১৩. অক্খৰুক্খপেতৱত্থুৱণ্ণনা

যং দদাতি ন তং হোতীতি ইদং অক্খদাযকপেতৱত্থু. তস্স কা উপ্পত্তি? ভগৱতি সাৱত্থিযং ৱিহৰন্তে অঞ্ঞতৰো সাৱত্থিৱাসী উপাসকো সকটেহি ভণ্ডস্স পূৰেত্ৱা ৱণিজ্জায ৱিদেসং গন্ত্ৱা তত্থ অত্তনো ভণ্ডং ৱিক্কিণিত্ৱা পটিভণ্ডং সকটেসু আৰোপেত্ৱা সাৱত্থিং উদ্দিস্স মগ্গং পটিপজ্জি. তস্স মগ্গং গচ্ছন্তস্স অটৱিযং একস্স সকটস্স অক্খো ভিজ্জি. অথ অঞ্ঞতৰো পুৰিসো ৰুক্খগহণত্থং কুঠাৰিফৰসুং গাহাপেত্ৱা অত্তনো গামতো নিক্খমিত্ৱা অৰঞ্ঞে ৱিচৰন্তো তং ঠানং পত্ৱা তং উপাসকং অক্খভঞ্জনেন দোমনস্সপ্পত্তং দিস্ৱা ‘‘অযং ৱাণিজো অক্খভঞ্জনেন অটৱিযং কিলমতী’’তি অনুকম্পং উপাদায ৰুক্খদণ্ডং ছিন্দিত্ৱা দড়্হং অক্খং কত্ৱা সকটে যোজেত্ৱা অদাসি.

সো অপৰেন সমযেন কালং কত্ৱা তস্মিংযেৱ অটৱিপদেসে ভুম্মদেৱতা হুত্ৱা নিব্বত্তো. অত্তনো কম্মং পচ্চৱেক্খিত্ৱা ৰত্তিযং তস্স উপাসকস্স গেহং গন্ত্ৱা গেহদ্ৱাৰে ঠত্ৱা –

৮০০. ‘‘যং দদাতি ন তং হোতি, দেথেৱ দানং দত্ৱা উভযং তৰতি;

উভযং তেন দানেন গচ্ছতি, জাগৰথ মা পমজ্জথা’’তি. –

গাথমাহ. তত্থ যং দদাতি ন তং হোতীতি যং দেয্যধম্মং দাযকো দেতি, ন তদেৱ পৰলোকে তস্স দানস্স ফলভাৱেন হোতি, অথ খো অঞ্ঞং বহুং ইট্ঠং কন্তং ফলং হোতিযেৱ. তস্মা দেথেৱ দানন্তি যথা তথা দানং দেথ এৱ. তত্থ কাৰণমাহ ‘‘দত্ৱা উভযং তৰতী’’তি, দানং দত্ৱা দিট্ঠধম্মিকম্পি সম্পৰাযিকম্পি দুক্খং অনত্থঞ্চ অতিক্কমতি. উভযং তেন দানেন গচ্ছতীতি দিট্ঠধম্মিকং সম্পৰাযিকঞ্চাতি উভযম্পি সুখং তেন দানেন উপগচ্ছতি পাপুণাতি, অত্তনো পৰেসঞ্চ হিতসুখৱসেনাপি অযমত্থো যোজেতব্বো. জাগৰথ মা পমজ্জথাতি এৱং উভযানত্থনিৱাৰণং উভযহিতসাধনং দানং সম্পাদেতুং জাগৰথ, দানূপকৰণানি সজ্জেত্ৱা তত্থ চ অপ্পমত্তা হোথাতি অত্থো. আদৰদস্সনত্থং চেত্থ আমেডিতৱসেন ৱুত্তং.

ৱাণিজো অত্তনো কিচ্চং তীৰেত্ৱা পটিনিৱত্তিত্ৱা অনুক্কমেন সাৱত্থিং পত্ৱা দুতিযদিৱসে সত্থাৰং উপসঙ্কমিত্ৱা ৱন্দিত্ৱা একমন্তং নিসিন্নো তং পৱত্তিং ভগৱতো আৰোচেসি. সত্থা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

অক্খৰুক্খপেতৱত্থুৱণ্ণনা নিট্ঠিতা.