৮. গূথখাদকপেতৱত্থুৱণ্ণনা

গূথকূপতো উগ্গন্ত্ৱাতি ইদং সত্থৰি জেতৱনে ৱিহৰন্তে একং গূথখাদকপেতং আৰম্ভ ৱুত্তং. সাৱত্থিযা কিৰ অৱিদূৰে অঞ্ঞতৰস্মিং গামকে একো কুটুম্বিকো অত্তনো কুলূপকং ভিক্খুং উদ্দিস্স ৱিহাৰং কাৰেসি. তত্থ নানাজনপদতো ভিক্খূ আগন্ত্ৱা পটিৱসিংসু. তে দিস্ৱা মনুস্সা পসন্নচিত্তা পণীতেন পচ্চযেন উপট্ঠহিংসু. কুলূপকো ভিক্খু তং অসহমানো ইস্সাপকতো হুত্ৱা তেসং ভিক্খূনং দোসং ৱদন্তো কুটুম্বিকং উজ্ঝাপেসি. কুটুম্বিকো তে ভিক্খূ কুলূপকঞ্চ পৰিভৱন্তো পৰিভাসি. অথ কুলূপকো কালং কত্ৱা তস্মিংযেৱ ৱিহাৰে ৱচ্চকুটিযং পেতো হুত্ৱা নিব্বত্তি, কুটুম্বিকো পন কালং কত্ৱা তস্সেৱ উপৰি পেতো হুত্ৱা নিব্বত্তি. অথাযস্মা মহামোগ্গল্লানো তং দিস্ৱা পুচ্ছন্তো –

৭৬৬. ‘‘গূথকূপতো উগ্গন্ত্ৱা, কো ন দীনো পতিট্ঠসি;

নিস্সংসযং পাপকম্মন্তো, কিং নু সদ্দহসে তুৱ’’ন্তি. –

গাথমাহ. তং সুত্ৱা পেতো –

৭৬৭. ‘‘অহং ভদন্তে পেতোম্হি, দুগ্গতো যমলোকিকো;

পাপকম্মং কৰিত্ৱান, পেতলোকং ইতো গতো’’তি. –

গাথায অত্তানং আচিক্খি. অথ নং থেৰো –

৭৬৮. ‘‘কিং নু কাযেন ৱাচায, মনসা দুক্কটং কতং;

কিস্সকম্মৱিপাকেন, ইদং দুক্খং নিগচ্ছসী’’তি. –

গাথায তেন কতকম্মং পুচ্ছি. সো পেতো –

৭৬৯. ‘‘অহু আৱাসিকো ময্হং, ইস্সুকী কুলমচ্ছৰী;

অজ্ঝাসিতো ময্হং ঘৰে, কদৰিযো পৰিভাসকো.

৭৭০. ‘‘তস্সাহং ৱচনং সুত্ৱা, ভিক্খৱো পৰিভাসিসং;

তস্সকম্মৱিপাকেন, পেতলোকং ইতো গতো’’তি. –

দ্ৱীহি গাথাহি অত্তনা কতকম্মং কথেসি.

৭৬৯. তত্থ অহু আৱাসিকো ময্হন্তি ময্হং আৱাসে মযা কতৱিহাৰে একো ভিক্খু আৱাসিকো নিবদ্ধৱসনকো অহোসি. অজ্ঝাসিতো ময্হং ঘৰেতি কুলূপকভাৱেন মম গেহে তণ্হাভিনিৱেসৱসেন অভিনিৱিট্ঠো.

৭৭০. তস্সাতি তস্স কুলূপকভিক্খুস্স. ভিক্খৱোতি ভিক্খূ. পৰিভাসিসন্তি অক্কোসিং. পেতলোকং ইতো গতোতি ইমিনা আকাৰেন পেতযোনিং উপগতো পেতভূতো.

তং সুত্ৱা থেৰো ইতৰস্স গতিং পুচ্ছন্তো –

৭৭১. ‘‘অমিত্তো মিত্তৱণ্ণেন, যো তে আসি কুলূপকো;

কাযস্স ভেদা দুপ্পঞ্ঞো, কিং নু পেচ্চ গতিং গতো’’তি. –

গাথমাহ. তত্থ মিত্তৱণ্ণেনাতি মিত্তপটিৰূপেন মিত্তপটিৰূপতায.

পুন পেতো থেৰস্স তমত্থং আচিক্খন্তো –

৭৭২. ‘‘তস্সেৱাহং পাপকম্মস্স, সীসে তিট্ঠামি মত্থকে;

সো চ পৰৱিসযং পত্তো, মমেৱ পৰিচাৰকো.

৭৭৩. ‘‘যং ভদন্তে হদন্তঞ্ঞে, এতং মে হোতি ভোজনং;

অহঞ্চ খো যং হদামি, এতং সো উপজীৱতী’’তি. – গাথাদ্ৱযমাহ;

৭৭২. তত্থ তস্সেৱাতি তস্সেৱ ময্হং পুব্বে কুলূপকভিক্খুভূতস্স পেতস্স. পাপকম্মস্সাতি পাপসমাচাৰস্স. সীসে তিট্ঠামি মত্থকেতি সীসে তিট্ঠামি, তিট্ঠন্তো চ মত্থকে এৱ তিট্ঠামি, ন সীসপ্পমাণে আকাসেতি অত্থো. পৰৱিসযং পত্তোতি মনুস্সলোকং উপাদায পৰৱিসযভূতং পেত্তিৱিসযং পত্তো. মমেৱাতি ময্হং এৱ পৰিচাৰকো অহোসীতি ৱচনসেসো.

৭৭৩. যং ভদন্তে হদন্তঞ্ঞেতি ভদন্তে, অয্য মহামোগ্গলান, তস্সং ৱচ্চকুটিযং যং অঞ্ঞে উহদন্তি ৱচ্চং ওস্সজন্তি. এতং মে হোতি ভোজনন্তি এতং ৱচ্চং ময্হং দিৱসে দিৱসে ভোজনং হোতি. যং হদামীতি তং পন ৱচ্চং খাদিত্ৱা যম্পহং ৱচ্চং কৰোমি. এতং সো উপজীৱতীতি এতং মম ৱচ্চং সো কুলূপকপেতো দিৱসে দিৱসে খাদনৱসেন উপজীৱতি, অত্তভাৱং যাপেতীতি অত্থো.

তেসু কুটুম্বিকো পেসলে ভিক্খূ ‘‘এৱং আহাৰপৰিভোগতো ৱৰং তুম্হাকং গূথখাদন’’ন্তি অক্কোসি. কুলূপকো পন কুটুম্বিকম্পি তথাৱচনে সমাদপেত্ৱা সযং তথা অক্কোসি, তেনস্স ততোপি পটিকুট্ঠতৰা জীৱিকা অহোসি. আযস্মা মহামোগ্গল্লানো তং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা উপৱাদে আদীনৱং দস্সেত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

গূথখাদকপেতৱত্থুৱণ্ণনা নিট্ঠিতা.