৯. তোদেয্যমাণৱসুত্তনিদ্দেসৱণ্ণনা

৫৭. নৱমে তোদেয্যসুত্তে – ৱিমোক্খো তস্স কীদিসোতি তস্স কীদিসো ৱিমোক্খো ইচ্ছিতব্বোতি পুচ্ছতি.

৫৮. ইদানিস্স অঞ্ঞৱিমোক্খাভাৱং দস্সেন্তো ভগৱা দুতিযং গাথমাহ. তত্থ ৱিমোক্খো তস্স নাপৰোতি তস্স অঞ্ঞো ৱিমোক্খো নত্থি.

৫৯. এৱং ‘‘তণ্হক্খযো এৱ ৱিমোক্খো’’তি ৱুত্তেপি তমত্থং অসল্লক্খেন্তো ‘‘নিৰাসসো সো উদ আসসানো’’তি পুন পুচ্ছতি. তত্থ উদ পঞ্ঞকপ্পীতি উদাহু সমাপত্তিঞাণাদিনা ঞাণেন তণ্হাকপ্পং ৱা দিট্ঠিকপ্পং ৱা কপ্পযতি.

৬০. অথস্স ভগৱা তং আচিক্খন্তো চতুত্থং গাথমাহ. তত্থ কামভৱেতি কামে চ ভৱে চ.

ৰূপে নাসীসতীতি চতুসমুট্ঠানিকে ৰূপাৰম্মণে ছন্দৰাগৱসেন ন পত্থেতি. সদ্ধাদীসুপি এসেৱ নযো. পলিবোধট্ঠেন ৰাগো এৱ কিঞ্চনং ৰাগকিঞ্চনং মদনট্ঠেন ৱা. দোসকিঞ্চনাদীসুপি এসেৱ নযো. সেসং সব্বত্থ পাকটমেৱ.

এৱং ভগৱা ইদম্পি সুত্তং অৰহত্তনিকূটেনেৱ দেসেসি, দেসনাপৰিযোসানে চ পুব্বসদিসো এৱ ধম্মাভিসমযো অহোসীতি.

সদ্ধম্মপ্পজ্জোতিকায চূড়নিদ্দেস-অট্ঠকথায

তোদেয্যমাণৱসুত্তনিদ্দেসৱণ্ণনা নিট্ঠিতা.