৫-৬. সঙ্গাৰৱসুত্তাদিৱণ্ণনা

১১৭-১১৮. পঞ্চমে ওৰিমং তীৰন্তি লোকিযং ওৰিমতীৰং. পাৰিমং তীৰন্তি লোকুত্তৰং পাৰিমতীৰং. পাৰগামিনোতি নিব্বানগামিনো. তীৰমেৱানুধাৱতীতি সক্কাযদিট্ঠিতীৰংযেৱ অনুধাৱতি. ধম্মে ধম্মানুৱত্তিনোতি সম্মা অক্খাতে নৱৱিধে লোকুত্তৰধম্মে অনুধম্মৱত্তিনো, তস্স ধম্মস্সানুচ্ছৱিকায সহসীলায পুব্বভাগপটিপত্তিযা পৱত্তমানা. মচ্চুধেয্যং সুদুত্তৰন্তি মচ্চুনো ঠানভূতং তেভূমকৱট্টং সুদুত্তৰং তৰিত্ৱা. পাৰমেস্সন্তীতি নিব্বানং পাপুণিস্সন্তি.

ওকা অনোকমাগম্মাতি ৱট্টতো ৱিৱট্টং আগম্ম. ৱিৱেকে যত্থ দূৰমন্তি যস্মিং কাযচিত্তউপধিৱিৱেকে দুৰভিৰমং, তত্ৰাভিৰতিমিচ্ছেয্য. হিত্ৱা কামেতি দুৱিধেপি কামে পহায. অকিঞ্চনোতি নিপ্পলিবোধো. আদানপটিনিস্সগেতি গহণপটিনিস্সগ্গসঙ্খাতে নিব্বানে. অনুপাদায যে ৰতাতি চতূহি উপাদানেহি কিঞ্চিপি অনুপাদিযিত্ৱা যে অভিৰতা. পৰিনিব্বুতাতি তে অপচ্চযপৰিনিব্বানেন পৰিনিব্বুতা নামাতি ৱেদিতব্বা. ছট্ঠং ভিক্খূনং দেসিতং.