১৫. সেট্ঠিপুত্তপেতৱত্থুৱণ্ণনা

সট্ঠিৱস্সসহস্সানীতি ইদং সেট্ঠিপুত্তপেতৱত্থু. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন খো পন সমযেন ৰাজা পসেনদি কোসলো অলঙ্কতপ্পটিযত্তো হত্থিক্খন্ধৱৰগতো মহতিযা ৰাজিদ্ধিযা মহন্তেন ৰাজানুভাৱেন নগৰং অনুসঞ্চৰন্তো অঞ্ঞতৰস্মিং গেহে উপৰিপাসাদে ৱাতপানং ৱিৱৰিত্ৱা তং ৰাজৱিভূতিং ওলোকেন্তিং ৰূপসম্পত্তিযা দেৱচ্ছৰাপটিভাগং একং ইত্থিং দিস্ৱা অদিট্ঠপুব্বে আৰম্মণে সহসা সমুপ্পন্নেন কিলেসসমুদাচাৰেন পৰিযুট্ঠিতচিত্তো সতিপি কুলৰূপাচাৰাদিগুণৱিসেসসম্পন্নে অন্তেপুৰজনে সভাৱলহুকস্স পন দুদ্দমস্স চিত্তস্স ৱসেন তস্সং ইত্থিযং পটিবদ্ধমানসো হুত্ৱা পচ্ছাসনে নিসিন্নস্স পুৰিসস্স ‘‘ইমং পাসাদং ইমঞ্চ ইত্থিং উপধাৰেহী’’তি সঞ্ঞং দত্ৱা ৰাজগেহং পৱিট্ঠো. অঞ্ঞং সব্বং অম্বসক্কৰপেতৱত্থুম্হি আগতনযেনেৱ ৱেদিতব্বং.

অযং পন ৱিসেসো – ইধ পুৰিসো সূৰিযে অনত্থঙ্গতেযেৱ আগন্ত্ৱা নগৰদ্ৱাৰে থকিতে অত্তনা আনীতং অৰুণৱণ্ণমত্তিকং উপ্পলানি চ নগৰদ্ৱাৰকৱাটে লগ্গেত্ৱা নিপজ্জিতুং জেতৱনং অগমাসি. ৰাজা পন সিৰিসযনে ৱাসূপগতো মজ্ঝিমযামে স-ইতি ন-ইতি দু-ইতি সো-ইতি চ ইমানি চত্তাৰি অক্খৰানি মহতা কণ্ঠেন উচ্চাৰিতানি ৱিয ৱিস্সৰৱসেন অস্সোসি. তানি কিৰ অতীতে কালে সাৱত্থিৱাসীহি চতূহি সেট্ঠিপুত্তেহি ভোগমদমত্তেহি যোব্বনকালে পাৰদাৰিককম্মৱসেন বহুং অপুঞ্ঞং পসৱেত্ৱা অপৰভাগে কালং কত্ৱা তস্সেৱ নগৰস্স সমীপে লোহকুম্ভিযং নিব্বত্তিত্ৱা পচ্চমানেহি লোহকুম্ভিযা মুখৱট্টিং পত্ৱা একেকং গাথং ৱত্থুকামেহি উচ্চাৰিতানং তাসং গাথানং আদিঅক্খৰানি, তে পঠমক্খৰমেৱ ৱত্ৱা ৱেদনাপ্পত্তা হুত্ৱা লোহকুম্ভিং ওতৰিংসু.

ৰাজা পন তং সদ্দং সুত্ৱা ভীততসিতো সংৱিগ্গো লোমহট্ঠজাতো তং ৰত্তাৱসেসং দুক্খেন ৱীতিনামেত্ৱা ৱিভাতায ৰত্তিযা পুৰোহিতং পক্কোসাপেত্ৱা তং পৱত্তিং কথেসি. পুৰোহিতো ৰাজানং ভীততসিতং ঞত্ৱা লাভগিদ্ধো ‘‘উপ্পন্নো খো অযং ময্হং ব্ৰাহ্মণানঞ্চ লাভুপ্পাদনুপাযো’’তি চিন্তেত্ৱা ‘‘মহাৰাজ, মহা ৱতাযং উপদ্দৱো উপ্পন্নো, সব্বচতুক্কং যঞ্ঞং যজাহী’’তি আহ. ৰাজা তস্স ৱচনং সুত্ৱা অমচ্চে আণাপেসি ‘‘সব্বচতুক্কযঞ্ঞস্স উপকৰণানি সজ্জেথা’’তি. তং সুত্ৱা মল্লিকা দেৱী ৰাজানং এৱমাহ – ‘‘কস্মা, মহাৰাজ, ব্ৰাহ্মণস্স ৱচনং সুত্ৱা অনেকপাণৱধহিংসনককিচ্চং কাতুকামোসি, ননু সব্বত্থ অপ্পটিহতঞাণচাৰো ভগৱা পুচ্ছিতব্বো? যথা চ তে ভগৱা ব্যাকৰিস্সতি, তথা পটিপজ্জিতব্ব’’ন্তি. ৰাজা তস্সা ৱচনং সুত্ৱা সত্থু সন্তিকং গন্ত্ৱা তং পৱত্তিং ভগৱতো আৰোচেসি. ভগৱা ‘‘ন, মহাৰাজ, ততোনিদানং তুয্হং কোচি অন্তৰাযো’’তি ৱত্ৱা আদিতো পট্ঠায তেসং লোহকুম্ভিনিৰযে নিব্বত্তসত্তানং পৱত্তিং কথেত্ৱা তেহি পচ্চেকং উচ্চাৰেতুং আৰদ্ধগাথাযো –

৮০২. ‘‘সট্ঠিৱস্সসহস্সানি, পৰিপুণ্ণানি সব্বসো;

নিৰযে পচ্চমানানং, কদা অন্তো ভৱিস্সতি.

৮০৩. ‘‘নত্থি অন্তো কুতো অন্তো, ন অন্তো পটিদিস্সতি;

তথা হি পকতং পাপং, তুয্হং ময্হঞ্চ মাৰিসা.

৮০৪. ‘‘দুজ্জীৱিতমজীৱিম্হ, যে সন্তে ন দদম্হসে;

সন্তেসু দেয্যধম্মেসু, দীপং নাকম্হ অত্তনো.

৮০৫. ‘‘সোহং নূন ইতো গন্ত্ৱা, যোনিং লদ্ধান মানুসিং;

ৱদঞ্ঞূ সীলসম্পন্নো, কাহামি কুসলং বহু’’ন্তি. –

পৰিপুণ্ণং কত্ৱা কথেসি.

৮০২. তত্থ সট্ঠিৱস্সসহস্সানীতি ৱস্সানং সট্ঠিসহস্সানি. তস্মিং কিৰ লোহকুম্ভিনিৰযে নিব্বত্তসত্তো অধো ওগচ্ছন্তো তিংসায ৱস্সসহস্সেহি হেট্ঠিমতলং পাপুণাতি, ততো উদ্ধং উগ্গচ্ছন্তোপি তিংসায এৱ ৱস্সসহস্সেহি মুখৱট্টিপদেসং পাপুণাতি, তায সঞ্ঞায সো ‘‘সট্ঠিৱস্সসহস্সানি, পৰিপুণ্ণানি সব্বসো’’তি গাথং ৱত্তুকামো স-ইতি ৱত্ৱা অধিমত্তৱেদনাপ্পত্তো হুত্ৱা অধোমুখো পতি. ভগৱা পন তং ৰঞ্ঞো পৰিপুণ্ণং কত্ৱা কথেসি. এস নযো সেসগাথাসুপি. তত্থ কদা অন্তো ভৱিস্সতীতি লোহকুম্ভিনিৰযে পচ্চমানানং অম্হাকং কদা নু খো ইমস্স দুক্খস্স অন্তো পৰিযোসানং ভৱিস্সতি.

৮০৩. তথা হীতি যথা তুয্হং ময্হঞ্চ ইমস্স দুক্খস্স নত্থি অন্তো, ন অন্তো পটিদিস্সতি, তথা তেন পকাৰেন পাপকং কম্মং পকতং তযা মযা চাতি ৱিভত্তিং ৱিপৰিণামেত্ৱা ৱত্তব্বং.

৮০৪. দুজ্জীৱিতন্তি ৱিঞ্ঞূহি গৰহিতব্বং জীৱিতং. যে সন্তেতি যে মযং সন্তে ৱিজ্জমানে দেয্যধম্মে. ন দদম্হসেতি ন অদম্হ. ৱুত্তমেৱত্থং পাকটতৰং কাতুং ‘‘সন্তেসু দেয্যধম্মেসু, দীপং নাকম্হ অত্তনো’’তি ৱুত্তং.

৮০৫. সোহন্তি সো অহং. নূনাতি পৰিৱিতক্কে নিপাতো. ইতোতি ইমস্মা লোহকুম্ভিনিৰযা. গন্ত্ৱাতি অপগন্ত্ৱা. যোনিং লদ্ধান মানুসিন্তি মনুস্সযোনিং মনুস্সত্তভাৱং লভিত্ৱা. ৱদঞ্ঞূতি পৰিচ্চাগসীলো, যাচকানং ৱা ৱচনঞ্ঞূ. সীলসম্পন্নোতি সীলাচাৰসম্পন্নো. কাহামি কুসলং বহুন্তি পুব্বে ৱিয পমাদং অনাপজ্জিত্ৱা বহুং পহূতং কুসলং পুঞ্ঞকম্মং কৰিস্সামি, উপচিনিস্সামীতি অত্থো.

সত্থা ইমা গাথাযো ৱত্ৱা ৱিত্থাৰেন ধম্মং দেসেসি, দেসনাপৰিযোসানে মত্তিকাৰত্তুপ্পলহাৰকো পুৰিসো সোতাপত্তিফলে পতিট্ঠহি. ৰাজা সঞ্জাতসংৱেগো পৰপৰিগ্গহে অভিজ্ঝং পহায সদাৰসন্তুট্ঠো অহোসীতি.

সেট্ঠিপুত্তপেতৱত্থুৱণ্ণনা নিট্ঠিতা.