পদুমো বুদ্ধো

তস্স অপৰভাগে পদুমো নাম সত্থা উদপাদি. তস্সাপি তযো সাৱকসন্নিপাতা. পঠমসন্নিপাতে কোটিসতসহস্সং ভিক্খূ অহেসুং, দুতিযে তীণি সতসহস্সানি, ততিযে অগামকে অৰঞ্ঞে মহাৱনসণ্ডৱাসীনং ভিক্খূনং দ্ৱে সতসহস্সানি. তদা বোধিসত্তো সীহো হুত্ৱা সত্থাৰং নিৰোধসমাপত্তিং সমাপন্নং দিস্ৱা পসন্নচিত্তো ৱন্দিত্ৱা পদক্খিণং কত্ৱা পীতিসোমনস্সজাতো তিক্খত্তুং সীহনাদং নদিত্ৱা সত্তাহং বুদ্ধাৰম্মণং পীতিং অৱিজহিত্ৱা পীতিসুখেনেৱ গোচৰায অপক্কমিত্ৱা জীৱিতপৰিচ্চাগং কত্ৱা ভগৱন্তং পযিৰুপাসমানো অট্ঠাসি. সত্থা সত্তাহচ্চযেন নিৰোধা ৱুট্ঠিতো সীহং ওলোকেত্ৱা ‘‘ভিক্খুসঙ্ঘেপি চিত্তং পসাদেত্ৱা সঙ্ঘং ৱন্দিস্সতী’’তি ‘‘ভিক্খুসঙ্ঘো আগচ্ছতূ’’তি চিন্তেসি. ভিক্খূ তাৱদেৱ আগমিংসু. সীহোপি ভিক্খুসঙ্ঘে চিত্তং পসাদেতি. সত্থা তস্স মনং ওলোকেত্ৱা ‘‘অনাগতে বুদ্ধো ভৱিস্সতী’’তি ব্যাকাসি. পদুমস্স পন ভগৱতো চম্পকং নাম নগৰং অহোসি, অসমো নাম ৰাজা পিতা, মাতা অসমা নাম দেৱী, সালো চ উপসালো চ দ্ৱে অগ্গসাৱকা, ৱৰুণো নামুপট্ঠাকো, ৰামা চ সুৰামা চ দ্ৱে অগ্গসাৱিকা, সোণৰুক্খো নাম বোধি, অট্ঠপণ্ণাসহত্থুব্বেধং সৰীৰং অহোসি, আযু ৱস্সসতসহস্সন্তি.

‘‘অনোমদস্সিস্স অপৰেন, সম্বুদ্ধো দ্ৱিপদুত্তমো;

পদুমো নাম নামেন, অসমো অপ্পটিপুগ্গলো’’তি. (বু. ৱ. ১০.১);