১০. গণপেতৱত্থুৱণ্ণনা

নগ্গা দুব্বণ্ণৰূপাত্থাতি ইদং সত্থৰি জেতৱনে ৱিহৰন্তে সম্বহুলে পেতে আৰব্ভ ৱুত্তং. সাৱত্থিযং কিৰ সম্বহুলা মনুস্সা গণভূতা অস্সদ্ধা অপ্পসন্না মচ্ছেৰমলপৰিযুট্ঠিতচিত্তা দানাদিসুচৰিতৱিমুখা হুত্ৱা চিৰং জীৱিত্ৱা কাযস্স ভেদা নগৰস্স সমীপে পেতযোনিযং নিব্বত্তিংসু. অথেকদিৱসং আযস্মা মহামোগ্গল্লানো সাৱত্থিযং পিণ্ডায গচ্ছন্তো অন্তৰামগ্গে পেতে দিস্ৱা –

৭৮২. ‘‘নগ্গা দুব্বণৰূপাত্থ, কিসা ধমনিসন্থতা;

উপ্ফাসুলিকা কিসিকা, কে নু তুম্হেত্থ মাৰিসা’’তি. –

গাথায পুচ্ছি. তত্থ দুব্বণ্ণৰূপাত্থাতি দুব্বণ্ণসৰীৰা হোথ. কে নু তুম্হেত্থাতি তুম্হে কে নু নাম ভৱথ. মাৰিসাতি তে অত্তনো সাৰুপ্পৱসেন আলপতি.

তং সুত্ৱা পেতা –

৭৮৩. ‘‘মযং ভদন্তে পেতম্হা, দুগ্গতা যমলোকিকা;

পাপকম্মং কৰিত্ৱান, পেতলোকং ইতো গতা’’তি. –

গাথায অত্তনো পেতভাৱং পকাসেত্ৱা পুন থেৰেন –

৭৮৪. ‘‘কিং নু কাযেন ৱাচায, মনসা দুক্কটং কতং;

কিস্সকম্মৱিপাকেন, পেতলোকং ইতো গতা’’তি. –

গাথায কতকম্মং পুচ্ছিতা –

৭৮৫. ‘‘অনাৱটেসু তিত্থেসু, ৱিচিনিম্হদ্ধমাসকং;

সন্তেসু দেয্যধম্মেসু, দীপং নাকম্হ অত্তনো.

৭৮৬. ‘‘নদিং উপেম তসিতা, ৰিত্তকা পৰিৱত্ততি;

ছাযং উপেম উণ্হেসু, আতপো পৰিৱত্ততি.

৭৮৭. ‘‘অগ্গিৱণ্ণো চ নো ৱাতো, ডহন্তো উপৱাযতি;

এতঞ্চ ভন্তে অৰহাম, অঞ্ঞঞ্চ পাপকং ততো.

৭৮৮. ‘‘অপি যোজনানি গচ্ছাম, ছাতা আহাৰগেধিনো;

অলদ্ধাৱ নিৱত্তাম, অহো নো অপ্পপুঞ্ঞতা.

৭৮৯. ‘‘ছাতা পমুচ্ছিতা ভন্তা, ভূমিযং পটিসুম্ভিতা;

উত্তানা পটিকিৰাম, অৱকুজ্জা পতামসে.

৭৯০. ‘‘তে চ তত্থেৱ পতিতা, ভূমিযং পটিসুম্ভিতা;

উৰং সীসঞ্চ ঘট্টেম, অহো নো অপ্পপুঞ্ঞতা.

৭৯১. ‘‘এতঞ্চ ভন্তে অৰহাম, অঞ্ঞঞ্চ পাপকং ততো;

সন্তেসু দেয্যধম্মেসু, দীপং নাকম্হ অত্তনো.

৭৯২. ‘‘তে হি নূন ইতো গন্ত্ৱা, যোনিং লদ্ধান মানুসিং;

ৱদঞ্ঞূ সীলসম্পন্না, কাহাম কুসলং বহু’’ন্তি. –

অত্তনা কতকম্মং কথেসুং.

৭৮৮. তত্থ অপি যোজনানি গচ্ছামাতি অনেকানিপি যোজনানি গচ্ছাম. কথং? ছাতা আহাৰগেধিনোতি, চিৰকালং জিঘচ্ছায জিঘচ্ছিতা আহাৰে গিদ্ধা অভিগিজ্ঝন্তা হুত্ৱা, এৱং গন্ত্ৱাপি কিঞ্চি আহাৰং অলদ্ধাযেৱ নিৱত্তাম. অপ্পপুঞ্ঞতাতি অপুঞ্ঞতা অকতকল্যাণতা.

৭৮৯. উত্তানা পটিকিৰামাতি কদাচি উত্তানা হুত্ৱা ৱিকিৰিযমানঙ্গপচ্চঙ্গা ৱিয ৱত্তাম. অৱকুজ্জা পতামসেতি কদাচি অৱকুজ্জা হুত্ৱা পতাম.

৭৯০. তে চাতি তে মযং. উৰং সীসঞ্চ ঘট্টেমাতি অৱকুজ্জা হুত্ৱা পতিতা উট্ঠাতুং অসক্কোন্তা ৱেধন্তা ৱেদনাপ্পত্তা অত্তনো অত্তনো উৰং সীসঞ্চ পটিঘংসাম. সেসং হেট্ঠা ৱুত্তনযমেৱ.

থেৰো তং পৱত্তিং ভগৱতো আৰোচেসি. ভগৱা তমত্থং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. তং সুত্ৱা মহাজনো মচ্ছেৰমলং পহায দানাদিসুচৰিতনিৰতো অহোসীতি.

গণপেতৱত্থুৱণ্ণনা নিট্ঠিতা.