৮. ৱিভত্তিহাৰসম্পাতৱণ্ণনা

৭০. কুসলপক্খো কুসলপক্খেন নিদ্দিসিতব্বোতি ৰক্খিতচিত্তস্সাতি সতিসংৱৰো, সো ছব্বিধো দ্ৱাৰৱসেন চক্খুদ্ৱাৰসংৱৰো যাৱ মনোদ্ৱাৰসংৱৰোতি. সম্মাসঙ্কপ্পো তিৱিধো – নেক্খম্মসঙ্কপ্পো, অব্যাপাদসঙ্কপ্পো, অৱিহিংসাসঙ্কপ্পোতি. সম্মাদিট্ঠি অট্ঠৱিধা দুক্খে ঞাণং…পে… ইদপ্পচ্চযতাপটিচ্চসমুপ্পন্নেসু ধম্মেসু ঞাণন্তি. উদযব্বযঞাণং পঞ্ঞাসৱিধং অৱিজ্জাসমুদযা ৰূপসমুদযো…পে… ৱিপৰিণামলক্খণং পস্সন্তোপি ৱিঞ্ঞাণক্খন্ধস্স ৱযং পস্সতি. থিনমিদ্ধাভিভৱনং চতুব্বিধং চতুমগ্গৱসেন. তত্থ সতিসংৱৰো লোকিযলোকুত্তৰৱসেন দুৱিধো. তেসু লোকিযো কামাৱচৰোৱ, লোকুত্তৰো দস্সনভাৱনাভেদতো দুৱিধো. একমেকো চেত্থ চতুসতিপট্ঠানভেদতো চতুব্বিধো. এস নযো সম্মাসঙ্কপ্পাদীসুপি.

অযং পন ৱিসেসো – সম্মাসঙ্কপ্পো পঠমজ্ঝানৱসেন ৰূপাৱচৰোতিপি নীহৰিতব্বো. পদট্ঠানৱিভাগো পদট্ঠানহাৰসম্পাতে ৱুত্তনযেন ৱত্তব্বো. অকুসলপক্খে অসংৱৰো চক্খুঅসংৱৰো…পে… কাযঅসংৱৰো, চোপনকাযঅসংৱৰো, ৱাচাঅসংৱৰো, মনোঅসংৱৰোতি অট্ঠৱিধো. মিচ্ছাসঙ্কপ্পো কামৱিতক্কাদিৱসেন তিৱিধো. অঞ্ঞাণং ‘‘দুক্খে অঞ্ঞাণ’’ন্তিআদিনা অট্ঠৱিধা ৱিভত্তং. সম্মাদিট্ঠিপটিপক্খতো মিচ্ছাদিট্ঠি দ্ৱাসট্ঠিৱিধেন ৱেদিতব্বা. থিনমিদ্ধং উপ্পত্তিভূমিতো পঞ্চৱিধন্তি এৱং অকুসলপক্খে ৱিভত্তি ৱেদিতব্বা.

ৱিভত্তিহাৰসম্পাতৱণ্ণনা নিট্ঠিতা.