১৫. পিযদস্সীবুদ্ধৱংসৱণ্ণনা

সুজাতস্স পন অপৰভাগে ইতো অট্ঠকপ্পসতাধিকসহস্সকপ্পমত্থকে একস্মিং কপ্পে পিযদস্সী, অত্থদস্সী, ধম্মদস্সীতি তযো বুদ্ধা নিব্বত্তিংসু. তত্থ পিযদস্সী নাম ভগৱা পাৰমিযো পূৰেত্ৱা তুসিতপুৰে নিব্বত্তিত্ৱা ততো চৱিত্ৱা সুধঞ্ঞৱতীনগৰে সুদত্তস্স নাম ৰঞ্ঞো অগ্গমহেসিযা চন্দসদিসৱদনায চন্দাদেৱিযা নাম কুচ্ছিস্মিং পটিসন্ধিং গহেত্ৱা দসন্নং মাসানং অচ্চযেন ৱৰুণুয্যানে মাতুকুচ্ছিতো নিক্খমি. তস্স পন নামগ্গহণদিৱসে লোকস্স পিযানং পাটিহাৰিযৱিসেসানং দস্সিতত্তা ‘‘পিযদস্সী’’ত্ৱেৱ নামমকংসু. সো নৱৱস্সসহস্সানি অগাৰং অজ্ঝাৱসি. তস্স কিৰ সুনিম্মলৱিমলগিৰিব্ৰহানামকা তযো পাসাদা অহেসুং. ৱিমলামহাদেৱিপ্পমুখানি তেত্তিংস ইত্থিসহস্সানি পচ্চুপট্ঠিতানি অহেসুং.

সো চত্তাৰি নিমিত্তানি দিস্ৱা ৱিমলাদেৱিযা কঞ্চনৱেড়ে নাম পুত্তে উপ্পন্নে আজঞ্ঞৰথেন মহাভিনিক্খমনং নিক্খমিত্ৱা পব্বজি. একা চ নং পুৰিসকোটি অনুপব্বজি. সো তেহি পৰিৱুতো মহাপুৰিসো ছ মাসে পধানচৰিযং চৰিত্ৱা ৱিসাখপুণ্ণমায ৱৰুণব্ৰাহ্মণগামে ৱসভব্ৰাহ্মণস্স ধীতায দিন্নং মধুপাযাসং পৰিভুঞ্জিত্ৱা সালৱনে দিৱাৱিহাৰং ৱীতিনামেত্ৱা সুজাতাজীৱকেন দিন্না অট্ঠ তিণমুট্ঠিযো গহেত্ৱা ককুধবোধিং উপসঙ্কমিত্ৱা তেপঞ্ঞাসহত্থৱিত্থতং তিণসন্থৰং সন্থৰিত্ৱা পল্লঙ্কং আভুজিত্ৱা সব্বঞ্ঞুতঞ্ঞাণং পটিৱিজ্ঝিত্ৱা ‘‘অনেকজাতিসংসাৰ’’ন্তি উদানং উদানেত্ৱা তত্থেৱ সত্তসত্তাহং ৱীতিনামেত্ৱা অত্তনা সহ পব্বজিতানং অৰিযধম্মপটিৱেধসমত্থতং ঞত্ৱা আকাসেন তত্থ গন্ত্ৱা উসভৱতীনগৰসমীপে উসভৱতুয্যানে ওতৰিত্ৱা ভিক্খুকোটিপৰিৱুতো ধম্মচক্কং পৱত্তেসি. তদা কোটিসতসহস্সানং ধম্মাভিসমযো অহোসি. অযং পঠমো অভিসমযো.

পুন উসভৱতিযা নাম নগৰস্স অৱিদূৰে সুদস্সনপব্বতে সুদস্সনো নাম দেৱৰাজা পটিৱসতি. সো মিচ্ছাদিট্ঠিকো অহোসি. সকলজম্বুদীপে পন মনুস্সা তস্স অনুসংৱচ্ছৰং সতসহস্সগ্ঘনিকং বলিং উপসংহৰন্তি. সো সুদস্সনো দেৱৰাজা নৰৰাজেন সদ্ধিং একাসনে নিসীদিত্ৱা বলিং সম্পটিচ্ছতি. অথ পিযদস্সী ভগৱা ‘‘তস্স সুদস্সনস্স দেৱৰাজস্স তং দিট্ঠিগতং ৱিনোদেস্সামী’’তি তস্মিং দেৱৰাজে যক্খসমাগমং গতে তস্স ভৱনং পৱিসিত্ৱা সিৰিসযনং আৰুহিত্ৱা ছব্বণ্ণৰংসিযো মুঞ্চন্তো যুগন্ধৰপব্বতে সৰদসমযে সূৰিযো ৱিয নিসীদি. তস্স পৰিৱাৰপৰিচাৰিকা দেৱতাযো মালাগন্ধৱিলেপনাদীহি দসবলং পূজেত্ৱা পৰিৱাৰেত্ৱা অট্ঠংসু.

সুদস্সনোপি দেৱৰাজা যক্খসমাগমতো আগচ্ছন্তো অত্তনো ভৱনতো ছব্বণ্ণৰস্মিযো নিচ্ছৰন্তে দিস্ৱা চিন্তেসি – ‘‘অঞ্ঞেসু পন দিৱসেসু মম ভৱনস্স এদিসী অনেকৰংসিজালসমুজ্জলৱিভূতি ন দিট্ঠপুব্বা. কো নু খো ইধ পৱিট্ঠো দেৱো ৱা মনুস্সো ৱা’’তি ওলোকেন্তো উদযগিৰিসিখৰমত্থকে সৰদসমযদিৱসকৰমিৱ ছব্বণ্ণৰংসিজালেন অভিজ্জলন্তং নিসিন্নং ভগৱন্তং দিস্ৱা চিন্তেসি – ‘‘অযং মুণ্ডকসমণো মম পৰিৱাৰেন পৰিজনেন পৰিৱুতো ৱৰসযনে নিসিন্নো’’তি কোধাভিভূতমানসো – ‘‘হন্দাহং ইমস্স অত্তনো বলং দস্সেস্সামী’’তি চিন্তেত্ৱা সকলং তং পব্বতং একজালমকাসি. ‘‘ইমিনা অগ্গিজালেন ছাৰিকাভূতো মুণ্ডকসমণো’’তি ওলোকেন্তো অনেকৰংসিজালৱিসৰৱিপ্ফুৰিতৱৰসৰীৰং পসন্নৱদনৱণ্ণসোভং ৱিপ্পসন্নচ্ছৱিৰাগং দসবলমভিজ্জলন্তং দিস্ৱা চিন্তেসি – ‘‘অযং সমণো অগ্গিদাহং সহতি, হন্দাহং ইমং সমণং উদকোঘেন ওসাদেত্ৱা মাৰেস্সামী’’তি অতিগম্ভীৰং উদকোঘং ৱিমানাভিমুখং পৱত্তেসি.

ততো উদকোঘেন পুণ্ণে তস্মিং ৱিমানে নিসিন্নস্স তস্স ভগৱতো চীৱৰে অংসুমত্তং ৱা সৰীৰে লোমমত্তং ৱা ন তেমিত্থ. ততো সুদস্সনো দেৱৰাজা – ‘‘ইমিনা সমণো নিৰস্সাসো মতো ভৱিস্সতী’’তি মন্ত্ৱা উদকং সঙ্খিপিত্ৱা ওলোকেন্তো ভগৱন্তং অসিতজলধৰৱিৱৰগতং সৰদসমযৰজনিকৰমিৱ ৱিৱিধৰংসিজালৱিসৰেন ৱিৰোচমানং সকপৰিসপৰিৱুতং নিসিন্নং দিস্ৱা অত্তনো মক্খং অসহমানো – ‘‘হন্দ মাৰেস্সামি ন’’ন্তি কোধেন নৱৱিধআৱুধৱস্সং ৱস্সেসি. অথস্স ভগৱতো আনুভাৱেন সব্বাৱুধানি নানাৱিধপৰমৰুচিৰদস্সনা সুৰভিকুসুমমালা হুত্ৱা দসবলস্স পাদমূলে নিপতিংসু.

ততো তং অচ্ছৰিযং দিস্ৱা সুদস্সনো দেৱৰাজা পৰমকুপিতমানসো ভগৱন্তং উভোহি হত্থেহি পাদেসু গহেত্ৱা অত্তনো ভৱনতো নীহৰিতুকামো উক্খিপিত্ৱা মহাসমুদ্দং অতিক্কমিত্ৱা চক্কৱাড়পব্বতং গন্ত্ৱা – ‘‘কিং নু খো সমণো জীৱতি ৱা মতো ৱা’’তি ওলোকেন্তো তস্মিংযেৱ আসনে নিসিন্নং দিস্ৱা – ‘‘অহো মহানুভাৱো অযং সমণো, নাহং ইমং সমণং ইতো নিক্কড্ঢিতুং সক্কোমি. যদি হি মং কোচি জানিস্সতি, অনপ্পকো মে অযসো ভৱিস্সতি. যাৱিমং কোচি ন পস্সতি, তাৱ নং ৱিস্সজ্জেত্ৱা গমিস্সামী’’তি চিন্তেসি.

অথ দসবলো তস্স চিত্তাচাৰং ঞত্ৱা তথা অধিট্ঠাসি, যথা নং সব্বে দেৱমনুস্সা পস্সন্তি. তস্মিঞ্চ দিৱসে সকলজম্বুদীপে একসতৰাজানো তস্সেৱ উপহাৰদানত্থায সন্নিপতিংসু. তে ভগৱতো পাদে গহেত্ৱা নিসিন্নং সুদস্সনং দেৱৰাজানং নৰৰাজানো দিস্ৱা – ‘‘অম্হাকং দেৱৰাজা মুনিৰাজস্স পিযদস্সিস্স সত্থুনো পাদপৰিচৰিযং কৰোতি, অহো বুদ্ধা নাম অচ্ছৰিযা, অহো বুদ্ধগুণা ৱিসিট্ঠা’’তি ভগৱতি, পসন্নচিত্তা সব্বে ভগৱন্তং নমস্সমানা সিৰস্মিং অঞ্জলিং কত্ৱা অট্ঠংসু. তত্থ পিযদস্সী ভগৱা তং সুদস্সনং দেৱৰাজানং পমুখং কত্ৱা ধম্মং দেসেসি. তদা দেৱমনুস্সানং নৱুতিকোটিসহস্সানি অৰহত্তং পাপুণিংসু. সো দুতিযো অভিসমযো অহোসি.

যদা পন নৱযোজনপ্পমাণে কুমুদনগৰে বুদ্ধপচ্চত্থিকো দেৱদত্তো ৱিয সোণত্থেৰো নাম মহাপদুমকুমাৰেন সদ্ধিং মন্তেত্ৱা তস্স পিতৰং ঘাতেত্ৱা পুন পিযদস্সীবুদ্ধস্স ৱধায নানপ্পকাৰং পযোগং কত্ৱাপি ঘাতেতুং অসক্কোন্তো সো দোণমুখনাগৰাজাৰোহং পক্কোসাপেত্ৱা তং পলোভেত্ৱা তমত্থং আৰোচেসি – ‘‘যদা পনাযং সমণো পিযদস্সী ইমং নগৰং পিণ্ডায পৱিসতি, তদা দোণমুখং নাম গজৱৰং ৱিস্সজ্জেত্ৱা পিযদস্সীসমণং মাৰেহী’’তি.

অথ সো আৰোহো হিতাহিতৱিচাৰণৰহিতো ৰাজৱল্লভো – ‘‘অযং সমণো ঠানন্তৰাপি মং চাৱেয্যা’’তি মন্ত্ৱা ‘‘সাধূ’’তি সম্পটিচ্ছিত্ৱা দুতিযদিৱসে দসবলস্স নগৰপ্পৱেসনসমযং সল্লক্খেত্ৱা সুজাতমত্থকপিণ্ডকুম্ভনলাটং ধনুসদিসদীঘসুণ্ডতটং সুৱিপুলমুদুকণ্ণং মধুপিঙ্গলনযনং সুন্দৰক্খন্ধাসনং অনুৱট্টঘনজঘনং নিচিতগূড়্হজাণুঅন্তৰং ঈসাসদিসৰুচিৰদন্তং সুৱালধিং অপচিতমেচকং সব্বলক্খণসম্পন্নং অসিতজলধৰসদিসচাৰুদস্সনং সীহৱিক্কন্তললিতগামিনং জঙ্গমমিৱ ধৰাধৰং সত্তপ্পতিট্ঠং সত্তধা পভিন্নং সব্বসো ৱিস্সৱন্তং ৱিগ্গহৱন্তমিৱ অন্তকং উপসঙ্কমিত্ৱা পিণ্ডকবড়ঞ্জনধূপলেপাদিৱিসেসেহি ভিয্যোপি মত্তপ্পমত্তং কত্ৱা অৰিৱাৰণৱাৰণং এৰাৱণৱাৰণমিৱ অৰিজনৱাৰণং মুনিৱাৰণং মাৰণত্থায পেসেসি. অথ সো দ্ৱিৰদৱৰো মুত্তমত্তোৱ গজমহিংসতুৰঙ্গনৰনাৰিযো হন্ত্ৱা হতৰুধিৰপৰিৰঞ্জিতসদন্তকৰসৰীৰো অন্তজালপৰিযোনদ্ধনযনো সকটকৱাটকূটাগাৰদ্ৱাৰতোৰণাদীনি ভঞ্জিত্ৱা কাক-কুলল-গিজ্ঝাদীহি অনুপৰিযাযমানো হতমহিংসনৰতুৰঙ্গদিৰদাদীনং অঙ্গানি আলুম্পিত্ৱা মনুস্সভক্খো যক্খো ৱিয ভক্খযন্তো দূৰতোৱ দসবলং সিস্সগণপৰিৱুতং আগচ্ছন্তং দিস্ৱা অনিলগৰুড়সদিসৱেগো ৱেগেন ভগৱন্তমভিগঞ্ছি.

অথ পুৰৱাসিনো পন জনা ভযসন্তাপপৰিপূৰিতমানসা পাসাদপাকাৰচযতৰূপগতা তথাগতাভিমুখমভিধাৱন্তং দিস্ৱা হাহাকাৰসদ্দমকংসু. কেচি পন উপাসকা তং নানপ্পকাৰেহি নযেহি নিৱাৰযিতুমাৰভিংসু. অথ সো বুদ্ধনাগো হত্থিনাগমাযন্তমোলোকেত্ৱা কৰুণাৱিপ্ফাৰসীতলহদযো মেত্তায তং ফৰি. ততো সো হত্থিনাগো মেত্তাফৰণেন মুদুকতহদযসন্তানো অত্তনো দোসাপৰাধং ঞত্ৱা লজ্জায ভগৱতো পুৰতো ঠাতুং অসক্কোন্তো পথৱিযং পৱিসন্তো ৱিয সিৰসা ভগৱতো পাদেসু নিপতি. এৱং নিপন্নো পন সো তিমিৰনিকৰসদিসসৰীৰো সঞ্ছাপ্পভানুৰঞ্জিতৱৰকনকগিৰিসিখৰসমীপমুপগতো অসিতসলিলধৰনিকৰো ৱিয ৱিৰোচিত্থ.

অথেৱং মুনিৰাজপাদমূলে কৰিৰাজানং সিৰসা নিপতন্তং দিস্ৱা নাগৰজনা পৰমপীতিপূৰিতহদযা সাধুকাৰসীহনাদং উক্কুট্ঠিসদ্দং পৱত্তযিংসু. সুৰভিকুসুমমালাচন্দনগন্ধচুণ্ণালঙ্কাৰাদীহি তং অনেকপ্পকাৰং পূজেসুং. সমন্ততো চেলুক্খেপা পৱত্তিংসু. গগনতলে সুৰদুন্দুভিযো অভিনদিংসু. অথ ভগৱা তমসিতগিৰিসিখৰমিৱ পাদমূলে নিপন্নং দিৰদৱৰং ওলোকেত্ৱা অঙ্কুসধজজালসঙ্খচক্কালঙ্কতেন কৰতলেন গজৱৰমত্থকং পৰামসিত্ৱা তস্স চিত্তাচাৰানুকূলায ধম্মদেসনায তং অনুসাসি –

‘‘গজৱৰ ৱদতো সুণোহি ৱাচং, মম হিতমত্থযুতঞ্চ তং ভজাহি;

তৱ ৱধনিৰতং পদুট্ঠভাৱং, অপনয সন্তমুপেহি চাৰুদন্তি.

‘‘লোভেন দোসেন চ মোহতো ৱা, যো পাণিনো হিংসতি ৱাৰণিন্দ;

সো পাণঘাতী সুচিৰম্পি কালং, দুক্খং সুঘোৰং নৰকেনুভোতি.

‘‘মাকাসি মাতঙ্গ পুনেৱৰূপং, কম্মং পমাদেন মদেন ৱাপি;

অৱীচিযং দুক্খমসয্হ কপ্পং, পপ্পোতি পাণং অতিপাতযন্তো.

‘‘দুক্খং সুঘোৰং নৰকেনুভোত্ৱা, মনুস্সলোকং যদি যাতি ভিয্যো;

অপ্পাযুকো হোতি ৱিৰূপৰূপো, ৱিহিংসকো দুক্খৱিসেসভাগী.

‘‘যথা চ পাণা পৰমং পিযা তে, মহাজনে কুঞ্জৰ মন্দনাগ;

তথা পৰস্সাপি পিযাতি ঞত্ৱা, পাণাতিপাতো পৰিৱজ্জনীযো.

‘‘দোসে চ হিংসানিৰতে ৱিদিত্ৱা, পাণাতিপাতা ৱিৰতে গুণে চ;

পাণাতিপাতং পৰিৱজ্জয ত্ৱং, সগ্গে সুখং ইচ্ছসি চে পৰত্থ.

‘‘পাণাতিপাতা ৱিৰতো সুদন্তো, পিযো মনাপো ভৱতীধ লোকে;

কাযস্স ভেদা চ পৰং পনস্স, সগ্গাধিৱাসং কথযন্তি বুদ্ধা.

‘‘দুক্খাগমং নিচ্ছতি কোচি লোকে, সব্বোপি জাতো সুখমেসতেৱ;

তস্মা মহানাগ ৱিহায হিংসং, ভাৱেহি মেত্তং কৰুণঞ্চ কালে’’তি.

অথেৱং দসবলেনানুসাসিযমানো দন্তিৱৰো সঞ্ঞং পটিলভিত্ৱা পৰমৱিনীতো ৱিনযাচাৰসম্পন্নো সিস্সো ৱিয অহোসি. এৱং সো পিযদস্সী ভগৱা অম্হাকং সত্থা ৱিয ধনপালং দোণমুখং কৰিৱৰং দমিত্ৱা তত্থ মহাজনসমাগমে ধম্মং দেসেসি. তদা অসীতিকোটিসহস্সানং ধম্মাভিসমযো অহোসি. অযং ততিযো অভিসমযো অহোসি. তেন ৱুত্তং –

১. ‘‘সুজাতস্স অপৰেন, সযম্ভূ লোকনাযকো;

দুৰাসদো অসমসমো, পিযদস্সী মহাযসো.

২. ‘‘সোপি বুদ্ধো অমিতযসো, আদিচ্চোৱ ৱিৰোচতি;

সব্বং তমং নিহন্ত্ৱান, ধম্মচক্কং পৱত্তযি.

৩. ‘‘তস্সাপি অতুলতেজস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. ‘‘সুদস্সনো দেৱৰাজা, মিচ্ছাদিট্ঠিমৰোচযি;

তস্স দিট্ঠিং ৱিনোদেন্তো, সত্থা ধম্মমদেসযি.

৫. ‘‘জনসন্নিপাতো অতুলো, মহাসন্নিপতী তদা;

নৱুতিকোটিসহস্সানং, দুতিযাভিসমযো অহু.

৬. ‘‘যদা দোণমুখং হত্থিং, ৱিনেসি নৰসাৰথি;

অসীতিকোটিসহস্সানং, ততিযাভিসমযো অহূ’’তি.

সুমঙ্গলনগৰে পালিতো নাম ৰাজপুত্তো চ পুৰোহিতপুত্তো সব্বদস্সিকুমাৰো চাতি দ্ৱে সহাযকা অহেসুং. তে পিযদস্সিম্হি সম্মাসম্বুদ্ধে চাৰিকং চৰন্তে ‘‘অত্তনো নগৰং সম্পত্তো’’তি সুত্ৱা কোটিসতসহস্সপৰিৱাৰা পচ্চুগ্গমনং কত্ৱা তস্স ধম্মং সুত্ৱা সত্তাহং মহাদানং দত্ৱা সত্তমে দিৱসে ভগৱতো ভত্তানুমোদনাৱসানে কোটিসতসহস্সেহি সদ্ধিং পব্বজিত্ৱা অৰহত্তং পাপুণিংসু. তেসং পন মজ্ঝে ভগৱা পাতিমোক্খং উদ্দিসি, সো পঠমো সন্নিপাতো অহোসি. অথাপৰেন সমযেন সুদস্সনদেৱৰাজস্স সমাগমে নৱুতিকোটিযো অৰহত্তং পাপুণিংসু. তেহি পৰিৱুতো সত্থা পাতিমোক্খং উদ্দিসি, অযং দুতিযো সন্নিপাতো অহোসি. পুন দোণমুখৱিনযনে অসীতিকোটিযো পব্বজিত্ৱা অৰহত্তং পাপুণিংসু. তেসং মজ্ঝে ভগৱা পাতিমোক্খং উদ্দিসি, অযং ততিযো সন্নিপাতো অহোসি. তেন ৱুত্তং –

৭. ‘‘সন্নিপাতা তযো আসুং, তস্সাপি পিযদস্সিনো;

কোটিসতসহস্সানং, পঠমো আসি সমাগমো.

৮. ‘‘ততো পৰং নৱুতিকোটী, সমিংসু একতো মুনী;

ততিযে সন্নিপাতম্হি, অসীতিকোটিযো অহূ’’তি.

তদা অম্হাকং বোধিসত্তো কস্সপো নাম ব্ৰাহ্মণমাণৱো ইতিহাসপঞ্চমানং তিণ্ণং ৱেদানং পাৰগূ হুত্ৱা সত্থু ধম্মদেসনং সুত্ৱা কোটিসতসহস্সপৰিচ্চাগেন পৰমাৰামং সঙ্ঘাৰামং কাৰেত্ৱা সৰণেসু চ পঞ্চসীলেসু চ পতিট্ঠাসি. অথ নং সত্থা – ‘‘ইতো অট্ঠাৰসকপ্পসতচ্চযেন গোতমো নাম বুদ্ধো লোকে ভৱিস্সতী’’তি ব্যাকাসি. তেন ৱুত্তং –

৯. ‘‘অহং তেন সমযেন, কস্সপো নাম ব্ৰাহ্মণো;

অজ্ঝাযকো মন্তধৰো, তিণ্ণং ৱেদান পাৰগূ.

১০. ‘‘তস্স ধম্মং সুণিত্ৱান, পসাদং জনযিং অহং;

কোটিসতসহস্সেহি, সঙ্ঘাৰামং অমাপযিং.

১১. ‘‘তস্স দত্ৱান আৰামং, হট্ঠো সংৱিগ্গমানসো;

সৰণে পঞ্চসীলে চ, দড়হং কত্ৱা সমাদিযিং.

১২. ‘‘সোপি মং বুদ্ধো ব্যাকাসি, সঙ্ঘমজ্ঝে নিসীদিয;

অট্ঠাৰসে কপ্পসতে, অযং বুদ্ধো ভৱিস্সতি.

১৩. ‘‘পধানং পদহিত্ৱান…পে… হেস্সাম সম্মুখা ইমং.

১৪. ‘‘তস্সাপি ৱচনং সুত্ৱা, ভিয্যো চিত্তং পসাদযিং;

উত্তৰিং ৱতমধিট্ঠাসিং, দসপাৰমিপূৰিযা’’তি.

তত্থ সৰণে পঞ্চসীলে চাতি তীণি সৰণানি পঞ্চ সীলানি চাতি অত্থো. অট্ঠাৰসে কপ্পসতেতি ইতো অট্ঠসতাধিকস্স কপ্পসহস্সস্স অচ্চযেনাতি অত্থো.

তস্স পন ভগৱতো সুধঞ্ঞং নাম নগৰং অহোসি. পিতা সুদত্তো নাম ৰাজা, মাতা সুচন্দা নাম দেৱী, পালিতো চ সব্বদস্সী চ দ্ৱে অগ্গসাৱকা, সোভিতো নামুপট্ঠাকো, সুজাতা চ ধম্মদিন্না চ দ্ৱে অগ্গসাৱিকা, ককুধৰুক্খো বোধি, সৰীৰং অসীতিহত্থুব্বেধং অহোসি, নৱুতিৱস্সসহস্সানি আযু, ৱিমলা নামস্স অগ্গমহেসী অহোসি, কঞ্চনাৱেড়ো নাম পুত্তো, সো আজঞ্ঞৰথেন নিক্খমীতি. তেন ৱুত্তং –

১৫. ‘‘সুধঞ্ঞং নাম নগৰং, সুদত্তো নাম খত্তিযো;

চন্দা নামাসি জনিকা, পিযদস্সিস্স সত্থুনো.

২০. ‘‘পালিতো সব্বদস্সী চ, অহেসুং অগ্গসাৱকা;

সোভিতো নামুপট্ঠাকো, পিযদস্সিস্স সত্থুনো.

২১. ‘‘সুজাতা ধম্মদিন্না চ, অহেসুং অগ্গসাৱিকা;

বোধি তস্স ভগৱতো, ককুধোতি পৱুচ্চতি.

২৩. ‘‘সোপি বুদ্ধো অমিতযসো, দ্ৱত্তিংসৱৰলক্খণো;

অসীতিহত্থমুব্বেধো, সালৰাজাৱ দিস্সতি.

২৪. ‘‘অগ্গিচন্দসূৰিযানং, নত্থি তাদিসিকা পভা;

যথা অহু পভা তস্স, অসমস্স মহেসিনো.

২৫. ‘‘তস্সাপি দেৱদেৱস্স, আযু তাৱতকং অহু;

নৱুতিৱস্সসহস্সানি, লোকে অট্ঠাসি চক্খুমা.

২৬. ‘‘সোপি বুদ্ধো অসমসমো, যুগানিপি তানি অতুলিযানি;

সব্বং তমন্তৰহিতং, ননু ৰিত্তা সব্বসঙ্খাৰা’’তি.

তত্থ সালৰাজা ৱাতি সব্বফালিফুল্লো পৰমৰমণীযদস্সনো সমৱট্টক্খন্ধো সালৰাজা ৱিয দিস্সতি. যুগানিপি তানীতি অগ্গসাৱকযুগাদীনি যুগড়ানি. সেসগাথাসু সব্বত্থ উত্তানমেৱাতি.

পিযদস্সীবুদ্ধৱংসৱণ্ণনা নিট্ঠিতা.

নিট্ঠিতো তেৰসমো বুদ্ধৱংসো.