১২. অম্বৱনপেতৱত্থুৱণ্ণনা

অযঞ্চ তে পোক্খৰণী সুৰম্মাতি ইদং সত্থৰি সাৱত্থিযং ৱিহৰন্তে অম্বপেতং আৰব্ভ ৱুত্তং. সাৱত্থিযং কিৰ অঞ্ঞতৰো গহপতি পৰিক্খীণভোগো অহোসি. তস্স ভৰিযা কালমকাসি, একা ধীতাযেৱ হোতি. সো তং অত্তনো মিত্তস্স গেহে ঠপেত্ৱা ইণৱসেন গহিতেন কহাপণসতেন ভণ্ডং গহেত্ৱা সত্থেন সদ্ধিং ৱণিজ্জায গতো, ন চিৰেনেৱ মূলেন সহ উদযভূতানি পঞ্চ কহাপণসতানি লভিত্ৱা সত্থেন সহ পটিনিৱত্তি. অন্তৰামগ্গে চোৰা পৰিযুট্ঠায সত্থং পাপুণিংসু, সত্থিকা ইতো চিতো চ পলাযিংসু. সো পন গহপতি অঞ্ঞতৰস্মিং গচ্ছে কহাপণে নিক্খিপিত্ৱা অৱিদূৰে নিলীযি. চোৰা তং গহেত্ৱা জীৱিতা ৱোৰোপেসুং. সো ধনলোভেন তত্থেৱ পেতো হুত্ৱা নিব্বত্তি.

ৱাণিজা সাৱত্থিং গন্ত্ৱা তস্স ধীতুযা তং পৱত্তিং আৰোচেসুং. সা পিতু মৰণেন আজীৱিকাভযেন চ অতিৱিয সঞ্জাতদোমনস্সা বাড়্হং পৰিদেৱি. অথ নং সো পিতু সহাযো কুটুম্বিকো ‘‘যথা নাম কুলালভাজনং সব্বং ভেদনপৰিযন্তং, এৱমেৱ সত্তানং জীৱিতং ভেদনপৰিযন্তং. মৰণং নাম সব্বসাধাৰণং অপ্পটিকাৰঞ্চ, তস্মা মা ত্ৱং পিতৰি অতিবাড়্হং সোচি, মা পৰিদেৱি, অহং তে পিতা, ত্ৱং ময্হং ধীতা, অহং তৱ পিতু কিচ্চং কৰোমি, ত্ৱং পিতুনো গেহে ৱিয ইমস্মিং গেহে অৱিমনা অভিৰমস্সূ’’তি ৱত্ৱা সমস্সাসেসি. সা তস্স ৱচনেন পটিপ্পস্সদ্ধসোকা পিতৰি ৱিয তস্মিং সঞ্জাতগাৰৱবহুমানা অত্তনো কপণভাৱেন তস্স ৱেয্যাৱচ্চকাৰিনী হুত্ৱা ৱত্তমানা পিতৰং উদ্দিস্স মতকিচ্চং কাতুকামা যাগুং পচিত্ৱা মনোসিলাৱণ্ণানি সুপৰিপক্কানি মধুৰানি অম্বফলানি কংসপাতিযং ঠপেত্ৱা যাগুং অম্বফলানি চ দাসিযা গাহাপেত্ৱা ৱিহাৰং গন্ত্ৱা সত্থাৰং ৱন্দিত্ৱা এৱমাহ – ‘‘ভগৱা ময্হং দক্খিণায পটিগ্গহণেন অনুগ্গহং কৰোথা’’তি. সত্থা মহাকৰুণায সঞ্চোদিতমানসো তস্সা মনোৰথং পূৰেন্তো নিসজ্জাকাৰং দস্সেসি. সা হট্ঠতুট্ঠা পঞ্ঞত্তৱৰবুদ্ধাসনে অত্তনা উপনীতং সুৱিসুদ্ধৱত্থং অত্থৰিত্ৱা অদাসি, নিসীদি ভগৱা পঞ্ঞত্তে আসনে.

অথ সা ভগৱতো যাগুং উপনামেসি, পটিগ্গহেসি ভগৱা যাগুং. অথ সঙ্ঘং উদ্দিস্স ভিক্খূনম্পি যাগুং দত্ৱা পুন ধোতহত্থা অম্বফলানি ভগৱতো উপনামেসি, ভগৱা তানি পৰিভুঞ্জি. সা ভগৱন্তং ৱন্দিত্ৱা এৱমাহ – ‘‘যা মে, ভন্তে, পচ্চত্থৰণযাগুঅম্বফলদানৱসেন পৱত্তা দক্খিণা, সা মে পিতৰং পাপুণাতূ’’তি. ভগৱা ‘‘এৱং হোতূ’’তি ৱত্ৱা অনুমোদনং অকাসি. সা ভগৱন্তং ৱন্দিত্ৱা পদক্খিণং কত্ৱা পক্কামি. তায দক্খিণায সমুদ্দিট্ঠমত্তায সো পেতো অম্বৱনউয্যানৱিমানকপ্পৰুক্খপোক্খৰণিযো মহতিঞ্চ দিব্বসম্পত্তিং পটিলভি.

অথ তে ৱাণিজা অপৰেন সমযেন ৱণিজ্জায গচ্ছন্তা তমেৱ মগ্গং পটিপন্না পুব্বে ৱসিতট্ঠানে একৰত্তিং ৱাসং কপ্পেসুং. তে দিস্ৱা সো ৱিমানপেতো উয্যানৱিমানাদীহি সদ্ধিং তেসং অত্তানং দস্সেসি. তে ৱাণিজা তং দিস্ৱা তেন লদ্ধসম্পত্তিং পুচ্ছন্তা –

৭৯৬. ‘‘অযঞ্চ তে পোক্খৰণী সুৰম্মা, সমা সুতিত্থা চ মহোদকা চ;

সুপুপ্ফিতা ভমৰগণানুকিণ্ণা, কথং তযা লদ্ধা অযং মনুঞ্ঞা.

৭৯৭. ‘‘ইদঞ্চ তে অম্বৱনং সুৰম্মং, সব্বোতুকং ধাৰযতে ফলানি;

সুপুপ্ফিতং ভমৰগণানুকিণ্ণং, কথং তযা লদ্ধমিদং ৱিমান’’ন্তি. –

ইমা দ্ৱে গাথা অৱোচুং.

৭৯৬. তত্থ সুৰম্মাতি সুট্ঠু ৰমণীযা. সমাতি সমতলা. সুতিত্থাতি ৰতনমযসোপানতায সুন্দৰতিত্থা. মহোদকাতি বহুজলা.

৭৯৭. সব্বোতুকন্তি পুপ্ফূপগফলূপগৰুক্খাদীহি সব্বেসু উতূসু সুখাৱহং. তেনাহ ‘‘ধাৰযতে ফলানী’’তি. সুপুপ্ফিতন্তি নিচ্চং সুপুপ্ফিতং.

তং সুত্ৱা পেতো পোক্খৰণিআদীনং পটিলাভকাৰণং আচিক্খন্তো –

৭৯৮. ‘‘অম্বপক্কং দকং যাগু, সীতচ্ছাযা মনোৰমা;

ধীতায দিন্নদানেন, তেন মে ইধ লব্ভতী’’তি. –

গাথমাহ. তত্থ তেন মে ইধ লব্ভতীতি যং তং ভগৱতো ভিক্খূনঞ্চ অম্বপক্কং উদকং যাগুঞ্চ মমং উদ্দিস্স দেন্তিযা ময্হং ধীতায দিন্নং দানং, তেন মে ধীতায দিন্নদানেন ইধ ইমস্মিং দিব্বে অম্বৱনে সব্বোতুকং অম্বপক্কং, ইমিস্সা দিব্বায মনুঞ্ঞায পোক্খৰণিযা দিব্বং উদকং, যাগুযা অত্থৰণস্স চ দানেন উয্যানৱিমানকপ্পৰুক্খাদীসু সীতচ্ছাযা মনোৰমা ইধ লব্ভতি, সমিজ্ঝতীতি অত্থো.

এৱঞ্চ পন ৱত্ৱা সো পেতো তে ৱাণিজে নেত্ৱা তানি পঞ্চ কহাপণসতানি দস্সেত্ৱা ‘‘ইতো উপড্ঢং তুম্হে গণ্হথ, উপড্ঢং মযা গহিতং ইণং সোধেত্ৱা সুখেন জীৱতূতি ময্হং ধীতায দেথা’’তি আহ. ৱাণিজা অনুক্কমেন সাৱত্থিং পত্ৱা তস্স ধীতায কথেত্ৱা তেন অত্তনো দিন্নভাগম্পি তস্সা এৱ অদংসু. সা কহাপণসতং ধনিকানং দত্ৱা ইতৰং অত্তনো পিতু সহাযস্স তস্স কুটুম্বিকস্স দত্ৱা সযং ৱেয্যাৱচ্চং কৰোন্তি নিৱসতি. সো ‘‘ইদং সব্বং তুয্হংযেৱ হোতূ’’তি তস্সাযেৱ পটিদত্ৱা তং অত্তনো জেট্ঠপুত্তস্স ঘৰসামিনিং অকাসি.

সা গচ্ছন্তে কালে একং পুত্তং লভিত্ৱা তং উপলালেন্তী –

৭৯৯. ‘‘সন্দিট্ঠিকং কম্মং এৱং পস্সথ, দানস্স দমস্স সংযমস্স ৱিপাকং;

দাসী অহং অয্যকুলেসু হুত্ৱা, সুণিসা হোমি অগাৰস্স ইস্সৰা’’তি. –

ইমং গাথং ৱদতি.

অথেকদিৱসং সত্থা তস্সা ঞাণপৰিপাকং ওলোকেত্ৱা ওভাসং ফৰিত্ৱা সম্মুখে ঠিতো ৱিয অত্তানং দস্সেত্ৱা –

‘‘অসাতং সাতৰূপেন, পিযৰূপেন অপ্পিযং;

দুক্খং সুখস্স ৰূপেন, পমত্তং অতিৱত্ততী’’তি. (উদা. ১৮; জা. ১.১.১০০) –

ইমং গাথমাহ. সা গাথাপৰিযোসানে সোতাপত্তিফলে পতিট্ঠিতা. সা দুতিযদিৱসে বুদ্ধপ্পমুখস্স ভিক্খুসঙ্ঘস্স দানং দত্ৱা তং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

অম্বৱনপেতৱত্থুৱণ্ণনা নিট্ঠিতা.