১. কোধপেয্যালং

১৮১. ইতো পৰেসু কুজ্ঝনলক্খণো কোধো. উপনন্ধনলক্খণো উপনাহো. সুকতকৰণমক্খনলক্খণো মক্খো. যুগগ্গাহলক্খণো পলাসো. উসূযনলক্খণা ইস্সা. পঞ্চমচ্ছেৰভাৱো মচ্ছৰিযং. তং সব্বম্পি মচ্ছৰাযনলক্খণং. কতপটিচ্ছাদনলক্খণা মাযা. কেৰাটিকলক্খণং সাঠেয্যং. অলজ্জনাকাৰো অহিৰিকং. উপৱাদতো অভাযনাকাৰো অনোত্তপ্পং. অক্কোধাদযো তেসং পটিপক্খৱসেন ৱেদিতব্বা.

১৮৫. সেক্খস্স ভিক্খুনোতি সত্তৱিধস্সাপি সেক্খস্স উপৰিউপৰিগুণেহি পৰিহানায সংৱত্তন্তি, পুথুজ্জনস্স পন পঠমতৰংযেৱ পৰিহানায সংৱত্তন্তীতি ৱেদিতব্বা. অপৰিহানাযাতি উপৰিউপৰিগুণেহি অপৰিহানত্থায.

১৮৭. যথাভতং নিক্খিত্তোতি যথা আনেত্ৱা নিক্খিত্তো, এৱং নিৰযে পতিট্ঠিতো ৱাতি ৱেদিতব্বো.

১৯০. একচ্চোতি যস্সেতে কোধাদযো অত্থি, সো একচ্চো নাম.

কোধপেয্যালং নিট্ঠিতং.