১০. পাযাসিৰাজঞ্ঞসুত্তৱণ্ণনা

৪০৬. এৱং মে সুতন্তি পাযাসিৰাজঞ্ঞসুত্তং. তত্ৰাযমপুব্বপদৱণ্ণনা – আযস্মাতি পিযৱচনমেতং. কুমাৰকস্সপোতি তস্স নামং. কুমাৰকালে পব্বজিতত্তা পন ভগৱতা ‘‘কস্সপং পক্কোসথ, ইদং ফলং ৱা খাদনীযং ৱা কস্সপস্স দেথা’’তি ৱুত্তে ‘‘কতৰকস্সপস্সা’’তি. ‘‘কুমাৰকস্সপস্সা’’তি এৱং গহিতনামত্তা ততো পট্ঠায ৱুড্ঢকালেপি ‘‘কুমাৰকস্সপো’’ ত্ৱেৱ ৱুচ্চতি. অপিচ ৰঞ্ঞো পোসাৱনিকপুত্তত্তাপি তং কুমাৰকস্সপোতি সঞ্জানিংসু.

অযং পনস্স পুব্বযোগতো পট্ঠায আৱিভাৱকথা – থেৰো কিৰ পদুমুত্তৰস্স ভগৱতো কালে সেট্ঠিপুত্তো অহোসি. অথেকদিৱসং ভগৱন্তং চিত্ৰকথিং একং অত্তনো সাৱকং এতদগ্গে ঠপেন্তং দিস্ৱা ভগৱতো সত্তাহং দানং দত্ৱা ‘‘অহম্পি ভগৱা অনাগতে একস্স বুদ্ধস্স অযং থেৰো ৱিয চিত্ৰকথী সাৱকো ভৱামী’’তি পত্থনং কত্ৱা পুঞ্ঞানি কৰোন্তো কস্সপস্স ভগৱতো সাসনে পব্বজিত্ৱা ৱিসেসং নিব্বত্তেতুং নাসক্খি. তদা কিৰ পৰিনিব্বুতস্স ভগৱতো সাসনে ওসক্কন্তে পঞ্চ ভিক্খূ নিস্সেণিং বন্ধিত্ৱা পব্বতং আৰুয্হ সমণধম্মং অকংসু. সঙ্ঘত্থেৰো ততিযদিৱসে অৰহত্তং পত্তো, অনুথেৰো চতুত্থদিৱসে অনাগামী অহোসি, ইতৰে তযো ৱিসেসং নিব্বত্তেতুং অসক্কোন্তা দেৱলোকে নিব্বত্তা.

তেসং একং বুদ্ধন্তৰং দেৱেসু চ মনুস্সেসু চ সম্পত্তিং অনুভৱন্তানং একো তক্কসিলাযং ৰাজকুলে নিব্বত্তিত্ৱা পক্কুসাতি নাম ৰাজা হুত্ৱা ভগৱন্তং উদ্দিস্স পব্বজিত্ৱা ৰাজগহং উদ্দিস্স আগচ্ছন্তো কুম্ভকাৰসালাযং ভগৱতো ধম্মদেসনং সুত্ৱা অনাগামিফলং পত্তো. একো একস্মিং সমুদ্দপট্টনে কুলঘৰে নিব্বত্তিত্ৱা নাৱং আৰুয্হ ভিন্ননাৱো দাৰুচীৰানি নিৱাসেত্ৱা লাভসম্পত্তিং পত্তো ‘‘অহং অৰহা’’তি চিত্তং উপ্পাদেত্ৱা ‘‘ন ত্ৱং অৰহা, গচ্ছ, সত্থাৰং উপসঙ্কমিত্ৱা পঞ্হং পুচ্ছা’’তি অত্থকামায দেৱতায চোদিতো তথা কত্ৱা অৰহত্তফলং পত্তো.

একো ৰাজগহে একিস্সা কুলদাৰিকায কুচ্ছিম্হি উপ্পন্নো. সা চ পঠমং মাতাপিতৰো যাচিত্ৱা পব্বজ্জং অলভমানা কুলঘৰং গন্ত্ৱা গব্ভং গণ্হি. গব্ভসণ্ঠিতম্পি অজানন্তি সামিকং আৰাধেত্ৱা তেন অনুঞ্ঞাতা ভিক্খুনীসু পব্বজিতা, তস্সা গব্ভনিমিত্তং দিস্ৱা ভিক্খুনিযো দেৱদত্তং পুচ্ছিংসু. সো ‘‘অস্সমণী’’তি আহ. দসবলং পুচ্ছিংসু. সত্থা উপালিত্থেৰং সম্পটিচ্ছাপেসি. থেৰো সাৱত্থিনগৰৱাসীনি কুলানি ৱিসাখঞ্চ উপাসিকং পক্কোসাপেত্ৱা সোধেন্তো ‘‘পুৰে লদ্ধো গব্ভো, পব্বজ্জা অৰোগা’’তি আহ. সত্থা ‘‘সুৱিনিচ্ছিতং অধিকৰণ’’ন্তি থেৰস্স সাধুকাৰমদাসি. সা ভিক্খুনী সুৱণ্ণবিম্বসদিসং পুত্তং ৱিজাযি. তং গহেত্ৱা ৰাজা পসেনদি কোসলো পোসাপেসি. ‘‘কস্সপো’’তি চস্স নামং কত্ৱা অপৰভাগে অলঙ্কৰিত্ৱা সত্থু সন্তিকং নেত্ৱা পব্বাজেসি. ইতি নং ৰঞ্ঞো পোসাৱনিকপুত্তত্তাপি ‘‘কুমাৰকস্সপো’’তি সঞ্জানিংসূতি. তং একদিৱসং অন্ধৱনে সমণধম্মং কৰোন্তং অত্থকামা দেৱতা পঞ্হে উগ্গহাপেত্ৱা ‘‘ইমে পঞ্হে ভগৱন্তং পুচ্ছা’’তি আহ. থেৰো পঞ্হে পুচ্ছিত্ৱা পঞ্হৱিস্সজ্জনাৱসানে অৰহত্তং পাপুণি. ভগৱাপি তং চিত্ৰকথিকানং ভিক্খূনং অগ্গট্ঠানে ঠপেসি.

সেতব্যাতি তস্স নগৰস্স নামং. উত্তৰেন সেতব্যন্তি সেতব্যতো উত্তৰদিসায. ৰাজঞ্ঞোতি অনভিসিত্তকৰাজা. দিট্ঠিগতন্তি দিট্ঠিযেৱ. যথা গূথগতং মুত্তগতন্তি ৱুত্তে ন গূথাদিতো অঞ্ঞং অত্থি, এৱং দিট্ঠিযেৱ দিট্ঠিগতং. ইতিপি নত্থীতি তং তং কাৰণং অপদিসিত্ৱা এৱম্পি নত্থীতি ৱদতি. পুৰা…পে… সঞ্ঞাপেতীতি যাৱ ন সঞ্ঞাপেতি.

চন্দিমসূৰিযউপমাৱণ্ণনা

৪১১. ইমে ভো, কস্সপ, চন্দিমসূৰিযাতি সো কিৰ থেৰেন পুচ্ছিতো চিন্তেসি ‘‘অযং সমণো পঠমং চন্দিমসূৰিযে উপমং আহৰি, চন্দিমসূৰিযসদিসো ভৱিস্সতি পঞ্ঞায, অনভিভৱনীযো অঞ্ঞেন, সচে পনাহং ‘চন্দিমসূৰিযা ইমস্মিং লোকে’তি ভণিস্সামি, ‘কিং নিস্সিতা এতে, কিত্তকপমাণা, কিত্তকং উচ্চা’তিআদীহি পলিৱেঠেস্সতি. অহং খো পনেতং নিব্বেঠেতুং ন সক্খিস্সামি, ‘পৰস্মিং লোকে’ ইচ্চেৱস্স কথেস্সামী’’তি. তস্মা এৱমাহ.

ভগৱা পন ততো পুব্বে ন চিৰস্সেৱ সুধাভোজনীযজাতকং কথেসি. তত্থ ‘‘চন্দে চন্দো দেৱপুত্তো, সূৰিযে সূৰিযো দেৱপুত্তো’’তি আগতং. ভগৱতা চ কথিতং জাতকং ৱা সুত্তন্তং ৱা সকলজম্বুদীপে পত্থটং হোতি, তেন সো ‘‘এত্থ নিৱাসিনো দেৱপুত্তা নত্থী’’তি ন সক্কা ৱত্তুন্তি চিন্তেত্ৱা দেৱা তে ন মনুস্সাতি আহ.

৪১২. অত্থি পন, ৰাজঞ্ঞ, পৰিযাযোতি অত্থি পন কাৰণন্তি পুচ্ছতি. আবাধিকাতি ৱিসভাগৱেদনাসঙ্খাতেন আবাধেন সমন্নাগতা. দুক্খিতাতি দুক্খপ্পত্তা. বাড়্হগিলানাতি অধিমত্তগিলানা. সদ্ধাযিকাতি অহং তুম্হে সদ্দহামি, তুম্হে ময্হং সদ্ধাযিকা সদ্ধাযিতব্বৱচনাতি অত্থো. পচ্চযিকাতি অহং তুম্হে পত্তিযামি, তুম্হে ময্হং পচ্চযিকা পত্তিযাযিতব্বাতি অত্থো.

চোৰাদিউপমাৱণ্ণনা

৪১৩. উদ্দিসিত্ৱাতি তেসং অত্তানঞ্চ পটিসামিতভণ্ডকঞ্চ দস্সেত্ৱা, সম্পটিচ্ছাপেত্ৱাতি অত্থো. ৱিপ্পলপন্তস্সাতি ‘‘পুত্তো মে, ধীতা মে, ধনং মে’’তি ৱিৱিধং পলপন্তস্স. নিৰযপালেসূতি নিৰযে কম্মকাৰণিকসত্তেসু. যে পন ‘‘কম্মমেৱ কম্মকাৰণং কৰোতি, নত্থি নিৰযপালা’’তি ৱদন্তি. তে ‘‘তমেনং, ভিক্খৱে, নিৰযপালা’’তি দেৱদূতসুত্তং পটিবাহন্তি. মনুস্সলোকে ৰাজকুলেসু কাৰণিকমনুস্সা ৱিয হি নিৰযে নিৰযপালা হোন্তি.

৪১৫. ৱেড়ুপেসিকাহীতি ৱেড়ুৱিলীৱেহি. সুনিম্মজ্জথাতি যথা সুট্ঠু নিম্মজ্জিতং হোতি, এৱং নিম্মজ্জথ, অপনেথাতি অত্থো.

অসুচীতি অমনাপো. অসুচিসঙ্খাতোতি অসুচিকোট্ঠাসভূতো অসুচীতি ঞাতো ৱা. দুগ্গন্ধোতি কুণপগন্ধো. জেগুচ্ছোতি জিগুচ্ছিতব্বযুত্তো. পটিকূলোতি দস্সনেনেৱ পটিঘাৱহো. উব্বাধতীতি দিৱসস্স দ্ৱিক্খত্তুং ন্হত্ৱা তিক্খত্তুং ৱত্থানি পৰিৱত্তেত্ৱা অলঙ্কতপটিমণ্ডিতানং চক্কৱত্তিআদীনম্পি মনুস্সানং গন্ধো যোজনসতে ঠিতানং দেৱতানং কণ্ঠে আসত্তকুণপং ৱিয বাধতি.

৪১৬. পুন পাণাতিপাতাদিপঞ্চসীলানি সমাদাযৱত্তেন্তানং ৱসেন ৱদতি. তাৱতিংসানন্তি ইদঞ্চ দূৰে নিব্বত্তা তাৱ মা আগচ্ছন্তু, ইমে কস্মা ন এন্তীতি ৱদতি.

৪১৮. জচ্চন্ধূপমো মঞ্ঞে পটিভাসীতি জচ্চন্ধো ৱিয উপট্ঠাসি. অৰঞ্ঞৱনপত্থানীতি অৰঞ্ঞকঙ্গযুত্ততায অৰঞ্ঞানি, মহাৱনসণ্ডতায ৱনপত্থানি. পন্তানীতি দূৰানি.

৪১৯. কল্যাণধম্মেতি তেনেৱ সীলেন সুন্দৰধম্মে. দুক্খপটিকূলেতি দুক্খং অপত্থেন্তে. সেয্যো ভৱিস্সতীতি পৰলোকে সুগতিসুখং ভৱিস্সতীতি অধিপ্পাযো.

৪২০. উপৱিজঞ্ঞাতি উপগতৱিজাযনকালা, পৰিপক্কগব্ভা ন চিৰস্সেৱ ৱিজাযিস্সতীতি অত্থো. ওপভোগ্গা ভৱিস্সতীতি পাদপৰিচাৰিকা ভৱিস্সতি. অনযব্যসনন্তি মহাদুক্খং. অযোতি সুখং, ন অযো অনযো, দুক্খং. তদেতং সব্বসো সুখং ব্যসতি ৱিক্খিপতীতি ব্যসনং. ইতি অনযোৱ ব্যসনং অনযব্যসনং, মহাদুক্খন্তি অত্থো. অযোনিসোতি অনুপাযেন. অপক্কং ন পৰিপাচেন্তীতি অপৰিণতং অখীণং আযুং অন্তৰাৱ ন উপচ্ছিন্দন্তি. পৰিপাকং আগমেন্তীতি আযুপৰিপাককালং আগমেন্তি. ধম্মসেনাপতিনাপেতং ৱুত্তং –

‘‘নাভিনন্দামি মৰণং, নাভিনন্দামি জীৱিতং;

কালঞ্চ পটিকঙ্খামি, নিব্বিসং ভতকো যথাতি. (থেৰগা. ১০০১)

৪২১. উব্ভিন্দিত্ৱাতি মত্তিকালেপং ভিন্দিত্ৱা.

৪২২. ৰামণেয্যকন্তি ৰমণীযভাৱং. ৱেলাসিকাতি খিড্ডাপৰাধিকা. কোমাৰিকাতি তৰুণদাৰিকা. তুয্হং জীৱন্তি সুপিনদস্সনকালে নিক্খমন্তং ৱা পৱিসন্তং ৱা জীৱং অপি নু পস্সন্তি. ইধ চিত্তাচাৰং ‘‘জীৱ’’ন্তি গহেত্ৱা আহ. সো হি তত্থ জীৱসঞ্ঞীতি.

৪২৩. জিযাযাতি ধনুজিযায, গীৱং ৱেঠেত্ৱাতি অত্থো. পত্থিন্নতৰোতি থদ্ধতৰো. ইমিনা কিং দস্সেতি? তুম্হে জীৱকালে সত্তস্স পঞ্চক্খন্ধাতি ৱদন্তি, চৱনকালে পন ৰূপক্খন্ধমত্তমেৱ অৱসিস্সতি, তযো খন্ধা অপ্পৱত্তা হোন্তি, ৱিঞ্ঞাণক্খন্ধো গচ্ছতি. অৱসিট্ঠেন ৰূপক্খন্ধেন লহুতৰেন ভৱিতব্বং, গৰুকতৰো চ হোতি. তস্মা নত্থি কোচি কুহিং গন্তাতি ইমমত্থং দস্সেতি.

৪২৪. নিব্বুতন্তি ৱূপসন্ততেজং.

৪২৫. অনুপহচ্চাতি অৱিনাসেত্ৱা. আমতো হোতীতি অদ্ধমতো মৰিতুং আৰদ্ধো হোতি. ওধুনাথাতি ওৰতো কৰোথ. সন্ধুনাথাতি পৰতো কৰোথ. নিদ্ধুনাথাতি অপৰাপৰং কৰোথ. তঞ্চাযতনং ন পটিসংৱেদেতীতি তেন চক্খুনা তং ৰূপাযতনং ন ৱিভাৱেতি. এস নযো সব্বত্থ.

৪২৬. সঙ্খধমোতি সঙ্খধমকো. উপলাপেত্ৱাতি ধমিত্ৱা.

৪২৮. অগ্গিকোতি অগ্গিপৰিচাৰকো. আপাদেয্যন্তি নিপ্ফাদেয্যং, আযুং ৱা পাপুণাপেয্যং. পোসেয্যন্তি ভোজনাদীহি ভৰেয্যং. ৱড্ঢেয্যন্তি ৱড্ঢিং গমেয্যং. অৰণীসহিতন্তি অৰণীযুগড়ং.

৪২৯. তিৰোৰাজানোপীতি তিৰোৰট্ঠে অঞ্ঞস্মিম্পি জনপদে ৰাজানো জানন্তি. অব্যত্তোতি অৱিসদো অছেকো. কোপেনপীতি যে মং এৱং ৱক্খন্তি, তেসু উপ্পজ্জনকেন কোপেনপি এতং দিট্ঠিগতং হৰিস্সামি পৰিহৰিস্সামীতি গহেত্ৱা ৱিচৰিস্সামি. মক্খেনাতি তযা ৱুত্তযুত্তকাৰণমক্খলক্খণেন মক্খেনাপি. পলাসেনাতি তযা সদ্ধিং যুগগ্গাহলক্খণেন পলাসেনাপি.

৪৩০. হৰিতকপণ্ণন্তি যং কিঞ্চি হৰিতকং, অন্তমসো অল্লতিণপণ্ণম্পি ন হোতীতি অত্থো. সন্নদ্ধকলাপন্তি সন্নদ্ধধনুকলাপং. আসিত্তোদকানি ৱটুমানীতি পৰিপুণ্ণসলিলা মগ্গা চ কন্দৰা চ. যোগ্গানীতি বলিবদ্দে.

বহুনিক্খন্তৰোতি বহুনিক্খন্তো চিৰনিক্খন্তোতি অত্থো. যথাভতেন ভণ্ডেনাতি যং ৱো তিণকট্ঠোদকভণ্ডকং আৰোপিতং, তেন যথাভতেন যথাৰোপিতেন, যথাগহিতেনাতি অত্থো.

অপ্পসাৰানীতি অপ্পগ্ঘানি. পণিযানীতি ভণ্ডানি.

গূথভাৰিকাদিউপমাৱণ্ণনা

৪৩২. মম চ সূকৰভত্তন্তি মম চ সূকৰানং ইদং ভত্তং. উগ্ঘৰন্তন্তি উপৰি ঘৰন্তং. পগ্ঘৰন্তন্তি হেট্ঠা পৰিস্সৱন্তং. তুম্হে খ্ৱেত্থ ভণেতি তুম্হে খো এত্থ ভণে. অযমেৱ ৱা পাঠো. তথা হি পন মে সূকৰভত্তন্তি তথা হি পন মে অযং গূথো সূকৰানং ভত্তং.

৪৩৪. আগতাগতং কলিং গিলতীতি আগতাগতং পৰাজযগুড়ং গিলতি. পজ্জোহিস্সামীতি পজ্জোহনং কৰিস্সামি, বলিকম্মং কৰিস্সামীতি অত্থো. অক্খেহি দিব্বিস্সামাতি গুড়েহি কীড়িস্সাম. লিত্তং পৰমেন তেজসাতি পৰমতেজেন ৱিসেন লিত্তং.

৪৩৬. গামপট্টন্তি ৱুট্ঠিতগামপদেসো ৱুচ্চতি. ‘‘গামপদ’’ন্তিপি পাঠো, অযমেৱত্থো. সাণভাৰন্তি সাণৱাকভাৰং. সুসন্নদ্ধোতি সুবদ্ধো. ত্ৱং পজানাহীতি ত্ৱং জান. সচে গণ্হিতুকামোসি, গণ্হাহীতি ৱুত্তং হোতি.

খোমন্তি খোমৱাকং. অযন্তি কাড়লোহং. লোহন্তি তম্বলোহং. সজ্ঝন্তি ৰজতং. সুৱণ্ণন্তি সুৱণ্ণমাসকং. অভিনন্দিংসূতি তুস্সিংসু.

৪৩৭. অত্তমনোতি সকমনো তুট্ঠচিত্তো. অভিৰদ্ধোতি অভিপ্পসন্নো. পঞ্হাপটিভানানীতি পঞ্হুপট্ঠানানি. পচ্চনীকং কত্তব্বন্তি পচ্চনীকং পটিৱিৰুদ্ধং ৱিয কত্তব্বং অমঞ্ঞিস্সং, পটিলোমগাহং গহেত্ৱা অট্ঠাসিন্তি অত্থো.

৪৩৮. সঙ্ঘাতং আপজ্জন্তীতি সঙ্ঘাতং ৱিনাসং মৰণং আপজ্জন্তি. ন মহপ্ফলোতি ৱিপাকফলেন ন মহপ্ফলো হোতি. ন মহানিসংসোতি গুণানিসংসেন মহানিসংসো ন হোতি. ন মহাজুতিকোতি আনুভাৱজুতিযা মহাজুতিকো ন হোতি. ন মহাৱিপ্ফাৰোতি ৱিপাকৱিপ্ফাৰতায মহাৱিপ্ফাৰো ন হোতি. বীজনঙ্গলন্তি বীজঞ্চ নঙ্গলঞ্চ. দুক্খেত্তেতি দুট্ঠুখেত্তে নিস্সাৰখেত্তে. দুব্ভূমেতি ৱিসমভূমিভাগে. পতিট্ঠাপেয্যাতি ঠপেয্য. খণ্ডানীতি ছিন্নভিন্নানি. পূতীনীতি নিস্সাৰানি. ৱাতাতপহতানীতি ৱাতেন চ আতপেন চ হতানি পৰিযাদিন্নতেজানি. অসাৰাদানীতি তণ্ডুলসাৰাদানৰহিতানি পলালানি. অসুখসযিতানীতি যানি সুক্খাপেত্ৱা কোট্ঠে আকিৰিত্ৱা ঠপিতানি, তানি সুখসযিতানি নাম. এতানি পন ন তাদিসানি. অনুপ্পৱেচ্ছেয্যাতি অনুপৱেসেয্য, ন সম্মা ৱস্সেয্য, অন্ৱদ্ধমাসং অনুদসাহং অনুপঞ্চাহং ন ৱস্সেয্যাতি অত্থো. অপি নু তানীতি অপি নু এৱং খেত্তবীজৱুট্ঠিদোসে সতি তানি বীজানি অঙ্কুৰমূলপত্তাদীহি উদ্ধং ৱুদ্ধিং হেট্ঠা ৱিৰূড়্হিং সমন্ততো চ ৱেপুল্লং আপজ্জেয্যুন্তি. এৱৰূপো খো ৰাজঞ্ঞ যঞ্ঞোতি এৱৰূপং ৰাজঞ্ঞ দানং পৰূপঘাতেন উপ্পাদিতপচ্চযতোপি দাযকতোপি পৰিগ্গাহকতোপি অৱিসুদ্ধত্তা ন মহপ্ফলং হোতি.

এৱৰূপো খো ৰাজঞ্ঞ যঞ্ঞোতি এৱৰূপং ৰাজঞ্ঞদানং অপৰূপঘাতেন উপ্পন্নপচ্চযতোপি অপৰূপঘাতিতায সীলৱন্তদাযকতোপি সম্মাদিট্ঠিআদিগুণসম্পন্নপটিগ্গাহকতোপি মহপ্ফলং হোতি. সচে পন গুণাতিৰেকং নিৰোধা ৱুট্ঠিতং পটিগ্গাহকং লভতি, চেতনা চ ৱিপুলা হোতি, দিট্ঠেৱ ধম্মে ৱিপাকং দেতীতি.

৪৩৯. ইমং পন থেৰস্স ধম্মকথং সুত্ৱা পাযাসিৰাজঞ্ঞো থেৰং নিমন্তেত্ৱা সত্তাহং থেৰস্স মহাদানং দত্ৱা ততো পট্ঠায মহাজনস্স দানং পট্ঠপেসি. তং সন্ধায অথ খো পাযাসি ৰাজঞ্ঞোতিআদি ৱুত্তং. তত্থ কণাজকন্তি সকুণ্ডকং উত্তণ্ডুলভত্তং. বিলঙ্গদুতিযন্তি কঞ্জিকদুতিযং. ধোৰকানি চ ৱত্থানীতি থূলানি চ ৱত্থানি. গুড়ৱালকানীতি গুড়দসানি, পুঞ্জপুঞ্জৱসেন ঠিতমহন্তদসানীতি অত্থো. এৱং অনুদ্দিসতীতি এৱং উপদিসতি. পাদাপীতি পাদেনপি.

৪৪০. অসক্কচ্চন্তি সদ্ধাৱিৰহিতং অস্সদ্ধদানং. অসহত্থাতি ন সহত্থেন. অচিত্তীকতন্তি চিত্তীকাৰৱিৰহিতং, ন চিত্তীকাৰম্পি পচ্চুপট্ঠাপেত্ৱা ন পণীতচিত্তং কত্ৱা অদাসি. অপৱিদ্ধন্তি ছড্ডিতং ৱিপ্পতিতং. সুঞ্ঞং সেৰীসকন্তি সেৰীসকং নাম একং তুচ্ছং ৰজতৱিমানং উপগতো. তস্স কিৰ দ্ৱাৰে মহাসিৰীসৰুক্খো, তেন তং ‘‘সেৰীসক’’ন্তি ৱুচ্চতি.

৪৪১. আযস্মা গৱংপতীতি থেৰো কিৰ পুব্বে মনুস্সকালে গোপালদাৰকানং জেট্ঠকো হুত্ৱা মহতো সিৰীসস্স মূলং সোধেত্ৱা ৱালিকং ওকিৰিত্ৱা একং পিণ্ডপাতিকত্থেৰং ৰুক্খমূলে নিসীদাপেত্ৱা অত্তনা লদ্ধং আহাৰং দত্ৱা ততো চুতো তস্সানুভাৱেন তস্মিং ৰজতৱিমানে নিব্বত্তি. সিৰীসৰুক্খো ৱিমানদ্ৱাৰে অট্ঠাসি. সো পঞ্ঞাসায ৱস্সেহি ফলতি, ততো পঞ্ঞাস ৱস্সানি গতানীতি দেৱপুত্তো সংৱেগং আপজ্জতি. সো অপৰেন সমযেন অম্হাকং ভগৱতো কালে মনুস্সেসু নিব্বত্তিত্ৱা সত্থু ধম্মকথং সুত্ৱা অৰহত্তং পত্তো. পুব্বাচিণ্ণৱসেন পন দিৱাৱিহাৰত্থায তদেৱ ৱিমানং অভিণ্হং গচ্ছতি, তং কিৰস্স উতুসুখং হোতি. তং সন্ধায ‘‘তেন খো পন সমযেন আযস্মা গৱংপতী’’তিআদি ৱুত্তং.

সো সক্কচ্চং দানং দত্ৱাতি সো পৰস্স সন্তকম্পি দানং সক্কচ্চং দত্ৱা. এৱমাৰোচেসীতি ‘‘সক্কচ্চং দানং দেথা’’তিআদিনা নযেন আৰোচেসি. তঞ্চ পন থেৰস্স আৰোচনং সুত্ৱা মহাজনো সক্কচ্চং দানং দত্ৱা দেৱলোকে নিব্বত্তো. পাযাসিস্স পন ৰাজঞ্ঞস্স পৰিচাৰকা সক্কচ্চং দানং দত্ৱাপি নিকন্তিৱসেন গন্ত্ৱা তস্সেৱ সন্তিকে নিব্বত্তা. তং কিৰ দিসাচাৰিকৱিমানং ৱট্টনিঅটৱিযং অহোসি. পাযাসিদেৱপুত্তো চ একদিৱসং ৱাণিজকানং দস্সেত্ৱা অত্তনো কতকম্মং কথেসীতি.

ইতি সুমঙ্গলৱিলাসিনিযা দীঘনিকাযট্ঠকথাযং

পাযাসিৰাজঞ্ঞসুত্তৱণ্ণনা নিট্ঠিতা.