(১৬) ৬. অচেলকৱগ্গৱণ্ণনা

১৫৭-১৬৩. ইতো পৰেসু আগাড়্হা পটিপদাতি গাড়্হা কক্খড়া লোভৱসেন থিৰগ্গহণা. নিজ্ঝামাতি অত্তকিলমথানুযোগৱসেন সুট্ঠু ঝামা সন্তত্তা পৰিতত্তা. মজ্ঝিমাতি নেৱ কক্খড়া ন ঝামা মজ্ঝে ভৱা. অচেলকোতি নিচ্চেলো নগ্গো. মুত্তাচাৰোতি ৱিস্সট্ঠাচাৰো, উচ্চাৰকম্মাদীসু লোকিযকুলপুত্তাচাৰেন ৱিৰহিতো ঠিতকোৱ উচ্চাৰং কৰোতি, পস্সাৱং কৰোতি, খাদতি ভুঞ্জতি. হত্থাপলেখনোতি হত্থে পিণ্ডম্হি নিট্ঠিতে জিৱ্হায হত্থং অপলেখতি, উচ্চাৰম্পি কত্ৱা হত্থস্মিংযেৱ দণ্ডকসঞ্ঞী হুত্ৱা হত্থেন অপলেখতি. ভিক্খায গহণত্থং ‘‘এহি, ভদন্তে’’তি ৱুত্তো ন এতীতি ন এহিভদন্তিকো. ‘‘তেন হি তিট্ঠ, ভন্তে’’তি ৱুত্তোপি ন তিট্ঠতীতি ন তিট্ঠভদন্তিকো. তদুভযম্পি কিৰ সো ‘‘এতস্স ৱচনং কতং ভৱিস্সতী’’তি ন কৰোতি. অভিহটন্তি পুৰেতৰং গহেত্ৱা আহটভিক্খং. উদ্দিস্সকতন্তি ইদং তুম্হে উদ্দিস্স কতন্তি এৱমাৰোচিতভিক্খং. নিমন্তনন্তি ‘‘অসুকং নাম কুলং ৱা ৱীথিং ৱা গামং ৱা পৱিসেয্যাথা’’তি এৱং নিমন্তিতভিক্খম্পি ন সাদিযতি ন গণ্হাতি. ন কুম্ভিমুখাতি কুম্ভিতো উদ্ধৰিত্ৱা দীযমানং ভিক্খম্পি ন গণ্হাতি. ন কড়োপিমুখাতি কড়োপীতি উক্খলি ৱা পচ্ছি ৱা, ততোপি ন গণ্হাতি. কস্মা? ‘‘কুম্ভিকড়োপিযো মং নিস্সায কটচ্ছুনা পহাৰং লভন্তী’’তি. ন এড়কমন্তৰন্তি উম্মাৰং অন্তৰং কত্ৱা দীযমানং ন গণ্হাতি. কস্মা? ‘‘অযং মং নিস্সায অন্তৰকৰণং লভতী’’তি. দণ্ডমুসলেসুপি এসেৱ নযো. দ্ৱিন্নন্তি দ্ৱীসু ভুঞ্জমানেসু একস্মিং উট্ঠায দেন্তে ন গণ্হাতি. কস্মা? কবড়ন্তৰাযো হোতীতি.

ন গব্ভিনিযাতিআদীসু পন গব্ভিনিযা কুচ্ছিযং দাৰকো কিলমতি, পাযন্তিযা দাৰকস্স খীৰন্তৰাযো হোতি, পুৰিসন্তৰগতায ৰতিঅন্তৰাযো হোতীতি ন গণ্হাতি. ন সঙ্কিত্তীসূতি সঙ্কিত্তেত্ৱা কতভত্তেসু. দুব্ভিক্খসমযে কিৰ অচেলকসাৱকা অচেলকানং অত্থায ততো ততো তণ্ডুলাদীনি সমাদপেত্ৱা ভত্তং পচন্তি, উক্কট্ঠাচেলকো ততো ন পটিগ্গণ্হাতি. ন যত্থ সাতি যত্থ সুনখো ‘‘পিণ্ডং লভিস্সামী’’তি উপট্ঠিতো হোতি, তত্থ তস্স অদত্ৱা আহটং ন গণ্হাতি. কস্মা? এতস্স পিণ্ডন্তৰাযো হোতীতি. সণ্ডসণ্ডচাৰিনীতি সমূহসমূহচাৰিনী. সচে হি অচেলকং দিস্ৱা ‘‘ইমস্স ভিক্খং দস্সামা’’তি মনুস্সা ভত্তগেহং পৱিসন্তি, তেসু চ পৱিসন্তেসু কড়োপিমুখাদীসু নিলীনা মক্খিকা উপ্পতিত্ৱা সণ্ডসণ্ডা চৰন্তি, ততো আহটং ভিক্খং ন গণ্হাতি. কস্মা? ‘‘মং নিস্সায মক্খিকানং গোচৰন্তৰাযো জাতো’’তি.

থুসোদকন্তি সব্বসস্সসম্ভাৰেহি কতসোৱীৰকং. এত্থ চ সুৰাপানমেৱ সাৱজ্জং, অযং পন সব্বেসু সাৱজ্জসঞ্ঞী. একাগাৰিকোতি যো একস্মিংযেৱ গেহে ভিক্খং লভিত্ৱা নিৱত্ততি. একালোপিকোতি একেনেৱ আলোপেন যাপেতি. দ্ৱাগাৰিকাদীসুপি এসেৱ নযো. একিস্সাপি দত্তিযাতি একায দত্তিযা. দত্তি নাম একা খুদ্দকপাতি হোতি, যত্থ অগ্গভিক্খং পক্খিপিত্ৱা ঠপেন্তি. একাহিকন্তি একদিৱসন্তৰিকং. অদ্ধমাসিকন্তি অদ্ধমাসন্তৰিকং. পৰিযাযভত্তভোজনন্তি ৱাৰভত্তভোজনং, একাহৱাৰেন দ্ৱীহৱাৰেন সত্তাহৱাৰেন অদ্ধমাসৱাৰেনাতি এৱং দিৱসৱাৰেন আভতভত্তভোজনং. সাকভক্খোতিআদীনি ৱুত্তত্থানেৱ.

উব্ভট্ঠকোতি উদ্ধং ঠিতকো. উক্কুটিকপ্পধানমনুযুত্তোতি উক্কুটিকৱীৰিযমনুযুত্তো, গচ্ছন্তোপি উক্কুটিকোৱ হুত্ৱা উপ্পতিত্ৱা উপ্পতিত্ৱা গচ্ছতি. কণ্টকাপস্সযিকোতি অযকণ্টকে ৱা পকতিকণ্টকে ৱা ভূমিযং কোট্টেত্ৱা তত্থ চম্মং অত্থৰিত্ৱা ঠানচঙ্কমাদীনি কৰোতি. সেয্যন্তি সযন্তোপি তত্থেৱ সেয্যং কপ্পেতি. সাযং ততিযমস্সাতি সাযততিযকং. পাতো মজ্ঝন্হিকে সাযন্তি দিৱসস্স তিক্খত্তুং ‘‘পাপং পৱাহেস্সামী’’তি উদকোৰোহনানুযোগং অনুযুত্তো ৱিহৰতি.

কাযে কাযানুপস্সীতিআদীনি হেট্ঠা এককনিপাতৱণ্ণনাযং ৱুত্তনযেনেৱ ৱেদিতব্বানি. অযং ৱুচ্চতি, ভিক্খৱে, মজ্ঝিমা পটিপদাতি, ভিক্খৱে, অযং কামসুখল্লিকানুযোগঞ্চ অত্তকিলমথানুযোগঞ্চাতি দ্ৱে অন্তে অনুপগতা, সস্সতুচ্ছেদন্তেহি ৱা ৱিমুত্তা মজ্ঝিমা পটিপদাতি ৱেদিতব্বা.

অচেলকৱগ্গো ছট্ঠো.