৬. সেৱনাসুত্তৱণ্ণনা

৬. ছট্ঠে জীৱিতপৰিক্খাৰাতি জীৱিতসম্ভাৰা. সমুদানেতব্বাতি সমাহৰিতব্বা. কসিৰেন সমুদাগচ্ছন্তীতি দুক্খেন উপ্পজ্জন্তি. ৰত্তিভাগং ৱা দিৱসভাগং ৱাতি এত্থ ৰত্তিভাগে ঞত্ৱা ৰত্তিভাগেযেৱ পক্কমিতব্বং, ৰত্তিং চণ্ডৱাড়াদিপৰিপন্থে সতি অৰুণুগ্গমনং আগমেতব্বং. দিৱসভাগে ঞত্ৱা দিৱা পক্কমিতব্বং, দিৱা পৰিপন্থে সতি সূৰিযত্থঙ্গমনং আগমেতব্বং. সঙ্খাপীতি সামঞ্ঞত্থস্স ভাৱনাপাৰিপূৰিআগমনং জানিত্ৱা. সো পুগ্গলোতি পদস্স পন ‘‘নানুবন্ধিতব্বো’’তি ইমিনা সম্বন্ধো. অনাপুচ্ছাতি ইধ পন তং পুগ্গলং অনাপুচ্ছা পক্কমিতব্বন্তি অত্থো. অপি পনুজ্জমানেনাতি অপি নিক্কড্ঢিযমানেন. এৱৰূপো হি পুগ্গলো সচেপি দাৰুকলাপসতং ৱা উদকঘটসতং ৱা ৱালিকাঘটসতং ৱা দণ্ডং আৰোপেতি, মা ইধ ৱসীতি নিক্কড্ঢাপেতি ৱা, তং খমাপেত্ৱাপি যাৱজীৱং সো অনুবন্ধিতব্বোৱ, ন ৱিজহিতব্বো.