সিখী বুদ্ধো

তস্স অপৰভাগে ইতো একত্তিংসকপ্পে সিখী চ ৱেস্সভূচাতি দ্ৱে বুদ্ধা অহেসুং. সিখিস্সাপি ভগৱতো তযো সাৱকসন্নিপাতা. পঠমসন্নিপাতে ভিক্খুসতসহস্সং অহোসি, দুতিযে অসীতিসহস্সানি, ততিযে সত্ততিসহস্সানি. তদা বোধিসত্তো অৰিন্দমো নাম ৰাজা হুত্ৱা বুদ্ধপ্পমুখস্স ভিক্খুসঙ্ঘস্স সচীৱৰং মহাদানং পৱত্তেত্ৱা সত্তৰতনপটিমণ্ডিতং হত্থিৰতনং দত্ৱা হত্থিপ্পমাণং কত্ৱা কপ্পিযভণ্ডং অদাসি. সোপি নং সত্থা ‘‘ইতো একত্তিংসকপ্পে বুদ্ধো ভৱিস্সতী’’তি ব্যাকাসি. তস্স পন ভগৱতো অৰুণৱতী নাম নগৰং অহোসি, অৰুণো নাম খত্তিযো পিতা, পভাৱতী নাম মাতা, অভিভূ চ সম্ভৱো চ দ্ৱে অগ্গসাৱকা, খেমঙ্কৰো নামুপট্ঠাকো, সখিলা চ পদুমা চ দ্ৱে অগ্গসাৱিকা, পুণ্ডৰীকৰুক্খো বোধি, সৰীৰং সত্ততিহত্থুব্বেধং অহোসি, সৰীৰপ্পভা যোজনত্তযং ফৰিত্ৱা অট্ঠাসি, সত্ততি ৱস্সসহস্সানি আযূতি.

‘‘ৱিপস্সিস্স অপৰেন, সম্বুদ্ধো দ্ৱিপদুত্তমো;

সিখিৱ্হযো আসি জিনো, অসমো অপ্পটিপুগ্গলো’’তি. (বু. ৱং. ২২.১);