১৪. ভোগসংহৰণপেতিৱত্থুৱণ্ণনা

মযং ভোগে সংহৰিম্হাতি ইদং ভোগসংহৰণপেতিৱত্থু. তস্স কা উপ্পত্তি? ভগৱতি ৱেড়ুৱনে ৱিহৰন্তে ৰাজগহে কিৰ চতস্সো ইত্থিযো মানকূটাদিৱসেন সপ্পিমধুতেলধঞ্ঞাদীহি ৱোহাৰং কত্ৱা অযোনিসো ভোগে সংহৰিত্ৱা জীৱন্তি. তা কাযস্স ভেদা পৰং মৰণা বহিনগৰে পৰিখাপিট্ঠে পেতিযো হুত্ৱা নিব্বত্তিংসু. তা ৰত্তিযং দুক্খাভিভূতা –

৮০১. ‘‘মযং ভোগে সংহৰিম্হা, সমেন ৱিসমেন চ;

তে অঞ্ঞে পৰিভুঞ্জন্তি, মযং দুক্খস্স ভাগিনী’’তি. –

ৱিপ্পলপন্তিযো ভেৰৱেন মহাসদ্দেন ৱিৰৱিংসু. মনুস্সা তং সুত্ৱা ভীততসিতা ৱিভাতায ৰত্তিযা বুদ্ধপ্পমুখস্স ভিক্খুসঙ্ঘস্স মহাদানং সজ্জেত্ৱা সত্থাৰং ভিক্খুসঙ্ঘঞ্চ নিমন্তেত্ৱা পণীতেন খাদনীযেন ভোজনীযেন পৰিৱিসিত্ৱা ভগৱন্তং ভুত্তাৱিং ওনীতপত্তপাণিং উপনিসীদিত্ৱা তং পৱত্তিং নিৱেদেসুং. ভগৱা ‘‘উপাসকা তেন ৱো সদ্দেন কোচি অন্তৰাযো নত্থি, চতস্সো পন পেতিযো দুক্খাভিভূতা অত্তনা দুক্কটং কম্মং কথেত্ৱা পৰিদেৱনৱসেন ৱিস্সৰেন ৱিৰৱন্তিযো –

‘‘মযং ভোগে সংহৰিম্হা, সমেন ৱিসমেন চ;

তে অঞ্ঞে পৰিভুঞ্জন্তি, মযং দুক্খস্স ভাগিনী’’তি. –

ইমং গাথমাহংসূতি অৱোচ.

তত্থ ভোগেতি পৰিভুঞ্জিতব্বট্ঠেন ‘‘ভোগা’’তি লদ্ধনামে ৱত্থাভৰণাদিকে ৱিত্তূপকৰণৱিসেসে. সংহৰিম্হাতি মচ্ছেৰমলেন পৰিযাদিন্নচিত্তা কস্সচি কিঞ্চি অদত্ৱা সঞ্চিনিম্হ. সমেন ৱিসমেন চাতি ঞাযেন চ অঞ্ঞাযেন চ, ঞাযপতিৰূপকেন ৱা অঞ্ঞাযেন তে ভোগে অম্হেহি সংহৰিতে ইদানি অঞ্ঞে পৰিভুঞ্জন্তি. মযং দুক্খস্স ভাগিনীতি মযং পন কস্সচিপি সুচৰিতস্স অকতত্তা দুচ্চৰিতস্স চ কতত্তা এতৰহি পেতযোনিপৰিযাপন্নস্স মহতো দুক্খস্স ভাগিনিযো ভৱাম, মহাদুক্খং অনুভৱামাতি অত্থো.

এৱং ভগৱা তাহি পেতীহি ৱুত্তং গাথং ৱত্ৱা তাসং পৱত্তিং কথেত্ৱা তং অট্ঠুপ্পত্তিং কত্ৱা সম্পত্তপৰিসায ধম্মং দেসেত্ৱা উপৰি সচ্চানি পকাসেসি, সচ্চপৰিযোসানে বহূ সোতাপত্তিফলাদীনি পাপুণিংসূতি.

ভোগসংহৰণপেতিৱত্থুৱণ্ণনা নিট্ঠিতা.