১০. ৱেৱচনহাৰসম্পাতৱণ্ণনা

৭২. ‘‘মানসং হদযং পণ্ডৰং ৱিঞ্ঞাণং ৱিঞ্ঞাণক্খন্ধো মনোৱিঞ্ঞাণধাতূ’’তি (ধ. স. ৬) চ চিত্তস্স ৱেৱচনং. ‘‘তক্কো ৱিতক্কো সঙ্কপ্পো অপ্পনা ব্যপ্পনা চেতসো অভিনিৰোপনা’’তি চ সম্মাসঙ্কপ্পস্স. ‘‘পঞ্ঞা পজাননা ৱিচযো পৱিচযো’’তিআদিনা (ধ. স. ১৬) সম্মাদিট্ঠিযা. ‘‘থিনং থিযনা থিযিতত্তং চিত্তস্স অকল্লতা অকম্মঞ্ঞতা ওনাহো পৰিনাহো অন্তোসঙ্কোচো’’তি থিনস্স. ‘‘অকল্লতা অকম্মঞ্ঞতা কাযালসিযং সুপ্যং সুপ্যনা সুপিতত্ত’’ন্তি (ধ. স. ১১৬৩) মিদ্ধস্স. ‘‘ভিক্খকো ভিক্খূ’’তিআদিনা (পাৰা. ৪৫) ভিক্খুপদস্স. ‘‘দুগ্গতি অপাযো ৱিনিপাতো ৱট্টদুক্খং সংসাৰো’’তিআদিনা দুগ্গতিযা ৱেৱচনং ৱেদিতব্বং.

ৱেৱচনহাৰসম্পাতৱণ্ণনা নিট্ঠিতা.