিযা মনাপা চ দযিতা চ.

৪০৮. ‘‘অথ মে সাকেততো ৱৰকা, আগচ্ছুমুত্তমকুলীনা;

সেট্ঠী পহূতৰতনো, তস্স মমং সুণুমদাসি তাতো.

৪০৯. ‘‘সস্সুযা সসুৰস্স চ, সাযং পাতং পণামমুপগম্ম;

সিৰসা কৰোমি পাদে, ৱন্দামি যথাম্হি অনুসিট্ঠা.

৪১০. ‘‘যা ময্হং সামিকস্স, ভগিনিযো ভাতুনো পৰিজনো ৱা;

তমেকৱৰকম্পি দিস্ৱা, উব্বিগ্গা আসনং দেমি.

৪১১. ‘‘অন্নেন চ পানেন চ, খজ্জেন চ যঞ্চ তত্থ সন্নিহিতং;

ছাদেমি উপনযামি চ, দেমি চ যং যস্স পতিৰূপং.

৪১২. ‘‘কালেন উপট্ঠহিত্ৱা, ঘৰং সমুপগমামি উম্মাৰে;

ধোৱন্তী হত্থপাদে, পঞ্জলিকা সামিকমুপেমি.

৪১৩. ‘‘কোচ্ছং পসাদং অঞ্জনিঞ্চ, আদাসকঞ্চ গণ্হিত্ৱা;

পৰিকম্মকাৰিকা ৱিয, সযমেৱ পতিং ৱিভূসেমি.

৪১৪. ‘‘সযমেৱ ওদনং সাধযামি, সযমেৱ ভাজনং ধোৱন্তী;

মাতাৱ একপুত্তকং, তথা ভত্তাৰং পৰিচৰামি.

৪১৫. ‘‘এৱং মং ভত্তিকতং, অনুৰত্তং কাৰিকং নিহতমানং;

উট্ঠাযিকং অনলসং, সীলৱতিং দুস্সতে ভত্তা.

৪১৬. ‘‘সো মাতৰঞ্চ পিতৰঞ্চ, ভণতি আপুচ্ছহং গমিস্সামি;

ইসিদাসিযা ন সহ ৱচ্ছং, একাগাৰেহং সহ ৱত্থুং.

৪১৭. ‘‘মা এৱং পুত্ত অৱচ, ইসিদাসী পণ্ডিতা পৰিব্যত্তা;

উট্ঠাযিকা অনলসা, কিং তুয্হং ন ৰোচতে পুত্ত.

৪১৮. ‘‘ন চ মে হিংসতি কিঞ্চি, ন চহং ইসিদাসিযা সহ ৱচ্ছং;

দেস্সাৱ মে অলং মে, অপুচ্ছাহং গমিস্সামি.

৪১৯. ‘‘তস্স ৱচনং সুণিত্ৱা, সস্সু সসুৰো চ মং অপুচ্ছিংসু;

কিস্স তযা অপৰদ্ধং, ভণ ৱিস্সট্ঠা যথাভূতং.

৪২০. ‘‘নপিহং অপৰজ্ঝং কিঞ্চি, নপি হিংসেমি ন ভণামি দুব্বচনং;

কিং সক্কা কাতুয্যে, যং মং ৱিদ্দেস্সতে ভত্তা.

৪২১. ‘‘তে মং পিতুঘৰং পটিনযিংসু, ৱিমনা দুখেন অধিভূতা;

পুত্তমনুৰক্খমানা, জিতাম্হসে ৰূপিনিং লক্খিং.

৪২২. ‘‘অথ মং অদাসি তাতো, অড্ঢস্স ঘৰম্হি দুতিযকুলিকস্স;

ততো উপড্ঢসুঙ্কেন, যেন মং ৱিন্দথ সেট্ঠি.

৪২৩. ‘‘তস্সপি ঘৰম্হি মাসং, অৱসিং অথ সোপি মং পটিচ্ছৰযি;

দাসীৱ উপট্ঠহন্তিং, অদূসিকং সীলসম্পন্নং.

৪২৪. ‘‘ভিক্খায চ ৱিচৰন্তং, দমকং দন্তং মে পিতা ভণতি;

হোহিসি মে জামাতা, নিক্খিপ পোট্ঠিঞ্চ ঘটিকঞ্চ.

৪২৫. ‘‘সোপি ৱসিত্ৱা পক্খং, অথ তাতং ভণতি ‘দেহি মে পোট্ঠিং;

ঘটিকঞ্চ মল্লকঞ্চ, পুনপি ভিক্খং চৰিস্সামি’.

৪২৬. ‘‘অথ নং ভণতী তাতো, অম্মা সব্বো চ মে ঞাতিগণৱগ্গো;

কিং তে ন কীৰতি ইধ, ভণ খিপ্পং তং তে কৰিহিতি.

৪২৭. ‘‘এৱং ভণিতো ভণতি, যদি মে অত্তা সক্কোতি অলং ময্হং;

ইসিদাসিযা ন সহ ৱচ্ছং, একঘৰেহং সহ ৱত্থুং.

৪২৮. ‘‘ৱিস্সজ্জিতো গতো সো, অহম্পি একাকিনী ৱিচিন্তেমি;

আপুচ্ছিতূন গচ্ছং, মৰিতুযে ৱা পব্বজিস্সং ৱা.

৪২৯. ‘‘অথ অয্যা জিনদত্তা, আগচ্ছী গোচৰায চৰমানা;

তাত কুলং ৱিনযধৰী, বহুস্সুতা সীলসম্পন্না.

৪৩০. ‘‘তং দিস্ৱান অম্হাকং, উট্ঠাযাসনং তস্সা পঞ্ঞাপযিং;

নিসিন্নায চ পাদে, ৱন্দিত্ৱা ভোজনমদাসিং.

৪৩১. ‘‘অন্নেন চ পানেন চ, খজ্জেন চ যঞ্চ তত্থ সন্নিহিতং;

সন্তপ্পযিত্ৱা অৱচং, অয্যে ইচ্ছামি পব্বজিতুং.

৪৩২. ‘‘অথ মং ভণতী তাতো, ইধেৱ পুত্তক চৰাহি ত্ৱং ধম্মং;

অন্নেন চ পানেন চ, তপ্পয সমণে দ্ৱিজাতী চ.

৪৩৩. ‘‘অথহং ভণামি তাতং, ৰোদন্তী অঞ্জলিং পণামেত্ৱা;

পাপঞ্হি মযা পকতং, কম্মং তং নিজ্জৰেস্সামি.

৪৩৪. ‘‘অথ মং ভণতী তাতো, পাপুণ বোধিঞ্চ অগ্গধম্মঞ্চ;

নিব্বানঞ্চ লভস্সু, যং সচ্ছিকৰী দ্ৱিপদসেট্ঠো.

৪৩৫. ‘‘মাতাপিতূ অভিৱাদ, যিত্ৱা সব্বঞ্চ ঞাতিগণৱগ্গং;

সত্তাহং পব্বজিতা, তিস্সো ৱিজ্জা অফস্সযিং.

৪৩৬. ‘‘জানামি অত্তনো সত্ত, জাতিযো যস্সযং ফলৱিপাকো;

তং তৱ আচিক্খিস্সং, তং একমনা নিসামেহি.

৪৩৭. ‘‘নগৰম্হি এৰকচ্ছে, সুৱণ্ণকাৰো অহং পহূতধনো;

যোব্বনমদেন মত্তো, সো পৰদাৰং অসেৱিহং.

৪৩৮. ‘‘সোহং ততো চৱিত্ৱা, নিৰযম্হি অপচ্চিসং চিৰং;

পক্কো ততো চ উট্ঠহিত্ৱা, মক্কটিযা কুচ্ছিমোক্কমিং.

৪৩৯. ‘‘সত্তাহজাতকং মং, মহাকপি যূথপো নিল্লচ্ছেসি;

তস্সেতং কম্মফলং, যথাপি গন্ত্ৱান পৰদাৰং.

৪৪০. ‘‘সোহং ততো চৱিত্ৱা, কালং কৰিত্ৱা সিন্ধৱাৰঞ্ঞে;

কাণায চ খঞ্জায চ, এড়কিযা কুচ্ছিমোক্কমিং.

৪৪১. ‘‘দ্ৱাদস ৱস্সানি অহং, নিল্লচ্ছিতো দাৰকে পৰিৱহিত্ৱা;

কিমিনাৱট্টো অকল্লো, যথাপি গন্ত্ৱান পৰদাৰং.

৪৪২. ‘‘সোহং ততো চৱিত্ৱা, গোৱাণিজকস্স গাৱিযা জাতো;

ৱচ্ছো লাখাতম্বো, নিল্লচ্ছিতো দ্ৱাদসে মাসে.

৪৪৩. ‘‘ৱোঢূন নঙ্গলমহং, সকটঞ্চ ধাৰযামি;

অন্ধোৱট্টো অকল্লো, যথাপি গন্ত্ৱান পৰদাৰং.

৪৪৪. ‘‘সোহং ততো চৱিত্ৱা, ৱীথিযা দাসিযা ঘৰে জাতো;

নেৱ মহিলা ন পুৰিসো, যথাপি গন্ত্ৱান পৰদাৰং.

৪৪৫. ‘‘তিংসতিৱস্সম্হি মতো, সাকটিককুলম্হি দাৰিকা জাতা;

কপণম্হি অপ্পভোগে, ধনিকপুৰিসপাতবহুলম্হি.

৪৪৬. ‘‘তং মং ততো সত্থৱাহো, উস্সন্নায ৱিপুলায ৱড্ঢিযা;

ওকড্ঢতি ৱিলপন্তিং, অচ্ছিন্দিত্ৱা কুলঘৰস্মা.

৪৪৭. ‘‘অথ সোড়সমে ৱস্সে, দিস্ৱা মং পত্তযোব্বনং কঞ্ঞং;

ওৰুন্ধতস্স পুত্তো, গিৰিদাসো নাম নামেন.

৪৪৮. ‘‘তস্সপি অঞ্ঞা ভৰিযা, সীলৱতী গুণৱতী যসৱতী চ;

অনুৰত্তা ভত্তাৰং, তস্সাহং ৱিদ্দেসনমকাসিং.

৪৪৯. ‘‘তস্সেতং কম্মফলং, যং মং অপকীৰিতূন গচ্ছন্তি;

দাসীৱ উপট্ঠহন্তিং, তস্সপি অন্তো কতো মযা’’তি.

তত্থ নগৰম্হি কুসুমনামেতি ‘‘কুসুমপুৰ’’ন্তি এৱং কুসুমসদ্দেন গহিতনামকে নগৰে, ইদানি তং নগৰং পাটলিপুত্তম্হীতি সৰূপতো দস্সেতি. পথৱিযা মণ্ডেতি সকলায পথৱিযা মণ্ডভূতে. সক্যকুলকুলীনাযোতি সক্যকুলে কুলধীতৰো, সক্যপুত্তস্স ভগৱতো সাসনে পব্বজিততায এৱং ৱুত্তং.

তত্থাতি তাসু দ্ৱীসু ভিক্খুনীসু. বোধীতি এৱংনামিকা থেৰী. ঝানজ্ঝাযনৰতাযোতি লোকিযলোকুত্তৰস্স ঝানস্স ঝাযনে অভিৰতা. বহুস্সুতাযোতি পৰিযত্তিবাহুসচ্চেন বহুস্সুতা. ধুতকিলেসাযোতি অগ্গমগ্গেন সব্বসো সমুগ্ঘাতিতকিলেসা. ভত্তত্থং কৰিযাতি ভত্তকিচ্চং নিট্ঠাপেত্ৱা. ৰহিতম্হীতি জনৰহিতম্হি ৱিৱিত্তট্ঠানে. সুখনিসিন্নাতি পব্বজ্জাসুখেন ৱিৱেকসুখেন চ সুখনিসিন্না. ইমা গিৰাতি ইদানি ৱুচ্চমানা সুখা লাপনা. অব্ভুদীৰেসুন্তি পুচ্ছাৱিস্সজ্জনৱসেন কথযিংসু.

‘‘পাসাদিকাসী’’তি গাথা বোধিত্থেৰিযা পুচ্ছাৱসেন ৱুত্তা. ‘‘এৱমনুযুঞ্জিযমানা’’তি গাথা সঙ্গীতিকাৰেহেৱ ৱুত্তা. ‘‘উজ্জেনিযা’’তিআদিকা হি সব্বাপি ইসিদাসিযাৱ ৱুত্তা. তত্থ পাসাদিকাসীতি ৰূপসম্পত্তিযা পস্সন্তানং পসাদাৱহা অসি. ৱযোপি তে অপৰিহীনোতি তুয্হং ৱযোপি ন পৰিহীনো, পঠমৱযে ঠিতাসীতি অত্থো. কিং দিস্ৱান ব্যালিকন্তি কীদিসং ব্যালিকং দোসং ঘৰাৱাসে আদীনৱং দিস্ৱা. অথাসি নেক্খম্মমনুযুত্তাতি অথাতি নিপাতমত্তং, নেক্খম্মং পব্বজ্জং অনুযুত্তা অসি.

অনুযুঞ্জিযমানাতি পুচ্ছিযমানা, সা ইসিদাসীতি যোজনা. ৰহিতেতি সুঞ্ঞট্ঠানে. সুণ বোধি যথাম্হি পব্বজিতাতি বোধিত্থেৰি অহং যথা পব্বজিতা অম্হি, তং তং পুৰাণং সুণ সুণাহি.

উজ্জেনিযা পুৰৱৰেতি উজ্জেনীনামকে অৱন্তিৰট্ঠে উত্তমনগৰে. পিযাতি একধীতুভাৱেন পিযাযিতব্বা. মনাপাতি সীলাচাৰগুণেন মনৱড্ঢনকা. দযিতাতি অনুকম্পিতব্বা.

অথাতি পচ্ছা মম ৱযপ্পত্তকালে. মে সাকেততো ৱৰকাতি সাকেতনগৰতো মম ৱৰকা মং ৱাৰেন্তা আগচ্ছুং. উত্তমকুলীনাতি তস্মিং নগৰে অগ্গকুলিকা, যেন তে পেসিতা, সো সেট্ঠি পহূতৰতনো. তস্স মমং সুণ্হমদাসি তাতোতি তস্স সাকেতসেট্ঠিনো সুণিসং পুত্তস্স ভৰিযং কত্ৱা ময্হং পিতা মং অদাসি.

সাযং পাতন্তি সাযন্হে পুব্বণ্হে চ. পণামমুপগম্ম সিৰসা কৰোমীতি সস্সুযা সসুৰস্স চ সন্তিকং উপগন্ত্ৱা সিৰসা পণামং কৰোমি, তেসং পাদে ৱন্দামি. যথাম্হি অনুসিট্ঠাতি তেহি যথা অনুসিট্ঠা অম্হি, তথা কৰোমি, তেসং অনুসিট্ঠিং ন অতিক্কমামি.

তমেকৱৰকম্পীতি একৱল্লভম্পি. উব্বিগ্গাতি তসন্তা. আসনং দেমীতি যস্স পুগ্গলস্স যং অনুচ্ছৱিকং, তং তস্স দেমি.

তত্থাতি পৰিৱেসনট্ঠানে. সন্নিহিতন্তি সজ্জিতং হুত্ৱা ৱিজ্জমানং. ছাদেমীতি উপচ্ছাদেমি, উপচ্ছাদেত্ৱা উপনযামি চ, উপনেত্ৱা দেমি, দেন্তীপি যং যস্স পতিৰূপং, তদেৱ দেমীতি অত্থো.

উম্মাৰেতি দ্ৱাৰে. ধোৱন্তী হত্থপাদেতি হত্থপাদে ধোৱিনী আসিং, ধোৱিত্ৱা ঘৰং সমুপগমামীতি যোজনা.

কোচ্ছন্তি মস্সূনং কেসানঞ্চ উল্লিখনকোচ্ছং. পসাদন্তি গন্ধচুণ্ণাদিমুখৱিলেপনং. ‘‘পসাধন’’ন্তিপি পাঠো, পসাধনভণ্ডং. অঞ্জনিন্তি অঞ্জননাড়িং. পৰিকম্মকাৰিকা ৱিযাতি অগ্গকুলিকা ৱিভৱসম্পন্নাপি পতিপৰিচাৰিকা চেটিকা ৱিয.

সাধযামীতি পচামি. ভাজনন্তি লোহভাজনঞ্চ. ধোৱন্তী পৰিচৰামীতি যোজনা.

ভত্তিকতন্তি কতসামিভতিকং. অনুৰত্তন্তি অনুৰত্তৱন্তিং. কাৰিকন্তি তস্স তস্সেৱ ইতি কত্তব্বস্স কাৰিকং. নিহতমানন্তি অপনীতমানং. উট্ঠাযিকন্তি উট্ঠানৱীৰিযসম্পন্নং. অনলসন্তি ততো এৱ অকুসীতং. সীলৱতিন্তি সীলাচাৰসম্পন্নং. দুস্সতেতি দুস্সতি, কুজ্ঝিত্ৱা ভণতি.

ভণতি আপুচ্ছহং গমিস্সামীতি ‘‘অহং তুম্হে আপুচ্ছিত্ৱা যত্থ কত্থচি গমিস্সামী’’তি সো মম সামিকো অত্তনো মাতৰঞ্চ পিতৰঞ্চ ভণতি. কিং ভণতীতি চে আহ – ‘‘ইসিদাসিযা ন সহ ৱচ্ছং, একাগাৰেহং সহ ৱত্থু’’ন্তি. তত্থ ৱচ্ছন্তি ৱসিস্সং.

দেস্সাতি অপ্পিযা. অলং মেতি পযোজনং মে তায ইত্থীতি অত্থো. অপুচ্ছাহং গমিস্সামীতি যদি মে তুম্হে তায সদ্ধিং সংৱাসং ইচ্ছথ, অহং তুম্হে অপুচ্ছিত্ৱা ৱিদেসং পক্কমিস্সামি.

তস্সাতি মম ভত্তুনো. কিস্সাতি কিং অস্স তৱ সামিকস্স. তযা অপৰদ্ধং ব্যালিকং কতং.

নপিহং অপৰজ্ঝন্তি নপি অহং তস্স কিঞ্চি অপৰজ্ঝিং. অযমেৱ ৱা পাঠো. নপি হিংসেমীতি নপি বাধেমি. দুব্বচনন্তি দুৰুত্তৱচনং. কিং সক্কা কাতুয্যেতি কিং মযা কাতুং অয্যে সক্কা. যং মং ৱিদ্দেস্সতে ভত্তাতি যস্মা অকাৰণেনেৱ ভত্তা ময্হং ৱিদ্দেস্সতে ৱিদ্দেস্সং চিত্তপ্পকোপং কৰোতি.

ৱিমনাতি দোমনস্সিকা. পুত্তমনুৰক্খমানাতি অত্তনো পুত্তং ময্হং সামিকং চিত্তমনুৰক্খণেন অনুৰক্খন্তা. জিতাম্হসে ৰূপিনিং লক্খিন্তি জিতা অম্হসে জিতা ৱতাম্হ ৰূপৱতিং সিৰিং, মনুস্সৱেসেন চৰন্তিযা সিৰিদেৱতায পৰিহীনা ৱতাতি অত্থো.

অড্ঢস্স ঘৰম্হি দুতিযকুলিকস্সাতি পঠমসামিকং উপাদায দুতিযস্স অড্ঢস্স কুলপুত্তস্স ঘৰম্হি মং অদাসি, দেন্তো চ ততো পঠমসুঙ্কতো উপড্ঢসুঙ্কেন অদাসি. যেন মং ৱিন্দথ সেট্ঠীতি যেন সুঙ্কেন মং পঠমং সেট্ঠি ৱিন্দথ পটিলভি, ততো উপড্ঢসুঙ্কেনাতি যোজনা.

সোপীতি দুতিযসামিকোপি. মং পটিচ্ছৰযীতি মং নীহৰি, সো মং গেহতো নিক্কড্ঢি. উপট্ঠহন্তিন্তি দাসী ৱিয উপট্ঠহন্তিং উপট্ঠানং কৰোন্তিং. অদূসিকন্তি অদুব্ভনকং.

দমকন্তি কাৰুঞ্ঞাধিট্ঠানতায পৰেসং চিত্তস্স দমকং. যথা পৰে কিঞ্চি দস্সন্তি, এৱং অত্তনো কাযং ৱাচঞ্চ দন্তং ৱূপসন্তং কত্ৱা পৰদত্তভিক্খায ৱিচৰণকং. জামাতাতি দুহিতুপতি. নিক্খিপ পোট্ঠিঞ্চ ঘটিকঞ্চাতি তযা পৰিদহিতং পিলোতিকাখণ্ডঞ্চ ভিক্খাকপালঞ্চ ছড্ডেহি.

সোপি ৱসিত্ৱা পক্খন্তি সোপি ভিক্খকো পুৰিসো মযা সদ্ধিং অদ্ধমাসমত্তং ৱসিত্ৱা পক্কামি.

অথ নং ভণতী তাতোতি তং ভিক্খকং মম পিতা মাতা সব্বো চ মে ঞাতিগণো ৱগ্গৱগ্গো হুত্ৱা ভণতি. কথং? কিং তে ন কীৰতি ইধ তুয্হং কিং নাম ন কিৰতি ন সাধিযতি, ভণ খিপ্পং. তং তে কৰিহিতীতি তং তুয্হং কৰিস্সতি.

যদি মে অত্তা সক্কোতীতি যদি ময্হং অত্তা অত্তাধীনো ভুজিস্সো চ হোতি, অলং ময্হং ইসিদাসিযা তায পযোজনং নত্থি, তস্মা ন সহ ৱচ্ছং ন সহ ৱসিস্সং, একঘৰে অহং তায সহ ৱত্থুন্তি যোজনা.

ৱিস্সজ্জিতো গতো সোতি সো ভিক্খকো পিতৰা ৱিস্সজ্জিতো যথাৰুচি গতো. একাকিনীতি একিকাৱ. আপুচ্ছিতূন গচ্ছন্তি ময্হং পিতৰং ৱিস্সজ্জেত্ৱা গচ্ছামি. মৰিতুযেতি মৰিতুং. ৱাতি ৱিকপ্পত্থে নিপাতো.

গোচৰাযাতি ভিক্খায, তাত-কুলং আগচ্ছীতি যোজনা.

তন্তি তং জিনদত্তত্থেৰিং. উট্ঠাযাসনং তস্সা পঞ্ঞাপযিন্তি উট্ঠহিত্ৱা আসনং তস্সা থেৰিযা পঞ্ঞাপেসিং.

ইধেৱাতি ইমস্মিং এৱ গেহে ঠিতা. পুত্তকাতি সামঞ্ঞৱোহাৰেন ধীতৰং অনুকম্পেন্তো আলপতি. চৰাহি ত্ৱং ধম্মন্তি ত্ৱং পব্বজিত্ৱা চৰিতব্বং ব্ৰহ্মচৰিযাদিধম্মং চৰ. দ্ৱিজাতীতি ব্ৰাহ্মণজাতী.

নিজ্জৰেস্সামীতি জীৰাপেস্সামি ৱিনাসেস্সামি.

বোধিন্তি সচ্চাভিসম্বোধিং, মগ্গঞাণন্তি অত্থো. অগ্গধম্মন্তি ফলধম্মং, অৰহত্তং. যং সচ্ছিকৰী দ্ৱিপদসেট্ঠোতি যং মগ্গফলনিব্বানসঞ্ঞিতং লোকুত্তৰধম্মং দ্ৱিপদানং সেট্ঠো সম্মাসম্বুদ্ধো সচ্ছি অকাসি, তং লভস্সূতি যোজনা.

সত্তাহং পব্বজিতাতি পব্বজিতা হুত্ৱা সত্তাহেন. অফস্সযিন্তি ফুসিং সচ্ছাকাসিং.

যস্সযং ফলৱিপাকোতি যস্স পাপকম্মস্স, অযং সামিকস্স অমনাপভাৱসঙ্খাতো নিস্সন্দফলভূতো ৱিপাকো. তং তৱ আচিক্খিস্সন্তি তং কম্মং তৱ কথেস্সামি. তন্তি আচিক্খিযমানং তমেৱ কম্মং, তং ৱা মম ৱচনং. একমনাতি একগ্গমনা. অযমেৱ ৱা পাঠো.

নগৰম্হি এৰকচ্ছেতি এৱংনামকে নগৰে. সো পৰদাৰং অসেৱিহন্তি সো অহং পৰস্স দাৰং অসেৱিং.

চিৰং পক্কোতি বহূনি ৱস্সসতসহস্সানি নিৰযগ্গিনা দড্ঢো. ততো চ উট্ঠহিত্ৱাতি ততো নিৰযতো ৱুট্ঠিতো চুতো. মক্কটিযা কুচ্ছিমোক্কমিন্তি ৱানৰিযা কুচ্ছিম্হি পটিসন্ধিং গণ্হিং.

যূথপোতি যূথপতি. নিল্লচ্ছেসীতি পুৰিসভাৱস্স লক্খণভূতানি বীজকানি নিল্লচ্ছেসি নীহৰি. তস্সেতং কম্মফলন্তি তস্স ময্হং এতং অতীতে কতস্স কম্মস্স ফলং. যথাপি গন্ত্ৱান পৰদাৰন্তি যথা তং পৰদাৰং অতিক্কমিত্ৱা.

ততোতি মক্কটযোনিতো. সিন্ধৱাৰঞ্ঞেতি সিন্ধৱৰট্ঠে অৰঞ্ঞট্ঠানে. এড়কিযাতি অজিযা.

দাৰকে পৰিৱহিত্ৱাতি পিট্ঠিং আৰুয্হ কুমাৰকে ৱহিত্ৱা. কিমিনাৱট্টোতি অভিজাতট্ঠানে কিমিপৰিগতোৱ হুত্ৱা অট্টো অট্টিতো. অকল্লোতি গিলানো, অহোসীতি ৱচনসেসো.

গোৱাণিজকস্সাতি গাৱিযো ৱিক্কিণিত্ৱা জীৱকস্স. লাখাতম্বোতি লাখাৰসৰত্তেহি ৱিয তম্বেহি লোমেহি সমন্নাগতো.

ৱোঢূনাতি ৱহিত্ৱা. নঙ্গলন্তি সীৰং, সকটঞ্চ ধাৰযামীতি অত্থো. অন্ধোৱট্টোতি কাণোৱ হুত্ৱা অট্টো পীড়িতো.

ৱীথিযাতি নগৰৱীথিযং. দাসিযা ঘৰে জাতোতি ঘৰদাসিযা কুচ্ছিম্হি জাতো. ‘‘ৱণ্ণদাসিযা’’তিপি ৱদন্তি. নেৱ মহিলা ন পুৰিসোতি ইত্থীপি পুৰিসোপি ন হোমি, জাতিনপুংসকোতি অত্থো.

তিংসতিৱস্সম্হি মতোতি নপুংসকো হুত্ৱা তিংসৱস্সকালে মতো. সাকটিককুলম্হীতি সূতককুলে. ধনিকপুৰিসপাতবহুলম্হীতি ইণাযিকানং পুৰিসানং অধিপতনবহুলে বহূহি ইণাযিকেহি অভিভৱিতব্বে.

উস্সন্নাযাতি উপচিতায. ৱিপুলাযাতি মহতিযা. ৱড্ঢিযাতি ইণৱড্ঢিযা. ওকড্ঢতীতি অৱকড্ঢতি. কুলঘৰস্মাতি মম জাতকুলগেহতো.

ওৰুন্ধতস্স পুত্তোতি অস্স সত্থৱাহস্স পুত্তো, মযি পটিবদ্ধচিত্তো নামেন গিৰিদাসো নাম অৱৰুন্ধতি অত্তনো পৰিগ্গহভাৱেন গেহে কৰোতি.

অনুৰত্তা ভত্তাৰন্তি ভত্তাৰং অনুৱত্তিকা. তস্সাহং ৱিদ্দেসনমকাসিন্তি তস্স ভত্তুনো তং ভৰিযং সপত্তিং ৱিদ্দেসনকম্মং অকাসিং. যথা তং সো কুজ্ঝতি, এৱং পটিপজ্জিং.

যং মং অপকীৰিতূন গচ্ছন্তীতি যং দাসী ৱিয সক্কচ্চং উপট্ঠহন্তিং মং তত্থ তত্থ পতিনো অপকিৰিত্ৱা ছড্ডেত্ৱা অনপেক্খা অপগচ্ছন্তি. এতং তস্সা ময্হং তদা কতস্স পৰদাৰিককম্মস্স সপত্তিং ৱিদ্দেসনকম্মস্স চ নিস্সন্দফলং. তস্সপি অন্তো কতো মযাতি তস্সপি তথা অনুনযপাপককম্মস্স দাৰুণস্স পৰিযন্তো ইদানি মযা অগ্গমগ্গং অধিগচ্ছন্তিযা কতো, ইতো পৰং কিঞ্চি দুক্খং নত্থীতি. যং পনেত্থ অন্তৰন্তৰা ন ৱিভত্তং, তং ৱুত্তনযত্তা উত্তানত্থমেৱ.

ইসিদাসীথেৰীগাথাৱণ্ণনা নিট্ঠিতা.

চত্তালীসনিপাতৱণ্ণনা নিট্ঠিতা.