১৬. পিঙ্গিযমাণৱসুত্তনিদ্দেসৱণ্ণনা

৮৯. সোড়সমে পিঙ্গিযসুত্তনিদ্দেসে – জিণ্ণোহমস্মি অবলো ৱীতৱণ্ণোতি সো কিৰ ব্ৰাহ্মণো জৰাভিভূতো ৱীসৱস্সসতিকো জাতিযা, দুব্বলো চ ‘‘ইধ পাদং কৰিস্সামী’’তি অঞ্ঞত্ৰেৱ কৰোতি, ৱিনট্ঠপুৰিমছৱিৱণ্ণো চ. তেনাহ – ‘‘জিণ্ণোহমস্মি অবলো ৱীতৱণ্ণো’’তি. মাহং নস্সং মোমুহো অন্তৰাৱাতি মাহং তুয্হং ধম্মং অসচ্ছিকত্ৱা অন্তৰা এৱ অৱিদ্ৱা হুত্ৱা অনস্সিং. জাতিজৰায ইধ ৱিপ্পহানন্তি ইধেৱ তৱ পাদমূলে পাসাণকে চেতিযে ৱা জাতিজৰায ৱিপ্পহানং নিব্বানং ধম্মৰসং অহং ৱিজঞ্ঞং, তং মে আচিক্খ.

অবলোতি বলৱিৰহিতো. দুব্বলোতি দুব্বলবলো. অপ্পবলোতি পৰিত্তবলো. অপ্পথামোতি পৰিত্তৱীৰিযো. ৱীতৱণ্ণোতি পৰিৱত্তিতছৱিৱণ্ণো. ৱিগতৱণ্ণোতি অপগতছৱিৱণ্ণো. ৱিগচ্ছিতৱণ্ণোতি দূৰীভূতছৱিৱণ্ণো. যা সা পুৰিমা সুভা ৱণ্ণনিভাতি যা সা সুভা সুন্দৰা পুৰিমকালে সতি, সা ৱণ্ণনিভা এতৰহি অন্তৰহিতা ৱিগতা. আদীনৱো পাতুভূতোতি উপদ্দৱো পাতুৰহোসি. ‘‘যা সা পুৰিমা সুভা ৱণ্ণনিভা’’তি পাঠং ঠপেত্ৱা ‘‘যা সুভা অস্সা’’তি একে ৱণ্ণযন্তি.

অসুদ্ধাতি পটলাদীহি অসুদ্ধা. অৱিসুদ্ধাতি তিমিৰাদীহি অৱিসুদ্ধা. অপৰিসুদ্ধাতি সমন্ততো ফোটপটলাদীহি পৰিযোনদ্ধত্তা অপৰিসুদ্ধা. অৱোদাতাতি নপ্পসন্না পসন্নসদিসা. নো তথা চক্খুনা ৰূপে পস্সামীতি যথা পোৰাণচক্খুনা ৰূপাৰম্মণং পস্সামি ওলোকেমি, তথা তেন পকাৰেন ইদানি ন পস্সামি. সোতং অসুদ্ধন্তিআদীসুপি এসেৱ নযো. মাহং নস্সন্তি অহং মা ৱিনস্সং.

৯০. ইদানি যস্মা পিঙ্গিযো কাযে সাপেক্খতায ‘‘জিণ্ণোহমস্মী’’তিআদিমাহ. তেনস্স ভগৱা কাযে সিনেহপ্পহানত্থং ‘‘দিস্ৱান ৰূপেসু ৱিহঞ্ঞমানে’’তি গাথমাহ. তত্থ ৰূপেসূতি ৰূপহেতু ৰূপপচ্চযা. ৱিহঞ্ঞমানেতি কম্মকাৰণাদীহি উপহঞ্ঞমানে. ৰুপ্পন্তি ৰূপেসূতি চক্খুৰোগাদীহি চ ৰূপহেতুযেৱ জনা ৰুপ্পন্তি বাধিযন্তি.

হঞ্ঞন্তীতি ঘটীযন্তি. ৱিহঞ্ঞন্তীতি ৱিহেসিযন্তি. উপৱিহঞ্ঞন্তীতি হত্থপাদচ্ছেদাদিং লভন্তি. উপঘাতিযন্তীতি মৰণং লভন্তি. কুপ্পন্তীতি পৰিৱত্তন্তি. পীড়যন্তীতি ৱিঘাতং আপজ্জন্তি. ঘট্টযন্তীতি ঘট্টনং পাপুণন্তি. ব্যাধিতাতি ভীতা. দোমনস্সিতাতি চিত্তৱিঘাতং পত্তা. ৱেমানেতি নস্সমানে.

৯১. এৱং ভগৱতা যাৱ অৰহত্তং, তাৱ কথিতং পটিপত্তিং সুত্ৱা পিঙ্গিযো জৰাদুব্বলতায ৱিসেসং অনধিগন্ত্ৱা চ পুন ‘‘দিসা চতস্সো’’তি ইমায গাথায ভগৱন্তং থোমেন্তো দেসনং যাচতি.

৯২. অথস্স ভগৱা পুনপি যাৱ অৰহত্তং, তাৱ পটিপদং দস্সেন্তো ‘‘তণ্হাধিপন্নে’’তি গাথমাহ.

তণ্হাধিপন্নেতি তণ্হায ৱিমুচ্চিত্ৱা ঠিতে. তণ্হানুগেতি তণ্হায সহ গচ্ছন্তে. তণ্হানুগতেতি তণ্হায অনুবন্ধন্তে. তণ্হানুসটেতি তণ্হায সহ ধাৱন্তে. তণ্হায পন্নেতি তণ্হায নিমুগ্গে. পটিপন্নেতি তণ্হায অৱত্থটে. অভিভূতেতি মদ্দিতে. পৰিযাদিন্নচিত্তেতি পৰিযাদিযিত্ৱা গহিতকুসলচিত্তে.

সন্তাপজাতেতি সঞ্জাতচিত্তসন্তাপে. ঈতিজাতেতি ৰোগুপ্পন্নে. উপদ্দৱজাতেতি আদীনৱজাতে. উপসগ্গজাতেতি উপ্পন্নদুক্খজাতে.

ৱিৰজং ৱীতমলন্তি এত্থ ৱিৰজন্তি ৱিগতৰাগাদিৰজং. ৱীতমলন্তি ৱীতৰাগাদিমলং. ৰাগাদযো হি অজ্ঝোত্থৰণট্ঠেন ৰজো নাম, দূসট্ঠেন মলং নাম. ধম্মচক্খুন্তি কত্থচি পঠমমগ্গঞাণং, কত্থচি আদীনি তীণি মগ্গঞাণানি, কত্থচি চতুত্থমগ্গঞাণম্পি. ইধ পন জটিলসহস্সস্স চতুত্থমগ্গঞাণং. পিঙ্গিযস্স ততিযমগ্গঞাণমেৱ. যং কিঞ্চি সমুদযধম্মং, সব্বং তং নিৰোধধম্মন্তি ৱিপস্সনাৱসেন এৱং পৱত্তস্স ধম্মচক্খুং উদপাদীতি অত্থো. সেসং সব্বত্থ পাকটমেৱ.

এৱং ইদম্পি সুত্তং ভগৱা অৰহত্তনিকূটেনেৱ দেসেসি, দেসনাপৰিযোসানে চ পিঙ্গিযো অনাগামিফলে পতিট্ঠাসি. সো কিৰ অন্তৰন্তৰা চিন্তেসি – ‘‘এৱং ৱিচিত্ৰপটিভানং নাম দেসনং ন লভতি ময্হং মাতুলো বাৱৰী সৱনাযা’’তি. তেন সিনেহৱিক্খেপেন অৰহত্তং পাপুণিতুং নাসক্খি. অন্তেৱাসিকা পনস্স সহস্সজটিলা অৰহত্তং পাপুণিংসু. সব্বেৱ ইদ্ধিমযপত্তচীৱৰধৰা এহিভিক্খুনো অহেসুন্তি.

সদ্ধম্মপ্পজ্জোতিকায চূড়নিদ্দেস-অট্ঠকথায

পিঙ্গিযমাণৱসুত্তনিদ্দেসৱণ্ণনা নিট্ঠিতা.