৭. ৰাজপুত্তপেতৱত্থুৱণ্ণনা

পুব্বে কতানং কম্মানন্তি ইদং সত্থা জেতৱনে ৱিহৰন্তো ৰাজপুত্তপেতং আৰব্ভ কথেসি. তত্থ যো সো অতীতে কিতৱস্স নাম ৰঞ্ঞো পুত্তো অতীতে পচ্চেকবুদ্ধে অপৰজ্ঝিত্ৱা বহূনি ৱস্সসহস্সানি নিৰযে পচ্চিত্ৱা তস্সেৱ কম্মস্স ৱিপাকাৱসেসেন পেতেসু উপ্পন্নো. সো ইধ ‘‘ৰাজপুত্তপেতো’’তি অধিপ্পেতো. তস্স ৱত্থু হেট্ঠা সাণৱাসিপেতৱত্থুম্হি ৱিত্থাৰতো আগতমেৱ, তস্মা তত্থ ৱুত্তনযেনেৱ গহেতব্বং. সত্থা হি তদা থেৰেন অত্তনো ঞাতিপেতানং পৱত্তিযা কথিতায ‘‘ন কেৱলং তৱ ঞাতকাযেৱ, অথ খো ত্ৱম্পি ইতো অনন্তৰাতীতে অত্তভাৱে পেতো হুত্ৱা মহাদুক্খং অনুভৱী’’তি ৱত্ৱা তেন যাচিতো –

৭৫৩. ‘‘পুব্বে কতানং কম্মানং, ৱিপাকো মথযে মনং;

ৰূপে সদ্দে ৰসে গন্ধে, ফোট্ঠব্বে চ মনোৰমে.

৭৫৪. ‘‘ইচ্চং গীতং ৰতিং খিড্ডং, অনুভুত্ৱা অনপ্পকং;

উয্যানে পৰিচৰিত্ৱা, পৱিসন্তো গিৰিব্বজং.

৭৫৫. ‘‘ইসিং সুনেত্তমদ্দক্খি, অত্তদন্তং সমাহিতং;

অপ্পিচ্ছং হিৰিসম্পন্নং, উঞ্ছে পত্তগতে ৰতং.

৭৫৬. ‘‘হত্থিক্খন্ধতো ওৰুয্হ, লদ্ধা ভন্তেতি চাব্ৰৱি;

তস্স পত্তং গহেত্ৱান, উচ্চং পগ্গয্হ খত্তিযো.

৭৫৭. ‘‘থণ্ডিলে পত্তং ভিন্দিত্ৱা, হসমানো অপক্কমি;

ৰঞ্ঞো কিতৱস্সাহং পুত্তো, কিং মং ভিক্খু কৰিস্সসি.

৭৫৮. ‘‘তস্স কম্মস্স ফৰুসস্স, ৱিপাকো কটুকো অহু;

যং ৰাজপুত্তো ৱেদেসি, নিৰযম্হি সমপ্পিতো.

৭৫৯. ‘‘ছড়েৱ চতুৰাসীতি, ৱস্সানি নহুতানি চ;

ভুসং দুক্খং নিগচ্ছিত্থো, নিৰযে কতকিব্বিসো.

৭৬০. ‘‘উত্তানোপি চ পচ্চিত্থ, নিকুজ্জো ৱামদক্খিণো;

উদ্ধংপাদো ঠিতো চেৱ, চিৰং বালো অপচ্চথ.

৭৬১. ‘‘বহূনি ৱস্সসহস্সানি, পূগানি নহুতানি চ;

ভুসং দুক্খং নিগচ্ছিত্থো, নিৰযে কতকিব্বিসো.

৭৬২. ‘‘এতাদিসং খো কটুকং, অপ্পদুট্ঠপ্পদোসিনং;

পচ্চন্তি পাপকম্মন্তা, ইসিমাসজ্জ সুব্বতং.

৭৬৩. ‘‘সো তত্থ বহুৱস্সানি, ৱেদযিত্ৱা বহুং দুখং;

খুপ্পিপাসহতো নাম, পেতো আসি ততো চুতো.

৭৬৪. ‘‘এতমাদীনৱং ঞত্ৱা, ইস্সৰমদসম্ভৱং;

পহায ইস্সৰমদং, নিৱাতমনুৱত্তযে.

৭৬৫. ‘‘দিট্ঠেৱ ধম্মে পাসংসো, যো বুদ্ধেসু সগাৰৱো;

কাযস্স ভেদা সপ্পঞ্ঞো, সগ্গং সো উপপজ্জতী’’তি. –

ইদং পেতৱত্থুং কথেসি.

৭৫৩. তত্থ পুব্বে কতানং কম্মানং, ৱিপাকো মথযে মনন্তি পুৰিমাসু জাতীসু কতানং অকুসলকম্মানং ফলং উড়াৰং হুত্ৱা উপ্পজ্জমানং অন্ধবালানং চিত্তং মথযেয্য অভিভৱেয্য, পৰেসং অনত্থকৰণমুখেন অত্তনো অত্থং উপ্পাদেয্যাতি অধিপ্পাযো.

ইদানি তং চিত্তমথনং ৱিসযেন সদ্ধিং দস্সেতুং ‘‘ৰূপে সদ্দে’’তিআদি ৱুত্তং. তত্থ ৰূপেতি ৰূপহেতু, যথিচ্ছিতস্স মনাপিযস্স ৰূপাৰম্মণস্স পটিলাভনিমিত্তন্তি অত্থো. সদ্দেতিআদীসুপি এসেৱ নযো.

৭৫৪. এৱং সাধাৰণতো ৱুত্তমত্থং অসাধাৰণতো নিযমেত্ৱা দস্সেন্তো ‘‘নচ্চং গীত’’ন্তিআদিমাহ. তত্থ ৰতিন্তি কামৰতিং. খিড্ডন্তি সহাযকাদীহি কেড়িং. গিৰিব্বজন্তি ৰাজগহং.

৭৫৫. ইসিন্তি অসেক্খানং সীলক্খন্ধাদীনং এসনট্ঠেন ইসিং. সুনেত্তন্তি এৱংনামকং পচ্চেকবুদ্ধং. অত্তদন্তন্তি উত্তমেন দমথেন দমিতচিত্তং. সমাহিতন্তি অৰহত্তফলসমাধিনা সমাহিতং. উঞ্ছে পত্তগতে ৰতন্তি উঞ্ছেন ভিক্খাচাৰেন লদ্ধে পত্তগতে পত্তপৰিযাপন্নে আহাৰে ৰতং সন্তুট্ঠং.

৭৫৬. লদ্ধা, ভন্তেতি চাব্ৰৱীতি ‘‘অপি, ভন্তে, ভিক্খা লদ্ধা’’তি ৱিস্সাসজননত্থং কথেসি. উচ্চং পগ্গয্হাতি উচ্চতৰং কত্ৱা পত্তং উক্খিপিত্ৱা.

৭৫৭. থণ্ডিলে পত্তং ভিন্দিত্ৱাতি খৰকঠিনে ভূমিপ্পদেসে খিপন্তো পত্তং ভিন্দিত্ৱা. অপক্কমীতি থোকং অপসক্কি. অপসক্কন্তো চ ‘‘অকাৰণেনেৱ অন্ধবালো মহন্তং অনত্থং অত্তনো অকাসী’’তি কৰুণাযনৱসেন ওলোকেন্তং পচ্চেকবুদ্ধং ৰাজপুত্তো আহ ‘‘ৰঞ্ঞো কিতৱস্সাহং পুত্তো, কিং মং ভিক্খু কৰিস্সসী’’তি.

৭৫৮. ফৰুসস্সাতি দাৰুণস্স. কটুকোতি অনিট্ঠো. যন্তি যং ৱিপাকং. সমপ্পিতোতি অল্লীনো.

৭৫৯. ছড়েৱ চতুৰাসীতি, ৱস্সানি নহুতানি চাতি উত্তানো নিপন্নো চতুৰাসীতিৱস্সসহস্সানি, নিকুজ্জো, ৱামপস্সেন, দক্খিণপস্সেন, উদ্ধংপাদো, ওলম্বিকো, যথাঠিতো চাতি এৱং ছ চতুৰাসীতিসহস্সানি ৱস্সানি হোন্তি. তেনাহ –

৭৬০. ‘‘উত্তানোপি চ পচ্চিত্থ, নিকুজ্জো ৱামদক্খিণো;

উদ্ধংপাদো ঠিতো চেৱ, চিৰং বালো অপচ্চথা’’তি.

তানি পন ৱস্সানি যস্মা অনেকানি নহুতানি হোন্তি, তস্মা ৱুত্তং ‘‘নহুতানী’’তি. ভুসং দুক্খং নিগচ্ছিত্থোতি অতিৱিয দুক্খং পাপুণি.

৭৬১. পূগানীতি ৱস্সসমূহে, ইধ পুৰিমগাথায চ অচ্চন্তসংযোগে উপযোগৱচনং দট্ঠব্বং.

৭৬২. এতাদিসন্তি এৱৰূপং. কটুকন্তি অতিদুক্খং, ভাৱনপংসকনিদ্দেসোযং ‘‘একমন্তং নিসীদী’’তিআদীসু ৱিয. অপ্পদুট্ঠপ্পদোসিনং ইসিং সুব্বতং আসজ্জ আসাদেত্ৱা পাপকম্মন্তা পুগ্গলা এৱৰূপং কটুকং অতিৱিয দুক্খং পচ্চন্তীতি যোজনা.

৭৬৩. সোতি সো ৰাজপুত্তপেতো. তত্থাতি নিৰযে. ৱেদযিত্ৱাতি অনুভৱিত্ৱা. নামাতি ব্যত্তপাকটভাৱেন. ততো চুতোতি নিৰযতো চুতো. সেসং ৱুত্তনযমেৱ.

এৱং ভগৱা ৰাজপুত্তপেতকথায তত্থ সন্নিপতিতং মহাজনং সংৱেজেত্ৱা উপৰি সচ্চানি পকাসেসি. সচ্চপৰিযোসানে বহূ সোতাপত্তিফলাদীনি সম্পাপুণিংসূতি.

ৰাজপুত্তপেতৱত্থুৱণ্ণনা নিট্ঠিতা.